ভারত অমসুং ইন্দোনেসিয়াগী মরক্ত লৈনরিবা মরী অসি শুপ্নগী জিও-পোলিতিকেল খক নত্তে, মসি চহি লিশিং কয়াগী নাৎ অমসুং পুৱারিদা য়ুম্ফম ওইবনি: প্রধান মন্ত্রী
নাৎকী গুনশিং, হেরিতেচ অমসুং পুৱারিনা ভারত অমসুং ইন্দোনেসিয়াগী মরক্ত মীগা মীগা লৈনবা মরীশিং ফগৎহল্লে: প্রধান মন্ত্রী
ঙসি প্রধান মন্ত্রী শ্রী নরেন্দ্র মোদীনা ভিদিও মেসেজগী খুৎথাংদা ইন্দোনেসিয়াগী জাকারতাদা শ্রী সনাতন ধর্মা আলায়মগী মহা কুম্ভভিসেগম মনুংদা মহাক্কী ৱারোল ফোঙদোকখ্রে। মহাক্না রাস্ত্রপতি প্রাবোৱো সুবিয়ান্তো, মুরুগান তেম্পল ত্রস্ত পা হাসিমগী চিয়ার্মেন, মেনেজিং ত্রস্তি দোক্তর কোবালান, শক্নাইরবশিং, তামিল নাতু অমসুং ইন্দোনেসিয়াগী সাধুশিং অমসুং অচার্য়াশিং, লৈবাক অদুদা ভারতমচাশিং, ইন্দোনেসিয়াগী মীয়াম অমসুং শেংলবা থৌরম অসিদা শরুক য়ারিবা অতোপ্পা লৈবাকশিংগী মীওইশিং অমসুং ঈশ্বরগী ফজরবা লাইশঙ অসি শাখিবা হৈথোই-শিংথোইরবা শিন্মীশিংদা য়াইফ পাউজেল পীখি।
প্রধান মন্ত্রীনা হায়খি থৌরম অসিদা মহাক শরুক য়াবা অসি মহাক্কী লাইবক ফবনি। থৌরম অসিদা ইকায়খুম্নরবা রাস্ত্রপতি প্রাবোৱো শরুক য়াবা অসিনা মহাক্কী হেন্না অখন্নবা ওইরে। জাকারতাদগী য়াম্না লাপ্লবশু, থৌরম অসিদা য়াম্না নকশিনবা অদু মহাক্কী পুক্নিংদা ফাওরে, মসিদা ভারত-ইন্দোনেসিয়াগী অচেৎপা মরীগী মমি তারে। হন্দক রাস্ত্রপতি প্রাবোৱোনা ভারতমচা করোর ১৪০ গী নুংশিবা অদু ইন্দোনেসিয়াদা পুখ্রে অমসুং রাস্ত্রপতি খুৎথাংদা ইন্দোনেসিয়াগী মীওই খুদিংমক্না ভারতমচা খুদিংমক্কী য়াইফ পাউজেল পীরমগনি হায়না মহাক্না থাজৈ। জাকারতাগী লাইশঙদা পাংথোক্লিবা মহা কুম্ভভিসেগম থৌরমদা ইন্দোনেসিয়া অমসুং মালেম শীনবা থুংবগী ভগবান মুরুগনগী ভক্তশিংদা প্রধান মন্ত্রীনা মহাক্কী য়াইফ পাউজেল পীখি। তিরুপ্পুগজগী লাইশোনশিংগী খুৎথাংদা মখা তানা ভগবান মুরুগন থাগৎনবা অমসুং স্কান্দা সাস্তি কভচম লাইৱাশিংগী খুৎথাংদা মীওই খুদিংমক ঙাক-শেন্নবা মহাক্না থৌনিজবা অদু প্রধান মন্ত্রীনা ফোঙদোকখি। লাইশঙ অসি শানবা মঙলান মঙফাওনবা ঙম্নবা থবক কন্না শুবগীদমক দোক্তর কোবালন অমসুং মহাক্কী কাংবু প্রধান মন্ত্রীনা থাগৎপা ফোঙদোকখি।
প্রধান মন্ত্রীনা মখা তানা হায়খি মদুদি ভারত অমসুং ইন্দোনেসিয়াগী মরক্ত লৈনরিবা মরী অসি শুপ্নগী জিও-পোলিতিকেল খক নত্তে, মসি চহি লিশিং কয়াগী নাৎ অমসুং পুৱারিদা য়ুম্ফম ওইবনি। লৈবাক অনিগী মরী অসি চৎনবী, সাইন্স, লাইনিং, থাজবশিং অমসুং অধ্যাতিক্ত য়ুম্ফম ওইবনি। মরীশিং অসিগী মনুংদা ভগবান মুরুগন, ভগবান রাম অমসুং ভগবান বুদ্ধ য়াওরে। ভারত্তগী কনাগুম্বা অমা ইন্দোনেসিয়াগী প্রামবানন লাইশঙদা চৎপা মতমদা, মখোয়না কাসি অমসুং কেদরনাথতা ফংবা অধ্যাতিক্কী ৱাখল অদুগা চপ মান্না ফংগনি। কাকাৱিন অমসুং সেরাত রামায়নগী ৱারিশিংনা ভারতকী বালমিকি রামায়ন, কাম্বা রামায়ন অমসুং রামচরিতমনাসকা চপ মান্নবা ইহুল ফাওহল্লে। ভারতকী অয়োধ্যাদা ইন্দোনেসিয়াগী রামলিলাশু উৎলি। বালিদা “ঔম-শ্বাস্তি-অস্তু’ হায়না লাওরিবা অসিনা ভারত্ত বেদগী পন্দিৎশিংগী থৌজাল অদু নিংশিংহল্লে। ইন্দোনেসিয়াগী বোরোবুদুর স্তুপা অসিদা ভারতকী সরনাথ অমসুং বোধ গয়াদা ভগবান বুদ্ধগী চপ মান্নবা পাউতাকশিং অদুগী মমি তারে। মতম অমদা ভারত অমসুং ইন্দোনেসিয়া নাৎ অমসুং ললোন-ইতিক্কী লমদা শম্নরম্বগী থায়নগী সমুদ্রগী খোঙচৎশিং অদু ওরিসাগী বালি যাত্র ফেস্তিবেলদা উৎলি। ঙসি ফাওবা, ভারতমচাশিংনা গুরুরা ইন্দোনেসিয়ান এয়রলাইন্সতা পাইবা মতমদা, শরুক য়ামিন্নরিবা নাৎ অমসুং চৎনবীশিং মখোয়না উবা ফংলি।
প্রধান মন্ত্রীনা হায়খি মদুদি ভারত অমসুং ইন্দোনেসিয়াগী মরক্ত লৈনরিবা মরী অসি অকনবা লংলা কয়ানা পুল্লি। হন্দক রাস্ত্রপতি প্রাবোৱোগী ভারত খোঙচৎ মনুংদা, শরুক য়ামিন্নরিবা চৎনবী কয়া মখোয়না উখ্রে। জাকারতাগী অনৌবা ফজরবা মুরুগন লাইশঙ অসিনা চহি চা কয়া শুরবা নাৎ অসিদা অনৌবা সনাগী পন্দুব অমা হাপচিল্লে। লাইশঙ অসি লাইনিং অমসুং নাৎকী গুনশিং অনিমক্কী অনৌবা মফম অমা ওইরগনি।
প্রধান মন্ত্রীনা হায়খি জাকারতাগী মুরুগন লাইশঙ অসি ভগবান মুরুগন খক্তগী লৈফম নত্তনা অতোপ্পা ভগবানশিংগী লৈফম ওইরি। মসিগী খেন্নবা অমসুং খুদিংমক শরুক য়াবা অসি ঐখোয়গী নাৎকী য়ু্ম্ফম থোল্লি। ইন্দোনেসিয়াদা, মসিগী খেন্নবগী চৎনবী অসি “ভিন্নেকা তুঙ্গাল ইকা” হায়না খঙনৈ অমসুং ভারত্ত মসি “খেন্নবশিংগী অপুনবা শক্তম” হায়না খঙনৈ। মসিগী খেন্নবা অসি অয়াবা পীবদগী ইন্দোনেসিয়া অমসুং ভারত্ত তোঙান তোঙানবা লাইনিংগী মীওইশিং পুন্না হিংমিন্নরিবনি। ঙসিগী শেংলবা নুমিৎ অসিদা খেন্নবশিংগী মরক্ত অপুনবগী শক্তম শাগৎনবা ঐখোয়দা ইথিল পীরি।
প্রধান মন্ত্রীনা হায়খি নাৎকী গুনশিং, হেরিতেচ অমসুং পুৱারিনা ভারত অমসুং ইন্দোনেসিয়াগী মরক্ত মীগা মীগা লৈনবা মরীশিং ফগৎহল্লে। প্রামবানন লাইশঙ অমসুং বোরোবুদুর বুদ্ধিস্ত লাইশঙ ঙাক-শেন্নবা অপুনবা ৱারেপ লৌরে। অয়োধ্যাদা ইন্দোনেসিয়াগী রামলিলা উৎলে অমসুং অসিগুম্বা থৌরমশিং হেন্না পুক্নিং থৌগৎপা দরকার ওইরি। রাস্ত্রপতি প্রাবোৱোগা লোয়ননা, মাইকৈ অসিদা মখোয়না য়াংনা থবক পায়খৎকনি। হৌখ্রবা থৌদোকশিংনা অফবা তুংলমচৎ অমগ য়ুম্ফম থোনগনি। লাইশঙ অসিগী মহা কুম্ভভিসেগম অসিদা প্রধান মন্ত্রীনা রাস্ত্রপতি প্রাবোৱো অমসুং মীওই খুদিংমক্ত তৌবীমল খঙবা উৎখি।
