ঙসি প্রধান মন্ত্রী শ্রী নরেন্দ্র মোদীনা ভিদিও মেসেজগী খুৎথাংদা অসাম রোজগার মেলাদা ৱা ঙাংখ্রে।
মীয়ামদা ৱা ঙাংবদা, প্রধান মন্ত্রীনা অসাম সরকারগী থবক ফংলবা নহারোলশিং অমসুং মখোয়গী ইমুং-মনুংগী মীওইশিংদা হরাওবা ফোঙদোকখি। মহাক্না হায়খি হৌখিবা থাদা বিহু কুহ্মৈ শরুক য়ানবা মহাক অসামদা লাক্লম্লে। অসামগী কলচর মশক তাকখিবা অচৌবা থৌরম অদু হৌজিক ফাওবা মহাক নিংশিংলি। অসামদা নহারোলশিংগী তুংগী পুন্সি লুম্না লৌবগী মমি অমা ঙসিগী রোজগার মেলা অসিদা তারে। মসিগী মমাঙদা অসামদা রোজগার মেলদা নহারোল লিশিং ৪০ হেনবদা সরকারগী থবকশিং ফংহনখ্রে। ঙসি নহারোল লিশিং ৪৫ হেনবদা এপোইন্তমেন্ত লেতরশিং য়েন্থোকখ্রে অমসুং নহারোলশিংগী তুংগী অফবা পুন্সি অমগীদমক থৌনিজরি।
প্রধান মন্ত্রীনা হায়খি অসামদা শান্তি অমসুং চাউখৎপগী অনৌবা যুগ অমা উবা ফংলে অমসুং চাউখৎপগী খোঙজেল অসিনা অসামদা অফবা অমসুং থাজবা হেনগৎহনগনি। তোঙান-তোঙানবা দিপার্তমেন্তশিংদা থবক হাপ্নবা ‘অসাম দাইরেক্ত রিক্রুইতমেন্ত কম্মিসন’ শেমখ্রে। মমাঙদা থবক লৌবা মতমদা দিপার্তমেন্ত অমগী তোঙানবা নিয়মশিং চৎনরম্বা অমসুং কেন্দিদেতশিংনা তোঙান-তোঙনবা দিপার্তমেন্তশিংগী তোঙান-তোঙানবা পরিক্ষাশিং শরুক য়াবা মরম্না থবক হাপ্পা কয়া মতম চানা লোইশিনবা ঙমখিদে। হায়রিবা থবকশিং অসি হৌজিক লাইহল্লে অমসুং মসিগী থবক অসিগীদমক অসাম সরকার থাগৎপা ফোঙদোকচরি।
প্রধান মন্ত্রীনা হায়খি অজাদি কা অমৃত কালদা ঐখোয়গী লৈবাক অসি চাউখৎলবা লৈবাক অমা ওইহন্নবা ঐখোয় খুদিংমক ৱাশক অমা লৌরসি। অমৃত কালগী মথং চহি ২৫ অসি সেবা কাল ওইনা য়াম্না মরুওই। নৌনা থবক খল্লবা মীওইশিং অসি মীচম মীয়ামগী ওইনা অসাম সরকারগী মমাই ওইগনি। খু্ন্নাই অসি চাউখৎপা পাম্মী অমসুং নগারিক অমতা চাউখৎনবা ঙাইবা পামদে। ত্বেন্তি-২০ ক্রিকেতকী মতম অসিদা, লৈবাক অসিগী মীয়াম্না অথুবা মতমদা মহৈ চাবা পাম্মী। সরকারগী থবকশিং হৌজিক্কী মতম অসিগী মতুংইন্না মখোয় মশামক অওনবা পুরক্কদবনি। সরকারগী থবক তৌবা মীওইশিংগী পান্দমদি লৈবাক অসিগী মীয়ামগী অনিংবশিং থুংহনবনি। মখোয় মফম অসি য়ৌহল্লকখিবা কৎথোকপা অদুগা চপ মান্নবা কৎথোকপগা লোয়ন্না থবক ফংলবশিংনা থবক তৌগদবনি অমসুং খুন্নাই চাউখৎনবা মখোয়না মতেং পাংগদবনি অমসুং অনৌবা থবকশিং তম্নবা সরকারনা থোং হাংদোক্লে।
প্রধান মন্ত্রীনা হায়খি ভারতকী ইনফ্রাস্ত্রকচর য়াম্না য়াংনা মতমগা চুন্নবা শেমগৎনবা লুপা করোর লাখ কয়া চাদিং তৌরে অমসুং অনৌবা হায়ৱেশিং, এক্সপ্রেসৱেশিং, রেলৱে লাইনশিং, হিথাংফমশিং, এয়রপোর্তশিং অমসুং ঈশিং লম্বীশিং শেমগৎলে। অনৌবা ইনফ্রাস্ত্রকচর প্রোজেকশিংগা লোয়ন্না হিরম খুদিংমক্তা থবক ফংবা অমসুং মশানা মশাবু থবক পীজবগী খুদোংচাবা অমা হেনগৎলে। এয়রপোর্ত অমা শেমগৎনবা ইঞ্জিনিয়ারশিং, তেক্নিসিয়ানশিং, একাউন্তেন্তশিং, শিন্মীশিং দরকার ওই অমসুং তোঙান-তোঙানবা খুৎলায়শিং, স্তিল অমসুং বিলাতিমাতি দরকার ওই।
মহাক্না হায়খি রেলৱে লাইনশিং পাকথোক-চাউথোকহনবা অমসুং মখোয় ইলেক্ত্রি ফংহনবদা থবক ফংনবা খুদোংচাবা কয়া পীরে। হিংবদা লাইনবা থবক কয়া সরকার অসিনা পায়খৎতুনা ২০১৪দগী লায়বশিংগী পাক্কাগী য়ুম করোর ৪ হেন্না শাখ্রে অমসুং হায়রিবা য়ুমশিং অসিদা তোইলেতশিং, গ্যাস কন্নেক্সন, তোতি ঈশিং অমসুং মৈ ফংহল্লে। হায়রিবা য়ুমশিং অসি শাবদা মেনুফেকচরিং সেক্তর, লোজিস্তিক্স, শিন্মীশিংনা য়াম্না চাউনা মতেং পাংখি। থবক ফংহনবদা অয়ুস্মান ভারত য়োজননা অচৌবা থৌদাং লৌখি অমসুং লৈবাক অসিদা অনৌবা হোস্পিতালশিং অমসুং ক্লিনিকশিং লিংখৎলে। চয়োল খরগী মমাঙদা এ.আই.আই.এম.এস গুৱাহাতি অমসুং অনৌবা মেদিকেল কলেজ অহুম মীয়ামদা কৎথোকপগী খুদোংচাবা ফংখ্রে। হৌখিবা চহি খর অসিদা অসামদা দেন্তেল কলেজশিং মশিং হেনগৎহল্লে। মসিনা মরম ওইদুনা, মেদিকেলগী শীনফমদা লৈরিবা নহারোলশিং থবক ফংনবা খুদোংচাবশিং পীরে।
প্রধান মন্ত্রীনা হায়খি চহি তারাগী মমাঙদা কনাগুম্বা অমগী ৱাখলদা খল্লমদবা হিরম কয়াদা ঙসিদি নহারোলশিং মাঙলোমদা চঙশিল্লে। লৈবাক অসিদা নাকোইন্না অমসুং হকথেংন্না থবক লাখ কয়া ফংহনবদা স্তার্দঅপকী থবকশিংনা মতেং পাংলে। লৌউ-শিংউ, খুন্নাইগী থবকশিং, সর্ভে অমসুং ঙাক-শেনগী লমদা দ্রোন শীজিন্নবা হেনগৎলক্লি অমসুং মসিনা নহারোলশিংগী অনৌবা খুদোংচাবা কয়া পীরে। ভারত্তা মোবাইল ফোন করোর কয়া পুথোক্তুনা ভারতকী চাউখৎপদা মতেং পাংলে। খুঙ্গং খুদিংমক্তা ব্রোদবেন্দ য়ৌরে অমসুং মসিনা পাক-শান্না থবক ফংবা অমসুং মশানা মশাবু থবক পীজনবা পুক্নিং থৌগৎলে। শুপ্নগী থৌরাং অমা নত্ত্রগা ৱারেপ অমনা মীওই কয়াগী পুন্সি কান্নবা পীবা ঙমগনি।
হৌজিক পাল্লিবা সরকার অসিগী থৌশিলশিং থাগৎলদুনা প্রধান মন্ত্রীনা হায়খি অৱাং-নোংপোক্কী মশিং য়াম্লবা নহারোলশিং চাউখৎপগী ইচেলদা শরুক য়ারে। থবক ফংনবা অমসুং মশানা মশাবু থবক পীজনবা অনৌবা খুদোংচাবশিং পীদুনা নহারোলশিংগী মঙলানশিং মঙফাওনবা ঙম্নবা সরকারনা থবক পায়খৎলে। অনৌবা ভারত অমা শেমগৎনবা মাইকৈদা ঐখোয় য়াংনা চঙশিল্লি।
