অমাং-অতা থেংনবা ঙম্নবা মপাঙ্গল কনখৎহন্নবা মালেমগী মরুওইবা ৱাফম ৫ প্রধান মন্ত্রীনা পুথোকখ্রে লৈবাক ২৯ কান্নবা ফংহনবা সুনামি ৱার্নিং সিষ্টেম অমা ভারতনা পুথোক্লে: প্রধান মন্ত্রী
চাউখৎলক্লিবা অপীকপা ইথৎ লৈবাকশিং অচৌবা সমুদ্রগী লৈবাকশিং ওইনা ভারতনা শক খঙলে অমসুং মখোয়গী খুদোংথিনিঙাই ওইবশিংগী অখন্নবা মীৎয়েং চঙবা দরকার ওইরে: প্রধান মন্ত্রী
ঙল্লিঙৈদা চেকশিনৱা পীরক্নবা থবকশিং ফগৎহনবা অমসুং মতেং পাংনবা অসি য়াম্না মরুওই: প্রধান মন্ত্রী
অমাং-অতাশিংদগী অমুক হন্না শেমজিন-শাজিন্নবা লৌশিং অমসুং অফবা থবকশিংগী মালেমগী দিজিতেলগী পুক্কৈ অমনা মালেম শীনবা থুংনা কান্নবা পীগনি: প্রধান মন্ত্রী
হন্দক পাংথোক্কদৌরিবা য়ুনাইতেদ নেসন্স ওসিন্স কনফরেন্সকীদমক প্রধান মন্ত্রীনা মহাক্কী য়াইফ পাউজেলশু পীখি।
ঙসি প্রধান মন্ত্রী শ্রী নরেন্দ্র মোদীনা ভিদিও কনফরেন্সকী খুৎথাংদা দিজাষ্টর রেসিলিয়েন্ত ইনফ্রাষ্ট্রকচর ২০২৫ গী মালেমগী মীফমদা ৱা ঙাংখ্রে। থৌরম অদুদা মহাক্না দিজাষ্টর রেসিলিয়েন্ত ইনফ্রাষ্ট্রকচর ২০২৫ গী মালেমগী মীফমদা শরুক য়ারিবশিং তরাম্না ওকখি অমসুং মসি য়ুরোপ্ত অহানবা ওইনা য়ুম্বু ওইবনি হায়না ফোঙদোকখি। থৌরম অসি শীনবদা মখোয়না মতেং পাংবগীদমক মহাক্না ফ্রান্সকী রাস্ত্রপতি ইম্মান্যুয়েল মেক্রোন অমসুং ফ্রান্স সরকার থাগৎপা ফোঙদোকখ্রে। হন্দক পাংথোক্কদৌরিবা য়ুনাইতেদ নেসন্স ওসিন্স কনফরেন্সকীদমক প্রধান মন্ত্রীনা মহাক্কী য়াইফ পাউজেলশু পীখি।
মীফম অসিগী থিম ‘সমুদ্র মপানগী লমদমশিংগীদমক অমাং-অতা মায়োক্নবা ঙম্বা তুংলমচৎ অমা শেমগৎপা’ হায়বসি পল্লদুনা, প্রধান মন্ত্রীনা হায়খি সমুদ্র মপানগী লমদমশিং অমসুং ইথৎশিং অসি মহৌশাগী ওইবা অমাং-অতাশিংদগী য়াম্না খুদোংথিনিঙাই ওই। হন্দক ভারত অমসুং বাংলাদেসতা নোংলৈ নুংশিৎ রেমাল, কেরিব্বিয়ানদা হুরিকেন বেরিল, খা-নোংপোক এসিয়াদা তাইফুন য়াগি, য়ু.এস.এদা হুরিকেন হেলেন, ফিলিপ্পিন্সতা তাইফুন য়ুসাগী অমসুং অফ্রিকাগী শরুকশিংদা নোংলৈ নুংশিৎ চিদো মায়োক্নখ্রে। হায়রিবা অমাং-অতাশিং আসিনা মীওই কয়া শিহনখ্রে অমসুং লন-থুমশিং মাংহনখ্রে, অমাং-অতাশিং থেংনবা ঙম্বা ইনফ্রাষ্ট্রকচর শেমগৎপা অমসুং অমাং-অতাশিং মপুংফানা থেংনবগী থবক হেন্না ফগৎহনবা দরকার ওইরে।
১৯৯৯ গী অকনবা নোংলৈ নুংশিৎ অমসুং ২০০৪ গী সুনামি য়াওনা ভারতনা মমাঙদা থেংনখ্রবা অচৌবা অমাং-অতাশিং নিংশিংলদুনা, প্রধান মন্ত্রীনা হায়খি মহৌশাগী অমাং-অতাশিং থেংনবা ঙম্নবা ভারতনা অমুক হন্না শেমগৎলে, খুদোংথিনিঙাই ওইবা মফমশিংদা নোংলৈ নুংশিৎতগী চঙজফম লৌনবা মফমশিং শারে অমসুং লৈবাক ২৯ কান্নবা ফংহনবা সুনামি ৱার্নিং সিষ্টেম অমা ভারতনা পুথোক্লে।
অমাং-অতাশিং মায়োক্নবা ঙম্বা য়ুমশিং, হোস্পিতালশিং, স্কুলশিং, ইনর্জি সিষ্টেমশিং, ঈশিং থম্নবা সিষ্টেমশিং অমসুং মাংজৌননা চেকশিনৱা পীনবা থবকশিং অপীকপা চাউখৎলক্লিবা ইথৎ লৈবাক ২৫ দা হৌজিক কোলিএসন ফোর দিজাষ্টর রেসিলিয়েন্ত ইনফ্রাষ্ট্রকচরনা পায়খৎলিবা থবকশিং পল্লদুনা, প্রধান মন্ত্রীনা হায়খি চুংশিন্নবা অসিদা পেসিফিক ইন্দিয়ান ওসিন অমসুং কেরিব্বিয়ান লমদমগী মীহুৎশিং শরুক য়াবা অসিদা থাগৎলি অমসুং মসিদা অফ্রিকান য়ুনিন শরুক য়াবদা তরাম্না ওক্লি। মালেমগী মরুওইবা থবকশিংগী মতাংদা পুক্নিং চিংশিল্লদুনা, প্রধান মন্ত্রীনা মরুওইবা হিরম ৫ পুথোকখি। অহানবদা, তুংদা লাক্কদবা শিংনবশিং থেংননবা হৈথোই-শিংথোইবা শীন্মী শেমগৎনবা অৱাংবা থাক্কী মহৈ-মশিং তম্বদা দিজাষ্টর রিসিলেয়েন্ত কোর্সশিং, মোদুলশিং অমসুং স্কিল দিবলপমেন্ত প্রোগ্রামশিং য়াওহনবা। অনিশুবদা, অমাং-অতাশিংদগী অমুক হন্না শেমজিন-শাজিন্নবা লৌশিং অমসুং অফবা থবকশিংগী মালেমগী দিজিতেলগী পুক্কৈ অমনা মালেম শীনবা থুংনা কান্নবা পীগনি হায়না মহাক্না ফোঙদোকখি। প্রধান মন্ত্রীনা হায়খি মদুদি অমাং-অতা মায়োক্নবা ঙম্নবা হোৎনবদা শেন থাদবা দরকার ওই অমসুং অহুমশুবা মরুওইবা ওইনা চাউখৎলক্লিবা লৈবাকশিংনা দরকার ওইবা শেনফমশিং ফংনবা থবক ওইনা পায়খৎকদবা থৌরমশিং শেমগদবনি। মরিশুবদা, প্রধান মন্ত্রীনা হায়খি চাউখৎলক্লিবা অপীকপা ইথৎ লৈবাকশিং অচৌবা সমুদ্রগী লৈবাকশিং ওইনা ভারতনা শক খঙলে অমসুং মখোয়গী খুদোংথিনিঙাই ওইবশিংগী অখন্নবা মীৎয়েং চঙবা দরকার ওইরে। মঙাশুবা মরুওইবা থবক্কী মতাংদা, প্রধান মন্ত্রীনা হায়খি মদুদি ঙল্লিঙৈদা চেকশিনৱা পীরক্নবা থবকশিং ফগৎহনবা অমসুং মতেং পাংনবা অসি য়াম্না মরুওই, মতম চানা ৱারেপ লৌবা অমসুং মনুং হুঞ্জিনবা মফমশিংদা মপুংফানা পাউ ফাওনবদা মখোয়না মরুওইবা থৌদাং লৌরি। মীফম অসিদা খন্নরিবা ৱাফমশিং অসিনা মখোয়গী তঙাইফদবা থবকশিং ফংহনবা ঙমগনি হায়বগী থাজবা প্রধান মন্ত্রীনা ফোঙদোকখি।
থিন্থবা তৌদনা য়াংনা মচাক-মথুমশিং শেমগৎনবা অমসুং চাউখৎ-থৌরাংগী থবক্ত অমাং-অতা মায়োক্নবা ঙম্বা ওইহনবগী দরকার ওইবা অদু প্রধান মন্ত্রীনা পনখি। মালেমগীদমক মপাঙ্গল কনবা অমসুং অমাং-অতা মায়োক্নবা ঙম্বা তুংলমচৎ অমা শেমগৎনবা মালেমগী থবকশিং পায়খৎনবা তকশিল্লদুনা মহাক্কী ৱারোল লোইশিনখি।
