প্রধান মন্ত্রী, শ্রী নরেন্দ্র মোদীনা দিসেম্বর ১১দা উত্তর প্রদেশকী বলরাম্পুর্দা চত্তুনা সর্য়ু নহার নেস্নেল প্রোজেক্তপু নুংথিলগী পুং ১ অদুৱাইদা শঙ্গাগনি।
প্রোজেক্ত অসিগী থবকশিং অসি ইং ১৯৭৮দা হৌখিবনি অদুবু লেপ্তনা শেল থাদবগী খুদোংচাবা, বিভাগ মশেল তেংবাংনবা অমসুং মতিক চানা য়েংশিনবগী থৌওং লৈতবদগী থেংথখি অমসুং চাউরাকপা দিকেদ মরি লোইরক্লবা ফাওবদা লোইশিনবা ঙমদনা লাকখি। প্রধান মন্ত্রীনা মতম কুইনদগী পল্লক্লবা লৈবাক্কীদমক্তা মরু ওইবা প্রোজেক্তশিংদা অহানবা মিৎয়েং চঙবা অমসুং লৌমীশিংগী য়াইফ-য়ুম্বাল অমসুং মপাঙ্গল লৈহন্নবা খোঙফম চেৎপনা তঙাই ফদনা মিৎয়েং চঙফম থোকপগী থৌওংবু ওইথোকহনখি। মসিগী মহৈ ওইনা, প্রোজেক্ত অসিবু অকক্নবা মতমগী মনুংদা লোইশিনবা ঙম্বগী পান্দমগা লোয়ননা ইং ২০১৬তা প্রধান মন্ত্রী কৃষি সিঞ্চায়ী য়োজনাগী মখাদা পুরকখি। হায়রিবা থৌওং অসিদা অনৌবা কেনেল শানবা অনৌবা লম লৈশিনবগী থৌওং অমসুং প্রোজেক্ত অসিগীদমক্তা মরু ওইবা অহোবশিং মেনশিন্নবগীদমক্তা অনৌবা ৱারোইশিন কয়া অমসু পুথোকখি। মসিদা নত্তনা, লম লৌশিনবগী মতাংদা মমাংদা লৈরম্বা শিংনবশিংগা মরী লৈনবা পন্দুনা লৈবা লিতিগেসন কয়াগী ৱারোইশিন পুরকপদসু অনৌবা থৌওং কয়া পুথোকপা ঙমখি। প্রোজেক্ত অসিদা নৌহৌননা মিৎয়েং চঙবনা প্রোজেক্ত অসিবু শুপ্নগী চহি মরিখক্কী মনুংদা লোইশিনহনবা ঙমখি।
সর্য়ু নহার নেস্নেল প্রোজেক্ত অসি অপুনবা লুপা করোর ৯৮০০গী শেনফম চঙদুনা শাবনি অমসুং মসিগী মনুংদগী লুপা করোর ৪৬০০তি হৌখিবা চহি মরিদা কায়থখি। লমদম অসিগী ঈশিং ফংফমশিংবু নীংথিনা শেন্নদুনা হেন্না কান্ননা শিজিন্নবা ঙম্নবগীদমক্তা প্রোজেক্ত অসিদা তুরেল মঙা- ঘাগরা, সর্য়ু, রাপ্তী, বঙ্গংগা অমসুং রোহিনিবু অমত্তা ওইনা শম্নহনবগী থৌওংসু য়াওগনি।
প্রোজেক্ত অসিনা হেক্তর লাখ ১৪ হেন্না পাক চাউবা লমগী ইরিগেসনগীদমক্তা ঈশিং শোইদনা পীগনি অমসুং নোংপোকথংবা উত্তর প্রদেশকী খুঙ্গং ৬২০০ হেনবগী চাউরাকপা লৌমী লাখ ২৯দা কান্নবা পীগনি। মসিনা নোংপোকথংবা উত্তর প্রদেশকী জিলা মাপল, মিং ওইনা পল্লবদা- বাহরাইচ, শ্রভস্তী, বলরাম্পুর, গোন্দা, সিধার্থনগর, বস্তি, সন্ত কবির নগর, গোরাখপুর অমসুং মহারাজগঞ্জতা কান্নবা ফংহনগনি। প্রোজেক্ত অসিনা থেংথবদগী খ্বাইদগী অৱাবা নংহল্লম্লিবা লমদমসিগী লৌমীশিংনা হৌজিক্তি হেন্না ফগৎলবা ইরিগেসনগী খুদোংচাবশিংদগী য়াম্না কান্নবা ফংলগনি। মখোয়না মখোয়গী লৌরোকপু পাক-চাউনা থাবা ঙম্লগনি অমসুং লমদম অসিগী লৌউবা ঙম্বগী মতিকসু য়াম্না হেনগৎহনবা ঙম্লগনি।
