য়োর এক্সলেন্সী কাইস অল য়ুসেফ, কমর্স, ইন্দস্ত্রী অমসুং ইনভেস্তমেন্ত প্রমোসনগী মন্ত্রী,
লৈবাক অনিমক্কী দেলিগেৎশিং,
বিজিনেস কম্ম্যুনিতীগী লুচিংবশিং,
ইচিল ইনাও পুম্নমক
খুরমজরি!
চহি তরেৎকী মতুংদা ওমানদা থুংদুনা ঙসি ময়াম পুম্নমক্কা উনবগী খুদোংচাবা ফংজবা অসি ঐহাক্কীদমক য়াম্না নুংঙাইবা অমনি।
বিজিনেস সমিৎ অসিদা অদোম্না নুংশিনা তরাম্না ওকপীবা ঐহাক্কী পুক্নিংদা অদুক্কী মতীক নুংঙাইবা পোকই। ঙসিগী সমিৎ অসিনা ভারত-ওমান পার্তনরশিপতা অনৌবা দিরেক্সন অমসুং ইথিল পীরগনি অমসুং অনৌবা অৱাংবা থাক্তা পুখৎপদা মতেং ওইরগনি। পুম্নমক্না মসিগী মায়কৈ অসিদা হোৎনবদা মরু ওইবা থৌদাং অমা লৌবা তাই।
মরুপশিং,
অদোম্না ভারত অমসুং ওমানগী বিজিনেসশিং অমসুং ঐখোয়গী বাইলেতরেল ত্রেদকী মীহুৎ ওইরি। অদোম্না চহি চা কয়াদগী লৈরক্লবা শিংথানীংঙাই ওইরবা হেরিতেজ অমগী ইনাক খুল্লবা মীওইশিংনি। সিভিলাইজেসন হৌরকপা মতমদগী, ঐখোয়গী ইপা ইপুশিংনা অমগা অমগা সমুদ্রগী ললোন-ইতিক তৌনদুনা লাক্লি।
সমুদ্রগী খোঙবাল অনী অসি য়াম্না লাপ্নৈ হায়না তোইনা হায়নৈ, অদুবু মান্দভি অমসুং মসকাৎকী মরক্তা, আরব সমুদ্রনা মপাঙ্গল লৈবা থোং অমা ওইনা মথৌ তৌখি। ঐখোয়গী মরীশিংবু মপাঙ্গল কনখৎহনখিবা অমসুং ঐখোয়গী চৎনবী অমসুং শেন্মিৎলোনবু মপাঙ্গল কনখৎহনখিবা থোং অমনি। ঙসিদি, ঐখোয়না থাজবগা লোইননা হায়জবা য়ারি মদুদি সমুদ্রগী ঈচেলশিং হোংলকপা য়াই অমসুং চহিগী মতমশিং হোংলকপা য়াই, ভারত অমসুং ওমানগী মরক্তা লৈনরিবা মরুপ-মপাং ওইবগী মরী অসি চহি খুদিংগী হেন্না মপাঙ্গল কনখৎলক্লি অমসুং ঈচেল খুদিংগী অনৌবা অৱাংবা থাক্তা য়ৌরক্লি।
মরুপশিং,
ঐখোয়গী মরী অসি থাজবগী য়ুম্ফমদা শাগৎলি, মরুপ-মপাং ওইবগী পাঙ্গলনা মপাঙ্গল কনখৎহল্লি, অমসুং মতমগী মতুং ইন্না হেন্না চেৎশিল্লক্লি।
ঙসিদি ঐখোয়গী দিপ্লোমেতিক রিলেসনশিং অসিসু চহী তরেৎ মপুং ফারক্লে। মসি চহি হুম্ফু খক্তমক্তা পাংথোকপা নত্তে। মসি ঐখোয়না চহি চা কয়াগী মমাংদগী লৈরক্লবা ঐখোয়গী তুংলমচৎকী মায়কৈদা পুখৎপা য়াবা মাইলস্তোন অমনি।
মরুপশিং,
ঙসি, ঐখোয়না পুৱারী ওইরবা ৱারেপ অমা লৌরি। মসিগী ইথিল অসি লাক্কদৌরিবা চহী কয়াদা ফাওরগনি। কম্প্রিহেন্সিব ইকোনোমিক পার্তনরশিপ এগ্রীমেন্ত, নৎত্রগা সি.ই.পি.এ.না, ২১শুবা চহিচাদা ঐখোয়গী পার্তনরশিপ অসিদা নৌনা থাজবা অমসুং অনৌবা ইনর্জী পীগনি। মসি ঐখোয়গী অপুনবা তুংলমচৎকী ব্লুপ্রিন্ট অমনি। মসিনা ললোন-ইতিক্তা অনৌবা ইথিল পীরগনি, শেন থাদবগী থাজবা হেনগৎহল্লগনি অমসুং সেক্তর খুদিংমক্তা অনৌবা খুদোংচাবা কয়া ফংহল্লগনি।
সি.ই.পি.এ.না ঐখোয়গী নহারোলশিংগীদমক্তা চাউখৎপা, ইনোবেসন অমসুং থবক ফংহন্নবা অনৌবা খুদোংচাবা কয়া অমা পীগনি। এগ্রীমেন্ত অসি চেবাং খক্তগী ৱাংমদগী হেন্দোক্তুনা তশেং-তশেংবা থবক ওইনা পাংথোক্নবগীদমক, খুদিংমক্কী থৌদাং অসি য়াম্না মরু ওই। মরমদি পোলিসী অমসুং এন্তর্প্রাইজনা পুন্না চৎমিন্নরবা খক্তদা পার্তনরশিপ অমনা অনৌবা পুৱারী অমা শেম্মী।
মরুপশিং,
ভারতনা মাংলোমদা চংশিল্লকপা অসি মতম পুম্নমক্তা পুন্না হোৎনমিন্নবগী ৱারী ওইদুনা লাক্লি। ভারতনা চাউখৎলকপা মতমদা, মসিনা মসিগী মপাংশিংবু চাউখৎপগী শরুক য়ামিন্নবা ফংহল্লি। মসিমক ঙসি ঐখোয়না পাঙথোক্লি।
ঙসিদি, ভারত অসি মালেমগী খ্বাইদগী চাউবা ইকোনোমীগী অহুমশুবা মফমদা ওইরক্নবা খোঙজেল য়াংনা চংশিল্লি। মসিনা মালেম পুম্বগীদমক খুদোংচাবশিং পীরি, অদুবু ওমানগী ওইনদি মসিগী কান্নবা অসি হেন্না চাউই।
মরমদি ঐখোয়না থাজবা থম্বা মরুপ-মপাং ওইবতা নত্তনা, মেরিতাইমগী য়ুম্লোন্নবশিংসু ওইরি। ঐখোয়গী মীওইশিংনা অমগা অমগবু নীংথিনা খঙনৈ। ঐখোয়গী বিজিনেস কম্ম্যুনিতীগী মনুংদা ইন্তরজেনেসনেল ত্রস্ত লৈ অমসুং ঐখোয়না অমগা অমগগী কৈথেলশিংবু নীংথিনা খঙনৈ। অসিগুম্বা ফীভম অসিদা, ভারতকী চাউখৎপগী খোঙচৎ অসিনা ওমানগীদমক্তা খুদোংচাবা কয়া অমা পীরি।
মরুপশিং,
ঙসিগী ললোন-ইতিক্কী মালেম অসিদা, ভারতকী শেন্মিৎলোনগী মপাঙ্গল অসি পাক শন্না নৈনরি। অসিগুম্বা মালেমগী ওইবা শিংনবশিং অমসুং মালেমগী শেন্মিৎলোনগী মায়োক্তা লৈরিবা শিংনবশিংগী মরক্তা, ভারতনা মতৌ করম্না চাদা ৮গী হেনবা গ্রোথ অমা ফংলিবগে হায়না মীওইশিংনা তোইনা হংই। মসিগী তুংদা লৈরিবা মরুওইবা মরম অদু ঐহাক্না অদোমদা শন্দোক্না তাকপীবা পাম্মি।
তশেংনমক, হৌখিবা চহী তরামঙা অসিদা, ভারতনা মসিগী পোলিসীশিং খক্তমক হোংদোকখিদে; মসিনা মসিগী শেন্মিৎলোনগী দি.এন.এ. বু অহোংবা পুরকখি।
ঐহাক্না খুদম খরা পীজগে। গুদস এন্দ সর্ভিসেস তেক্স (জি.এস.তি.) না ভারতপু ইন্তিগ্রেতেদ অমসুং য়ুনিফাইদ মার্কেত অমদা ওন্থোকখ্রে। ইন্সোলভেন্সী অমসুং বেঙ্ক্রোপসী কোদ অসিনা শেল-থুমগী দিসিপ্লিন হেন্না লৈহনখ্রে, ত্রান্সপরেন্সী হেঙ্গৎহনখ্রে অমসুং ইনভেস্তরশিংগী থাজবা হেঙ্গৎহনখ্রে। মসিগা মান্ননা, ঐখোয়না কোর্পোরেৎ তেক্স রিফোর্মশিং পায়খৎলে। মসিনা ভারতপু মালেমগী খ্বাইদগী কম্পিতিতিব ইনভেস্তমেন্ত দেস্তিনেসনশিংগী মরক্তা অমা ওইহল্লে।
মরুপশিং,
অদোম্না হৌজিক পায়খৎলিবা লেবর রিফোর্মশিংগী মরমদসু খঙবা য়াই। ঐখোয়না লেবর লো কয়া অমা কোদ মরি খক্তদা পুন্সিনখ্রে। মসি ভারতকী পুৱারীদা খ্বাইদগী মরু ওইবা লেবর রিফোর্মশিংগী মনুংদা অমনি।
মরুপশিং,
পোলিসীনা ময়েক শেংলকপা মতমদা, মেন্যুফেকচরিংনা থাজবা হেনগৎলকই। নাকল অমরোমদা ঐখোয়না পোলিসী অমসুং প্রোসেস রিফোর্মশিং পায়খৎলি। অদুগা নাকল অমরোমদা ঐখোয়না ভারত্তা মেন্যুফেকচরিং প্রমোৎ তৌনবা প্রদক্সন লিঙ্ক ইন্সেন্তিবশিং পীরি। অসিগুম্বা হোৎনবা কয়া অসিনা মরম ওইদুনা 'মেক ইন ইন্দিয়া' ইনিসিয়েতিব অসিনা ঙসি মালেম পুম্বদা য়াম্না চাউনা পুক্নিং থৌগৎলি।
মরুপশিং,
ভারতকী দিজিতেল পব্লিক ইনফ্রাস্ত্রকচরনা রিফোর্মশিং অসিবু হেন্না মপাঙ্গল কনখৎহল্লে। লৈঙাক অসি পেপরলেস ওইখ্রে, শেন্মিৎলোন অসি কেশলেস ওইখ্রে, অমসুং সিস্তেম অসি হেন্না ইফিসিএন্ত, ত্রান্সপরেন্ত, অমসুং প্রদিক্তিব ওইখ্রে।
দিজিতেল ইন্দিয়া অসি প্রোজেক্ত অমা খক্তা নত্তে, মসি মালেমগী খ্বাইদগী চাউবা ইনক্লুজন রিভোলুসননি। মসিনা ইজ ওফ লিভিং হেনগৎহল্লে অমসুং ইজ ওফ দুইং বিজিনেসবু অনৌবা থাক অমদা পুখৎলে। ভারত্তা শেমগৎলক্লিবা মোদর্ন ফিজিকেল ইনফ্রাস্ত্রকচর অসিনা মসি হেন্না মপুং ফাহনরি। কনেক্তিবিতী ফগৎলকপগা লোয়ননা ভারত্তা লোজিস্তিক্সকী মমল লেপ্তনা হন্থরক্লি।
মরুপশিং,
মালেম্না ভারতপু ইনবেস্তমেন্তকীদমক্তা য়াম্না পাম্নবা মফম অমা ওইনা খঙনরি। অমরোমদা, ভারত অসি থাজবা য়াবা, তুংলমচৎকীদমক শেম-শারবা পার্তনর অমনি। মসি ওমাননা য়াম্না ফজনা খঙই অমসুং থাগৎলি।
ঐখোয়গী জোইন্ত ইনভেস্তমেন্ত ফন্দনা চহি কয়াদগী ঐখোয়গী লৈবাক অনিগী মরক্তা ইনভেস্তমেন্ত প্রমোৎ তৌদুনা লাক্লি। ইনর্জী ওইগেরা, ওইল অমসুং গ্যাস ওইগেরা, ফর্তিলাইজর ওইগেরা, হেল্থ ওইগেরা, পেত্রোকেমিকেল ওইগেরা, নৎত্রগা গ্রীন ইনর্জী ওইগেরা, সেক্তর খুদিংমক্তা অনৌবা খুদোংচাবশিং থোরক্লি।
অদুবু মরূপশিং, ভারত অমসুং ওমান অসি মসিখক্তদা লুপতুনা লৈবা ওইদে। ঐখোয়না ঐখোয়গী কম্ফোর্ৎ জোনদা লৈরোই। ঐখোয়না ভারত-ওমান পার্তনরশিপপু মথংগী থাক্তা পুখৎকদবনি। মসিগীদমক্তা, লৈবাক অনিমক্কী ললোন-ইতিক্কী কাংলুপশিংনা মখোয় মশাগীদমক চাউথোকচনীংঙাই ওইবা পান্দমশিং থমগদবনি।
ঐহাক্না অদোমগী থবক অসি শিংনবশিং খরা পল্লদুনা খরা হেন্না লাইথোকহল্লগনি। ঐখোয়না গ্রীন ইনর্জীগী মতাংদা মগুন লৈরবা খরা ফংনবগীদমক পুন্না থবক তৌমিন্নবা ঙমগদ্রা? লাক্কদৌরিবা চহি মঙা অসিদা ঐখোয়না অচৌবা গ্রীন প্রোজেক্ত মঙা হৌদোকপা ঙমগদ্রা? ঐখোয়না গ্রীন হাইদ্রোজেন, গ্রীন অমোনিয়া, সোলর পার্কশিং, ইনর্জী স্তোরেজ অমসুং স্মার্ত গ্রিদশিংদা অনৌবা থাকশিং থমসি।
মরুপশিং,
ইনর্জী সেক্যুরিতী অসি মরু ওই, অমসুং ফুদ সেক্যুরিতী অসিসু চপ মান্ননা মরু ওই। লাক্কদৌরিবা চহিশিংদা, মসি মালেম পুম্বদা অচৌবা শিংনরকপা অমা ওইরগনি। ঐখোয়না ইন্দিয়া-ওমান এগ্রি ইন্নোবেসন হব অমা লিংখৎনবা পুন্না থবক তৌমিন্নবা য়াগদ্রা? খোঙথাং অসিনা ওমানগী ফুদ সেক্যুরিতী মপাঙ্গল কনখৎহল্লগনি অমসুং ভারতকী এগ্রিকলচর তেক্নোলোজী সোলুসনশিং মালেমগী কৈথেলশিংদা য়ৌহনবদা মতেং পাংগনি।
মরুপশিং,
লৌউ-শিংউ হায়বসি হীরম অমখক্তনি। চপ মান্ননা, সেক্তর খুদিংমক্তা ইনোবেসন পুক্নিং থৌগৎকদবনি। অসুম্না, ঐখোয়না "ওমান-ইন্দিয়া ইনোবেসন ব্রিজ" অমা শেম্বা ঙমগদ্রা? ঐখোয়গী পান্দমদি লাক্কদৌরিবা চহি অনি অসিদা ভারত অমসুং ওমানগী স্তার্ত অপ ২০০গা শম্নহনবনি।
ঐখোয়না জোইন্ত ইনক্যুবেতরশিং, ফিনতেক সেন্দবোক্সশিং, এ.আই. অমসুং সাইবর সেক্যুরিতী লেবোরেতরীশিং শেমগদবনি, অমসুং ক্রোস-বোর্দর ভেঞ্চর ফন্দিং প্রমোৎ তৌগদবনি।
মরুপশিং,
মসি ৱাখল্লোন খক্তমক নত্তে, মখোয় অসি চেবাউ অমনিঃ
শেল থাদনবগী চেবাউ।
ইনোবেসন তৌনবা চেবাউ।
পুন্না তুংলমচৎ শেমগৎনবা চেবাউ।
অনৌবা তেক্নোলোজী, অনৌবা ইনর্জী অমসুং অনৌবা মঙলানগী পাঙ্গলগা লোয়ননা ঐখোয়না মতম শাংনা লৈরক্লবা মরুপ-মপাং ওইবগী মরী অসি মাংলোমদা চংশিনসি।
শুক্রান জাজিলান!
অদোমবু থাগৎচরি!
