প্রধান মন্ত্রী শ্রী নরেন্দ্র মোদীনা ঐচ.সি.এল.-ফোক্সকোন জোইন্ত ভেঞ্চর প্রোজেক্ত - ইন্দিয়া চিপ প্রাইবেৎকী অচৌবা থৌরম অমদা শরুক য়াগনি। ২০২৬গী ফেব্রুৱারী ২১গী নুমিদাংৱাইরম পুং ৫ রোম তাবদা য়মুনা এক্সপ্রেসৱে ইন্দস্ত্রীএল দিবেলপমেন্ত ওথোরিতী (ই.ই.আই.দি.এ.), উত্তর প্রদেশতা ভিদিও কনফরেন্সিংগী খুত্থাংদা থৌরম অদুদা প্রধান মন্ত্রীনা মীয়াম তিনবা মীফমদা ৱা ঙাংগনি।
ঐচ.সি.এল.-ফোক্সকোন সেমিকন্দক্তর ফেসিলিতী লিংখৎপা অসিনা ভারতকী তেক্নোলোজীগী লমদা মশা-মরোমদোম লেপচবগী খোঙচৎতা মরুওইবা মাইলস্তোন অমা ওইরি। মসিনা অৱাংবা থাক্কী ইলেক্ত্রোনিক্স অমসুং সেমিকন্দক্তর মেনুফেকচরিংগীদমক ভারতপু থাজবা য়াবা গ্লোবেল দেস্তিনেসন অমা ওইহন্নবা প্রধান মন্ত্রীগী মিৎয়েং অদু উৎলি।
ইন্দিয়া চিপ প্রাইভেৎনা য়েদাদা আউতসোর্স সেমিকন্দক্তর এসেমব্লী অমসুং তেস্ত (ও.এস.এ.তি.) সেমিকন্দক্তর এসেমব্লী, তেস্তিং, মার্কিং অমসুং পেক্কেজিং (এ.তি.এম.পি.) গী মোদিফাইদ স্কিমগী মখাদা লুপা করোর ৩,৭০০ হেনবগী অপুনবা ইনভেস্তমেন্ত অমগা লোইননা সেমিকন্দক্তর এসমেব্লী, তেস্তিং, মার্কিং অমসুং পেক্কেজিং (এ.তি.এম.পি.) প্রোজেক্ত অসি গবর্নমেন্তনা লৈবাক অসিগী মেনুফেকচরিং কেপাসিতীশিং মপাঙ্গল কনখৎহন্নবা, ইম্পোর্তকী মখা পোনবা হন্থহন্নবা অমসুং মালেমগী ওইবা সপ্লাই চেনশিং শেমগৎনবা হোৎনরিবা অসিগা মরী লৈনৈ। মসিনা মোবাইল ফোনশিং, তেব্লেতশিং, লেপতোপশিং, ওতোমোতিভ, কঞ্জ্যুমর ইলেক্ত্রোনিক্স অমসুং অতোপ্পা দিভাইসশিংগুম্বা মরুওইবা সেক্তরশিং শৌগৎপদা মরুওইবা থৌদাং অমা লৌগনি হায়না পানরি।
মসিগী খোংথাং অসিগী খুত্থাংদা, ভারতকী সেমিকন্দক্তর ইকোসিস্তেম অসি ইনোবেসন, স্কিল দিবেলপমেন্ত, অমসুং তেক্নোলোজী ত্রান্সফরবু পুক্নিং থৌগৎতুনা চাউনা চাউখৎহনগনি। ফেসিলিতী অসিনা ইঞ্জিনীয়রশিং, তেক্নিসিয়নশিং অমসুং প্রোফেস্নেলশিংদা হকথেংননা অমসুং নাকোইননা থবক পীবগী খুদোংচাবা লিশিং কয়া শেমগৎকনি হায়না পানরি।
ঐচ.সি.এল. অমসুং ফোক্সকোনগী জোইন্ত ভেঞ্চর অসিনা মালেমগী সেমিকন্দক্তরগী লমদা ভারতকী চাউখৎলক্লিবা থাক অদু উৎলি অমসুং মপাঙ্গল লৈরবা অমসুং মশা-মরোমদোম লেপচবা ইলেক্ত্রোনিক্স মেন্যুফেকচরিং ইকোসিস্তেম অমা শেমগৎপদা অচৌবা খোংথাং অমনি।
