চহি চা কয়াগী সভেত্যগী মরীশিং লৈনরিবা, লোয়ননা হৌজিক্কী মতম অসিদা লৈবাকশিংগী মরীশিং লৈনরিবা লৈবাক অহুম, জোরদান, ইথোপীয়া অমসুং ওমানগী লৈবাক অহুমগী খোঙচৎ অমগীদমক ঙসি ঐ খোঙশাল্লে।
নিংথৌ অবদুল্লাহ সেকেন্দ আইবিন অল হুসেন্না চেপাউ পীরকপদগী ঐ অহানবদা জোরদানদা চৎকনি। ঐখোয়গী লৈবাক অনিগী মরক্ত কুতনিতিগী মরী লৈনরকপা চহি ৭৫ মপুংফারকপগী শরুক অমা ওইনা পুৱারি ওইরবা খোঙচৎ অসি পাংথোকপনি। ঐগী খোঙচৎ মনুংদা, ঐনা নিংথৌ অবদুল্লাহ সেকেন্দ আইবিন অল হুসেন, জোরদানগী প্রধান মন্ত্রী জফর হাসানগা ৱাফম কয়া খন্নগনি অমসুং যুবরাজ অল হুসেন বিন অবদুল্লাহ সেকেন্দগা উনগনি হায়বগী থাজবা লৈরি। অম্মান্দা, ঐনা ভারত-জোরদানগী মরীশিংদা শিংথাবা য়ানা মতেং পাংলিবা ভারতমচাশিংগা উনগনি।
অম্মানদগী, ইথোপীয়াগী প্রধান মন্ত্রী দোক্তর অবি অহমদ অলিনা চেপাউ পীরকপদগী, ঐগী অহানবা খোঙচৎ ওইনা ইথোপীয়াদা চৎকনি। অদিস অবাবা অসি অফ্রিকান য়ুনিয়নগী হেদক্বাতরসু ওইরি। ২০২৩ দা, ভারতনা জি-২০ গী প্রসিদেন্দ ওইবা মতমদা, অফ্রিকান য়ুনিয়ন জি-২০ গী লেংদ্রবা মেম্বর অমা ওইহনখি। অদিস অবাবাদা, ঐনা দোক্তর অবি অহমদ অলিগা ৱারি শানগনি অমসুং লৈবাক অদুদা লৈরিবা ভারতমচাশিংগা উনগনি। ঐনা সংসদকী অপুনবা মীফমদা ৱা ঙাংগনি, মফম অদুনা “গনতন্ত্রগী মমা” ওইনা ভারতকী খোঙচৎ অমসুং ভারত-ইথোপীয়াগী মরীনা গ্লোবেল সাউথতা মতেং পাংনবা ঐগী ৱাখল্লোনশিং ঐনা ফোঙদোক্কনি।
ঐগী খোঙচৎকী অরোইবা শরুক্ত, ঐ ওমানদা চৎকনি। ভারত অমসুং ওমানগী মরক্ত কুতিনিতিগী মরী লৈনরকপা চহি ৭০ মপুং ফারকপগী শরুক অমা ওইনা ঐগী খোঙচৎ পাংথোকপনি। মুস্কাত্ত, ঐনা ওমানগী সুলতানগা ৱারি শানগনি অমসুং ললোন-ইতিক অমসুং শেন-থুমগী ঐখোয়গী মরীশিং মপাঙ্গল কনখৎনবা অমসুং ঐখোয়গী ষ্ট্রাতেজিক পার্তনরশিপ ফগৎনবা খন্নগনি। ঐনা ওমানদা লৈবা ভারতমচাশিংদা ৱা ঙাংগনি, লৈবাক অসিগী চাউখৎপা অমসুং ঐখোয়গী মরী ফগৎহনবদা ভারতমচাশিংনা অচৌবা থৌদাং লৌরি।
