“সরকারনা অৱাং নোংপোক্কী চাউখৎ-থৌরাংগী লম্বেলদা লাকপা অপনবা পুম্নমক্তা রেদ কার্দ পীখি”
“ভারতনা অসিগুম্বা মান্নবা থৌরম অসি পাঙথোক্তুনা ভারত মচা পুম্নমক্না মদুদা শরুক য়ারিবা ঐখোয়গী তীমবু শৌগৎকদবা মতম অদু লাক্কদবা কুইদ্রে”“চাউখৎ-থৌরাং অসি বজেৎ, তেন্দরশিং, উরেপ-উয়ুং তম্বা অমসুং শঙ্গাবশিং খক্তদা লোইদে”“ঐখোয়না ঙসি উবা ফংলিবা অওনবা অসি ঐখোয়গী অপাম্বা, ফিরেপ, মরু ওইবা অমদি ঐখোয়গী ৱার্ক কলচরদা অহোংবা লাকপগী ফলনি”“কেন্দ্র সরকারনা চহি অসিদা ইনফ্রাস্ত্রকচর খক্তদা লুপা করোর লাখ ৭ চাদিং তৌখি অমরোমদা হৌখিবা চহি ৮ অসিদা মসিগী চাদিং অসি লুপা করোর লাখ ২দগী তানা তৌখি”“পি.এম.-দিভাইনগী মখাদা মথংগী চহি ৩-৪গীদমক লুপা করোর ৬,০০০গী বজেৎ খাক্তুনা থমখ্রে”“ত্রাইবেল খুন্নাইগী চৎনবী, লোল অমসুং নাৎ ঙাক্না থমদুনা ত্রাইবেলশিংনা খুন্দাবা মফমশিংদা চাউখৎ থৌরাং পুরকপা হায়বসি সরকার অসিগী অহানবা মীৎয়েংনি”“অৱাং নোংপোক্কীদমক মমাংদা পাল্লম্বা সরকারশিংগী ‘তোখাইনা তাবগী’ থৌশিল পাইখৎলমখি অদুবু ঐখোয়গী সরকারনা ‘দিভাইন’গী অপাম্বশিং পুথোকখি”মেঘালয়াগী রাজ্যপাল ব্রিগেদিয়র বি.দি. মিশ্রাজী, মেঘালয়গী মুখ্য মন্ত্রী সাংমাজী, কেন্দ্র মন্ত্রী মন্দলগী ঐহাক্কী মরুপ শ্রী অমিত ভাই শাহ, সর্বানন্দ সোনোৱাল, কিরেন রিজিজুজী, জি.কে. কিশন রেদ্দীজী, বি.এল. বর্মাজী, মনিপুর, মিজোরম, অসম, অরুনাচল প্রদেশ প্রদেশ, ত্রিপুরা অমসুং সিক্কিমগী মুখ্য মন্ত্রীশিং অমসুং ঐহাক্কী মেঘালয়গী নুংশিরবা ইচিল ইনাওশিং!
খুবলেহ শিবোন! (খাসি অমসুং জয়ন্সিয়াদা নমস্কার) নমেং অমা!(গারোদা নমস্তে)
মেঘালয় অসিদি মহৌশা অমসুং সংস্কৃতী মরাং কায়বা লমদম্নি। মসিগুম্বা মরাং কায়বগী মতৌসি অদোমগী হোস্পিতালিতীদসু উবা ফংই। মেঘালয়গী চাউখৎ-থৌরাংগী শরুক ওইবগী ঐহাক্না ঙসি খুদোংচাবা ফংজরে। মেঘালয়গী ইচিল ইনাও খুদিংবু কন্নেক্তিবিতী, এজুকেসন, স্কিল অমসুং ইমপ্লোয়মেন্তকী প্রোজেক্ত কয়াসিগীদমক্তা থাগৎচরি।
ইচিল ইনাওশিং,
ঙসি অসি ফুতবোল ৱর্ল্দ কপকী ফাইনেল ওইবা অমসুং ঐহাক্না ফুতবোলগী লম্পাক্তগী ফুতবোলবু পামজবা মীওইশিংগী মরক্তা লৈবসিসু তান য়াম্না চান্নবা অমনি। অসোমদনা ফুতবোল মেৎচ শান্নরি অদুগা ঐখোয়গী সিদনা ফুতবোল গ্রাউন্দদা চাউখৎ থৌরাংগী মেৎচ শান্নরি। মেৎচ অসি কতরদা শান্নৈ হায়বা ঐ খঙই, অদুবু থৱাই য়াওবগী মতৌদি স্বাইদসু হনবা নত্তে। ফুতবোল গ্রাউন্দদা লৈরবনিনা ফুতবোল ফিবরসু মাইকৈ মরিমক্তা লৈবা উরে, অদুনা ফুতবোলগী মরোলদা ৱারী শাবদি করি কায়বগে, ফুতবোলগী খুদম পীদুনা ৱারী শাসি। করিগুম্বা শান্নরোই অমনা ফুতবোল মেৎচতা স্পোর্তমেন্সিপ স্পিরিতকী ৱাংমদা শান্নবা মতমদা করি তৌই হায়বা ঐখোয় পুম্নমক্না খঙই। মহাকপু রেক কার্দ পীদুনা শান্নবদগী তান্থোকই। মতৌ অসুম্না, ঐখোয়না অৱাং নোংপোক্কী চাউখৎ থৌরাংদা অয়েৎপা পীরম্বা খুদিংবু ঙসিদগী চহি ৮গী মমাংদা রেদ কার্দ পীখিবনি। শেঞ্জা থুমজা, অচান মীরায় নাইবা, শাগৈ নাতৈবু লুনা খনবা, হিংশা, প্রোজেক্তশিংবু পন্দুনা থম্বা, ইন্সিনবা, ভোত বেঙ্ককী রাজনিতী শান্নববু তান্থোকখিনবগীদমক্তা থম্মোই শেংনা হোৎনদুনা লাক্লি। অদুবু অদোমসু খঙলে, লৈবাক্নসু খঙলে। মদুদি, মসিগুম্বা লাইনা অসিগী মরা য়াম্না লুনা তাখ্রে, মরম অদুনা ঐখোয় পুন্না মসিবু শোইদনা তান্থোক্কদবনি। ঐখোয়না চাউখৎ থৌরাংগী খোঙথাংশিংবু খোঙজেল হেন্না য়াঙহন্নবা অমসুং মায় পাক্নবা হোৎনখিবশিংগী মহৈ উবা ফংলক্লে। মসিদা নত্তনা, কেন্দ্র সরকারনা স্পোর্তকীদমক্তা অনৌবা ৱাখল্লোন অমগা লোয়ননা মাং থানা চঙশিল্লি। মসিনা অৱাং নোংপোক্তা কান্নবা য়াম্না পীখি, লমদমসিগী নহা, নুপা অমসুং নুপীশিংনা কান্নবা ফংখি। লৈবাক্কী অহানবা স্পোর্ত য়ুনিভর্সিতী অৱাং নোংপোক্তা লৈ। ঙসিদি অৱাং নোংপোক্তা মলতিপর্পজ হোল, ফুতবোল গ্রাউন্দ, এথলেতিক্স ত্রেক্কুম্বা মসিগুম্বা প্রোজেক্ত ৯০দা থবক পায়খৎলি। ঐখোয়গী ঙসিগী মিৎয়েংনা কতরদা চত্থরিবা মশান্না, লম্পাক্তা খোঙদারিবা মীরমগী তীমদা লৈরবসু, ঐহাক্না লৈবাক্কী নহাশিংগী পাঙ্গলদা থাজবা থম্লি হায়না ঐহাক্না ঙসি শিলোংদগী য়াম্না থাজনা হায়রি। মরম অদুনা, ভারত্তসু মসিগুম্বা থৌরম পাংথোকপা অমসুং ঐখোয়না তিরঙ্গাগীদমক্তা নুংঙাইবা ফোংদোকপগী মতমদুসু কুইদ্রবনি হায়না ঐহাক্না য়াম্না থাজনা হায়রি।
ইচিল ইনাওশিং,
চাউখৎপা হায়বসি বজেত, তেন্দর, উরেপ উয়ুং তম্বা অমসুং শঙ্গাবগী থৌরম খক্তদা লোইবা নত্তে। মসিদি ইং ২০১৪গী মমাংদসু পাংথোক্তুনা লাক্লি। রিব্বোন কক্নবা হেক্তা য়ৌনরকপনি। নেতাশিংনা লৈ পরেং হুক্তুনা জিন্দাবাদ হায়নসু লাওনরিবনি। অদুদি, ঙসি অহোংবা লাক্লিবসি করিনো? ঙসিগী অহোংবা অসিদি ঐখোয়গী ৱাখলোন্দা লাক্লিবনি। ঐখোয়গী ৱারেপতা লাক্লিবনি, ঐখোয়গী অহানবা মিৎয়েং চঙফমদা লাক্লিবনি, ঐখোয়গী থবক তৌবগী মওংদা লাক্লিবনি, হোৎনবা অমসুং মহৈদসু অহোংবা লাক্লে। ৱারেপ অসিদি মতমগা চুনবা ইনফ্রাস্ত্রকচর, কন্নেক্তিবিতীনা চাউখৎপা ভারত ওইহনবনি। অপাম্বদি ভারতকী লমদম খুদিংবু চাউখৎ থৌরাংগী মিসনগা খোঙজেল লৈনা মরী লৈনহনবনি, সবকা প্রয়াসকী ভারত অমা লৈহনবনি। অহেনবা মিৎয়েং চঙলিবা হীরমদি, অহাঙবা মেনবা, অরাপ্পবু নকশিনবনি, কেপাসিতী বিলদিং তৌবনি, নহাশিংদা খুদোংচাবা হেন্না পীবনি। থবক তৌবগী মতৌদা অহোংবা লাকপা হায়বদি প্রোজেক্তশিংবু অকক্নবা মতমগী মনুংদা লোইশিনবা ঙম্লকপসিনি।
মরুপশিং,
ঐখোয়না কেন্দ্র সরকারগী প্রাইওরিতী হোংদোকখিবা মতমদা মসিগী পোজিতিব ওইবা কান্নবা কয়া লৈবাক পুম্বদা উবা ফংখি। হন্দক্কী চহিসিদা লৈবাক্না লুপা করোর লাখ ৭, শেনফম অসি অৱাং নোংপোক লমদমগী ইচিল ইনাওশিংনা নিংশিংবীয়ুকো। ইনফ্রাস্ত্রকচরগীদমক্তা কেন্দ্র সরকারনা লুপা করোর লাখ ৭ চাদিং তৌরিবনি। অদুগা ৮গী মমাংদা শেনফম অসি লুপা করোর লাখ ২দগী ফাওবা হেন্না তাখিবনি। মসিনা হায়বদি, নিংতম্বা মতুংগী দিকেদ ৭তা ফাওবা মসিগুম্বা শেনফম অসি শুপ্নগী লুপা করোর লাখ ২ ফাওবতং য়ৌই, অদুগা মমাংগী চহি ৮সিদনা শেনফম অসিবু ঐখোয়না শরুক ৪গী চাংদা হেনগৎহনখি। শিল্লোং য়াওনা অৱাং নোংপোক রাজ্যশিংগী কোনুং খুদিংবু রেল লাইন্না শম্নহন্নবা থবক কন্না পায়খৎলি। ইং ২০১৪গী মমাংদা চয়োল অমদা শুপ্নগী ফ্লাইত ৯০০ খক পায়রম্বদু ঙসিদি ঐখোয়না মশিং অসি হেনগৎহন্দুনা ১৯০০ য়ৌহল্লে। অদুগা, উরান য়োজনাগী মখাদা মেঘালয়দসু এয়র সর্ভিসকী রুত ১৬ পায়রি। মসিনা লমদমসিগী মীয়ামদা হোংনা প্লেন তোংবগী খুদোংচাবা ফংহল্লি। অৱাং নোংপোক্কী লৌমীশিংনা অফবা এয়র কন্নেক্তিবিতী লৈবদগী কান্নবা কয়া হেন্না ফংলে। কেন্দ্র সরকারগী কৃষি উরান য়োজনাগী মতেংদগী মফমসিগী উহৈ অমসুং মনা মশিংশিং মীরমগী কৈথেলদা য়ৌবা ঙমহল্লে।
মরুপশিং,
ঙসি মীয়ামদা খুৎশিন্নরিবা অমসুং উরেপ উয়ুং তম্লিবা প্রোজেক্তশিং অসিদগী মেঘালয়গী কন্নেক্তিবিতীগী মপাঙ্গল হেনগৎলগনি। মেঘালয়দা মমাংগী চহি ৮দা নেস্নেল হাইৱে প্রোজেক্ত শাবগীদমক্তা লুপা করোর লিশিং ৫ চাদিং তৌখ্রে। মেঘালয়গী খুঙ্গংশিংদা মমাংগী চহি ৮দা প্রধান মন্ত্রী সরক য়োজনাগী মখাদা শেমখিবা লম্বী মশিংনা চহি ২০গী মমাংদা লৈরম্বা লম্বী মশিংদগী শরুক ৭ হেল্লিবনি।
ইচিল ইনাওশিং,
অৱাং নোংপোক্কী নহাশিংগী মপাঙ্গল হাপ্নবগীদমক্তা দিজিতেল কন্নেক্তিবিতীগী অনৌবা খুদোংচাবা কয়া পীরি। দিজিতেল কন্নেক্তিবিতীনা শুপ্নগী পাউ ফাওনহল্লি হায়বা নত্তে। মসিনা তুরিজমদগী হৌরগা তেক্নোলোজী ফাওবদা, এজুকেসন্দগী হৌরগা হকশেল ফাওবদা, সেক্তর খুদিংদা খুদোংচাবা হেন্না পীরি। মসিদা নত্তনা, দিজতেলগী খুদোংচাবা হেনগৎলক্লিবা অসিসু মসিগী মরমদগীনি। ইং ২০১৪গা চাংদম্নবদা, অৱাং নোংপোক্তা ওপ্তিকেল ফাইবরগী কভরেজ অসি চাউরাক্না শরুক ৪ হেনগৎলে। মসিগীদমক্তসু লুপা করোর লিশিং কয়া চাদিং তৌখ্রবনি। ঙসি, ৪জি. তাৱর কয়া অমা মেঘালয়দা মীয়ামদা খুৎশিন্নরিবসিনা হায়রিবা হোৎনজমনশিংবু হেন্না তেংবাংগনি। মসিগী ইনফ্রাস্ত্রকচর অসিনা নহাশিংদা অহেনবা খুদোংচাবা কয়া পীরগনি। মেঘালয়দা আই.আই.এম. হৌদোকপা, তেক্নোলোজী পার্ক্কী উরেপ উয়ুং তম্বা অসিনা শেল তানবগী খুদোংচাবা কয়াসু পীগনি। ঙসিদি, অৱাং নোংপোক্কী ত্রাইবেল মফমশিংদা এক্লাব্যা মোদেল স্কুল চাম্মগা য়াংখৈ হেন্না শারি, মসিগী মনুংদা মেঘালয়দা ৩৯ য়াওরি। মসিদা নত্তনা, আই.আই.এম. গুম্বা প্রোফেস্নেল এজুকেসন ইন্সতিত্যুতশিংনসু নহাশিংদা প্রোফেস্নেল এজুকেসন তম্বগী খুদোংচাবা পীরগনি।
ইচিল ইনাওশিং,
বি.জে.পি. অমসুং এন.দি.এ. সরকারনা অৱাং নোংপোক্কী চাউখৎ থৌরাংগীদমক্তা থম্মোই শেংনা হোৎনরি। হন্দক্কী চহিমক্তদসু অনৌবা স্কিম ৩ হৌদোক্লে, হায়রিবশিং অৱাং নোংপোক খক্কীনি অমসুং মসিনা লমদমসিদা কান্নবা য়াম্না পীগদৌরিবনি। পর্বতমালা য়োজনাগী মখাদা রোপৱে নেতৱর্ক শেম্লি। মসিনা লমদমসিগী তুরিজমগী মরু ওইবা মফমশিংদা খুদোংচাবা হেন্না পীগনি অমসুং তুরিজম চাউৎখহনবদসু তেংবাংগনি। পি.এম. দিভাইন য়োজনানা অৱাং নোংপোক্কী চাউখৎ থৌরাংগী খোঙজেল হেনগৎহনগনি। মসিগী মতেংদগী চাউখৎ থৌরাংগী অচৌবা প্রোজেক্তশিংগী অয়াবা য়াম্না লায়না পীবা ঙমহনগনি। মসিনা নুপী অমসুং নহাশিংগী নোংমগী পুন্সি মহিং তানবগী খুদোংচাবা হেন্না ফগৎহনগনি। মসিগী মখাদা, লাক্কদৌরিবা মতমশিংগীদমক্তা লুপা করোর লিশিং ৬ খাক্তুনা থমখ্রবনি।
ইচিল ইনাওশিং,
মতম কয়াদগী সরকার পায়দুনা লাকখিবা রাজনিতী দলশিংনা অৱাং নোংপোকপু মচেত তাহনবগীদমক্তা খনদুনা লাকখি, অদুবু ঐখোয়না দিভাইনগী ৱাখল্লোন পুদুনা লাকখি। তোঙানবা খুন্নাই নত্ত্রগা মফম ওইরো, ঐখোয়না তোঙান তাবগী মখল খুদিংগী থৌওংবু লৌথোক্লি। অৱাং নোংপোকপু চয়েৎনবগী ঙমখৈ ওইহনবগী মহুত্তা চাউখৎ থৌরাংগী থোঙ ওইহন্নবা ঐখোয়না অহেনবা মিৎয়েং চঙদুনা থবক তৌরি। মমাংগী চহি ৮দা তোঙানবা লুপ কয়ানা হিংশাগী লম্বী থাদোকখি অমসুং শান্তিগী লম্বীদা চঙলকখি। অৱাং নোংপোক্তা এ.এফ.এস.পি.এ.গী মথৌ তাদনবগীদমক্তা ঐখোয়না রাজ্য সরকারশিংগা তত্তনা ৱারী শারি। মসিদা নত্তনা, দিকেদ কয়াদগী লৈরক্লবা রাজ্যশিংগী ঙমখৈগী মুক্নবা কয়াবুসু ঐখোয়না ৱারোইশিন পুরকখি।
মরুপশিং,
ঐহাক্না মমাং চহিদা ভেতিকন সিতীদা চৎপগী খুদোংচাবা ফংখি, মফমদুদা ঐহাক্না হিস হোলিনেস, দি পোপকা উন্নখি। ঐহাক্না মহাক্কী মফমদা ভারত্তা লাকপীনবা পাউজেল পীখি। মদুগী মীফমদুনা ঐহাক্কী ৱাখলদা অরুবা ৱাখল অমা খলহনখি। ঐখোয়না মীওইবা খুন্নাইগা মরী লৈনবা শিংনবা কয়াগী মতাংদা ৱারী শাখি। অমত্তা ওইবা অমসুং নুংশি চান্নবগী ৱাখল্লোন্না মীপুম খুদিংগী করম্না য়াইফবা পুরক্কনি হায়বগী মতাংদা য়ানবা খরা পুরকখি। মসিগুম্বা ৱাখল্লোন্সিবু ঐখোয়না মপাঙ্গল কনখৎহনগদবনি।
মরুপশিং,
শান্তি অমসুং চাউখৎ থৌরাংগী রাজনিতীনা ঐখোয়গী ত্রাইবেল খুন্নাইদা খ্বাইদগী হেনবা কান্নবা পীরি। ত্রাইবেল খুন্নাইগী চৎনবী, চাকচা-য়ুথক, লোল, সংস্কৃতীবু ঙাক শেন্দুনা থমদুনা মখোয়গী লমদমগী চাউখৎ থৌরাংদা ঐখোয়না অহেনবা মিৎয়েং চঙখি। মরম অদুনা, ৱা য়ানবগী মতাংদা থম্লম্বা অথিংবা খুদিং ঐখোয়না লৌথোকখি। উমংদগী ফংবা পোত্থোকশিংদা ভেল্যু এদিসন তৌনবগীদমক্তা অৱাং নোংপোক রাজ্য ৮মক্তা বন ধন কেন্দ্র হৌদোকখ্রে। ঐখোয়গী ইমা, ইচেল ইচল কয়ানা শরুক য়ারিবা সেল্ফ হেল্প গ্রুপ কয়াগা মসিগা মরী লৈনরি, থবক তৌমিন্নরি। মসিদা নত্তনা, য়ুম, ঈশিং, মৈ, গ্যাসকুম্বা সোসিএল ইনফ্রাস্ত্রকচরশিংনা অৱাং নোংপোক্তা য়াম্না চাউখৎলে। মমাংগী চহিশিংদা, মেঘালয়গী য়ুম লাখ ২দা অহানবা ওইনা মৈ ফংখি। লাইরবশিংগী য়ুম লিশিং ৭০মুক্কী অয়াবা পীখ্রে। চাউরাকপা ইমুং লাখ ৩দা অহানবা ওইনা তোতি ঈশিং য়ৌহনখি। মসিগুম্বা খুদোংচাবশিং অসিগী খ্বাইদগী হেনবা কান্নবদি ঐখোয়গী ত্রাইবেল ইচিল ইনাওশিংনা ফংলি।
মরুপশিং,
অৱাং নোংপোক্কী চাউখৎ থৌরাংগী ইচেলনা মতৌ অসুম্না য়াঙনা চেন্দুনা লৈবা, মসিগীদমক্তা অদোম্না ঐখোয়বু থৌজানবীবনা ঐখোয়গী শক্তি হাপ্লি। ঙসিদগী নুমিৎ খরনিগী মতুংদা খৃস্তমাস লাক্লগনি, মসিগীদমক্তা ঐহাক্না অৱাং নোংপোক্কী ইচিল ইনাও খুদিংদা য়াইফ পাউজেল পীজরি। অদোম্বু অমুক্কা হন্না থাগৎচরি। খুবলেহ শিবোন! (খাসি অমসুং জয়ন্সিয়াদা নমস্কার) নমেং অমা!(গারোদা নমস্তে)
