খুরুমজরি মরূপশিং,
মসি ২০১৯গী অরোইবা মীফম্নি, অমসুং মসি য়াম্না মরু ওইবা মীফম অমসুনি। মরমদি মসি রাজ্যসভাগী ২৫০শুবা মীফম্নি। মীফম ২৫০গী খোংচৎ অসিগী য়াম্নমক ইথিল পোক্নীংঙাই ওইরবা নীংশিংবা কয়া অদুগা লোইননা রাজ্যসভাগী ২৫০শুবা মীফম হৌগদৌরি। মতৌ অসুম্না মীফম অসিগী মনুংদা তারিবা তাং ২৬ অসি ঐখোয়গী সংবিধানগী নুমিৎসুনি। ঐখোয়গী সংবিধানগী চহি ৭০ শুরকপা অসিদা, সংবিধান অসিনা লৈবাক অসিগী অপুনবা, অমত্তা ওইবা, ভারতকী মখল–মখা, ভারতকী ফজবা কয়া অসি মসিদা য়োমশিল্লি অমসুং মসি লৈবাক অসিগীদমক্তা চলাইরিবা থৌনা অদুনি।
অদুনা সংবিধানগী ৭০শুবা চহি অসিমক্না, সদন অসিগী থোংদগী ইরৈচাশিংগীদমক্তসু য়কাইহন্নবগী তাঞ্জা অমা ওইবা য়াই। হৌখিবা নুমিৎ খরনিদা চাউরাক্না দল খুদিংমক্কী লুচীংবশিংগা উনবগী তাঞ্জা ফংখি অমসুং মীফম অসিসু মমাংগী অনৌবা সরকার শেম্লবা মতুংদা দল পুম্নমক্কী মতেংনা মরম ওইদুনা, ইকাই খুম্নজরবা
এম.পি. পুম্নমক্কী মতেংনা মরম ওইদুনা পুম্নমক্কী অচুম্বা অশেংবা থৌদাং অদুনা মরম ওইদুনা হৌখিবা মীফম অদু মাই পাকপতনা থনখি। অদুগা ঐ মসি মহৌশা ওইবা মওংদা চাউথোক্না হায়জনীংই মদুদি মাই পাকপা অসি সরকারগী নত্তে, মাই পাকপা অসি ত্রেজরী বেঞ্চকী নত্তে, মাই পাকপা অসি সদন পুম্নমক্কীনি অমসুং এম.পি. পুম্নমক মসিগী হক লৈ অমসুং মরম অসিনা ঐনা অমুক্কা হন্না অচুম্বা অশেংবা থৌদাং অদুগীদমক্তা এম.পি. পুম্নমক্কী মফমদা থাগৎপা ফোংদোকচরি, অমসুং মীফম অসিসু লবাক অসিগী চাউখৎপগী খোংচৎতা, লৈবাক অসিগী ইনোৎ হাপ্ননবা, মালেম অসিনা খোংজেল য়াংনা চৎলিবা অসিগুম্না মখোয়গা খোংথাং মান্ননা চৎমিন্নবা ঙম্বগী থৌনা ঐখোয়গী সংসদতগীসু পুথোকপীরক্কনি হায়না ঐনা থাজবা থমজরি।
