প্ৰধানমন্ত্ৰী শ্ৰী নৰেন্দ্ৰ মোদীয়ে ২০২৫ চনৰ ২৫ ডিচেম্বৰত প্ৰাক্তন প্ৰধানমন্ত্ৰী ভাৰতৰত্ন শ্ৰী অটল বিহাৰী বাজপেয়ীৰ ১০১ সংখ্যক জয়ন্তী উপলক্ষে উত্তৰ প্ৰদেশৰ লক্ষ্ণৌ ভ্ৰমণ কৰিব। প্ৰায় দুপৰীয়া ২.৩০ বজাত প্ৰধানমন্ত্ৰীয়ে ৰাষ্ট্ৰ প্ৰেৰণা স্থল উদ্বোধন কৰিব আৰু এই উপলক্ষে এক ৰাজহুৱা সমাৱেশকো সম্বোধন কৰিব।
স্বাধীন ভাৰতৰ প্ৰতিভাশালী ব্যক্তিসকলৰ উত্তৰাধিকাৰীক সন্মান জনোৱাৰ বাবে প্ৰধানমন্ত্ৰী শ্ৰী নৰেন্দ্ৰ মোদীৰ দৃষ্টিভংগীৰ দ্বাৰা চালিত ৰাষ্ট্ৰ প্ৰেৰণা স্থলে ভাৰতৰ অন্যতম সন্মানীয় ৰাজনীতিবিদৰ জীৱন, আদৰ্শ আৰু স্থায়ী উত্তৰাধিকাৰৰ প্ৰতি শ্ৰদ্ধাঞ্জলি জ্ঞাপন কৰিব, যাৰ নেতৃত্বত দেশৰ গণতান্ত্ৰিক, ৰাজনৈতিক আৰু উন্নয়নমূলক যাত্ৰাত গভীৰ প্ৰভাৱ পৰিছিল।
ৰাষ্ট্ৰ প্ৰেৰণা স্থলক এক যুগান্তকাৰী ৰাষ্ট্ৰীয় স্মাৰক আৰু স্থায়ী ৰাষ্ট্ৰীয় গুৰুত্বৰ অনুপ্ৰেৰণামূলক চৌহদ হিচাপে বিকাশ ঘটোৱা হৈছে। প্ৰায় ২৩০ কোটি টকা ব্যয়েৰে নিৰ্মিত আৰু ৬৫ একৰ বিস্তৃত অঞ্চলত বিয়পি থকা এই চৌহদটো নেতৃত্বৰ মূল্যবোধ, ৰাষ্ট্ৰীয় সেৱা, সাংস্কৃতিক চেতনা আৰু ৰাজহুৱা অনুপ্ৰেৰণাৰ বাবে উৎসর্গীকৃত এক স্থায়ী ৰাষ্ট্ৰীয় সম্পদ হিচাপে কল্পনা কৰা হৈছে।
এই চৌহদত ড০ শ্যামাপ্ৰসাদ মুখাৰ্জী, পণ্ডিত দীনদয়াল উপাধ্যায় আৰু প্ৰাক্তন প্ৰধানমন্ত্ৰী শ্ৰী অটল বিহাৰী বাজপেয়ীৰ ৬৫ ফুট ওখ ব্ৰঞ্জৰ প্ৰতিমূৰ্তি আছে, যি ভাৰতৰ ৰাজনৈতিক চিন্তাধাৰা, ৰাষ্ট্ৰ নিৰ্মাণ আৰু ৰাজহুৱা জীৱনত তেওঁলোকৰ গুৰুত্বপূৰ্ণ অৱদানৰ প্ৰতীক। ইয়াত প্ৰায় ৯৮,০০০ বৰ্গফুটত বিস্তাৰিত পদুম ফুলৰ আকৃতিৰ গাঁথনি ৰূপত আৰ্হি প্ৰস্তুত কৰা এক অত্যাধুনিক সংগ্ৰহালয়ো আছে। সংগ্ৰহালয়টোৱে ভাৰতৰ ৰাষ্ট্ৰীয় যাত্ৰা আৰু উন্নত ডিজিটেল আৰু অত্যাধুনিক প্ৰযুক্তিৰ জৰিয়তে এই দূৰদৰ্শী নেতাসকলৰ অৱদান প্ৰদৰ্শন কৰি দৰ্শনাৰ্থীসকলক এক আকৰ্ষণীয় আৰু শৈক্ষিক অভিজ্ঞতা প্ৰদান কৰিব।
ৰাষ্ট্ৰ প্ৰেৰণা স্থলৰ উদ্বোধনে নিঃস্বাৰ্থ নেতৃত্ব আৰু সুশাসনৰ আদৰ্শ সংৰক্ষণ তথা প্ৰচাৰৰ ক্ষেত্ৰত এক গুৰুত্বপূৰ্ণ পদক্ষেপ হিচাপে পৰিগণিত হৈছে আৰু ই বৰ্তমানৰ লগতে ভৱিষ্যৎ প্ৰজন্মৰ বাবেও অনুপ্ৰেৰণাৰ উৎস হিচাপে কাম কৰিব বুলি আশা কৰা হৈছে।
