প্রধান মন্ত্রী শ্রী নরেন্দ্র মোদীনা হান্নগী প্রধান মন্ত্রী ভারত রত্ন শ্রী অতল বিহারি বাজপায়ীগী 101শুবা মপোক কুমওনগী নুমিৎ, দিসেম্বর 25, 2025দা উত্তর প্রদেশকী লখনৌদা চৎকনি। নুংথিল পুং 2:30রোম তারকপদা প্রধান মন্ত্রীনা রাস্ত্রা প্রেরনা স্থাল শঙ্গাগনি অমসুং থৌরম অদুদা তিনবা মীয়ামদসু ৱা ঙাংগনি।
নিংতম্লবা ভারতকী শক্নাইরবশিং ইকায়খুম্নবা উৎনবা প্রধান মন্ত্রী শ্রী নরেন্দ্র মোদীগী পান্দম্না লমজিংদুনা, লৈবাক্কী গনতন্ত্র, রাজনিতি অমসুং চাউখৎপগী খোঙচৎতা অকনবা ইথিল অমা পীখিবা ভারতকী খ্বাইদগী মমিং লৈরবা রাজনিতিৱালাগী থবক, পুন্সি অমসুং অচুম্বা ফিদমশিংদা রাস্ত্রা প্রেরনা স্থালনা ইকায়খুম্নবা উৎকনি।
লৈবাক্কী মেমোরিএল অমসুং ইথিল পীনবা মফম অমা ওইনবা রাস্ত্রা প্রেরনা স্থাল শেমগৎপনি। মসি লুপা করোর 130 রোম চঙনা অমসুং লম একর 65 রোমদা শেমগৎপনি অমসুং মফম অসিনা লুচিংবগী গুনশিং, লৈবাক্কী থবক তৌবা, নাৎকী ৱাখল তাবা অমসুং মীয়াম ইথিল পীবগী থবক ফগৎনবা লৈবাক্কী মফম অমা ওইনবা পান্দম থম্লি।
ভারতকী রাজনিতিগী ৱাখল, লৈবাক শেমগৎপা অমসুং মীয়ামগী পুন্সিদা মখোয়না পাংথোকখিবা থবকশিংগী খুদম ওইনা, মফম অসিদা দোক্তর শ্যাম প্রসাদ মুকর্জী, পন্দিৎ দীনদয়াল উপাধ্যায় অমসুং হান্নগী প্রধান মন্ত্রী শ্রী অতল বিহারি বাজপায়গী ফিত 65 ৱাংবা শেঞ্জেংগী মীতমশিং লৈরি। মসিদা স্ক্বার ফিত 98000 রোম পাক-চাউবা থম্বাল মওংগী ম্যুজিয়ম অমসু য়াওরি। ম্যুজিয়ম অসিদা ভারতকী লৈবাক্কী খোঙচৎ অমসুং লুচিংবশিংনা পাংথোকখিবা থবকশিং দিজিতেল অমসুং অনৌবা তেক্নোলোজিশিংগী খুৎথাংদা অয়েংবশিংদা উৎকনি।
রাস্ত্রা প্রেরনা স্তাল শঙ্গাবনা ইশা ওইজবা থীদবা লুচিংবা অমসুং অফবা লৈঙাক্কী ৱাখল্লোনশিং ঙাক-শেন্দুনা থম্নবা অমসুং প্রমোৎ তৌবদা মরুওইবা খোংথাং অমনি। মসিনা হৌজিক্কী অমসুং তুংগী মীরোলশিংগীদমক্তা ইথিলগী হৌরকফম অমা ওইরগনি হায়না পানরি।
