ঐগী মন্ত্রী মন্দলগী খোঙলোই, শ্রী মনসুখ ভাই, ইন্দিয়ন ফার্মাস্যুতিকেল এলাইন্সকী প্রসিদেন্ত শ্রী সমীর মেহতা, কেদিল্লা হেল্থকেয়র লিমিতেদকী চিয়রমেন, শ্রী পঙ্কজ পতেল, শরুক য়াবীরিবশিং,
খুরুমজরি!
ইহান হানবদা, ঐনা গ্লোবেল ইনোবেশন সমিৎপু শিনবীরিবা ইন্দিয়ন ফার্মাস্যুতিকেল এসোসিএসনবু থাগৎপা ফোংদোকচরি।
কোবিদ-১৯ লাইচৎনা হকশেলগী লমদা মরুওইনা খনবা য়াম্না হেনগৎহল্লে। হেল্থকেয়রগী লম পুম্নমক্না হৌখিবা চহি অনি অসিদা হিংবগী মওংবু ওইরো, নত্ত্রগা হিদাক-লাংথক, মেদিকেল তেক্নোলোজী, নত্ত্রগা ভেক্সিনবু ওইরো, মালেমগী পুক্নীং চিংশিল্লি। মসিগী মতাংদা, শিংনবা অসিদা ফার্মাস্যুতিকেল ইন্দস্ত্রীনসু চাউনা খুমাং চাউশিল্লি।
ইন্দিয়ন হেল্থকেয়র সেক্তরনা ফংলিবা মালেমগী থাজবা অসিনা হৌখিবা মতম অসিদা ভারতপু “মালেমগী ফার্মসী” হায়না কৌনরে। চাউরাক্না মীওই মিলিয়ন ৩ লোমদা থবক পীবা অমসুং চাউরাক্না দোলর বিলিয়ন ১৩গী ত্রেদ সর্প্লস শেম্বা, ইন্দিয়ন ফার্মা ইন্দস্ত্রী অসি ঐখোয়গী শেনমিৎলোন চাউখৎহনবদা অথোইবা শক্লোন অমা লৌরি।
অহোংবা মমলদা মগুন ৱাংবা অমসুং চাংগী অপুনবনা মেলেম শিন থুংবদা ইন্দিয়ন ফার্মা সেক্তরদা অদুক্কী মতিক অপাম্বা পোকহল্লে। ২০১৪গী মতুংদগী, ইন্দিয়ন হেল্থকেয়র সেক্তরনা ফোরেন দাইরেক্ত ইনভেস্তমেন্ততা দোলর বিলিয়ন ১২দগী হেন্না পুক্নীং চিংশিনখি। অমসুং, মসিদা নত্তনা ওইথোকপা য়াবা কয়া অমসু লৈরি।
মরূপশা,
নুংঙাই-য়াইফবা হায়বসিগী ঐখোয়গী ৱাহন্থোক অসি ঙমখৈনা অকক্নবা লৈহন্দে। ঐখোয়না অপুনবা মীওইবা কাংলুপকী য়াইফবা অদুদা থাজবা থম্মি।
সর্ব ভবন্তু সুখিনঃ সর্বে সন্তু নিরাময়াঃ।
অমসুং, ঐখোয়না কোবিদ-১৯ মালেমগী লাইচৎ মনুংদা মালেম অপুনবা অসিগীদমক ৱাখল্লোন অসি ফোংদোকখি। লাইচৎ অসি হৌরকপা মতমদা ঐখোয়না লৈবাক ১৫০ হেনবদা লাইব সেবিংস হিদাকশিং অমসুং মেদিকেল ইক্বিপমেন্ত থাখি। হন্দক্কী চহি অসিদা ঐখোয়না চাউরাক্না লৈবাক ১০০ রোমদা কোবিদ ভেক্সিন মিলিয়ন ৬৫দগী হেন্না থাখি। লাক্কদৌরিবা থা খরা অসিদা, ঐখোয়না ভেক্সিন পুথোকপা অসুম অসুম হেনগৎলকপগা লোইননা, ঐখোয় অতৈ ময়াম অমসু তৌরক্কনি।
মরূপশা,
পুন্সিগী লম পুম্নমক্তা কোবিদ-১৯গী চহি চা অসিদা ইনোবেসনগী মরুওইবা অসিদা হেন্না মপাঙ্গল হাপখ্রে। অপনবা অথিংবশিংনা ঐখোয়না ঐখোয়গী পুন্সি মহিং, ঐখোয়গী ৱাখল্লোন অমসুং থবক তৌবগী মওংবু অমুক হন্না খনজিনবদা হেন্না শাফু পীরে। ইন্দিয়ন ফার্মা সেক্তরগী মতাংদসু, মসিগী খোঙজেল, চাং অমসুং ইনোবেসনগীদমক্তা ফাওরক্লিবা ইহুল অসি য়াম্না মতিং লৈ। খুদম ওইনা, ইনোবেসনগী ইহুল অসিননি ভারতনা পি.পি.ই.শিংগী মরুওইবা প্রদ্যুসর অমা ওইবা ঙমহল্লিবা। অমসুং, ইনোবেসনগী ইহুল অসিননি ভারতপু কোবিদ-১৯ ভেক্সিন থিদোকপা, পুথোকপা, থৌপাংবা, অমসুং থাদোকপদা মাংজিল থাহল্লিবা।
মরূপশা,
ফার্মা সেক্তরদা ইনোৎ হাপ্নবগীদমক্তা ভারত সরকারনা পায়খৎলিবা খোঙথাংশিংদা ইনোবেসনগা মান্নবা ৱাখল্লোন থোরক্লি। হৌখিবা থাদা, সরকারনা “ভারত্তা ফার্মা-মেদতেক সেক্তরদা রিসর্স অমসুং দিবেলপমেন্ত অমসুং ইনোবেসন্দা ইনোৎ হাপ্পা পোলিসী” হায়বা অসিদা দ্রাফ দোক্যুমেন্ত অমা থোদোক্লে। পোলিসী অসিদা ফার্মস্যুতিকেল্স অমসুং মেদিকেল দিভাইসশিংদা রিসর্স অমসুং দিবেলপমেন্ত হেনগৎহন্নবা থম্লিবা ভারতকী ৱাফম অদু উৎলি।
মরূপশা,
ইন্দস্ত্রী, একাদমিক ৱার্ল্দ অমসুং মরু ওইনা ঐখোয়গী তেলেন্ত লৈরবা নহারোলশিংগী তেংবাং মরুওই। মরম অসিনা ঐখোয় একাদমিয়া অমসুং ইন্দস্ত্রীগী মরক্তা তেংবাং পীনবা হেনগৎহল্লি। ভারত্তা সাইন্তিস্তশিং অমসুং তেক্নোলোজিস্তশিংগী অচৌবা তীম অমা লৈ মদুনা ইন্দস্ত্রীবু অনৌবা মতোন অদুদা পুবা ঙমহল্লি। পাঙ্গল অসি “দিস্কভর এন্দ মেক ইন ইন্দিয়া”গীদমক্তা শিজিন্নবীয়ু।
মরূপশা,
ঐনা অদোমদা খঙহনবা পাম্বা লম অনিখক্কী মতাংদা ফোংদোকচবা পাম্মি। অহানবা অসি রো মেতরিএলশিং মথৌ তাবশিংগা মরী লৈনৈ। ঐখোয়না কোবিদ-১৯গা মায়োক্নরিঙৈ মনুংদা, ঐখোয়না খঙখি মদুদি মসি অদুক্কী মতিক পুক্নীং চংনীংঙাই ওইবা ৱাফম্নি হায়বসে। ঙসি ভারতপু আত্মনির্ভর ওইহন্নবগীদমক মীওই বিলিয়ন ১.৩না ফিরেপ লৌরিবা অসিদা, ঐখোয় ভেক্সিন অমসুং হাদাক-লাংথক্কীদমক্তা মরুওইবা মচলশিংগী ওইবা দোমেস্তিক মেন্যুফেকচরিং হেনগৎহন্নবগী মতাংদা খনবা মথৌ তাই। মসি ভারতনা মায় পাকপা মথৌ তাবা অদুগুম্বা লম অমনি।
ঐনা চেৎনা থাজৈ মদুদি ইনভেস্তর অমসুং ইনোবেসনশিংনা শিংনবা অসিগা মায়োক্ননবা পুন্না থবক তৌমিন্ননবগীদমক লাংতক্নরি। অতোপ্পা শরুক অদু ভারতকী ত্রেদিস্নেল মেদিসিনগা মরী লৈনৈ। মালেমগী কৈথেলদা হৌজিক হায়রিবা পোৎথোকশিং অদু মরুওইবা হেনগৎলক্লি অমসুং য়াম্না পাম্নরক্লি। মসি হন্দক্কী চহি খরা অসিদা হায়রিবা পোৎথোকশিং থাদোকপদা হেনগৎলক্লিবা অসিদা উবা ফংই। ২০২০-২১ খক্তদা ভারতনা দোলর বিলিয়ন মঙাগী হর্বেল মেদিসিনশিং থাদোকখি। দবল্যু.ঐচ.ও.না ভারত্তা ত্রেদিস্নেল মেদিসিনগীদমক্তা গ্লোবেল সেন্তর লিংখৎনবগীদমক্তসু থবক পায়খৎলি। অদোম মালেমগী তঙাইফদবশিং, সাইন্তিফিক স্তেন্দর অমসুং খ্বাইদগী ফবা মেন্যুফেকচরিং প্রাক্তিসশিংগী মনুং চন্না ঐখোয়গী ত্রেদিস্নেলবু মীয়াম্না পাম্নহন্নবা অহেনবা থৌওশিংগী মতাংদা খনবীবা ঙম্বরা?
মরূপশা,
ঐনা ময়াম পুম্নমক্তা ভারত্তা খন্নবা, ভারত্তা থিজিন্নবা অমসুং মালেমগীদমক্তা ভারত্তা পোৎথোক পুথোক্নবগীদমক চে-বাও পীজরি। অদোমগী অশেংবা থৌনা অদু থিদোকপীয়ু অমসুং মালেমগী থৌগল তৌবীয়ু।
ঐখোয়গী ইফমদা ইনোবেসন অমসুং ইন্তর্প্রাইজগীদমক্তা মথৌ তাবা তেলেন্ত, রিসোর্সশিং অমসুং ইকো সিস্তেম লৈরি। ঐখোয়গী খোঙজেল য়াংবা খোঙহৌ, ইনোবেসনগী ৱাখল্লোন অমসুং ফার্মা সেক্তরদা ঐখোয়না ফংলকপশিংগী থাক অদু মালেমনা উরে। মাংদা চখৎনবা অমসুং অনৌবা মতোল অদু ওন্ননবা মসি খ্বাইদগী ফবা মতমনি। ঐনা গ্লোবেল অমসুং দোমেস্তিক ইন্দস্ত্রীগী লুচিংবশিং অমসুং স্তেকহোল্দরশিংদা থাজবা পীজরি মদুদি ভারত ইনোবেসন্দা ইন্দিয়ন ফার্মাস্যুতিকেল ইন্দস্ত্রীগী ফিভম ফগৎহন্নবগীদমক ফিরেপ লৌরি। সমিৎ অসি আর.&দি. অমসুং ইনোবেসন্দা ইন্দিয়ন ফার্মাস্যুতিকেল ইন্দস্ত্রীগী ফিভম চেৎশিলহন্নবগীদমক মরুওইবা থৌরম অমনি।
নুমিৎ নিনিগী ওইবা সমিৎ অসিদা খন্ন-নৈনখিবশিং অদুবু মায় পাকহনবীবগীদমক ঐনা শিল্লি-লাংলিবশিংবু অমুক্কা হন্না থাগৎপা ফোংদোকচরি।
অদোম্বু থাগৎচরি।
অদোম্বু হায়নীংঙাই লৈতনা থাগৎচরি।
