ময়ামদা হরাও-তয়াম্বা ফোংদোকচরি।
নমস্কার!
ঐহাক্কা মিনিস্ত্রীগী লোয়নরিবা, কিরেন রিজিজু জি, মুরালিথারন জি, গ্লোবেল আয়ুর্বেদা ফেস্তিবেলগী সেক্রেতরী জেনেরেল দাঃ গঙ্গাধারন জি, এফ.আই.সি.সি.আই.গী প্রসিদেন্ত উদয় শঙ্কর জি, দাঃ সঙ্গীতা রেদী জি।
নুংশিরবা মরুপশিং,
ঐহাক্না মরিশুবা গ্লোবেল আয়ুর্বেদা ফেস্তিবেল অসি ৱা ঙাংবা ফংজবা অসি য়াম্না নুঙাইজৈ। এক্সপার্ত কয়া অমনা মখোয়গী মিয়েং অমসুং থেংনরকপশিং ফোংদোক্কনি হায়বা অসিদা য়াম্না নুঙাইবা ফাওজৈ। শরুক য়াগদৌরিবা লৈবাক মশীং অসি ২৫দগী হেল্লি। মসি অচৌবা খুদম অমনি। মসিনা আয়ুর্বেদা অমসুং থায়নগী হিদাক্কী চৎনবি অসিদা অপাম্বা হেনগৎলকপা অসি উৎলি। মসিগী ফোরুম অসিদগী ঐহাক্না মালেম পুম্বদা আয়ুর্বেদাগী থবকশিংদা হোৎনরিবা অসিদা থাগৎপা ফোংদোকচরি। মখোয়গী পামজবা অমসুং অখাঙ কনবা অসিনা মালেম পুম্বদা কান্নবা পীরগনি।
মরুপশিং,
আয়ুর্বেদা অসিনা ইন্দিয়গী মহৌশা অমসুং অকোইবদা লৈরিবা চৎনবি অসিগা য়াম্না নকপা মরী লৈরি। ঐখোয়গী তেক্সতা আয়ুর্বেদা অসি য়াম্না নিংথিনা হায়রি মদুদি: হিতা-হিতম সুখম দুখম, আয়ু: তস্য হিতা-হিতম। মানম চ তচ্চ য়ত্র ওক্তম, আয়ুর্বেদ স ওচ্যতে॥ আয়ুর্বেদানা মাইকৈ কয়া অমদা চেকশিন থৌরাং লৌরি। মসিনা হকচাং ফনা অমসুং পুন্সি শাংনা থম্লি। আয়ুর্বেদা অসি মপুং ফাবা হ্যুমেন সাইন্সনি হায়বা য়াই। পাম্বীদগীনা অদোমগী প্লেত ফাওবা, হকচাংগী ওইবা পাঙ্গলদগী ৱাখল ফাওবা, আয়ুর্বেদা অমসুং ত্রেদিসনেল মেদিসিন অসিগী শাফু অসি অদুক্কী মতিক অকনবনি।
মরুপশিং,
মসিনা হায়রি মদুদি: ‘স্বস্থস্য স্বাস্থ্য রক্ষন, আতুরস্য বিকার প্রশমন’। মসিনা হায়বদি: হান্ননা লৈরম্বা অনাবা কয়া অমা ফহনবতা নত্তনা, আয়ুর্বেদানা হকচাং পুম্বা ঙাকথোক্লি। ঙক্নিঙাই ওইদে, মদুদি রোগতগী হেন্দুনা, আয়ুর্বেদানা নিরোগকী মতাংদা হায়রি। মমাংঙৈদা কনাগুম্বা অমনা বাইদ্যাদা চৎলবা মহাক অদু হিদাক অদু খক্তা নত্তনা মন্ত্র খর অমসু ফংই মদুদি: ভোজন করো আরাম সে, সব চিন্তা কো মার। চবা-চবা কর খায়ে, বেদ আবে দ্বার॥ মসিনা হায়বদি: ৱাখলদা অৱাবা অমত্তা লৈতনা অদোমগী চিঞ্জাক লৌবিয়ু, চারিবা পম্বা তপ্না শাইবিয়ু… হায়রিবা অসিনা কৈদৌনুংদা য়ুমদা বাইদ্যারাজ লাক্লরোই।
মরুপশিং,
২০২০গী জুন্দা, ফাইনান্সিএল তাইমস্তা আর্তিকল অমা থেংনৈ। হেদলাইন অদু – কোরোনা ভাইরসনা ‘হেলথ হালো’গী পোত্থোকশিং কাপখৎলি। পোলমশিং অসি য়াইঙং, শিং অমসুং কোবিদ-১৯গী লায়চৎ মনুং অসিদা পাম্নবা মরু-মরাংশিং অসিনি। হৌজিক ওইরিবা ফিবম অসি আয়ুর্বেদাগী অমসুং ত্রেদিসনেল মেদিসিনগী মালেম অসিদা হেন্না মমিং লৈননবা চপ চাবা মতম অমনি। মখোয়দা পাম্নবা অসি হেনগৎলক্লি। মালেম অসিনা হৌজিক মতমগী অমসুং থায়নগী চৎনবী অনি অসিগী হকচাং ফবদা চংবা মরুওইবা খঙনরি। মীয়াম্না আয়ুর্বেদা অমসুং মসিনা লৌরিবা থৌদাংশিং অসি খঙনরক্লি। মীয়াম্না কাধা, বাসিল, ব্লেক পিপর অসি হিংবদা চংদবা য়াদবা ওইনা লৌরি।
মরুপশিং,
ঙসিদি লমকোইবা মখল কয়া অমা লৈরি। অদুবু, ইন্দিয়ানা অখন্ননা পীরিবা অসি হকচাং ফনবগী লমকোইবা অসিনি, ঐহাক্না অমুক্কা হন্না হায়রি মদুদি হকচাং ফবগী লমকোইবা অসিনি। হকচাং ফনবগী লমকোইবা অসিদা লৈরিবা অসি – অনাবা লায়েংবা, মখাতানা হকচাং ফনবা অসিনি। অমসুং, ঐহাক্না হকচাং ফনবগী লমকোইবা হায়রকপা মতমদা মসিগী খ্বায়দগী কনবা য়ুম্বী অসি আয়ুর্বেদা অমসুং ত্রেদিসনেল মেদিসিন অসিনি। খন্দুনা য়েংবিয়ু কেরলা স্তেতকী অশংবনা থল্লবা অকোইবদা অদোম্না পোত্থাবা। খন্দুনা য়েংবিয়ু অৱাং-নোংপোক্কী অশংবনা থল্লবা উমং মরক্তা লৈবা। অদোমগী পুন্সিদা অৱাবনা থল্লবা অদোম্না ইন্দিয়াদা লাকপা মতম ওইরে। অদোম্না ৱাখল হকচাং অনিমক ফগৎহনবা পাম্লবা ইন্দিয়াদা লাকপিয়ু।
মরুপশিং,
আয়ুর্বেদাগী মমিং চৎলবা অসিনা য়াম্না চাওরবা খুদোংচাবা কয়া অমা ঙাইদুনা লৈবা অসিগীদমক থাগৎপা ফোংদোকচরি। ঐখোয়না খুদোংচাবা অসি মাংহল্লোইদবনি। থায়নগী চৎনবিগা হৌজিক মতমগা চুশিন্নবগী কান্নবা কয়া অমা লৈরি। নহারোলশিংনা আয়ুর্বেদাগী পোত্থোক পাক শন্না শিজিন্নরি। মেদিকেল সাইন্সকা আয়ুর্বেদাগা পুন্সিবগী খুদম কয়া অমা লাক্লি। মসিগা মান্ননা অতোপ্পা কয়া অমসু মমিং লৈরক্লি: আয়ুর্বেদাগী সপ্লিমেন্তশিং। ঐহাক্না একাদেমিসিয়ানশিংবু আয়ুর্বেদা অমসুং ত্রেদিসনেল মেদিসিন অসিদা রিসর্স তৌনবা হায়রি। ঐহাক্না অখন্ননা নহাশিং অসিদা থাগৎপা ফোংদোক্লি মদুদি মখোয়না থায়নগী লায়েংবগী মওং অসি মালেম শিনবা থুংনা খঙবা লোল অমদা পীরি।
মরুপশা,
সরকারগী মায়কৈদগী ঐহাক্না আয়ুর্বেদাদা মপুং ফাবা মতেং পীগনি হায়না থাজবা থম্লি। ইন্দিয়ানা নেস্নেল আয়ুশ মিসন লিংখৎলি। নেস্নেল আয়ুশ মিসন অসিনা আয়ুশকী মেদিকেল সিস্তেম অসি পুখৎতুনা আয়ুশকী থবক অসি হৌননবা তৌরি। সরকার অসিনা ক্বালিতি কন্ত্রোল তৌনবা খোঙথাং কয়া অমা পায়খৎলি। ঐখোয়গী আয়ুর্বেদা অমসুং ইন্দিয়াগী হিদাক্কী সিস্তেম অসি ৱার্লদ হেলথ ওর্গানাইজেসনগী ২০১৪-২০২৩গী হিদাকশিংগা চান্নহল্লি। দবল্যু.ঐচ.ও.না ইন্দিয়াদা ত্রেদিসনেল মেদিসিনগী সেন্তর অমা লিংখৎনবা লাওথোকখ্রে। ঐখোয়না মসিগী খোঙথাং অসি তরাম্না ওক্লি। অদোম্না মসি খঙবদা হরাওগনি মদুদি হান্ননা লৈবাক কয়া অমদগী ছাত্র কয়া অমনা ভারত্তা আয়ুর্বেদা অমসুং ত্রেদিসনেল মেদিসিন তম্নবা লাক্লি। মালেম পুম্বগী ওইনা হকচাং ফনবগী খনবা অসিনা অফবা মতম অমা ওইরগনি। লোয়ননা থীম অসিদা গ্লোবেলগী ওইবা সম্মিত অমা পাংথোকপা য়ারি। লাক্কদৌরিবা মতম কয়া অসিদা ঐখোয়না আয়ুর্বেদা অমসুং আহারগী খনবা মতম ওইরে। আয়ুর্বেদাগা মরী লৈনবা চিঞ্জাক অমসুং হকচাং ফনবা চিঞ্জাক। অদোম অয়াম্বনা খঙবিরম্লগনি মদুদি নুমিৎ খরনিগী মমাংদা ২০২৩ অসি ইন্তর্নেস্নেল ইয়ার ওফ মিলেত হায়না লাওথোকখ্রে। মিলেত অসিগী কান্নবা অসি ঐখোয়না শন্দোকলশি।
মরুপশিং,
ঐহাক্না মহাত্মা গান্ধীগী ৱাহৈ খর অসিনা লোইশিনজগে। ঐহাক্না হায়জরি: ঐহাক্না আয়ুর্বেদা অসি য়াম্না থাক ৱাংনা থম্মী। মসি ইন্দিয়াগী মমাংঙৈগী সাইন্স অমনি, হায়রিবা অসিনা খুঙ্গং লিশিং কয়াগী মিল্লিয়ন কয়া অমগী মশা মউ ফনবা পখ্রবনি। ঐহাক্না নাগরিক পুম্বা আয়ুর্বেদাগী চৎন পথাপ অসিদা হিংনবা পাউতাক পীজরি। ফার্মাসি, দিস্পেন্সরী অমসুং বাইদ্যারাজ পুম্বা আয়ুর্বেদাগী খ্বায়দগী ফবা থবকশিং ফংহনবা অসিদা থৌনিজরি।অনকোত। মহাত্মা গান্ধীনা মসি চহি চাম্মগী মমাংদা হায়খ্রবনি। অদুবু মহাক্কী ৱাখল ঙসি ফাওবা মরী লৈনরি। ঐখোয়দগী মায় পাকপা অসি আয়ুর্বেদা অসিনা ওইহল্লসি। আয়ুর্বেদা অসিনা চিংশিনবা শক্তি অমা ওইদুনা মালেম অসি ঐখোয়গী লমদা পুশিল্লসি। মসিনা ঐখোয়গী নহাশিংগী য়াইফবা অমা শেম্লশি। ঐহাক্না মসিগী কনফরেন্স অসিনা মায় পাকপা ওইনবা থৌরিজরি। শরুক য়ারিবশিংদা য়াইফ পাউজেল পীজরি।
থাগৎচরি।
য়াম্না থাগৎচরি।
