ঐহাক্কী মরুপ, প্রধান মন্ত্রীজী, ঐহাক্না অদোমবু থাগৎচরি। ঐহাক অমসুং ঐহাক্কী মীহুৎ কাংবুবু তরাম্না ওকপগী মওং, অমসুং অদোম্না পুং খরগী মনুংদা মালেসিয়াগী পুন্সিগী মরুওইবশিং উৎখিবা মওং-মতৌ - চৎনবীশিংদগী হেন্দোক্তুনা অমসুং পুম্নমকপু য়াম্না ফজনা শীন-লাংদুনা, ঐহাক্না মতম পুম্নমক্তা নীংশিংদুনা লৈহৌরগনি। মসিগীদমক্তা ঐহাক্না থাগৎপা ফোঙদোকচরি। ঐহাক্না মরুপ-মপাং ওইবগী ৱাহন্থোক, মসিগী অৱা-নুংঙাই অদু তশেংনা থেংনখি, অমসুং মসিগীদমক্তা ঐহাক অদোমগী থাগৎচরি।
ইকসেলেন্সী,
প্রধান মন্ত্রী ওইনা ঐহাক্না অহুমশুবা ওইনা মালেসিয়াদা চৎপগী খুদোংচাবা ফংজবা অসি ঐহাক্কী খুদোংচাবা অমনি। অমসুং অদোমগী মতম অসিদা, ঐহাক্না অদোমগা মরিশুবা ওইনা উনবগী খুদোংচাবা ফংজরি। মসিনা ঐখোয়গী মরীগী খোঙজেল অমসুং থৌনা অদু উৎলি। হৌখিবা চহিশিংদা, ঐখোয়গী লৈবাক অনিগী মরীনা চাউখৎলকপা অমসুং অচেৎপা ওইরকপা অসি তশেংনা ইথিল পীবা অমনি। মসিগীদমক্তা অদোমগী মমল য়াম্লবা তেংবাং অদুগীদমক ঐহাক্না অদোমবু থাগৎচরি। ঙসিদি, ঐখোয়গী কোওপরেসন অসি লৌউ-শিংউ অমসুং মেন্যুফেকচরিংদগী ক্লিন ইনর্জী অমসুং সেমিকন্দক্তর ফাওবা শন্দোক্লি। ঐখোয়না স্কিল দিবেলপমেন্ত অমসুং কেপাসিতী বিল্দিংদা মরুওইবা পার্তনরসু ওইরি। ঐখোয়গী দিফেন্স অমসুং সেক্যুরিতী কোলাবোরেসন অসি মখা তানা মপাঙ্গল কনখৎলক্লি।
ইকসেলেন্সী,
ঐহাক্না অমুক্কা হন্না অদোমবু আসিয়ানগী মাইপাক্না চেয়রমেনশিপ পাইখিবগীদমক থম্মোয় শেংনা নুংঙাইবা ফোংদোকচরি। ঐখোয়না থাজবা থম্লি মদুদি মালেসিয়াগী মতেংগা লোয়ননা, আসিয়ানগা লোইননা ঐখোয়গী মরী অসি হেন্না চেৎশিল্লগনি অমসুং পাকথোক চাউথোক্লগনি।
ইকসেলেন্সী,
ঐখোয়গী মরীগী অশেংবা মপাঙ্গল অসি মীয়ামগী মরক্তা লৈনরিবা মরীদা লৈ। ভারতকী হৌরকফমগা লোইননা মালেসিয়াদগী লাকপা মীওই মিলিয়ন অহুমরোম্না ঐখোয়গী লৈবাকশিংগী মরক্তা থোং অমা ওইনা থবক তৌরি। ঙরাং ঐহাক্না অদোমগা লোয়ননা দাইস্পোরাগা উনবগী খুদোংচাবা ফংখি। মসি য়াম্না অখন্নবা এক্সপরিয়েন্স অমনি। মখোয়না অদোমগীদমক থম্লিবা ইকায় খুম্নবা অমসুং নুংশিবা অদু ঐনা উখি, মসিনা ঐবু চাউথোকচবা পোকহল্লি। তেরোরিজমগা লান্থেংনবদা ঐখোয়গী মরুপ লৈবাকশিংগী মতেং অসি য়াম্না মরু ওই।
ইকসেলেন্সী,
ভারত অমসুং মালেসিয়াগী য়াইফ-থৌরাং অসি অমগা অমগা মরী লৈনৈ হায়না ঐখোয়না চেৎনা থাজৈ। ঙসিগী মালেমগী অচেৎপা ফীভম অসিদা, সমুদ্রগী য়ুম্লোন্নবশিং ওইনা, ভারত অমসুং মালেসিয়ানা মখোয়গী মরীগী মপুং ফাবা পোতেন্সিএল শীজিন্নবা অসি তঙাইফদে। ঙসিগী ঐহাক্কী খোংচৎ অসিগী মরুওইবা পাউজেল অসি ময়েক শেংই: ভারতনা মলেসিয়াগা লোয়ননা পার্তনরশিপ অসি অনৌবা থাক্তা পুখৎনবা, হিরম খুদিংদা মতেং পীনবা হেনগৎহন্নবা অমসুং হেন্না চেৎশিলহন্নবা অপাম্বা থম্লি। ঐহাক অমসুং ঐহাক্কী মীহুৎ কাংবুবু তরাম্না ওকপগীদমক ঐহাক্না অমুক্কা হন্না অদোম অমসুং অদোমগী কাংবু পুম্নমকপু থাগৎপা ফোংদোকচরি।
