খুরুমজরি।
অসাম লৈঙাক্কী মখাদা লৈঙাক্কী থবক ফংলিবা নহা পুম্নমক অমদি মখোয়গী ইমুং মনুংশিংগী মফমদা ঐনা নুংঙাইবা ফোঙদোকচরি। মমাঙ থাদা ঐ বিহু কুমহৈগী মতমদা অসামদা লাক্লম্মি। নুমিত্তুগী নীংথিরবা থৌরমদুগী নীংশিং মমি ঙসিসু ঐগী পুক্নিং ময়েক লানা তাদুনা লৈরি। মতমদুদা পাঙথোকখিবা থৌরম, অসামগী নাৎ-চৎনবীবু শিংথাদুনা শৈথাবগী মশক্নি। ঙসিগী রোজগার মেলা অসিনা অসামগী বি.জি.পি. লৈঙাক্না নহাশিংগী তুংগীদমক কয়া য়াম্না লুম্না লৌবগে হায়বগী খুদম্নি। মসিগী মমাঙদসু অসামদা পাঙথোকপা রোজগার মালেদা নহা লিশিং ৪০ হেনবদা লৈঙাক্কী থবক পীখ্রবনি। ঙসি চাউরাক্না নহা লিশিং ৪৫ রোমদা এপোইন্তমেন্ত লেত্তর খুৎশিন্নরি। নহা পুম্নমক্কী তরং তরংবা তুংলমচৎ অমমম লৈহনবিসনু হায়না ঐনা থৌনিজরি।
মরূপশিং,
বি.জি.পি. লৈঙাক্না ঙসিদি অসামদা ইং-তপ্পা অমদি চাওখৎপগী অনৌবা চক অমগী খুদম চাংদম ওইরি। চাওখৎপগী খোঙজেল অসিনা অসামগী পোজিতিবিতী অমদি ইচঙ থৌবগী মশক উৎলি। অসাম লৈঙাক্না লৈঙাক্কী থবক লৌবগী থৌওংবু হেন্না অরোন অথুপ লৈহন্দনবা খোঙথাং কয়া লৌখৎলে হায়না ঐঙোন্দা পাউদমই। তোঙান তোঙানবা দিপার্তমেন্তশিংদা থবক লৌনবগীদমক অসাম দাইরেক্ত রিক্রুইতমেন্ত পোলিসী শেমখ্রে। মমাঙদদি তোঙান তোঙানবা দিপার্তমেন্তশিংদা তোঙান তোঙানবা থবক লৌবগী কাঙলোন লৈরম্মি। মদুনা থবক লৌবগী থৌওং মতম চানা লোইশিনবা ঙম্লমদে। থবক থিরিবা মীওইশিংসু তোঙান তোঙানবা দিপার্তমেন্তশিংগী ফমশিংগীদমক তোঙান তোঙানবা চাংয়েং ফম্বা তারম্মি। হৌজিক্তি হায়রিবা থৌওং খুদিংমকসি লায়থোকহল্লে। মসিগীদমক অসাম লৈঙাক তশেংনমক থাগৎপদা মতিক চাই।
মরূপশিং,
নীংতম্বগী অমৃৎ কালসিদা ঐখোয় পুম্নমক্না ইরৈবাকসিবু চাওখৎপা লৈবাক অমা ওইহন্নবা ফিরেপ লৌরি। অমৃৎকালগী লাক্কদৌরিবা চহি ২৫ অসি অদোম্না থবক তৌগদবা মরুওইবা মতমসুনি। মীচম মীয়াম পুম্নমক্কী মফমদা হৌজিক্তি অদোম্না অসাম লৈঙাক্কী মায়থোঙ ওইরবনি। অদোমগী থৌগল্লোন, অদোমগী ৱাখল্লোন, থবক থৌওংদা লৈরিবা অদোমগী এপ্রোচ, মীয়ামগী থৌগল তৌবগী ৱাখল্লোন অদুগী মহৈ হৌজিক্তি মীয়ামদা ফংলগদৌরিবনি। মরম অসিনা অদোম্না হীরম খরদা পুক্নিং চঙবা মথৌ তাই। ঙসি ঐখোয়গী খুন্নাই খোঙজেল য়াঙনা এস্পিরেস্নেল ওইরক্লি। হৌজিক তঙায় ফদনা চঙদ্রবা য়াদ্রবশিংগীদমক্তসু দেকেদ কয়া ঙাইনরম্বা মমাঙথক্কী মতমদু নৎত্রে। হৌজিক্কী মতমদা চাওখৎপা হায়বসি মীওই অমত্তনা মতম কুইনা ঙাইবা পাম্নদ্রে। ত্বেন্তী-২০ ক্রিকেৎকী মতমসিদা লৈবাকসিগী মীয়াম্না খোঙজেল য়াঙবা মহৈ পাম্নরে। মরম অসিনা লৈঙাক্কী থবক থৌওংশিংসু মদুগী মতুং ইন্না হোংদোকপা মথৌ তাই। লৈবাক মীয়ামগী অনিংবা অপাম্বা ফংহন্নবগী থৌদাং লৈঙাক্কী শিন্মীশিংদসু লৈ। অদোমবু মফমসি ফাওবা য়ৌহল্লক্লিবা হোৎনবা কনবগী লম্বীদুদা চত্তুনা অদোম মাঙদা চঙশিনগদবনি। অদোম মতম পুম্বদা তমশিনবা লেপ্লোইদবনি। মসিনা অদোমবু খুন্নাই অমদি সিস্তেম অনিমকপু হেন্না ফগৎহনবদা অদোমগী থৌদাং য়াবা ঙমহনগনি।
মরূপশিং,
ঙসি ভারতনা খোঙজেল য়াঙনা মশাগী ইনফ্রাস্ত্রকচরশিং মতমগা চুননবা শেমগৎলি। অনৌ-অনৌবা হায়ৱে অমদি এক্সপ্রেসৱে শেমগৎপবু ওইরবসু, অনৌবা রেল লম্বী শেমগৎপবু ওইরবসু, অনৌবা হিথাংফম, মালং হিথাংফম অমদি ঈশিং লমূ্বী শেমগৎপবু ওইরবসু, হায়রিবা প্রোজেক্তশিং অসিদা লুপা করোর লাখ কয়া চাদিং তৌরি। ইনফ্রাস্ত্রকচরগী প্রোজেক্ত খুদিং, লৈঙাক্না থাদরিবা শেনফমশিংনা থবক পীবা অমদি মশাবু থবক পীজবগী থৌওং হেনগৎহল্লিবনি। খুদম ওইনা মফম অমদা এয়রপোর্ত শাবা মতমদা মদুদা ইঞ্জিনিয়র, তেক্নিসিয়ন, একাউন্তেন্ত, শিন্মী, মখল মখলগী খুৎশু-খুৎলায়, স্তীল অমদি সিমেন্তকী মথৌ তাই। হায়বদি থবক অমা পায়খৎপনা সেক্তর কয়াদা থবক পীনবগী অনৌবা খুদোংচাবশিং শেমগৎলি। রেল লাই তিংবনা, মখোয়বু ইলেক্ত্রিফিকেসন তৌবনসু, থবক পীনবগী অনৌবা খুদোংচাবশিং শেম্মি। ভারতনা ঙসি ফংফম থোকপা খুদোংচাবশিংদা মরুওইবা মীৎয়েঙ থম্লিবা, ইজ ওফ লিভিং হেনগৎহল্লিবা অসিনসু লৈবাকসিগী কাচিন কোয়া শিনবা থুংনা অনৌবা ওপোর্চনিতীশিং শেমগৎলি। ২০১৪গী মতুংদা ঐখোয়গী লৈবাকসিদা চাউরাক্না পক্কাগী য়ুম করোর ৪ রোম শাদুনা লায়রবা ইমুংশিংদা ফংহনখ্রে। হায়রিবা য়ুমশিং অদুদা তোইলেৎ, গ্যাস কন্নেক্সন, তোতীগী ঈশিং অমদি মৈগী খুদোংচাবশিং ফংহল্লি। হায়রিবা য়ুমশিং অসি শাবদা, হায়রিবা ফেসিলিতীশিং অদু ফংহনবদা মেন্যুফেকচরিং সেক্তর, লোজিস্তিক্স, স্কিল্দ ৱর্কর অমদি লংফৈগী শিন্মী ঈচিল ঈনাওশিংনা মশিং য়াম্না থবক পায়খৎখি। হায়বদি, তোঙান তোঙানবা থাক্তা তোঙন তোঙানবা সেক্তরশিংদা থবক্কী খুদোংচাবশিং শেমদুনা লাক্লি। থবক পীবদা অয়ুস্মান ভারত য়োজনাগী অচৌবা থৌদাং লৈ। অয়ুস্মান ভারত য়োজনানা মরম ওইরগা লৈবাকসিদা মশিং য়াম্লবা অনৌবা লায়েংশঙ অমদি ক্লিনিকশিং শেমগৎলি। চয়োল খরগী মমাঙদা ঐনা এইম্স গুৱাহাতী অমদি মেদিকেল কলেজ ৩ মীয়ামদা কত্থোক্নবা খুদোংচাবা ফংখি। হৌখিবা চহি খরসিদা অসামদা দেন্তেল কলেজশিংসু লিংখৎখি। মসিনা মেদিকেলগী লমদা লৈরিবা নহাশিংদা থবক পীনবগী পাম্বৈ ওইহল্লি।
মরূপশিং,
ঙসি চহি তরাগী মমাঙদা ৱাখলনা খল্লুদবা অদুগুম্বা সেক্তর কয়াদা নহাশিংনা মাঙজিল থারি। স্তার্ত-অপ ইকোসিস্তেম্না লৈবাকসিদা থবক লাখ কয়া হকথেংননা অমদি নাকোইননা পীরি। লৌউ-শিংউ, খুন্নাইগী থৌদোকশিং, সর্ভে অমদি দিফেন্স সেক্তরদা হেনগৎলক্লিবা দ্রোনগী দিমান্দনা নহাশিংগীদমক অনৌবা খুদোংচাবা কয়া পীরি। ঙসি লৈবাকসিদা পায়খৎলিবা আত্মনিরভর ভারত অভিয়াননসু থবক পীনবগী য়াম্লবা তাঞ্জা কয়া পীরি। ঙসি ভারত্তা মোবাইল ফান করোর কয়া পুথোক্লি, খুঙ্গংশিংদা ব্রোদবেন্দ কন্নেক্তিবিতী য়ৌহল্লি, মসিনসু য়াম্লবা থবক পীবা অমদি মশাবু থবক পীজনবগী ফীভম কয়া শেম্লি। লৈঙাক্কী মখাদা থবক তৌনা তৌনা কমদৌনা স্কীম অমনা, ফিরেপ অমনা মীয়ামগী পুন্সিদা করি ইথিল পীদুনা করি অহোংবা পুরকপগে হায়বা অদোম্না মতম পুম্নমক্তা নীংশিংদুনা লৈগদবনি।
মরূপশিং,
বি.জে.পি. লৈঙাক্কী থৌশিলশিংনা মরম ওইরগা ঙসি অৱাং নোংপোক্তা য়াম্লবা নহা কয়া চাওখৎ লম্বী পরিংদা লাক্লি। ভাজপা লৈঙাক্না নহাশিংগী মঙলানশিংবু মঙফাওনহন্নবা থৌরাং য়াৎলি। থবক পীনবা অমদি মশাবু থবক পীজনবগী খুদোংচাবশিং ফংহন্দুনা ঐখোয়না অনৌবা ভারত শেমগৎনবগী মায়কৈদা খোঙজেল য়াঙনা খোঙ থাংজিল্লি। অমুক্কা হন্না ময়ামবু অমদি অদোমগী ইমুং মনুং পুম্নমক্কী মফমদা নুংঙাইবা ফোঙদোকচরি।
থাগৎচরি।
