থৌরমসিদা শরুক য়ারিবা মনিপুরগী গভর্নর লা গনেসন জী, মুখ্য মন্ত্রী শ্রী এন. বিরেন সিংহ জী, উপ মুখ্যমন্ত্রী ৱাই. জয়কুমার সিংহ জী, কেন্দ্রগী মন্ত্রী মন্দলদগী ঐবু খোঙবু ভুপেন্দ্র য়াদব জী, রাজকুমার রঞ্জন সিংহ জী, মনিপুর লৈঙাক্কী মন্ত্রী বিস্বজিত সিংহ জী, লোসি দিখো জী, লেতপাউ হাউকিপ জী, অৱাংবৌ নিউমাই জী, এস রাজেন সিংহ জী, ভুংজাগিন বালতে জী, সত্যব্রত সিংহ জী, ও. লুখোই সিংহ জী, পার্লিয়ামেন্তকী ঐগী খোঙবু পুম্নমক, এম.এল.এ. পুম্নমক, অতৈ মীয়ামগী মীহুৎশিং, অমদি মনিপুরগী ঐগী নুংশিরবা ইচিল ইনাউ পুম্বক! খুরুমজরি।
ঐনা মনিপুরগী শেংলবা মফমসিবু, মফমসিগী মীয়ামবু, অমদি মফমসিগী চাউথোকচনিংঙাই ওইরবা নাৎ-চৎনবীবু ইকোক নোন্না খুরুমজরি। চহি হৌরকপদা মনিপুরগী লাক্তুনা, ময়ামগা উনজবা, ময়ামগী মফমদগী য়াম্লবা মিনুংশি ফংজবা, থৌজাল ফংজবা, পুন্সিদা মসিদগী হেন্না নুংঙাইবা করিবু লৈরমগনি। ঙসি ঐনা এয়রপোর্ত্তা থুংলবা মতুংদা এয়রপোর্ত্তগী মফম অসি ফাওবা লাকপদা চাউরাক্না কিলোমিতর ৮-১০গী লমবীদা মনিপুরগী মীয়াম্না মচু মমেন থন্না ইচঙ থৌনা, মীওইবগী ফক্লাং অমগুম, কিলোমিতর ৮-১০ শাংবা মীওইবগী ফক্লাংগুম লেপ্পিরমবা, অসিগুম্লবা মিনুংসি, অদোমগী থৌজাল কৈদৌঙৈদসু কাউবা ঙম্লরোই। ময়াম পুম্নমকপু কুমজা ২০২২গী য়াম্লবা য়াইফ পাউজেল পীজরি।
মরূপশিং,
ঙসিদগী নুমিৎ খরনিগী মতুং, জনুৱারী ২১ হায়বা নুমিৎসিদা মনিপুরনা মপুং ফাবা স্তেতকী মফম ফংখিবা, চহি ৫০ মপুং ফারে। লৈবাকসিনা হৌজিক নীংতম্বগী ৭৫শুবা চহিসিদা অমৃত মহোতসব পাঙথোক্লি। মতম অসিমকসু পুক্নিং থৌগৎনিংঙাইগী মতম্নি। মনিপুর অসি নিংথৌ ভাগ্য চন্দ্র অমসুং পু খেতিন্থাং সিত্লৌনচিংবা অথৌবা কয়াগী পোক্নফম্নি। লৈবাক মীয়ামদা পীখিবা নীংতমবগী থাজবা অদু, মফমসিগী মোইরাংগী লৈমায়দগী পোকখিবনি হায়বসিমকসু চাউথোকচনিংঙাই ওইবা ৱাফম অমনি। নেতাজী সুভাস চন্দ্রগী লান্মীনা অহানবা ওইনা ফিরাল পাইহনখিবা, নেতাজীনা ভারতকী নীংতম্বগী হোজঙ ওইনা লৌখিবা অৱাং নোংপোক ঙসিদি অনৌবা ভারতকী মঙলান মঙফাওনহন্নবা থোঙজিন ওইররে।
ঐনা মমাঙদসু হায়খ্রে মদুদি লৈবাকসিগী নোংপোকথংবা শরুক, অৱাং নোংপোক অসি, ভারতকী চাউখৎপগী মরুওইবা মফম ওইগনি হায়না। ঙসি কমদৌনা মনিপুর অমসুং অৱাং নোংপোক্না ভারতকী তুংগী পুন্সিদা অনৌবা মচু হাপ্লি হায়বা ঐখোয়না উরি।
মরূপশিং,
ঙসি মফমসিদা পুন্না য়াম্লবা প্রোজেক্তশিংগী উরেপ উয়ুং তম্লি অমদি শঙ্গাদুনা মীয়ামদা খুৎশিন্নরি। মসি চাউখৎপগী তোঙান তোঙানবা হী-য়াইশিংনি, মসিনা পরেং লেংদুনা মনিপুরগী মীয়ামগী পুন্সিদা নুংঙাইবা পুরক্তুনা সনা লৈবাক মনিপুরগী মিংচৎ হেনগৎহনগদৌরিবনি। ইম্ফালগী ইন্তিগ্রেতেদ কম্মান্দ অমসুং কন্ত্রোল সেন্তরনা ময়োল্লম অসিগী ঙাকশেলগী ফীভমসু ফগৎহনগনি অমদি খুদোংচাবসু হেনগৎহল্লগনি। বরাক তুরেলগী থোং অসিনা মনিপুরগী লাইফলাইনবু অনৌবা কুম্বী কালেন নাইদবা লম্বী অমা ফংহল্লি। থৌবাল মল্তিপরপজ প্রোজেক্তকা লোয়ন-লোয়ননা তমেংলোংগী ৱাতর সপ্লাই স্কিম অসিনা অরাপ্পা দিস্ত্রিক্তা লৈবা মীয়াম পুম্বদা অফবা অমদি অরুবা ঈশিংগী থৌরাং তৌরি।
মরূপশিং,
নীংশিংবিয়ু, চহি খরগী মমাঙদা মনিপুরদা তোতিগী ঈশিংগী খুদোংচাবা কয়া য়াম্না ৱাৎলম্মি। শুপ্নতগী মীশিং চাদা ৬কী য়ুমদা তোতিগী ঈশিং য়ৌরম্মি। অদুবু ঙসিদি ‘জল-জীবন মিসন’গী মখাদা মনিপুরগী য়ুমথোঙ খুদিংদা য়ৌহন্নবগীদমক বিরেন সিংহ জীগী লৈঙাক্না অহিং নুংথিল নাইদনা হোৎনরি। ঙসিদি মনিপুরগী য়ুমথোঙ চাদা ৬০দা তোতিগী ঈশিং য়ৌরে। অথুবা মতমদা চাদা ১০০গী চাং কোনশিন্দুনা ‘য়ুমথোঙ খুদিং ঈশিং’গী পান্দম ফংবা ঙম্লগনি। মসি দবল ইঞ্জিন লৈঙাক্কী কান্নবনি, দবল ইঞ্জিন লৈঙাক্কী পাঙ্গলনি।
মরূপশিং,
ঙসি চাউখৎ থৌরাংগী থবকশিং উরেপ উয়ুং তম্লিবা অমদি মীয়ামদা খুৎশিন্নরিবা অসিগা লোয়ননা ঐনা মনিপুরগী মীয়ামবু অমুক্কা হন্না থাগৎপা ফোঙদোকচরি। অদোম্না মনিপুরদা মরা চেৎপা লৈঙাক শেমদুনা মপুং ফাবা মেজোরিতীগা লোয়ননা ঈচঙ থৌনা থবক পায়খৎলি। মসি অদোমগী ভোতনা ওইহল্লক্লিবনি। অদোমগী ভোত অমগী পাঙ্গলনা মনিপুরদা মমাঙদা ওইথোক্কনি হায়না খন্নরুদবা থবক কয়া পায়খৎপা ঙমহল্লিবনি। অদোমগী ভোতকী পাঙ্গলননি মনিপুরগী লৌমী লাখ ৬না পি.এম. কিসান সম্মান নিধিগী মখাদা লুপা করোর চা কয়া ফংলিবসি। হৌজিক ঐহাক্না অসিগুম্লবা কান্নবা ফংলবা লৌমী খরগা ৱারী ৱাতায় শাননবগী তাঞ্জা ফংই, মখোয়গী পুক্নিংগী থৌনা য়েংবদা অপেনবা পোকই। মসি পুম্নমকসি অদোমগী ভোত অমগী পাঙ্গলননি মনিপুরগী লায়রবা ইমুং লাখ ৬না পি.এম. গরিব কল্য়ান য়োজনাগী মখাদা লেম্না চেঙ ফংবা ঙম্লিবসি।
প্রধানমন্ত্রী অৱাস য়োজনাগী মখাদা চাউরাক্না য়ুম লিশিং ৮০রোমগী অয়াবা পীখ্রে, মসিসু অদোমগী ভোত অমগী পাঙ্গলননি। মফমসিগী মীওই লাখ ৪ লিশিং ২৫ হেনবনা অয়ুস্মান ভারতকী মখাদা লায়েংশঙদা লেম্না লায়েংবা ফংলিবা অসিসু অদোমগী ভোত অমনা ওইথোকপা ঙমহল্লিবনি। অদোমগী ভোত অমনা য়ুমথোঙ লাখ অমা মখায়দা লেম্না গ্যাস কন্নেক্সন ফংহল্লিবনি, অদোমগী ভোত অমনা য়ুমথোঙ লাখ ১ লিশিং ৩০দা লেম্না মৈ ফংহল্লিবনি।
অদোমগী ভোত অমনা স্বচ্ছ ভারত অভিয়ানগী মখাদা য়ুম লিশিং ৩০ হেনবদা খোঙহাম খুৎহাম্ফম শাবা ঙমখিবনি। মফমসিদা কোরোনাগী লান্থেংদা ভেক্সিন দোজ লাখ ৩০ হেনববু লেম্না ফংহনখিবা অসিসু অদোমগী ভোত অমগী পাঙ্গলননি। ঙসি মনিপুরগী দিস্ত্রিক্ত খুদিংদা ওক্সিজেন প্লান্তশিং শেমগৎলি। মসি পুম্নমকসি অদোমগী ভোত অমনা পাঙথোকপা ঙমহল্লিবনি।
ঐনা মনিপুরগী মীয়াম পুম্নমকপু মশিং য়াম্লবা কান্নরবা খুদোংচাবশিং অসি ফংলিবসিগীদমক পুকচেল শেংনা নুংঙাইবা ফোঙদোকচরি। ঐনা মুখ্যমন্ত্রী বিরেন সিংহ জী অমসুং মহাক্কী লৈঙাকপু মনিপুর চাউখৎনবগীদমক ইচঙ থৌনা হোৎনরিবসিগীদমক থাগৎপা ফোঙদোকচরি।
মরূপশিং,
মনিপুরবু মমাঙগী লৈঙাকশিংনা হন্না য়েংদনা থমবিরমবা মতম অমা লৈরম্মি। দিল্লীদা লৈবশিং অদুনা কনানা অয়ুক লাপ্পা মফমসিদা চত্তুনা ৱারুগদৌরিবনো হায়না খল্লম্মি। ঐখোয় ঐখোয়গী মীশিংদা অসুম্না লৎনবিরবদি মরী লাপথোক্নরকপা মশানা তাবনি। ঐনা প্রধানমন্ত্রী ওইদ্রিঙৈগী মমাঙদা মনিপুরদা কয়ারক হন্না লাকখি। অদোমগী পুক্নিংদা করমবা পেন্দবা ৱাফম লৈবগে হায়বা ঐ খঙখি। মরম অসিনা ২০১৪গী মতুংদা দিল্লীবু, ভারত লৈঙাকপু অদোমগী থোঙজিন্দা পুরকখিবনি। লুচিংবা ওইরবসু, মন্ত্রী ওইরবসু, ওফিসর ওইরবসু, ঐনা পুম্নমক্তা লৈমায়দা কমথদুনা মতম শাংনা লেন্দুনা মফমসিগী মথৌ তাবগী মতুং ইন্না খুজিন থৌরাং য়াৎনবা ৱাফম থমখি। অদোমগী মফমদা করিগুম্বা খরা পীরুনবগী ৱাখল্লোন্দা তৌখিবা নত্তে। অদোমগী থৌগল্লোয় ওইনা চত্তুনা অদোমগীদমক, মনিপুরগীদমক, অৱাং নোংপোক্কীদমক পুক্নিং লুপ্তুনা মপুং ফানা থৌগল তৌনবা ৱাখল্লোন্দা তৌখিবনি। ঙসিদি কেন্দ্রগী মন্ত্রী মন্দলদা অৱাং নোংপোক্কী মরুওইবা মীওই মঙানা লৈবাক্কী মরুওইবা মন্ত্রালয়শিং পানরিবা অসি অদোম্না উরে।
মরূপশিং,
ঙসি ঐখোয়গী লৈঙাক্কী চহি তরেৎকী হোৎনজমল অৱাং নোংপোক পুম্বদা উরি, মনিপুরদা উরি। ঙসিদি মনিপুর অওনবগী, অনৌবা শিনপাংবগী চৎনবী অমগী ফিদম্নফম ওইরক্লি। অওনবা অসি মনিপুরগী নাৎকীদমক্তনি, চেকশিন থৌরাংগীদমক্তনি, মসিদা লম্বী থোংদা মরুওইবা মীৎয়েং থম্লি অমদি ক্রিএতিভিতীদসু চপ মান্নবা মীৎয়েং থম্লি। লম্বীগী ইনফ্রাস্ত্রকচরগা মরী লৈনবা প্রোজেক্তশিং, হেন্না ফবা মোবাইল নেতৱর্ক্না মনিপুরগী কন্নেক্তিভিতীগী ফীভম ফগৎহনগনি। ‘সি-ত্রিপল আই.তি.’না মফমসিগী নহাশিংগী ক্রিএতিভিতী অমসুং ইনোভেসনগী ইহুলবু হেন্না মপাঙ্গল কনখৎহল্লগনি। মতমগা চুনরবা কেন্সর হোস্পিতাল অসিনা অরুবা লায়নাদগী ঙাকথোক্নবা মনিপুরগী মীয়ামগী চেকশিন থৌরাংদা মতেং ওইরগনি। মনিপুর ইন্সতিত্যুৎ ওফ পর্ফোর্মিং আর্তস লিংখৎপা অমসুং গোবিন্দজী মন্দির নৌনা শেমজিনবনা মনিপুরগী নাৎপু হেন্না মশক থোকহল্লগনি।
মরূপশিং,
অৱাং নোংপোক্কী মফম অসিদা রানী গাইদিনলিয়ুনা মীরম মচাশিংদা ভারতকী নুপীগী থৌনা খঙহনখি, অংগ্রেজশিংগী মায়োক্তা লান্থেংনখি। রানী গাইদিনলুয়ু ম্যুজিয়ম্না ঐখোয়গী নহাশিংদা হৌখিবা পুৱারীগা শম্নহনগনি অমদি পুক্নিংসু থৌগৎকনি। মতম খরগী মমাঙদা, ঐখোয়গী লৈঙাক্না অন্দমান নিকোবর ঈথতৎকী মাউন্ত হেরিয়ত – অন্দমান নিকোবর ঈথত্তা মাউন্ত হেরিয়ত হায়না খঙনবা ঈথৎ মচা অমা লৈ। নীংতম্লবা চহী ৭৫গী মতুংদসু মীয়াম্না মদুবু মাউন্ত হেরিয়ত হায়না অদুম কৌনরম্মি, অদুবু ঐখোয়না মাউন্ত হেরিয়তকী মমীং হোংদোক্তুনা মাউন্ত মনিপুর হায়না মিংথোন্নবা ফিরেপ লৌখি। হৌজিক্তি মালেমগী লমকোয়বা খুদিংমক্না অন্দমান নিকোবরদা চৎপা মতমদা মাউন্ত মনিপুর হায়রিবসি করিনো, মসিগী পুৱারী করিনো হায়না খঙননবা হোৎনরগনি।
অৱাং নোংপোক্কীদমক মমাঙগী লৈঙাকশিংগী থৌশিল অমা লৈরম্মি, হায়রিবা থৌসিল অদুদি, দোন্ত লুক ইস্ত হায়বসিনি। অৱাং নোংপোক্কী মায়কৈদা দিল্লীনা হেক হেক য়েংলকপসি মীখল মতমখক্তদনি। অদুবু ঐখোয়না অৱাং নোংপোক্কীদমক ‘এক্ত ইস্ত’ পোলিসীগী থৌরাং য়াৎখি। তাইবং মপুনা মফম অসিদা মহৌশাগী লন কয়া পীবিরম্মি, মতিং কয়া হাপ্পিরম্মি। মফমসিদা চাউখৎপগী, তুরিজমগী মতিং য়াম্না লৈ। অৱাং নোংপোক্কী হায়রিবা মতিংশিং অসিদা হৌজিক্তি থবক পায়খৎলি। অৱাং নোংপোকপু হৌজিক্তি ভারতকী চাউখৎপগী হোজঙ ওইহল্লক্লি।
হৌজিক্তি অৱাং নোংপোক্তা এয়রপোর্তশিংসু শাগৎলি, অমদি রেলসু য়ৌশিল্লক্লি। জিরিবাম-তুপুল-ইম্ফাল রেললাইনগী খুত্থাঙদা মনিপুরসু হৌজিক্তি লৈবাক্কী রেল নেতৱর্ক্কা শম্নরগনি। ইম্ফাল-মোরে হায়ৱে হায়বদি এসিয়ন হায়ৱে ৱনগী থবকসু খোঙজেল য়াঙনা পায়খৎলি। হায়ৱে অসিনা খা-নোংপোক এসিয়াগা ভারতকগী কন্নেক্তিভিতী হেন্না ফগৎহল্লগনি। মমাঙদা এক্সপোর্তকী ৱাফম খন্নবদা লৈবাক্কী অকক্নবা ময়োল্লম খরখক্কী মমীং পন্নরম্মি। অদুবু হৌজিক্তি ইন্তিগ্রেতেদ কার্গো তর্মিনেলগী খুত্থাঙদা মনিপুরসু লল্লোন ইতিক অমসুং এক্সপোর্তকী অচৌবা মফম অমা ওইরক্তুনা আত্মনিরভর ভারত্তা খোঙজেল হাপ্লগনি। অদুগা ঙরাং লৈবাক মীয়াম্না পাউ অমা তাখি, নীংতম্লবা মতুংদা লৈবাকসিনা অহানবা ওইনা দোলর বিলিয়ন ৩০০গী এক্সপোর্ত তৌদুনা অনৌবা পন্দোল অমা ফংখি। অপীক অপীকপা স্তেতশিংসু হীরমসিদা খুমাঙ চাওশিল্লক্লি।
মরূপশিং,
মমাঙদা মীয়াম্না অৱাং নোংপোক্তা চৎপা পাম্নরবসু মফমসিদা কমদৌনা য়ৌরক্কনি হায়বসি খল্লগা নীংহন্ননা লৈনরমখি। মসিনা মফমসিগী তুরিজম সেক্তরদা য়াম্না মাঙজবা ওইরম্মি। অদুবু হৌজিক্তি অৱাং নোংপোক্কী ময়োল্লমখক্তা নত্তনা খুঙ্গঙশিংদসু ইরায় লায়না য়ৌশিনবা ঙম্লে। ঙসি মফমসিদা নেসনেল হায়ৱেজকী মশিং য়াম্লবা থবক পায়খৎলি, খুঙ্গঙশিংদসু প্রধানমন্ত্রী গ্রাম সরক য়োজনাগী মখাদা কিলোমিতর চা কয়াগী অনৌবা লম্বীশিং শেম্লি। অকক্নবা মফম খরদা ফংবা খুদোংচাবা ওইনা খন্নরমবা নেচরেল গ্যাস পাইপলাইনগুম্বশিং হৌজিক্তি অৱাং নোংপোক্তা য়ৌরক্লে। অসুম্না হেনগৎলক্লিবা কন্নেক্তিভিতী অসিনা মফমসিগী তুরিজম চাউখৎহনগনি, মফমসিগী নহাশিংবু থবক পীনবগী অনৌবা তাঞ্জাশিং শেমগৎপা ঙম্লগনি।
মরূপশিং,
মনিপুর লৈবাক্কীদমক খ্বাইদগী তাঙবা লন পীরিবা স্তেত অমনি। মফমসিগী নহাশিং, অমদি মরুওইনা মনিপুরগী ইচানুপীশিংনা মালেম পুমবদা ভারতকী ফিরাল পাইহল্লি, চাউথোকপগা লোয়ননা লৈবাক্কী মিংচৎ পুরক্লি। মরুওইনা ঙসি লৈবাক্কী নহাশিংনা, মনিপুরগী শান্নরোয়শিংদগী ফিদম লৌনরি। কম্মনৱেল্থ গেম্সতগী হৌরগা ওলিম্পিক্স ফাওবদা, আর্চরী অমদি বোক্সিংদগী হৌরগা ৱেতলিফ্তিং ফাওবদা মনিপুরনা এম.সি. মেরী কোম, মিরাবাই চনু, বোম্বেলা দেবী, লাইস্রম সরিতা দেবীনচিংবা মমীং লৈর-লৈরবা চেম্পিয়ন কয়া কয়া পুথোক্লি। অদোমগী মফমদা, লমজিং নীংথিনা পীবিরবা অমদি মরুওইবা ঙাক্লৌ পীবিরবদি অসিগুম্লবা পুকচেল শেংলবা মিংচৎ পুরক্কদবা মীওই কয়া লৈরি। মফমসিগী ঐখোয়গী নহাশিংদা, ঐখোয়গী ইচানুপীশিংদা মতিং কয়া ফুদোংদুনা লৈরি। মরম অসিনা ঐখোয়না মনিপুরদা মতমগা চুনবা স্পোর্তস য়ুনিভর্সিতী লিংখৎলিবনি। য়ুনিভর্সিতী অসিনা নহাশিংদা মখোয়গী মঙলান মঙফাওনহনবতা নত্তনা শান্ন-খোৎনবগী লমদা ভারতকীদমকসু অনৌবা মিংচৎ পুরক্কদৌরিবনি। মসি ঐখোয়গী নহাশিংগী, ইচানুপীশিংগী মখাদা লৈগদবা লৈবাকসিগী অনৌবা ইহুলনি, অনৌবা থৌনানি।
মরূপশিং,
কেন্দ্র লৈঙাক্না ওইল পামগীদমক লৈবাক্কী ওইবা মিসন অমা হৌদোক্লিবসিনা অৱাং নোংপোক লমদমদা চাউনা কান্নবা পীগনি। ঙসি ভারতনা মশাগী মথৌ তাবশিং ফংনবগীদমক মপান লৈবাক্তগী য়াম্লবা পামগী থাউ পুশিল্লক্লি। মসিদা লুপা করোর লিশিং কয়া চাদিং তৌরি। হায়রিবা শেনফম অসি ভারতকী লৌমীশিংনা ফংজনবা, ভারতপু পাম থাউগী মরমদা মরোমদোম লেপচবা ঙমহন্নবা মায়কৈদা থৌরাং পায়খৎলি। লুপা করোর লিশিং ১১গী ওইল পাম মিসন অসিনা লৌমীশিংগী শেন্থোক হেনগৎহনবদা চাউনা মতেং ওইগনি। অদুগা হায়রিবসিগী অয়ামবা শরুক্তি অৱাং নোংপোক্না ফংগদৌরিবনি। মনিপুরদসু হীরমসিদা খুমাঙ চাউশিন্না থবক পায়খৎলি। ওইল পাম থানবগীদমক, অনৌবা মিল লিংখৎনবগীদমক লৈঙাক্না শেলগী তেংবাঙসু পীরি।
মরূপশিং,
ঙসি মনিপুরগী কান্নবা ফংলিবা মীওইশিংগীদমক চাউথোকচবা পোকপগা লোয়ননা হৌজিক ঐখোয় শাংলবা লম্বী অমা মাঙদা চঙশিনগদবা লৈরি হায়বসিসু নীংশিংবা তাই। ঐখোয়না খোঙচৎ অসি কদায়দগী হৌরকখিবগে হায়বদুসু নীংশিংবা তাই। ঐখোয়গী মনিপুরবু কমদৌনা মমাঙগী লৈঙাকশিংনা ব্লোকেদ স্তেত ওইহন্দুনা লৈরমবা, লৈঙাক্না চীং অমসুং তমবু রাজনিতিগী খুদোংচাবা লৌনবগীদমক তোখায়হল্লমবা হায়বসিসু কাউরোইদবনি। মীয়ামগী মরক্তা মরী লাপথোকহন্নবা করম করমবা থৌশিল য়াৎলমবগে হায়বসিসু ঐখোয় নীংশিংগদবনি।
মরূপশিং,
ঙসি দবল ইঞ্জিন লৈঙাক্না লেপ্তনা হোৎনবনা মরম ওইরগা লমদম অসিদা লালহৌবগী অমদি তংদু লৈতাদবগী মৈরি লৈত্রে, মদুগী মহুত্তা ইং-চীকপা অমদি চাউখৎপগী মঙাল ফংলে। অৱাং নোংপোক পুমবদা নহা চা কয়ানা খুৎলায় থাদোক্তুনা চাউখৎপগী খোঙজেলদা শরুক য়ারক্লি। চহি কয়া ঙাইদুনা লৈরক্লবা ৱারোইশিন অদুসু ঐখোয়গী লৈঙাক্না পুৱারী ওইবা মওংদা ৱারোইশিন পুরক্তুনা উৎলে। মনিপুর ব্লোকেদ স্তেত ওইরমবদগী মালেমগী লল্লোন ইতিক্কী লম্বী শেম্লিবা স্তেত ওইরে। ঐখোয়গী লৈঙাক্না চীং অমসুং তমগী মরক্তা লাপ্নরমবা অদু মেনশিন্নবগীদমক ‘গো তু ভিলেজ’নচিংবা থৌরাংশিং পায়খৎলি।
অসিগুম্বা থৌরাংশিংগী অসিগী মরক্তা কনাগুম্বা মীওই খরনা লৈঙাক চুপ্লি পায়নবগীদমক মনিপুরবু অমুক্কা হন্না তংদু লৈতাদবা ফীভমদা পুরক্নবা হোৎনরি হায়বসি ঐখোয় নীংশিংগদবনি। হায়রিবা মীওইশিং অসিনা করমবা মতমদা মখোয়না খুদোংচাবা অসি ফংগদগে অমদি করমবা মতমদা মখোয়না তংদু লৈতাদবগী মশান্ন অসি শান্নগদগে হায়না লুমদুনা লৈরিবনি। মনিপুরগী মীয়াম্না মখোয়বু মশক খঙলকপসিদা ঐনা নুংঙাইবা ফাওই। হৌজিক্তি মনিপুরগী মীয়াম্না মফমসিগী চাউখৎ খোঙজেল লেপহল্লরোই, মনিপুরবু অমুক্কা হন্না অমম্বা মরক্তা পুশিল্লরোই।
মরূপশিং,
ঙসি লৈবাকসিনা ‘সবকা সাথ, সবকা বিকাস, সবকা প্রয়াস’ হায়বা লাইৱা পুদুনা চৎলি। ঙসি লৈবাকসিনা পুন্না হোৎনমিন্নবা হায়বা ৱাখল্লোনসিদা থবক চঙশিন্দুনা ময়ামগীদমক থবক তৌরি, ময়াম পুম্নমক পুন্না তৌমিন্নরি। ২১শুবা চহিচাগী চহি তরা অসি মনিপুরগীদমক য়াম্না মরুওই। মমাঙগী লৈঙাকশিংনা মতম য়াম্না মাঙহনখ্রে। হৌজিক ঐখোয় মীৎকুপ অমা ফাওবা মাঙহনফদ্রে। ঐখোয়না মনিপুরগী তংদু লৈতবাবুসু ঙাক্কদবনি অমদি মনিপুরবু চাউখৎপগী অনৌবা পন্দোল য়ৌনবসু পুখৎকদবনি। অদুগা হায়রিবা থবক অসি দবল ইঞ্জিন লৈঙাকখক্তনা তৌবা ঙমগনি।
মনিপুরনা হান্নগুম দবল ইঞ্জিন লৈঙাক্তা মখোয়গী থৌজাল মীৎয়েং মখা তানা য়েংলকখিগনি হায়না ঐনা মপুং ফানা থাজৈ। অমুক্কা হন্না ঙসিগী মশিং য়াম্লগা প্রোজেক্তশিং অসিগীদমক মনিপুরগী মীয়ামবু, মনিপুরগী ঐগী নুংশিরবা ইচিন ইনাউশিংবু য়াম্লবা য়াইফ পাউজেল পীজরি।
থাগৎচরি!!!
ভারত ইমানা – য়াইফরে!!
ভারত ইমানা – য়াইফরে!!
ভারত ইমানা – য়াইফরে!!
ভারত ইমানা – য়াইফরে!!
হন্না হন্না থাগৎচরি!
