লাক্লিবা দিশেম্বর ১৫, ২০২০দা গুজরাতকী কচ্ছ লমদমদা লৈবা ধোরদোদা প্রধান মন্ত্রী নরেন্দ্র মোদী চৎকনি অমসুং রাজ্য অদুদা তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি। প্রোজেকশিং অদুগী মনুংদা দিসেলিনেসন প্লান্ত অমা, হায়ব্রিদ রিনিউএবল ইনর্জি পার্ক অমা, শঙ্গোম শেম-শানবা অমসুং পেক্কিং তৌনবা ওতোমেতিক প্লান্ত অমা য়াওরি। থৌরম অদুদা গুজরাতকী চীফ মিনিস্তর শরুক য়াগনি। প্রধান মন্ত্রীনা ৱাইত রনদা চৎকনি অমসুং তুংদা কলচরগী থৌরম অমা য়েংগনি।
রাজ্য অসিগী পাক-চাউরবা সমুদ্র মপান লৈবগী খুদোংচাবা লৌদুনা, কুচ্ছকী মান্দবিদা নৌনা লিংখৎলিবা দিসেলিনেসন প্লান্ত অসিদা সমুদ্রগী ঈশিংদগী থক্নবা ঈশিং ওন্থোক্নবা গুজরাতনা শিংথানিঙাই ওইবা থবক অমা পায়খৎলে। নোংমদা লিতর করোর ১০(১০০ এম.এল.দি) পুথোকপা ঙম্বা দিসেলিনেসন প্লান্ত অসিনা নর্মাদা গ্রিদ, সাওনি নেতৱার্ককা শম্নদুনা গুজরাত্তা ঈশিং ফংবা হেনগৎহনগনি অমসুং ফত্তবা ঈশিং চুমথোক্কনি।
প্রোজেক অসি লৈবাক অসিদা তুংকোইনা অফবা ঈশিং ফংনবা মরুওইবা থবক অমনি। মুন্দ্রা, লাখপাত, অবদাসা অমসুং নাখাত্রানা তালুকাশিংগী চাউরাক্না মীওই লাখ ৮ রোম মসিগী প্লান্ত অসিদগী ঈশিং ফংগনি অমসুং অহেনবা ঈশিং অদু বাচাউ, রাপার অমসুং গান্ধীধাম জিলাশিংদা ফংহনগনি। হৌজিক গুজরাত্তা পায়খৎলিবা দিসেলিনেসন প্লান্ত মঙা অসিগী মনুংদা মসিসু অমনি। অতৈ প্রোজেকশিংনা দাহেজ(১০০ এম.এল.দি), দ্বারকা(৭০ এম.এল.দি),গোগা ভাবনগর(৭০ এম.এল.দি) অমসুং গির সোমনাথ(৩০ এম.এল.দি)তা পায়খৎলি।
গুজরাতকী কচ্ছ জিলাগী বিঘাকোত খুঙ্গং ময়াদা লৈবা হায়ব্রিদ রিনিউএবল ইনর্জি পার্ক লৈবাক অসিদা খ্বাইদগী চাউবা রিনিউএবল ইনর্জি পার্ক ওইরগনি। মসিনা গিগাৱাত ৩০ ফাওবগী রিনিউএবল ইনর্জি পুথোক্কনি। লম হেক্তর ৭২,৬০০ হেনবদা লৈরিবা পার্ক অসিদা নুংশিৎ অমসুং নুমিৎ মঙালদগী ফংবা ইনর্জি থম্নবা অখন্নবা হায়ব্রিদ পার্ক জোন অমা লৈগনি অমসুং ৱিন পার্ককী থবকশিংগী অখন্নবা মফম অমসু লৈগনি।
কুচ্ছকী সারহাদ দাইরি অঞ্জরদা প্রধান মন্ত্রীনা শঙ্গোম শেম-শানবা অমসুং পেক্কিং তৌনবা ওতোমেতিক প্লান্ত অমগী উরেপ-উয়ুং তমগনি। লুপা করোর ১২১ চঙনা পায়খৎকদৌরিবা প্লান্ত অসিনা নোংমদা শঙ্গোম লিতর লাখ ২ প্রোসেস তৌবা ঙমগনি।
