প্রধান মন্ত্রী শ্রী নরেন্দ্র মোদীনা ঙসি অহমদাবাদতগী ভিদিও মেসেজ অমগী খুত্থাংদা অহানবা ৱার্ল্দ য়োগাসন চেম্পিয়নশিপ হৌদোকখ্রে, মসি মালেমগী শান্ন-খোৎনবগী লিগেসীদা পুৱারী ওইরবা মাইলস্তোন অমনি। “ঙসি, অহমদাবাদকী লমদমদগী, মালেমগী শান্ন-খোৎনবগী লিগেসীদা অনৌবা চেপ্তর অমা হাপচিল্লে,” হায়না শ্রী মোদীনা ফোংদোকখি।
মালেম পুম্বগী শান্নরোইশিংবু তরাম্না ওক্লদুনা, শান্ন-খোৎনবদা শরুক য়াবদা প্রধান মন্ত্রীনা অহমদাবাদতা অনৌবা থৌরম অসি পাংথোকপদা নুংঙাইবা ফোংদোকখি। শ্রী মোদীনা হায়খি, “অহমেদাবাদ অসি য়ুনেস্কোগী ৱার্ল্দ হেরিতেজ সিতি অমনি, অমসুং ভারতকী পুৱারী ওইরবা শহর অসিদা থৌরম অসি পাংথোকপা অসি লৈবাক পুম্বগীদমক চাউথোকচনিংঙাই ওই।”
মালেমগী ওইনা য়োগগী পালন তৌবগী থৌওং অসি মরুওইনা পল্লদুনা প্রধান মন্ত্রীনা হায়খি মদুদি মালেমগী য়োগ নুমিৎ অসি জুন ২১দা তোঙান তোঙানবা লৈবাকশিংদা থৌরম কয়া পাংথোক্কনি। মসিগী মরুওইবা থৌরম অসি ভারতকী পুৱারী ওইরবা শহর কলকাতাদা পাংথোক্কনি। “মালেমগী য়োগ নুমিৎকী মমাংদা পাংথোকপা ৱার্ল্দ য়োগসন চেম্পিয়নশিপ অসিনা হকশেল অমসুং হকচাং ফনা লৈবগী দবল দোজ অমা পুরক্লি,” হায়না শ্রী মোদীনা ফোংদোকখ্রে।
মালেমগী থাক্তা য়োগবু মপাঙ্গল কনখৎহন্নবা ভারতনা হোৎনখিবা অদু নৌহৌনা নীংশিংলদুনা প্রধান মন্ত্রীনা হায়খি মদুদি চাউরাক্না চহী তরাগী মমাংদা ভারতনা য়োগগী মালেমগী নুমিৎ অমা লাউথোক্নবা য়ুনাইতেদ নেসন্সতা ৱাফম অমা পুখৎলকখি। ভারতকী অরিবা চৎনবী অসি মীওইবা খুন্নাইগী হকশেল অমসুং পুন্না হিংমিন্নবগী য়াইফ-থৌরাংগা শম্নহন্নবা হোৎনখি। “য়ু.এন.দা লৈবাক ১৯০না ভারতকী প্রপোজেল অসিবু শৌগৎখি”, হায়না শ্রী মোদীনা ফোংদোকখি।
য়োগবু মালেম পুম্বনা পাম্নবগী চাং হেনগৎলকপদা প্রধান মন্ত্রীনা নুংঙাইবা ফোংদোকখি। মহাক্না মীওই মিলিয়ন কয়ানা মতৌ করম্না য়োগ, মেদিতেসন, অমসুং প্রাবায়ামবু মখোয়গী নুমিৎ খুদিংগী রুতিন অমসুং পুন্সি মহিংদা য়াওহনবগে হায়বগী মতাংদা পনখি। লিভিং ত্রেদিসনশিংগী ইভোলুস্নরি নেচরদা মীৎয়েং থম্লদুনা মহাক্না ৱার্ল্দ য়োগসন চেম্পিয়নশিপ অসি হৌজিক্কী মতমগা চুনবা অনৌবা ফেজ অমদা য়োগগী এন্ত্রি অদু উৎলি হায়না শকখঙখি। চেম্পিয়নশিপ অসিনা য়োগসনবু মশক খঙনরবা কম্পিতিতিব দিসিপ্লিন অমা ওইনা লিংখৎপদা মরুওইবা পীখি, প্রধান মন্ত্রীনা মসি মালেমগী মরুওইবা শান্ন-খোৎনবগী থৌরমশিংদা তুংলমচৎতা য়াওহল্লগনি হায়না থাজবা ফোংদোকখি। “চেম্পিয়নশিপ অসিগী খুত্থাংদা, য়োগসন অসি কম্পিতিতিব স্পোর্ত অমা ওইনা নৌনা শকখঙবা অমা ফংলগনি অমসুং তুংলমচৎতা য়োগসন অসি ওলিম্পিক্স অমসুং অতোপ্পা মল্তি-স্পোর্ত ইভেন্তশিংদা য়াওরক্লগনি হায়না ঐহাক্না থাজবা থম্লি” হায়না শ্রী মোদীনা ফোংদোকখি।
অহমদাবাদকী অনৌবা থৌদাং অদু শকখঙলদুনা প্রধান মন্ত্রীনা হায়খি মদুদি হৌদোকপগী চেম্পিয়নশিপ অসিনা য়োগসন মালেমগী থাক্তা মশক খঙনবগী মায়কৈদা চংশিল্লিবা খোঙচৎ অসিদা মরুওইবা থৌদাং লৌগনি। শান্ন-খোৎনবা অমা ওইনা য়োগগী গ্রোথকী পাক-চাউবা ইকনোমিক অমসুং প্রোফেস্নেল ইমপ্লিকেসনশিং অদুদা মহাক্না অকনবা ৱাফম থমখি। মহাক্না সেক্তর অমসুং প্রোফেসন মখল কয়াদা ফংলিবা খুদোংচাবশিং অদু শন্দোক্না তাকখি। শ্রী মোদীনা হায়খি, "য়োগসন স্পোর্তস পাকথোক চাউথোক্লকপগা লোয়ননা, অনৌবা ওইথোকপা য়াবশিং হেনগৎলক্লগনি, মসিনা শান্নরোইশিং, ত্রেনিং পীবশিং, স্পোর্তস সাইন্তিস্তশিং, রিসর্চরশিং অমসুং ইভেন্ত মেনেজরশিংগীদমক কেরিয়রগী খুদোংচাবশিং পুরক্লগনি।"
চহি অসিগী মালেমগী য়োগ নুমিৎকী থিম “য়োগ ফোর হেল্থী এজিং” মতাংদা পল্লদুনা, প্রধান মন্ত্রীনা হৌজিক মতমগী মালেমগী হকশেলগী ওইবা ৱাফমশিং অমসুং মতম শাংনা হিংবা পাম্লিবা মোদর্ন পোপুলেসনশিংগীদমক য়োগগী মরুওইবা অদু পনখি। শ্রী মোদীনা হায়খি, “মতম শাংনা হকচাং ফনা অমসুং এক্তিব ওইদুনা লৈনবা পাম্বৈশিং থিরিবা মীওইশিংগীদমক্তা য়োগ অসি য়াম্না চুনবা ওপ্সন অমনি”।
লিবরেতিং প্রাক্তিস অমা ওইনা অমসুং শেল চংদবা হকশেলগী সোলুসন অমা ওইনা য়োগগী কান্নবা অনিদা মরুওইবা পীরদুনা, শ্রী মোদীনা য়ুনিভর্সেল এক্সেসিবিলিতীগী মতাংদা হোলিস্তিক ওইবা পাউজেল অমা পীখি। কাওররোইদবা পব্লিক হেল্থ মন্ত্র অমা প্রমোৎ তৌদুনা, মহাক্না মালেম পুম্বনা য়ানবা য়োগগী প্রিভেন্তিব পৱার অসি অচম্বা, কাওররোইদবা ৱাহৈদা শন্দোক্না তাকখি। শ্রী মোদীনা হায়খি, "নুমিৎ খুদিংগী য়োগ তৌবীয়ু, মসিনা অনাবা পুম্নমক কোকহনগনি।"
অয়ুশ মন্ত্রালয়না ইকুই কুইদ্রিঙৈদা হৌদোকখিবা 'য়োগ ৩৬৫' কেম্পেননা য়োগবু নুমিৎ খুদিংগী থবক ওইনা পাংথোকপদা য়াওহন্নবা প্রধান মন্ত্রীনা খঙহনখি। শরুক য়ারিবা শান্নরোই পুম্নমকপু ময়ুমদা হল্লক্লবা মতুংদা য়োগগী গ্লোবেল এম্বেসেদরশিং ওইনবা আপিল তৌদুনা, প্রধান মন্ত্রীনা ইথিল পীবা অমসুং ৱাখল্লোনগী লুচিংবা ওইনা মখোয়গী তোপ তোপ্পা থাক অদু খঙখি। "অদোম্না অদোমগী লৈবাকশিংদা হল্লকপা মতমদা, 'য়োগ ৩৬৫'কী এম্বেসেদরশিং ওইনা অদোমগা লোয়ননা য়োগগী পাউজেল অসি পুখো অমসুং অদোমগী এক্সপরিয়েন্স অমসুং থাজবগী খুত্থাংদা মালেম পুম্ববু মসিগী পাউজেল অসিগা শম্নহল্লু।"
শরুক য়ারিবা পুম্নমকপু কম্পিতিতিব রিজল্তকী খেন্নবা লৈতনা পুৱারী ওইরবা কন্ত্রিব্যুতরশিং ওইনা থাগৎলদুনা, শ্রী মোদীনা হৌদোকপগী থৌরম অসিদা মখোয়না শরুক য়াবগী মরুওইবা অদু খঙখি।
মালেমগী থাক্কী শান্নরোয়শিংগী পুক্নিং থৌগৎপা ঙম্বগী পাঙ্গলবু মশক খঙলদুনা মহাক্না মখোয়গী অপুনবা হৈশিংবা অমসুং দিসিপ্লিনবু মালেমগী নহারোলশিংগীদমক্তা লমজিং মৈরা ওইনা শকখঙখি। মহাক্না হায়খি, "অদোমগী থৌদাং অসিনা মালেম শিনবা থুংনা লৈরিবা নহাশিংদা ইথিল পীগনি।"
চেম্পিয়নশিপ অসি ওফিসিএল ওইনা হৌদোক্লদুনা শ্রী মোদীনা লাউথোকখি, "ঐহাক্না অহানবা ৱার্ল্দ য়োগসন চেম্পিয়নশিপ ২০২৬, অহমদাবাদ, হৌদোক্লে।"
