ভারত ইমানা, য়াইফরে!
ভারত ইমানা, য়াইফরে!
জৌন মহোবাগী ইচেলদা, আল্হা-উদল অমসুং অথৌবা চন্দেলশিংগী থৌনা ঈরিক খুদিংদা চেল্লি, অমসুং মহোবাগী মফমদা, ঐনা হন্না হন্না খুরুমজরি।
উত্তর প্রদেশকী রাজ্যপাল শ্রীমতী আনন্দীবেন পতেলজী, য়ু.পি.গী মীয়াম্না পাম্নরবা কর্ময়োগী মুখ্যমন্ত্রী য়োগী আদিত্যনাথজী, কেন্দ্রগী মন্ত্রিমন্দলদা ঐগী খোঙলোই ওইরিবা শ্রী গজেন্দ্র সিংহ শেখাৱৎজী, য়ু.পি. সরকারদা মন্ত্রী ওইরিবা দোক্তর মহেন্দ্র সিংহজী, শ্রী জি.এস. ধর্মেশজী, সংসদতা ঐগী খোঙলোই আর.কে. পতেলজী, শ্রী পুশপেন্দ্র সিংহজী, য়ু.পি. বিধান পরিশদ অমসুং বিধানসভাগী খোঙলোই শ্রী স্বতন্ত্রদেব সিংহজী, শ্রী রাকেশ গোস্বামীজী, অতৈ মীহুৎ ময়াম অমসুং মফম অসিদা লেংবীরক্লিবা ঐগী ইচিল-ইনাও, ইচল-ইচেশিং!!
মহোবাগী পুৱারী ওইরবা লমদম অসিদা লাকপদা, তোপ তোপ্পা ইথিল অমা ফাওজৈ। মতম অসিদা লৈবাক, লৈবাক অসিগী নীং-খা তম্বা অমসুং লৈবাক শেম্বদা ত্রাইবেল মরূপশিংগী থৌদাংদা কৎথোক্লবা জনজাতীয় গৌরব চয়োলসু পাংথোক্লি। মতম অসিদা থৌনা ফবা আল্হা অমসুং উদলগী শেংলবা লমদম অসিদা লাকচবা, মসি ঐগীদমক্তদি য়াম্না লাইবক ফবনি। মীনাই নাইথাংগী খোঙচৎ অদুদা ভারত্তা অনৌবা মৈরা অমা চুখৎপীরম্বা গুরুনানক দেবজীগী ঙসি প্রকাশ পর্বসু তারি। ঐনা লৈবাক অসিগী অমসুং মালেম অসিগী মীয়াম্বু গুরু পুরবকীদমক্তা য়াইফ-পাউজেল পীজরি। ঙসি অসিমক ভারতকী থৌনা ফবী মচা নিংঙোল, বুন্দেলখন্দগী চাউথোকচনীংঙাই, থৌনাফবী রানী লক্ষ্মীবাইগী মপোক কুমওনসুনি। থৌরম অসিগী মতুংদা ঐ ঝান্সীদসু চৎকনি। দিফেন্সকী য়াম্না চাউবা থৌরম অমা মফম অদুদা পাংথোক্লি।
ইচিল-ইনাও অমসুং ইচে-ইচলশিং,
ইচিল-ইনাও অমসুং ইচে-ইচলশিং,
হৌজিক ঐ ঙসি মফম অসিদা বুন্দেলখন্দগী ইচে-ইচল অমসুং ঐগী নুংশিজরবা লৌমী ইচিল-ইনাওশিংদা য়াম্না চাউবা খুদোল শিন্নবা লাক্লিবনি। ঙসি অর্জুন তেংবাং প্রোজেক্ত, রতৌলী দাম প্রোজেক্ত, ভাবনী দাম প্রোজেক্ত অমসুং মঝগাঁও চিল্লী স্প্রিংকল ইর্রিগেসন প্রোজেক্ত লৈবাক মীয়ামদা কৎথোকচবগী লায়বক ফবা অদু ফংজরে। লুপা করোর লিশিং ৩দগী হেন্না চংবা প্রোজেক্তশিং অসিদগী মহোবাগী মীয়ামগা লোইননা হমীরপুর, বান্দা অমসুং ললিতপুর জিলাগীসু মীওই লাখ কয়া, লৌমী ইমুং লাখ কয়াসু কান্নবা ফংগদৌরিবনি। মসিদগী মীওই লাখ ৪ হেনবনা থক্ননবা অশেংবা ঈশিংসু ফংলগনি। মীরোল কয়াদগী ঙাইরক্লিবা ঈশিং অদু, ঙসি ঙাইবগী মতম লোইরগনি।
মরূপশা,
অদোমগী থৌনা অদু কোক্তা থোংগৎচরি। অদোমগী মীনুংশি ঐগীদমক্তদি পুম্নমক্নি অদুবু ঐনা খুরুমজরি মদুদি য়েংবীয়ু মাংদা মফম লৈত্রে, অদোম মাংদা লাক্তনবা হোৎনবীয়ু, অমসুং মফম অদুদসু খরা ইং-তপ্না লৈবীয়ু।
মরূপশা,
গুরু নানক দেবজীনা হায়বীরম্মি-
পহলাং পানী জীও হৈ, জিত হরিয়া সভ কোয়!!
হায়বদি, ঈশিং অসি মতম পুম্নমক্তা মরুওইনা লৌগদবনি মরমদি ঈশিংদগী খুৎশেম পুম্নমক্না পুন্সি ফংলিবনি। মহোবা য়াওনা লমদম অপুনবা অসি চহি লিশিং কয়াগী মমাংদগী ঈশিং য়োকশিনবা অমসুং ঈশিং ঙাক-শেনবগী অথোইবা মোদেল অমা ওইরম্মি। বুন্দেল, পরিহার অমসুং চন্দেলগী নিংথৌশিংগী মতমদা মফম অসিদা পুখ্রি-খোঙশিংদা তৌরম্বা থবকশিং অদু, ঙসিসু ঈশিং ঙাক-শেনবগী থোইদোক্না ফরবা খুদম অমনি। সিন্ধ, বেতৱা, ধসান, কেন অমসুং নর্মদাগুম্বা তুরেলশিংগী ঈশিংনা বুন্দেলখন্দবু ৱাৎত-পাদবসু ওইহল্লি, মমিংসু চৎহল্লি। চিত্রকুৎ অসিমক, বুন্দেলখন্দ অসিমক, মসিনা বন্দা চৎখিবা মতমদা প্রভু রামগী খোঙলোই ওইখি, মফম অসিগী উমংগী লন-থুম অসিনসু মহাকপু থৌজান পীনবীখি।
অদুবু মরূপশা,
হংলিবদি মতমগী মতুং ইন্না লমদম অসিনা ঈশিংগী শিংনবা অমদি অৱাৎপগী মফম অসি করম্না ওইখ্রিবনো? লমদম অসিদা মীয়াম্না মচানুপীবু থাজ-য়োঞ্জবদা করিগী নীংহন্নরিবা, মফম অসিগী মচা নিংঙোলশিংনা ঈশিং লৈবা মফমদা করিগী লুহোংবা পাম্লিবা। ৱাহংশিং অসিগী পাউখুম মহোবাগী মীয়াম্না, বুন্দেলখন্দগী মীয়াম্না মমুৎ তানা খঙই।
দিল্লী অমসুং উত্তর প্রদেশতা মতম কুইনদগী লৈঙাক্লকপশিংনা মথং মথং ওইনা লমদম অসিবু কাং-খোঙ চাইহনবদা অখাকপা অমত্তা থম্লমদে। মফম অসিগী উমংবু, মফম অসিগী রিসোর্সশিংবু করম্না মাফিয়াগী খুৎতা শিন্নখিবা, মসিনা কনাদসু লোৎপা লৈতে। অমসুং হৌজিক য়েংবীয়ু, অদুগুম্বা মাফিয়াশিং অদুদা য়ু.পি.দা বুলদোজর থৌজিনবা মতমদা, মীওই খরদি অৱাবা ওইনরি। মীওইশিং অসিনা অদুক্কী মতিক অৱাবা ফাওজরবসু, য়ু.পি.গী চাউখৎ-থৌরাংগী থবক, বুন্দেলখন্দগী চাউখৎ থৌরাংগী থবক্তি খক লেপ্লরোই।
মরূপশা,
ইচিল-ইনাও অমসুং ইচে-ইচলশিং,
মখোয়না করম্বা থবক তৌখিবা, মসিগী খুদম অমনি মসিগী অর্জুন তেংবাং প্রোজেক্ত অসি। চহি কয়া প্রোজেক্ত অসি পন্দুনা লৈখি, মপুং ফাদনা লৈখি। ২০১৪গী মতুংদা ঐনা লৈবাক অসিদা অসিগুম্বা পন্দুনা লৈরক্লবা প্রোজেক্তশিং, অসুম্না পন্দুনা লৈরক্লবা ইর্রিগেসনগী স্কিমশিংগী রিকোর্দ তানবা হৌরকখি। অর্জুন তেংবাং প্রোজেক্ত অসি অথুবা মতমদা লোইশিন্নবগীদমক্তসু মতম অদুগী য়ু.পি. সরকারগা কয়ারক হন্না ৱারী শানখি, থাক কয়াদা ৱারী শানখি। অদুবু বুন্দেলখন্দগী মরাল লৈরবশিং অদুনা, মফম অসিদা ইর্রিগেসনগী প্রোজেক্তশিং মপুং ফাহনবা খক পামখিদে।
২০১৭তা য়োগীজীগী সরকার শেম্লবা মতুংদা মমৈথংদা, প্রোজেক্ত অসিদা খোঙজেল হাপখি। অমসুং ঙসি প্রোজেক্ত অসি অদোমদা, বুন্দেলখন্দগী মীয়ামদা কৎথোকচরি। চহি তরাগী খুজিং কয়া বুন্দেলখন্দগী মীয়াম্না নম্ফু-শাফুদা মুনবা সরকারশিং উরকখি। অহানবা ওইনা বুন্দেলখন্দগী মীয়াম্না, মফম অসিগী চাউখৎ-থৌরাংগীদমক্তা থবক তৌবা সরকার উরি। বুন্দেলখন্দগী ঐগী ইচিল-ইনাওশিং, মসিগী অহকপা অচুম্বা অসি কনা অমত্তনা কাওথোকপা ঙম্লোই মদুদি মখোয় উত্তর প্রদেশপু লুৎ তৌরগা চোকথবা নাইরমদে অমসুং থবক পুমনমক তৌবদা চোকথবা নাইদে।
মরূপশা,
লৌমীশিংবু মতম পুম্নমক্তা সমস্যাশিংদা য়েৎশিন্দুনা থম্বা অসিমক রাজনীতি দল খরগী অনীংবনি। মখোয় সমস্যাশিংগী রাজনীতি তৌই অমসুং ঐখোয়না পাম্বৈ পুথোকপগী রাস্ত্রনীতি তৌই। কেন-বেতৱা লিঙ্ককী পাম্বৈসু ঐখোয়গী সরকারনা পুথোকপনি, নাকল পুম্নমক্কা ৱারী শানদুনা লম্বী পুথোকই। কেন-বেতৱা লিঙ্কতগীসু তুংলমচৎতা মফম অসিগী লৌমী লাখ কয়ানা কান্নবা ফংগদৌরিবনি। য়োগীজীগী সরকারনা হৌখিবা চহি ৪ মখাইগী মতমদা বুন্দেলখন্দদা ঈশিংগী প্রোজেক্ত কয়ামরুমদা থবক পায়খৎলি। ঙসি মসগাঁও চিল্লী স্প্রিংকলর স্কিমগুম্বা অনৌবা তেক্নিক মীয়ামদা কৎথোকপা অসিনা, ইর্রিগেসন্দা পুরক্লিবা অনৌবা অসি উৎলি।
মরূপশা,
উত্তর প্রদেশকীসু মফম কয়ামরুমগী ঐগী ইচিল-ইনাও/ইচে-ইচলশিংনা কচ্ছদা লাক্তুনা লাইবক চাং য়েংলরি। অমসুং কচ্ছগী ঐগী খঙলক-উরকপশিং অদুনা হায়রিবনি, ঐখোয় বুন্দেলখন্দবুসু অমুক হন্না মদুগী পাঙ্গল অদু হাপ্পা ঙম্মি, অমুক হন্না অনৌবা পুন্সি পীবা ঙম্মি। মফম অসিগী ইমা-ইচেশিংগী খ্বাইদগী চাউবা অৱাববু কোকহন্নবগীদমক্তা, বুন্দেলখন্দদা জল জীবন মিশনগী মখাদসু খোঙজেল য়াংনা থবক পায়খৎলি। বুন্দেলখন্দ অমসুং মসিগা লোইননা বিন্ধ্যাঞ্চলদা, পাইপ্তগী য়ুমথোং খুদিংদা ঈশিং য়ৌনবা, মসিগীদমক্তা অখন্ননা খোঙজং চংশিল্লি।
ইচিল-ইনাও অমসুং ইচে-ইচলশিং,
ইমুং-মনুংতগী ৱাখলচেনবা সরকারশিংনা চহি তরাগী খুজিং কয়া য়ু.পি.গী খুঙ্গং অয়াম্বা খৌগংননা থম্বীখি। কর্ময়োগীশিংগী সরকারশিংনা শুপ্নগী চহি ২গী মনুংদা ইমুং লাখ ৩০বু য়ু.পি.দা কোঞ্জিলদগী ঈশিং পীরে। ইমুং-মনুংতগী ৱাখলচেনবা সরকারশিংনা অঙাংশিংবু, ইচানুপীশিংবু, স্কুলদগী তোঙানবা অমাংশঙ, থক্নবা ঈশিংগী খুদোংচাবদগী লাপ্না থম্বীখি, কর্ময়োগীশিংগী দবল ইঞ্জিনগী সরকারনা ইচানুপীশিংগীদমক্তা স্কুলদা তোঙানবা তোয়লেৎসু শারে অমসুং য়ু.পি.গী স্কুল লাখ ১দগী হেনবা, আংগনৱারী সেন্তর লিশিং কয়া কোঞ্জিলদগী ঈশিংসু ফংহল্লে। লাইরবগী চাউখৎপা অসিমক খ্বাইদগী মরুওইবনি, অদুনা মসি অসুম্না থবক পাংথোকই, অসুক্কী মতিক খোঙজেল য়াংনা থবক পাংথোকই।
ইচিল-ইনাও অমসুং ইচে-ইচলশিং,
ঐখোয়গী সরকারনা মরু-মরাংদগী হৌরগা কৈথেল ফাওবা থাক খুদিংমক্তা লৌমীশিংগী কান্ননবগীদমকসু খোঙথাং লৌখৎলি। হৌখিবা চহি ৭ লোম অসিদা অফবা মরু-মরাং ১৬০০ মখাইদগী হেন্না শেম-শাখ্রে। মদুগী মনুংদা মরু-মরাং কয়ামরুম ঈশিং লিকপা মফমদা হেন্না পোৎথোক লৈ। ঙসি বুন্দেলখন্দগী লৈবাক-লৈহাওদা চুজাক, হৱাই অমসুং থাও থোকপা মরুদা সরকারনা থোইদোক্না ফোকস তৌরি। হৌখিবা চহি খরা অসিদা থোইদিং লৈবদা রিকোর্দ থমখি। হন্দক্তা হঙ্গাম, মুসোরীগুম্বা হৱাই কয়া মরুমগীদমক্তা ক্বিন্তন অমদা লুপা ৪০০ ফাওবা এম.এস.পি. হেনগৎহনখ্রে। ভারত, অচাথাওদা আত্মনির্ভর ওইনবা, অচাথাও মীরমদগী পুশিল্লক্নবা চহি খুদিংগী ঐখোয় লুপা করোর লিশিং ৮০ থারম্বদু, লুপা করোর ৮০ লৌমীশিংগী মফমদা য়ৌনবা, অদোম্না ফংনবা, লৈবাক্কী ওইবা মিশন হৌদোক্লে। মসিদগী বুন্দেলখন্দগী লৌমীশিংবুসু মতেং য়াম্না ফংগদৌরিবনি।
ইচিল-ইনাও অমসুং ইচে-ইচলশিং,
ইমুং-মনুংতগী ৱাখলচেনবা সরকারনা লৌমীশিংবু শুপ্নগী নাথৈদুনতা থম্বা পামখি। মখোয়না লৌমীশিংগী মিংদা লাওথোকই, অদুবু লৌমীদা শিকি অমফাওবা য়ৌখিদে। অদুম ওইনমক পি.এম. কিসান সম্মান নিধিদগী ঐখোয়না হৌজিক ফাওবদা লুপা করোর লাখ ১ লিশিং ৬২ হকথেংননা লৌমীশিংগী বেঙ্ক একাউন্ততা থাখ্রে। শেনফম পুম্নমক অসি লৌমী ইমুং খুদিংমক্তা য়ৌখ্রে। ইমুং-মনুংতগী ৱাখলচেনবশিংনদি অপীকপা লৌমীশিং-শা-শন য়োকপশিংবু কিসান ক্রেদিৎ কার্দকী খুদোংচাবা অসিদগীসু লাপ্না থম্বীখি। ঐখোয়গী সরকারনা অপীকপা লৌমীশিংবু কিসান ক্রেদিৎ কার্দকী খুদোংচাবগসু নপশিন্ননবা থবক তৌরি।
ইচিল-ইনাও অমসুং ইচে-ইচলশিং,
অসিগুম্বা থৌরম কয়াদগী দবল ইঞ্জিনগী সরকারনা চহি তরাগী খুজিং অসিদা বুন্দেলখন্দগী, উত্তর প্রদেশকী চহি তরাগী খুজিং ওইহন্নবা হোৎনরি। দবল ইঞ্জিন অসিনা অদোমগী থৌজালগী পাঙ্গল ফংদুনা লৈখিগনি, থাজবা অসিগা লোইননা ঐ অদোম পুম্নমক্কী অয়াবা লৌজরগা মফম অসিদগী হৌজিক ঝান্সীগী থৌরমগীদমক চৎচগদৌরি। অদোম অসুক য়াম্না লাক্তুনা ঐখোয় পুম্নমকপু থৌজাল পীনবীরি, মসিগীদমক্তা ঐনা থমোয় শেংনা অদোমগী লমন হন্না হন্না তোনশিল্লে। ঐগা লোইননা হায়বীয়ু -
ভারত ইমানা, য়াইফরে!
ভারত ইমানা, য়াইফরে!
ভারত ইমানা, য়াইফরে!
হন্না হন্না থাগৎচরি!
