প্রধান মন্ত্রী শ্রী নরেন্দ্র মোদী ওগষ্ট ২৫-২৬ দা গুজরাত্ত চৎকনি। মহাক্না ওগষ্ট ২৫ দা নুংথিল পুং ৬ রোম তাবদা অহমেদবাদকী খোদালধাম লম্পাক্ত লুপা করোর ৫,৪০০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাগনি, উরেপ-উয়ুং তমগনি অমসুং মীয়ামদা কৎথোক্কনি।
ওগষ্ট ২৬ গী অয়ুক পুং ১০:৩০ রোম তাবদা, প্রধান মন্ত্রীনা অহমেদবাদকী হন্সালপুরদা লমদম অসিদা হায়ব্রিদ বেত্তরি ইলেক্ত্রোদশিং পুথোকপগী থবক শঙ্গাগনি অমসুং মপান লৈবাক ১০০ দা থাদোক্নবা বেত্তরি ইলেক্ত্রিক গারিশিং লমথাগনি। মহাক্না থৌরম অদুদা মীয়ামদা ৱা ঙাংগনি।
মালেম থাক্কী ইনফ্রাষ্ট্রকচর অমসুং লম্বী-থোং শেমগৎনবা মহাক্না থাজবা পীখিবগী মতুংইন্না, প্রধান মন্ত্রীনা লুপা করোর ১,৪০০ হেনবগী তোঙান তোঙানবা রেলৱে প্রোজেকশিং মীয়ামদা কৎথোক্কনি। প্রোজেকশিং অদুগী মনুংদা মহেসনা-পলানপুর রেল লাইন লুপা করোর ৫৩০ হেন্না চঙনা দবল ওনখৎপা, লুপা করোর ৮৬০ চংনা কিমি ৩৭ শাংবা কালোল-কাদি-কাতোসান রোদ রেল লাইন অমসুং কিমি ৪০ শাংবা বেচরাজি-রানুজ রেল লাইন গেজ ওনখৎপা য়াওরি। ব্রোদ-গেস কেপাসিতি হেনগৎহনবা অসিগা লোয়ননা, হায়রিবা প্রোজেকশিং অসিনা লমদম অসিদা নুংঙাইনা, অশোই-অঙাম লৈতনা অমসুং অপনবা লৈতনা চৎথোক-চৎশিন তৌবা য়াহনগনি।
মসিনা লমদম অসিগী শেন-থুমগী থবকশিং মফম অমদা পুনশিনবগা লোয়ননা, নুমিৎ খুদিংগী চৎথোক-চৎশিন তৌরিবা মীওইশিং, লমকোয়বশিং অমসুং ললোন-ইতিক্কী থবকশিং লাইনা চৎথোক-চৎশিন তৌহনগনি। মখা তানা, কাতোসান রোদ অমসুং সবরমাতিগী মরক্ত পেসেঞ্জর ত্রেন লমথাদুনা লাইফমশিং য়ৌবা হেন্না নুংঙাইহনগনি অমসুং মীয়ামগী শেন-থুম তানবগী থবকশিং ফগৎহনগনি। বেচরাজিদগী কার-লোদেদ ফ্রেদ ত্রেন সর্বিসনা রাজ্য অসিগী উদ্যোগকী মফমশিংগী চৎথোক-চৎশিন ফগৎহনগনি, লোজিষ্টিক্স নেতৱার্ক ফগৎহনগনি অমসুং থবক কয়া ফংহনগনি।
লম্বী-থোং ফৎনবা, চৎথোক-চৎশিন তৌরিবশিং অশোই-অঙাম থোক্তবা হেনগৎহন্নবা অমসুং লমদম অসি চাউখৎপা য়াংখৎনবা মহাক্কী পান্দম থবক ওইনা পাংথোক্লদুনা, প্রধান মন্ত্রীনা বিরামগম-খুদাদ-রামপুরা লম্বী পাকথোকপগী থবক শঙ্গাগনি। মহাক্না অহমেদবাদ-মেহসনা-পলানপুর লম্বীদা লেন-তরুক্কী ভেহিকল অন্দরপাস; অহমেদবাদ-বিরমগম লম্বীদা রেলৱে ওভরব্রিজ শানবা উরেপ-উয়ুং তমগনি। অপুনবা ওইনা, হায়রিবা থবকশিং অসিনা উদ্যোগ চাউখৎপা হেনগৎহনগনি, চৎথোক-চৎশিন ফগৎহনগনি অমসুং লমদম অসিগী শেন-থুমগী খুদোংচাবা হেনগৎহনগনি।
রাজ্য অসিগী পৱার সেক্তর চাউখৎনবা, উত্তর গুজরাত বিজ কম্পেনি লিমিতেদকী মখাদা অহমেদবাদ, মেহসনা অমসুং গান্ধীনগরদা পৱার দিষ্ট্রিব্যুসন প্রোজেকশিং প্রধান মন্ত্রীনা শঙ্গানি অমসুং মসিনা মৈ মাঙবা হন্থহন্নবা অমসুং নেতৱার্ক মতমগা চুন্না শেমগৎনবা অমসুং রিভাম্প দিষ্ট্রিব্যুসন সেক্তর স্কিমগী মখাদা ইনফ্রাষ্ট্রকচর ফগৎনবা পান্দম থম্লি। লুপা করোর ১০০০ হেনবগী প্রোজেকশিং অসিনা, নোং-চিংগী ফিবম ফত্তবা মতমদা মৈ য়াদবা হন্থহনগনি, মীয়াম অশোই-অঙাম থোক্ত হেনগৎহনগনি, ত্রান্সফোর্মরশিং ঙাকথোক্কনি অমসুং মৈ পীনবা নেতৱার্ক ফজনা মথৌ পাংথোকপা ঙমগনি।
পি.এম.এ.ৱাই(য়ু) গী ইন সিতু শ্লম রিহেবিলিতেসন কম্পোনেন্তগী মখাদা রামাপির নো তেক্রোগী সেক্তর-৩ দা লৈবা শ্লমশিং শেমগৎপগী থবক প্রধান মন্ত্রীনা শঙ্গাগনি। লম্বী চিনবা হন্থহন্নবা অমসুং চৎথোক-চৎশিন নুংঙাইবা হেনগৎনবা সরকার পতেল রিং রোদকী অকোয়বদা পায়খৎকদবা লম্বী পাকথোকপগী প্রোজেকশিংসু মহাক্না উরেপ-উয়ুং তমগনি। ঈশিং অমসুং সিৱেরেজ মেনেজমেন্ত সিষ্টেমশিং ফগৎনবা মরুওইবা অর্বান ইনফ্রাষ্ট্রকচর প্রোজেকশিং প্রধান মন্ত্রীনা উরেপ-উয়ুং তমগনি।
লৈবাক ঙাকপগী থবক অমসুং সরকারগী থবকশিং মীয়ামদা য়ৌহনবা ফগৎহন্নবা, প্রধান মন্ত্রীনা গুজরাত্ত মরুওইবা ইনফ্রাষ্ট্রকচর প্রোজেকশিং উরেপ-উয়ুং তমগনি। প্রোজেকশিংগী মনুংদা অহমেদবাদ ৱেষ্টতা অনৌবা স্তাম্পস অমসুং রেজিষ্ট্রেন বিল্দিং শাবা, গুজরাত শীনবা থুংনা দেতা মেনেজমেন্ত অমসুং দিজিতেলগী থবকশিং ফগৎনবা দিজাইন তৌরবা রাজ্য থাক্কী দেতা ষ্টোরেজ সেন্তর অমা গান্ধীনগরদা শাবা য়াওরি।
ওগষ্ট ২৬ দা, অহমেদবাদকী হন্সালপুরদা সুজুকি মোতর প্লান্তদা পুৱারি ওইনা মাইপাক্লবা থবক অনি প্রধান মন্ত্রীনা শঙ্গাগনি। হায়রিবা শিংথানিঙাই ওইরবা থবকশিং অসিনা মেক ইন ইন্দিয়া অমসুং অত্মনির্ভর ভারত লমদা প্রধান মন্ত্রীগী থাজবশিং থবক ওইনা পাংথোকপগা লোয়ননা মালেমদা ভারত গ্রিন মোবিলিতিগী মফম অমা ওইহল্লে।
মেক ইন ইন্দিয়া মাইপাকপগী অচৌবা খুদম অমদা, প্রধান মন্ত্রীনা সুজুকিগী মালেমদা অহানবা বেত্তরি ইলেক্ত্রিক গারি “ই বিতারা” লমথাগনি। মেদ-ইন-ইন্দিয়া বেত্তরি ইলেক্ত্রিক ভেহিকল অসি য়ুরোপ অমসুং জপানগুম্বা চাউখৎলবা কৈথেলশিং য়াওনা লৈবাক ১০০ হেনবদা থাদোক্কনি। মসিগী মাইপাকপা অসিগা লোয়ননা, হৌজিক ভারত সুজুকিগী মালেমগী ইলেক্ত্রিক গারিশিং শাফম ওইরগনি।
গ্রিন ইনর্জিগী লমদা অত্মনির্ভর ওইরক্নবা মাইকৈদা অচৌবা থবকশিং পায়খৎলদুনা, গুজরাত্ত তি.দি.এস লিথিয়ম-আইওন বেত্তরি প্লান্তদা লমদম অসিদা হায়ব্রিদ বেত্তরি ইলেক্ত্রোদশিং পুথোকপা হৌবগা লোয়ননা মথং তাঙ্কক্কী ভারতকী বেত্তরিগী থবকশিংসু প্রধান মন্ত্রীনা শঙ্গাগনি। তোসিবা, দেন্সো অমসুং সুজুকিগী অপুনবা ভেঞ্চর অমা ওইরিবা প্লান্ত অসিনা লৈবাক অসিদা মেনুফেকচরিং অমসুং ক্লিন ইনর্জি ইন্নোবেসন হেনগৎহনগনি। থবকশিং অসিনা বেত্তরি ভেলুগী চাদা ৮০ ভারত মনুংদা শারগনি।
