উজ্জনির রায়জ কেনে ওসে? আপুনালুকোলোই মুর অন্তোরিক মোরোম আরু শ্রদ্ধা জাসিসু!
অসামগী রাজ্যপাল, শ্রী লক্ষ্মন প্রসাদ আচার্য়জী, মুখ্য মন্ত্রী হিমন্তা বিস্ব সরমাজী, কেন্দ্র সরকারদা ঐহাক্কী মরুপ অমসুং মফম অসিগী মীহুৎ, অসামগী হান্নগী মুখ্য মন্ত্রী, সর্বানন্দ সোনোৱালজী, অসাম সরকারগী মন্ত্রীশিং, সংসদকী মীহুৎশিং, লেজিস্লেতিব এসেমব্লীগী মীহুৎশিং, অতোপ্পা মশক নাইবা মীওইশিং অমসুং ঐখোয়বু য়াইফ-পাউজেল পীনবা লাকপীরিবা মশিং য়াম্লবা ঐহাক্কী ইচিল-ইনাওশিং, ঐহাক্না পন্দলগী মপান্দা মশিং য়াম্লবা মীওইশিং উবা ফংজৈ।
মসি চাউলুং সুকাফা অমসুং লাচিত বোর্ফুকানগুম্বা অথৌবশিংগী লমনি, ভীমবর দ্যুরি, শহিদ কুশল কোনৱার, মোরেন নিংথৌ বোদোসা, মালতি মেম, ইন্দিরা মিরি, স্বর্গদেও সরবানন্দ সিংহ অমসুং থৌনা ফরবা সাতি সাধনিগী লমনি। ঐহাক্না অপ্পর অসামগী লমদম অসিগী মফমদা ইকায় খুম্নবা উৎচরি।
মরুপশিং,
ঐহাক্না ময়াম পুম্নমকপু উবা ফংই, য়েংনবা কন্না হোৎনবা, অদোমগী থৱায় য়াওবা, অদোমগী নুংঙাইবা, অমসুং অদোমগী মীনুংশি অসিনা ঐঙোন্দা ঈথিল পীরি। অমসুং অখন্ননা, ঐহাক্কী ইমাশিং অমসুং ইচে-ইচলশিং, অদোম্না পুরক্লিবা য়াম্না চাউবা নুংশিবা অমসুং য়াইফ-পাউজেলশিং অসি ঐখোয়গী খ্বাইদগী চাউবা পাঙ্গল, ঐখোয়গী খ্বাইদগী চাউবা ইনর্জী অমসুং থোইদোক হেন্দোকপা ৱাখল্লোন অমনি। ঐগী ইচিল-ইনাও কয়া অমা মফম অসিদা অসামগী চাগী বাগানশিংগী মগুন পুদুনা লাক্লি। চাগী মগুন অসিনা অসামগা ঐহাক্কা লৈনরিবা মরীদা য়াম্না অখন্নবা ৱাখল্লোন অমা পোকহল্লি। ঐহাক্না ময়াম পুম্নমক্কী মফমদা ইকায় খুম্নবা উৎচরি। মসিগী নুংশিবা অসিগীদমক্তা ঐহাক্না ময়াম পুম্নমক্তা থাগৎপা ফোংদোকচরি।
মরুপশিং,
ঙসি অসি অসাম অমসুং অৱাং-নোংপোক্কী মফম পুম্নমক্কী য়াম্না মরু ওইবা নুমিৎ অমনি। মতম কুইনদগী ঙাইদুনা লাক্লবা নামরুপ অমসুং দিব্রুগরগী মঙলান ঙসিদি মঙফাওনরে। অমসুং লমদম অসিদা ইন্দস্ত্রীএল প্রোগ্রেসকী অনৌবা চেপ্তর অমা হৌরে। মতম খরগী মমাংদা, ঐহাক্না মফম অসিদা অমোনিয়া-য়ুরিয়া ফর্তিলাইজর প্লান্তকী উরেপ-উয়ুং তম্বগী থৌরম পাংথোকখি। দিব্রুগরদা লাক্রিঙৈ মমাংদা, ঐহাক্না গুৱাহাতি এয়রপোর্তকী অনৌবা তর্মিনেল অমা শঙ্গাখি। মীপুম খুদিংমক্না হায়রি মদুদি অসামনা চাউখৎপগী অনৌবা খোঙজেল য়াংখৎলে। অদোম্না হৌজিক উরিবা অমসুং থেংনরিবা অসি অহৌবা খক্তনি হায়বা ঐহাক্না অদোমদা হায়জনীংই। ঐখোয়না অসামবু হেন্না খুমাং চাউশিলহনগদবনি, অমসুং ঐখোয়না ময়াম পুম্নমক্কা লোয়ননা মাংলোমদা চংশিনগনি। ঐখোয়না অসামবু চাউখৎলবা ভারতকী লমদম অমা ওইহল্লগনি, মসি অহোম নিংথৌরেলগী মতমদা লৈরম্বা অদুগুম্না মপাঙ্গল লৈহল্লগনি। অনৌবা ইন্দস্ত্রীশিং হৌদোকপা, মোদর্ন ইনফ্রাস্ত্রকচর শেমগৎপা, সেমিকন্দক্তরশিং অমসুং মখোয়গী মেনুফেকচরিং, লৌউ-শিংউগী লমদা অনৌবা খুদোংচাবশিং, চাগী বাগানশিং অমসুং মখোয়গী শিন্মীশিংগী খুমাং চাউশিল্লকপা, অমসুং তুরিজমদা হেনগৎলক্লিবা পোতেন্সিএল অসুম্না আসাম অসি সেক্তর খুদিংমক্তা মাংলোমদা চংশিল্লি। ময়াম পুম্নমকপু অমসুং লৈবাক অসিগী লৌমী ইচিল-ইনাও পুম্নমকপু অনৌবা মওংগী ফর্টিলাইজর প্লান্ত অসিগীদমক্তা য়াইফ-পাউজেল পীজরি। গুৱাহাতি এয়রপোর্তকী অনৌবা তর্মিনেলগীদমকসু ঐহাক্না ময়ামবু থাগৎপা ফোংদোকচরি। বি.জে.পি.গী দবল ইঞ্জিন সরকারগী মখাদা, ইন্দস্ত্রী অমসুং কনেক্তিবিতীগী অপুনবা অসিনা অসামগী মঙলানশিং মপুং ফাহল্লক্লি অমসুং ঐখোয়গী নহারোলশিংদা অনৌবা মঙলানশিং শাগৎনবগী থৌনা পীরি।
মরুপশিং,
ঐখোয়গী লৈবাক অসিগী লৌমীশিং, ঐখোয়গী চিঞ্জাক পুথোক্লিবশিং অসিনা চাউখৎলবা ভারত অমা শেমগৎপদা মরু ওইবা থৌদাং অমা লৌরি। মরম অদুনা, ঐখোয়গী সরকারনা লৌমীশিংগী কান্নবশিংবু মরুওইনা লৌনবা নুমিৎ নিনি চুপ্না থবক তৌরি। মফম অসিদা, ময়াম পুম্নমক্না লৌমীশিংগীদমক্তা খুদোংচাবা পীবা স্কিমশিংগী কান্নবা ফংলি। লৌউ-শিংউগী য়াইফ-থৌরাংশিং অসিগী মরক্তা, ঐখোয়গী লৌমীশিংনা মহৈ-মরোংশিং লেপ্পা লৈতনা ফংহনবা অসিসু য়াম্না মরু ওই। য়ুরিয়া প্লান্ত অসিনা লাক্কদৌরিবা চহিশিংদা মসি ফংহনগনি। হায়রিবা ফর্তিলাইজর প্রোজেক্ত অসিদা চাউরাক্না লুপা করোর 11,000 চাদিং তৌগনি। চহি খুদিংগী মেত্রিক তন মিলিয়ন 1.2 হেনবগী ফর্তিলাইজর মফম অসিদা পুথোক্কনি। লোকেলদা পুথোকপা মতমদা, সপ্লাই অসি হেন্না থুগনি, অমসুং লোজিস্তিক্সকী শেনফম হন্থগনি।
মরুপশিং,
নামরুপকী য়ুনিত অসিনা অনৌবা থবক পীবা অমসুং সেল্ফ-ইমপ্লোইমেন্তকী খুদোংচাবা লিশিং কয়া অমসু শেমগনি। প্লান্ত অসি মথৌ তৌবা হৌরকপগা লোয়ননা মীওই কয়া অমা মফম অসিদা লেপ্পা লৈতনা থবক ফংলগনি। মসিগী মথক্তা, প্লান্ত অসিগা মরী লৈনবা থবক কয়া অমা লৈগনি, মসিগী মনুংদা মেন্তেনেন্স, সপ্লাই অমসুং কন্সত্রক্সন য়াওরি। হায়রিবা মফম পুম্নমক্তা, মফম অদুগী মীওইশিং, অমসুং মরুওইনা ঐখোয়গী নহাশিংনা থবক ফংলগনি।
অদুবু ইচিল-ইনাওশিং,
খল্লু, করিগীদমক লৌমীশিংগী য়াইফনবা থবকশিং অসি বি.জে.পি. সরকারনা লৈঙাক পায়রবা মতুংদা খক্তমক পাংথোক্লিবনো? ঐখোয়গী নামরুপ লমদম অসি দিকেদ কয়াগী মমাংদগী ফর্তিলাইজর পুথোকপগী মফম অমা ওইদুনা লাক্লি। মফম অসিদা পুথোকপা ফর্তিলিতরশিংনা অৱাং-নোংপোক্কী লমশিংদা শক্তি পীখিবা মতম অমা লৈরম্মি। মখোয়না লৌমীশিংগী মহৈ-মরোংশিংদা মতেং পাংখি। লৈবাক অসিগী মফম কয়াদা ফর্তিলাইজর সপ্লাই অসি অরুবা অমা ওইরক্লবসু, নামরুপ অসি লৌমীশিংগীদমক আশাগী সোর্স অমা ওইদুনা লৈরি। অদুম ওইনমক, মতমগী মতুং ইন্না অরিবা ফেক্টরীশিংগী তেক্নোলোজী অসি মতমগা চুনদ্রে, অমসুং কংগ্রেস সরকারশিংনা করিসু খন্নখিদে। মসিনা মরম ওইদুনা, নামরুপ প্লান্তগী য়ুনিৎ কয়া অমা থিংজিনখি। অৱাং-নোংপোক্কী লৌমীশিংনা অৱাবা মায়োক্নখি, লৈবাক শিনবা থুংবগী লৌমীশিংনা অৱাবা মায়োক্নখি, মখোয়গী শেন্থোক্না শোকহনখি, অমসুং লৌউ-শিংউদা হেন্না খুদোংচাদবা ওইখি, অদুবু কংগ্রেসকী লুচিংবশিংনা মসিগী সমস্যা অসি কোকহন্নবা করিসু তৌখিদে; মখোয়না মীৎয়েং চংবা লৈতে। ঙসি ঐখোয়গী দবল ইঞ্জিন সরকার অসিনা কংগ্রেসনা থোকহনবা সমস্যাশিং অসিসু কোকহল্লে।
মরুপশিং,
অসামদা তৌবগুম্না, লৈবাক অসিগী অতোপ্পা রাজ্যশিংদসু ফর্তিলাইজরগী ফেক্টরী কয়া অমা থিংজিনখি। মতম অদুদা লৌমীশিংগী অৱাবা অদু অদোম্না নীংশিংলিবরা? লৌমীশিংনা য়ুরিয়া ফংনবগীদমক অশাংবা ক্যু লেপ্পা তারম্মি। য়ুরিয়াগী দুকানশিংদা পুলিস থম্বা মথৌ তাই। পুলিসনা লৌমীশিংগী মায়োক্তা লাথি চার্জ তৌবা ফাওবা হৌখি।
ইচিল-ইনাওশিং,
ঐখোয়গী সরকারনা কংগ্রেস পার্তীনা থোকহনখিবা ফীভম অদু চুমথোক্নবা হোৎনরি। অমসুং মখোয়না ফত্তবা থবক অমা তৌখি, ফত্তবা থবক অমা তৌখি, চহী 11গী কন্না হোৎনরবা মতুংদা, ঐহাক্না মখা তানা তৌগদবা কয়া লৈরি। কংগ্রেস সরকারগী মতমদা, ফর্তিলাইজরগী ফেক্টরীশিং থিংজিল্লম্মি। মসিগী ওন্ন-তৈনবদা, ঐখোয়গী সরকারনা গোরখপুর, সিন্দ্রি, বরৌনী অমসুং রামাগুন্দমগুম্বা মফমশিংদা প্লান্ত কয়া অমা হৌদোকখ্রে। হীরম অসিদা প্রাইবেৎ সেক্তরসু পুক্নিং থৌগৎলি। হায়রিবা হোৎনরিবশিং অসিগী মহৈ ওইনা, ঐখোয়না হৌজিক য়ুরিয়া সেক্তরদা অঙকপা মতমদা মশা-মরোমদোম লেপচবা ঙম্নবগী মায়কৈদা চংশিল্লি।
মরুপশিং,
2014দা লৈবাক অসিনা য়ুরিয়া মেত্রিক তন মিলিয়ন 22.5 খক্তমক পুথোকখি। অদোম্না ফিগর অদু নীংশিংলব্রা? নম্বর অদু অদোম্না নীংশিংলব্রা? চহি 10-11গী মমাংদা অদোম্না ঐঙোন্দা থবক অসি পীখি, অমসুং মতম অদুদা, পোত্থোক পুথোকপা অসি মেত্রিক তন মিলিয়ন 22.5 ওইখি। ফিগর অসিবু নীংশিংউ। হৌখিবা চহি 10-11 অসিদা ঐখোয়না কন্না হোৎনদুনা, ঐখোয়না পোত্থোক পুথোকপা অসি চাউরাক্না মেত্রিক তন মিলিয়ন 30.6দা হেনগৎহনখ্রে। অদুবু ঐখোয়না মসিদা লোইশিনবা য়ারোই, মরমদি মখা তানা তৌগদবা কয়া লৈরি। মতমদুদা পাংথোক্কদৌরিবা থবকশিং অদু পাংথোকখিদে, অমসুং মসিনা মরম ওইদুনা ঐহাক্না অহেনবা হোৎনবা খরা চংলি। হৌজিক্কী ওইনা, ঐখোয়না চহি খুদিংগী য়ুরিয়াগী মেত্রিক তন মিলিয়ন 38 মথৌ তাই। ঐখোয়না মিলিয়ন 30.6 য়ৌখ্রে, মরম অদুনা ঐখোয়না অতোপ্পা মিলিয়ন 7-8 তঙাইফদে। অদুবু ঐহাক্না লৈবাক অসিগী মীয়ামদা থাজবা পীজরি মদুদি ঐখোয়না থবক তৌরিবা মওংদা, ঐখোয়না থৌরাং তৌরিবা মওংদা, অমসুং ঐহাক্কী লৌমী ইচিল-ইনাওশিংগী য়াইফ-পাউজেলগা লোয়ননা, ঐখোয়না য়ারিবমখৈ থুনা মসিগী অৱাবা অসি কোকহন্নবা হোৎনগনি।
অমসুং ইচিল-ইনাওশিং,
ঐহাক্না অদোমদা অতোপ্পা ৱাফম অমা হায়জবা পাম্মি: ঐখোয়গী সরকারনা নখোয়গী অপাম্বা অদু য়াম্না মুন্না খঙই। ঐখোয়না মপান্দগী মমল ৱাংনা পুশিল্লকপা য়ুরিয়া অসিসু ঐখোয়গী লৌমীশিংগী মথক্তা পোৎলুম ওইহন্দে। বি.জে.পি. সরকারনা সবসিদী পীরি অমসুং মসিদা শেল চংই। ভারতকী লৌমীশিংনা য়ুরিয়াগী বেগ অমা লুপা 300 খক্তদা ফংই, অদুবু বেগ অমগীদমক, ভারত সরকারনা ঐখোয়না য়ুমদা পুশিল্লিবা লৈবাকশিংদা চাউরাক্না লুপা 3,000 পীবা তাই। হৌজিক ৱাখল খল্লু, ঐখোয়না মসি লুপা 3,000দা য়োন্থোকই অমসুং লুপা 300দা য়োন্থোকই। ঐখোয়না লৈবাক অসিগী লৌমীশিংগী মথক্তা মসিগী অপুনবা পোৎলুম অসি পীদে। মসিগী শেনফম পুম্নমক লৈঙাক্না পুথোকই, মসিনা মরম ওইদুনা ঐগী লৌমী ইচিল-ইনাওশিংনা মসিগী পোৎলুম পুবগী মথৌ তাদে। অদুবু ঐহাক্না ঐহাক্কী লৌমী ইচিল-ইনাওশিংদা হায়জনীংবদি, নখোয়নসু ঐহাকপু মতেং পাংগদবনি, অমসুং মতেং অসি ঐহাক্কীদমক্তা নত্তে, নখোয়গী দমক্তনি, ঐহাক্কী লৌমী ইচিল-ইনাওশিং, অমসুং মসি পৃথিবী ইমাগী কন্নবনি। করিগুম্বা ঐখোয়না ইমা পৃথীবি অসি কনদ্রবদি, ঐখোয়না য়ুরিয়াগী বেগ কয়া শীজিন্নরবসু, ইমা পৃথীবি অসিনা ঐখোয়দা করিগুম্বা অমত্তা পীরোই। মরম অদুনা, হকচাংদা অনাবা লৈবগুম্না, হিদাক অসি চাং নাইনা শিজিন্নগদবনি; করিগুম্বা নহাক্না পিল্লী অনি মথৌ তারগা অমসুং নহাক্না মরি চারবদি, মসিনা হকচাং অদুদা কান্নবা পীদে, অদুবু শোকহল্লি। মতৌ অসুম্না, করিগুম্বা ঐখোয়না ঐখোয়গী য়ুম্লোন্নবশিংনা হেন্না শিজিন্নরে হায়দুনা য়ুরিয়া মশিং য়াম্না শিজিন্নরবদি, য়ুরিয়া কা হেন্না শিজিন্নদুনা ইমা পৃথীবিনা ঐখোয়দা শাওগনি, ঐখোয়না য়ুরিয়া হেন্না শিজিন্নদুনা ইমা পৃথিবী হাৎনবা ঐখোয়গী হক লৈতে। মহাক ঐখোয়গী ইমানি, অমসুং ঐখোয়না মহাকপুসু ঙাকথোক্কদবনি।
মরুপশিং,
ঙসি, মরুদগী কৈথেল ফাওবদা, বি.জে.পি সরকারনা লৌমীশিংগা লোয়ননা লেপ্লি। লৌউ-শিংউগী থবকশিংগীদমক্তা লৌমীশিংগী একাউন্তশিংদা শেল হকথেংননা ত্রান্সফর তৌরি। মসিনা মরম ওইদুনা লৌমীশিংনা লোনগীদমক্তা মফম মফম চৎপা মথৌ তাদ্রে। হৌজিক ফাওবদা পি.এম. কিসান সম্মান নিধি স্কিমগী মখাদা চাউরাক্না লুপা করোর লাখ 4 লৌমীশিংগী একাউন্তশিংদা ত্রান্সফর তৌখ্রে। অদোম্না ফিগর অসি নীংশিংগদ্রা? নৎত্রগা অদোম্না মসিবু কদাইদা থাদোক্কদগে? লৈবাক অসিগী লৌমীশিংগী একাউন্তশিংদা লুপা করোর লাখ 4 হকথেংননা দিপোজিৎ তৌখ্রে। চহি অসিদা, লুপা করোর 35,000গী অনৌবা স্কিম অনি লৌমীশিংদা মতেং পাংনবা হৌদোক্লে। পি.এম. ধন ধনয়া কৃশি য়োজনা অমসুং পলস সেল্ফ রিলাইন্স মিসননা লৌউ-শিংউদা পুক্নিং থৌগৎকনি।
মরুপশিং,
ঐখোয়না লৌমীশিংগী মথৌ তাবশিংবু ৱাখলদা থমদুনা থবক তৌরি। লৌমীশিংনা অৱাবা মতমগী ফীভম্না মরম ওইদুনা মহৈ-মরোং মাংখিবা তারবদি মহৈ-মরোংগী ইন্সুরেন্স স্কিমগী খুত্থাংদা মতেং ফংলি। লৌমীশিংনা মখোয়গী মহৈ-মরোংগীদমক অচুম্বা মমল ফংহনবগীদমক পোৎ-চৈ য়োনবগী পথাপশিং ফগৎহনখ্রে। ঐখোয়গী লৌমীশিং মপাঙ্গল কনখৎলকপা মতমদা লৈবাক অসিনা চাউখৎপা ঙমগনি হায়না ঐখোয়গী সরকারনা চেৎনা থাজৈ অমসুং মসি ফংনবগীদমক ঐখোয়না তৌবা য়াবা পুম্নমক তৌরি।
মরুপশিং,
কেন্দ্রদা ঐখোয়গী সরকার লৈরক্লবা মতুংদা, ঐখোয়না কিসান ক্রেদিৎ কার্দকী খুদোংচাবা অসি শা-ষন য়োকপা অমসুং ঙা য়োকপা মীওইশিংদা ফংহনখি। ঐখোয়গী শা-ষন য়োকপা অমসুং ঙা য়োকপা মীওইশিংনা কিসান ক্রেদিৎ কার্দ (কে.সি.সি.) হায়রিবা মশীং অসি নিংশিংবীয়ু: চহি অসিদা, লৌমীশিংনা কে.সি.সি.গী খুত্থাংদা লুপা করোর লাখ 10 হেন্না মতেং ফংখ্রে। লুপা করোর লাখ 10! বাইও-ফর্তিলাইজরশিংদা জি.এস.তি. হন্থবনা লৌমীশিংদা চাউনা কান্নবা ফংহল্লে। বিজেপি সরকারনা ভারতকী লৌমীশিংদা নেচরেল ফার্মিংগীদমক পুক্নিং থৌগৎলি। অসামগী দিস্ত্রিক্ত খরদা তুংলমচৎতা 100% নেচরেল ফার্মিংগী থবক পায়খৎকনি হায়বা ঐহাক্না পাম্মি। অসামনা ভারতকী অতৈ মফমশিংদা লম্বী তাকপা ঙম্মি। অসামগী লৌমীশিংনা লৈবাক অসিদা লম্বী তাকপা ঙম্মী। ঐখোয়না নেস্নেল মিসন ওন নেচরেল ফার্মিং হৌদোকখি, অমসুং ঙসি লৌমী মিলিয়ন কয়ানা মসিদা শরুক য়াখ্রে। হৌখিবা চহি খরা অসিদা, লৈবাক অসিদা ফার্মর প্রদ্যুসর ওর্গনাইজেসন (এফ.পি.ও.) 10,000 শেমখ্রে। অৱাং-নোংপোক লমদমদা অখন্নবা মীৎয়েং থমদুনা, ঐখোয়গী সরকারনা ইদিবল ওইলশিং - পাম ওইলগা মরী লৈনবা মিসন অমসু হৌদোক্লে। মসিগী মিসন অসিনা ভারতপু চিঞ্জাক্কী ওইলদা মশা-মরোমদোম লেপচবা ঙমহনবতা নত্তনা মফম অসিগী লৌমীশিংগী ইনকমসু হেনগৎহনগনি।
মরুপশিং,
লমদম অসিদা ঐখোয়না চাগী বাগানদা থবক তৌরিবশিং মশিং য়াম্না লৈ। মসি বিজেপি সরকারনা অসামদা চাগী বাগানদা থবক তৌরিবা মীওই 750,000গীদমক জন ধন বেঙ্ক একাউন্ত হাংদোকখি। হৌজিক্তি, মখোয় অসি বেঙ্কিং সিস্তেমগা শম্নবনা মরম ওইদুনা, হায়রিবা শিন্মীশিং অসিনা মখোয়গী বেঙ্ক একাউন্তশিংদা হকথেংননা শেল থাদবা ফংগনি। ঐখোয়গী সরকারনা স্কুল, লম্বী, ইলেক্ত্রিসিতী, ঈশিং, অমসুং হোস্পিতালগী খুদোংচাবশিং অসি চাগী বাগানগী মফমশিংদা ফগৎহল্লি।
মরুপশিং,
ঐখোয়গী সরকারনা "সবকা সাথ, সবকা বিকাস" হায়বা মন্ত্র অসিগা লোয়ননা মাংলোমদা চংশিল্লি। ঐখোয়গী মিৎয়েং অসিনা ঐখোয়গী লৈবাক অসিগী লাইরবশিংগী পুন্সিদা মশক থোকপা অহোংবা পুরক্লি। হৌখিবা চহি 11 অসিদা, ঐখোয়গী হোৎনবশিং অমসুং ঐখোয়গী স্কিমশিংবু মপুং ফানা থবক ওইনা পাংথোকপগী মহৈ ওইনা, মীওই করোর 25 - হায়রিবা মশিং অসি নিংশিংবীয়ু, মীওই করোর 25 – লাইরবদগী থোরকপা ঙমখ্রে। লৈবাক অসিদা অনৌবা মিদল ক্লাস অমা থোরক্লে। মসিনা মরম ওইদুনা হৌখিবা চহিশিংদা ভারতকী লায়রবা ইমুংশিংগী হিংবগী থাক অসি লেপ্তনা ফগৎলক্লি। ভারত্তা ওইরক্লিবা অহোংবশিং অদুগী খুদম ওইরিবা, হন্দক থোরকখিবা মশীং খরদি উবা ফংলে।
মরুপশিং,
অমসুং হায়রিবা ৱাফমশিং অসি মীদিয়াদা য়াম্না কান্নবা ওই। মরম অদুনা ঐনা হায়রিবশিং অসি নীংশিংনবা অমসুং অতোপ্পশিংদা শেয়র তৌনবা ঐনা অদোমদা হায়জরি।
মরুপশিং,
মমাংদা, খুঙ্গংগী খ্বাইদগী লায়রবা ইমুংশিংদা, ইমুং 10গী মনুংদা অমফাওবা মোতোরসাইকল অমত্তা লৈরমদে। হৌজিক্কী ওইনা, ইকুই কুইদ্রিবা সর্ভেগী মতুং ইন্না, খুঙ্গংশিংদা লৈবা ইমুংশিংগী তংখায়রোমদি মোতোরসাইকল নৎত্রগা কার অমা লৈ। মসিগী মথক্তা, মোবাইল ফোনশিং অসি য়ুমথোং খুদিংমক্তা য়ৌরে। মতম অমদা লুচিংবা পোৎলম ওইনা লৌনরম্বা রেফ্রিজরেতরগুম্বা পোৎলমশিং অসি হৌজিক ঐখোয়গী অনৌবা মিদ্দল ক্লাসকী য়ুমশিংদা য়াম্না তোইনা উবা ফংলে। মখোয়না খুঙ্গংগী চাকশঙশিংদা য়ৌবা ঙম্লে অনৌবা দেতাশিংনা উৎলি মদুদি স্মার্তফোনশিং হেনগৎলক্লবসু, খুঙ্গংশিংদা তেলিভিজন লৈবা হেনগৎলক্লি। মসিগী অহোংবা অসি মশানা থোক্লকখিদে। মসিনা মরম ওইদুনা লৈবাক অসিদা লৈরিবা লায়রবশিংনা শক্তি লৈরক্লি, অমসুং চাউখৎপগী কান্নবা অসি অরাপ্পা মফমশিংদা লৈবা লায়রবশিংদা য়ৌরক্লি।
মরুপশিং,
বি.জে.পি.গী দবল-ইঞ্জিন লৈঙাক অসি লায়রবশিং, ত্রাইবেলশিং, নহাশিং অমসুং নুপীশিংগী লৈঙাক অমনি। মরম অসিনা ঐখোয়গী সরকারনা অসাম অমসুং অৱাং-নোংপোক লমদমদা চহী কয়াদগী চত্থরক্লিবা হিংসা অসি লোইশিন্নবা হোৎনরি। ঐখোয়গী সরকারনা মতম পুম্নমক্তা অসামগী শক্তম অমসুং চৎনবীবু মরুওইনা লৌরি। বিজেপি সরকারনা প্লেতফোর্ম খুদিংমক্তা অসামীজ প্রাইদকী খুদমশিংবু ময়েক শেংহল্লি। মরম অদুনা, ঐখোয়না লচিত বোর্ফুকনগী ফুত 125গী মীতম অসি চাউথোকচবা ফাওনা শাখি অমসুং ঐখোয়না আসামগী চাউথোকচবগী হৌরকফম অমা ওইরিবা ভুপেন হাজারিকাগী মপোক কুমওন পাংথোকখি। ঐখোয়না অসামগী আর্ত অমসুং ক্রাফৎশিং অমসুং অসামগী গামোসা অসি মালেম পুম্বনা শকখঙলি। নুমিৎ খরনিগী মমাংদা, রাসিয়াগী প্রসিদেন্ত মিস্তর পুতিন দিল্লীদা লাকখি, ঐহাক্না মহাকপু অসামগী ব্লেক চা খুদোল ওইনা পীখি। আসামগী ইকাই খুম্নবা অমসুং মগুন হেনগৎহনগদবা থবক খুদিংমক ঐখোয়না মরুওইনা লৌই।
অদুবু ইচিল-ইনাওশিং,
বি.জে.পি.না মসি তৌরকপা মতমদা, কংগ্রেস পার্তীনা খ্বাইদগী অৱাবা ফংগনি। ঐখোয়গী সরকারনা ভুপেন হাজরিকাবু ভারত রত্ন পীখিবা অদু অদোম্না নীংশিংবা য়াই, অদুগা কংগ্রেসনা মদুগী মায়োক্তা লানখি। কংগ্রেসকী নেস্নেল প্রসিদেন্তনা হায়খি মদুদি মোদীনা ভারত রত্ন অসি ঈশৈ শকপা অমসুং জগোয় শাবা মীওইশিংদা পীরি। ঐঙোন্দা হায়বিয়ু, মসি ভুপেন হাজরিকাবু ইকায়বা পীবনি নত্ত্রা? মসি আর্ত অমসুং কলচরদা ইকায়বা পীবা নত্ত্রা? মসি অসামদা ইকায়বা পীবা নত্ত্রা? মসিনি কংগ্রেসনা নুমিৎ চুপ্পা তৌরিবা অসি। ঐখোয়না অসামদা সেমিকন্দক্তর য়ুনিৎ অমা লিংখৎখি, অদুগা মতম অদুদসু কংগ্রেসনা মসিগী মায়োক্তা লৈখি। কনাগুম্বনা নিংশিংবীরমগনি, হায়রিবা কংগ্রেস সরকার অসিনা চহী তরাগী খুজিং কয়াদগী ঐখোয়গী চাগী কাংলুপকী ইচিল-ইনাওশিংদা লমগী হকশিং পীরমদে। বি.জে.পি. সরকারনা মখোয়দা লমগী হকশিং অমসুং ইকাই খুম্নরবা পুন্সি অমা পীখি। অমসুং ঐহাক চা য়োল্লিবনি, ঐহাক্না তৌদ্রবদি কনানা তৌগনি? মসিগী কংগ্রেস অসিনা হৌজিক ফাওবা এন্তি-নেস্নেল ৱাখল্লোন প্রমোৎ তৌরি। হায়রিবা মীওইশিং অসিনা অসামগী উমং লমদমদা বঙ্গলাদেশকী লানহৌলুপশিং অসিবু য়ুম্ফম ওইরগা লৈহন্নবা হোৎনরি। নহাক্না মাঙখ্রবসু মখোয়দা করিসু অকাইবা লৈতে। মখোয়না মখোয়গী ভোৎ বেঙ্ক মপাঙ্গল কনখৎহনবখক্তদা পুক্নিং চংলি।
ইচিল-ইনাওশিং,
কংগ্রেস পার্তীনা অসাম নৎত্রগা অসামগী মীয়াম নৎত্রগা অদোমগী মশক খঙবগীদমক করিসু খল্লোই। মখোয়শিং অসি শক্তি, লৈঙাক, অমসুং মখোয়না মমাংদা তৌরম্বা থবকশিং অসিবু মখা চত্থবদা পুক্নিং চিংশিল্লি। মরম অদুনা মখোয়না বঙ্গালাদেসকী ইলিগেল ইমিগ্রেন্তশিংবু হেন্না পাম্মি। কংগ্রেস পার্তীনা হায়রিবা ইলিগেল ইমিগ্রেন্তশিং অসিবু য়ুম্লোন্নখি, অমসুং কংগ্রেস পার্তীনা মখোয়বু ঙাক-শেনলি। মরম অদুনা কংগ্রেস পার্তীনা ভোতর লিস্ত শেমদোকপদা য়ানীংদ্রে। ঐখোয়না অসামবু কংগ্রেসনা চৎনরিবা পোলিসী অসিদগী ঙাকথোক্কদবনি। ঐহাক্না ঙসি অদোমদা গেরেন্তী পীরি মদুদি বিজেপিনা অসামগী শক্তম অমসুং ইকাই খুম্নবা ঙাক্নবা অদোমগা লোয়ননা চীংজাওগুম লেপমিন্নগনি।
মরুপশিং,
চাউখৎলবা ভারত অমা শেমগৎপদা, অদোমগী য়াইফ-পাউজেলশিং অসি ঐগী শক্তিনি। নখোয়গী মীনুংশিনা ঐহাক্কী লননি। অমসুং মরম অসিনা ঐহাক্না অদোমগীদমক মতম পুম্নমক্তা হিংবদা নুংঙাইবা ফংই। চাউখৎলবা ভারত অমা শেমগৎপদা, নোংপোক থংবা ভারতকী, ঐখোয়গী অৱাং নোংপোক্কী থৌদাং অসি লেপ্তনা হেনগৎলক্লি। ঐহাক্না মমাংদা হায়খি মদুদি নোংপোক থংবা ভারত অসি ভারতকী চাউখৎপগী গ্রোথ ইঞ্জিন ওইগনি। নামরুপকী অনৌবা য়ুনিৎ অসি অসিগুম্বা অহোংবা অসিগী খুদম অমনি। মফম অসিদা পুথোক্লিবা ফর্তিলাইজর অসি অসামগী লমখক্তদা অকক্নবা ওইরোই। মসিনা বিহার, ঝারখন্দ, ৱেস্ত বেঙ্গল অমসুং নোংপোক থংবা উত্তর প্রদেশ ফাওবা য়ৌরগনি। মসি অচৌবা ৱাফম অমনি। মসিনা লৈবাক অসিগী ফর্তিলাইজরগী মথৌ তাবশিংদা অৱাং নোংপোক্কী শরুক য়াবা অদুনি। নামরুপকুম্বা প্রোজেক্তশিং অসিনা লাক্কদৌরিবা মতমশিংদা অৱাং-নোংপোক লমদম অসি মশা-মরোমদোম লেপচবা ভারতকী মরুওইবা মফম অমা ওইনা থোক্লক্লগনি। মসি তশেংনা "অশতলক্ষ্মী" (লক্ষ্মী, শেন্মিৎলোনগী লাইরেম্বী) ওইগনি। অনৌবা ফর্তিলাইজর প্লান্ত অসিদা ঐহাক্না অমুক্কা হন্না ময়াম পুম্নমকপু থাগৎচরি। ময়াম ঐগা লোয়ননা হায়বিয়ু:
ভারত মাতা কী জয়।
ভারত মাতা কী জয়।
অমসুং চহি অসিদা বন্দে মাতরম অসি চহি 150 মপুং ফারি, ময়ামসু হায়বীয়ু-
বন্দে মাতরম।
বন্দে মাতরম।
বন্দে মাতরম।
বন্দে মাতরম।
বন্দে মাতরম।
বন্দে মাতরম।
বন্দে মাতরম।
বন্দে মাতরম।
বন্দে মাতরম।
