প্রধান মন্ত্রী, শ্রী নরেন্দ্র মোদীনা ঙসি মধ্য প্রদেশকী জবলপুরদা রোদ, রেল, গ্যাস পাইপলাইন, হাউসিং অমসুং অফবা থক্নবা ঈশিংগুম্বা সেক্তরশিংদা লুপা করোর 12,600 হেনবগী চাউখৎ-থৌরাংগী প্রোজেক্তশিং উরেপ-উয়ুং তমখ্রে অমসুং জাতিদা কত্থোকখ্রে। শ্রী মোদীনা রানী দুর্গাবতীগী 500শুবা মপোক কুমওনগা ইরোইননা জবলপুরদা ‘বীরাঙ্গনা রানী দুর্গাবতী স্মারক ওর উধ্যান’গী ‘ভুমি পুজন’ পাঙথোকখ্রে। প্রোজেক্তশিং অদুদা ইন্দোরদা লাইৎ হাউস প্রোজেক্তকী মখাদা শাখিবা য়ুম 1000 হেন্না শঙ্গাবা, মন্দলা, জবলপুর অমসুং দিন্দোরী জিলাশিংদা তোঙান-তোঙানবা জল জীবন মিসন প্রোজেক্তশিংগী উরেপ-উয়ুং তম্বা অমসুং সিওনী জিলাদা জল জীবন মিসন প্রোজেক্ত কত্থোকপা, মধ্য প্রদেশতা রোদ ইনফ্রাস্ত্রকচর ফগৎহন্নবা লুপা করোর 4800 হেনবগী তোঙান-তোঙানবা প্রোজেক্তশিংগী উরেপ-উয়ুং তম্বা অমসুং কত্থোকপা, লুপা করোর 1850 হেনবা রেল প্রোজেক্তশিং কত্থোকপা, বিজয়পুর – ঔরৈয়ন – ফুলপুর পাইপলাইন প্রোজেক্ত অমসুং জবলপুরদা অনৌবা বোত্তলিং প্লান্ত কত্থোকপা, অমসুং মুম্বাই নাগপুর ঝারসুগুদা পাইপলাইন প্রোজেক্তকী নাগপুর জবলপুর সেক্সন (317 কিমি)গী উরেপ-উয়ুং তম্বা য়াওখি।
প্রধান মন্ত্রীনা থৌরম অসিদা উৎখিবা একজিবিসনগী ৱাকথ্রু তৌখি অমসুং বীরাঙ্গনা রানী দুর্গাবতীগী মীতমদা হৈকৎ লৈকৎ তমখি।
থৌরম অসিদা ৱা ঙাংবদা প্রধান মন্ত্রীনা মা নর্মদাগী শেংলবা লমদমদা ইকোক নোন্না খুরুমজরি অমসুং হায়খি মহাক্না জবলপুর অসি পুমনৌ নৌবা সহর অমা ওইবা উবা ফংলি মরমদি সহর অসি ইনোৎ, হরাও নুংঙাইবনা থনবগী মমিং উবা ফংলি। প্রধান মন্ত্রীনা হায়খি লৈবাক অসিনা হরাও তয়াম্বগা লোয়ননা বীরাঙ্গনা রানী দুর্গাবতীগী 500শুবা মপোক কুমওন পালন তৌরি। রানী দুর্গাবতী গৌরব য়াত্রা লোইশিনবদা প্রধান মন্ত্রীন হায়খি মহাক্না জয়েন্তী অসিবু জাতিগী থাক্তা পাঙথোক্নবা হায়খি অমসুং ঙসিগী থৌরম অমদুনা মসিগী থৌনা লিংজেল অদু তাক্লি। “ঐখোয়না মফম অসিদা ভারতকী ইপা-পুশিংদা থোনখিবা লমশিংনবা পুল্লি”, হায়না প্রধান মন্ত্রীনা ফোঙদোকখি। বীরাঙ্গনা রানী দুর্গাবতী স্মারক ওর উধ্যানগী প্রোজেক্ত প্লানগী মতাংদা ঙাংলদুনা প্রধান মন্ত্রীনা হায়খি মদুদি লৈবাক অসিদা লৈরিবা মমা লোয়ননা নহা খুদিংমক্না মফম অসিদা চৎপা পাম্মি অমসুং মসিনা তীর্থ য়াত্রা অমা ওইরক্কনি হায়বগী থাজবা ফোঙদোকখি। রানী দুর্গাবতীনা ঐখোয়না অতোপ্পদা কান্নবা পীনবগীদমক হীংনবা তাকপীরমখি অমসুং ঐখোয়দা ইমা লৈবাক্কীদমক করিগুম্বা খরা তৌনবা ইথিল পীখি হায়না ফোঙদোকখি। প্রধান মন্ত্রীনা ত্রাইবেল খুন্নাই পুম্বদা, মধ্য প্রদরশকী মীয়ামদা অমসুং লৈবাক্কী প্রজা করোর 140দা রানী দুর্গাবতীগী 500শুবা মপোক কুমওন্না লাকপদা য়াইফ পাউজেল পীখ্রে। ভারতকী নীংতম্বা ফংলবা মতুংদা লমদম অসিগী ইপা-ইপুশিংদা লম ৱাৎনা পীরম্বদা নুংঙাইতবা ফোঙদোক্লদুনা হায় লমদম অসিগী অথৌবশিংবু কাউথোকপীখি।
লুপা করোর 12,000 হেনবগী ঙসিগী প্রোজেক্তকী মতাংদা ৱা ঙাংলদুনা প্রধান মন্ত্রীনা হায় মদুদি মসিনা লৌমীশিং অমসুং নহারোলশিং য়াওনা মীওই লাখ কয়াগী পুন্সিদা অওনবা পুরক্লগনি। “লমদম অসিদা অনৌবা ইন্দস্ত্রীশিং লাকপগা লোয়ননা নহাশিংনা মফম অসিদা হৌজিক থবক ফংলগনি,” হায়না মহাক্না মখা তাখি।
প্রধান মন্ত্রীনা হায়খি হৌজিক পাল্লিবা সরকার অসিনা ইমা অমসুং ইচে-ইচলশিংগীদমক চাকশঙদা মৈখু চেলহনদবদা খ্বাইদগী মরু ওইবা মীৎয়েং চংলি। রিসর্চ স্তদী অমগী মতাংদা পল্লদুনা প্রধান মন্ত্রীনা হায়খি মৈখু চেনবা শীং শীজিন্নদুনা চাক থোংবনা নোংমদা চুরুপ 400 থকপগা মান্নৈ। মহাক্না মমাংগী সরকারনা নুপীশিংগীদমক সেফ এনভাইর্নমেন্ত অমা পীনবা খোঙথাং লৌখৎলমদবদা নুংঙাইতবা ফোঙদোকখি।
উজ্জ্বলা স্কিমগী মতাংদা ৱাং ঙাংলদুনা প্রধান মন্ত্রীনা মমাংদা গ্যাস কন্নেক্সন অমা লৌশিন্নবা হোৎনবদা থেংনরম্বা অৱাবশিং নীংশিংখি। মহাক্না হৌজিক পাল্লিবা সরকার অসিনা উজ্জ্বলা বেনিফিসরীশিংগীদমক গ্যাস সিলিন্দরশিংদা লুপা 400 হোংথহন্দুনা রক্ষা বন্দনগী হরাও কুহ্মৈ মনুংদা গ্যাসকী মমলদা হন্থহনখি হায়নসু ফোঙদোকখি। হৌজিক লাক্কদৌরিবা হরাও কুহ্মৈগী পন্থা অসিগী মাংওইননা গ্যাস সিলিন্দর অমদা লুপা 100 অমুক হন্থহন্নবা সরকারনা ৱারেপ লৌরে হায়নসু ফোঙদোকখি। “হৌখিবা চয়োল খরা অসিদা উজ্জ্বলা বেনিফিসরীশিংগীদমক গ্যাস সিলিন্দরশসিংগী মমলশিং লুপা 500 হন্থহনখি”, হায়না প্রধান মন্ত্রীনা হায়খি। রাজ্য অসিদা গ্যাস পাইপলাইনশিং তীংবগী মতাংদা প্রধান মন্ত্রীনা কেন্দ্র সরকারনা পাইপলাইনশিংগী খুত্থাংদা হোংনা চাকথোং গ্যাস সপ্লাই তৌনবা অচৌবা থবক পাইখৎলি হায়না ফোঙদোকখি।
মমাংগী সরকারশিংগী মতমদা তৌখিবা স্কেমশিংগী মতাংদা পল্লদুনা প্রধান মন্ত্রীনা হায়খি লায়রবশিংগী ফন্দশসিং অদুনা শেঞ্জা থুমজা তৌরিবশিংগী শেল লুপাক থলহনখি। মহাক্না হায় তোঙান-তোঙানবা স্কেমশিংগী পাউতনা থল্লবা চহি তরাগী মমাংগী হেদলাইনশিং ওনলাইন্দা চংদুনা য়েংনবসু হায়খি।
2014গী মতুংদা, হৌজিক পাল্লিবা সরকার অসিনা শেঞ্জা-থুমজা তৌবগী থৌওংশিং মরু ফংনা মুত্থৎনবা ‘স্বচ্ছতা’ কেম্পেন অমা চত্থখি হায়না প্রধান মন্ত্রীনা ফোঙদোকখি। “তেক্নোলোজী শীজিন্নদুনা সরকারগী লিস্ততগী শুকলৈ লৈতবা অশাবা বেনিফিসরী করোর 11 লৌথোকখি” হায়না প্রধান মন্ত্রীনা ফোঙদোকখি। “2014গী মতুংদা মোদীনা লায়রবশিংগীদমক্তা লাকপা ফন্দশিং কনাগুম্বা অমত্তনা লুত তৌবা ঙমহনখিদে”। মহাক্না হান্না লৈরম্বা শেঞ্জা-থুমজা তৌবা সিস্তেম অদু মাংহন্নবা জন ধন, আধার অমসুং মোবাইলগী ত্রিনিতী শেমখিবা অদুবু থাগৎখি। “ঙসি ত্রীশক্তিনা মরম ওইরগা অরানবা মখুৎশিংদা তাখিগদবদগী লুপা করোর লাখ 2.5 কলহৌবা ঙমখি,” হায়না প্রধান মন্ত্রীনা নৌনা ফোঙদোকখি। মহাক্না কেন্দ্র সরকারনা উজ্জ্বলা সিলিন্দরশিং শুপ্নগী লুপা 500দা ফংহন্নবা লুপা করোর কয়া চাদিং তৌখি, ইমুং করোর কয়াদা লেম্না রাসন ফংহন্নবা লুপা করোর লাখ 3 চাদিং তৌরি, আয়ুশ্মান স্কিমগী মখাদা লৈবাক্কী ইমুং করোর 5রোমদা লেম্না লায়েং ফংহন্নবা লুপা করোর 70,000 চাদিং তৌরি, লৌমীশিংনা হোংনা য়ুরিয়া ফংনবা লুপা করোর লাখ 8 চাদিং তৌরি, পি.এম. কিসান সম্মান নিধিগী মখাদা অপীকপা লৌমীশিংগী বেঙ্ক একাউন্তশিংদা লুপা করোর লাখ 2.5 হেন্না দিপোজিৎ তৌরি অমসুং লায়রবা ইমুংশিংদা পর্মিনেন্ত হাউস ফংহন্নবা লুপা করোর লাখ 4 চাদিং তৌরি হায়না ফোঙদোকখি। মহাক্না ইন্দোরদা লৈরিবা লায়রবা ইমুংশিংনা মোদর্ন তেক্নোলোজীগা লোয়ননা শাখিবা পর্মিনেন্ত হাউস 1,000 ফংলে হায়নসু ফোঙদোকখি।
মধ্য প্রদেশকীদমক হৌজিক অসি য়াম্না মরু ওইবা তানফম অমনি আয়রদুনা প্রধান মন্ত্রীনা চাউখৎ-থৌরাংদা অপনবা পীবনা হৌখিবা দিকেদ অনিদা কন্না হোৎনখিবশিং অদু মাংহনগনি হায়না ফোঙদোকখি। চহি 25গী মখাদা লৈরুবা মীওইশিংদা ওনশিন্দুনা মহাক্না হায়, “25গী মখাদা লৈরিবা মীওইশিংনা মখোয়গী মচাশিংনা লাক্কদৌরিবা চহি 25 অসিদা চাউখৎপা মধ্য প্রদেশ অমা উবা ফংহনবা অসি মখোয়গী থৌদাংনি”। মহাক্না হায় হৌজিক পাল্লিবা সরকার অসিনা হৌখিবা চহি খরা অসিদা MPবু এগ্রিকলচরেল এক্সপোর্তশিংদা মকোক্তা লৈহনখি অমসুং ইন্দস্ত্রিএল দিবেলপমেন্তদা রাজ্য অসিনা লুচিংবা অমা ওইবা হায়বসিসু মরু ওই হায়না ফোঙদোকখি। ভারতনা হৌখিবা চহি খরা অসিদা দিফেন্স প্রদক্সনশিং এক্সপোর্ত তৌবদা শরুক কয়া হেনগৎলকখি হায়রদুনা প্রধান মন্ত্রীনা জবলপুরদা দিফেন্সকা মরী লৈনবা পোৎলমশিং মেন্যুফেকচর তৌরিবা ফেক্তরী 4 লৈবনা জবলপুরনা চাউনা শরুক তমখি হায়না ফোঙদোকখি। মহাক্না হায় কেন্দ্র সরকারনা মাগী আর্মীশিংদা ‘মেদ ইন ইন্দিয়া’ খুৎলাইশিং পীরি অমসুং ভারতকী দিফেন্স গুদসকী দিমান্দ অসি মালেমদসু হেনগৎলক্লি। “মধ্য প্রদেশনা মসিদগী চাউনা কান্নবা ফংলগনি, মফম অসিদা অনৌবা থবক্কী খুদোংচাবা লিশিং কয়া লৈরগনি,” হায়না মহাক্না ফোঙদোকখি।
“ঙসি ভারতকী থাজবনা অনৌবা পনখৈ অমা য়ৌবা ঙম্লে। শান্নবুংদগী লৌবুক অমসুং কৈ ফাওবদা ভারতকী ফিরালনা পাইরি”, হায়না প্রধান মন্ত্রীনা ফোঙদোকখি। মহাক্না হৌজিক চত্থরিবা এসিয়ন গেম্স অসিদা ভারতকী ফজরবা পরফোর্মেন্স অদু পল্লদুনা ভারতকী নহা খুদিংমক্না হন্দক্তি ভারতকী মতম ওইরে হায়না ফাওরি হায়না ফোঙদোকখি। মহাক্না হায় মদুদি নহারোলনা অসিগুম্বা খুদোংচাবশিং অসি ফংবা মতমদা চাউখৎপা ভারত অমা ওইনবা মখোয়দা লৈরিবা থৌনাদা ইনোৎ হাপকনি। মহাক্না G-20গুম্বা মালেমগী অচৌবা থৌরমশিং শিনবা অমসুং ভারতকী চন্দ্রয়ানগী মাইপাকপা অদু খুদমশিং ওইনা পীরদুনা হায় ভোকেল ফোর লোকেল ওইবগী মন্ত্রী অসি অসিগুম্বা মাইপাকপশিং অসিনা মফম খুদিংমক্তা য়ৌহল্লি। প্রধান মন্ত্রীনা হন্দক্কী গান্ধী জয়েন্তীগী থৌরমদা দিল্লীদা লৈবা স্তোর অমদা লুপা করোর 1.5 হেনবগী খাদী প্রদক্তশিং য়োনখি হায়নাফোঙদোকখি। “স্বদেশীগী ৱাখল্লো, লৈবাকপু মাংদা পুখৎনীংবগী ৱাখল্লোন অসি ঙসিদি মফম খুদিংমক্তা হেনগৎলক্লি,” হায়না শ্রী মোদীনা ফোঙদোকখি। মহাক্না স্তার্তঅপশিংগী লমদা মাইপাক্লিবা অসিদা ভারতকী নহারোশিংনা লৌখিবা থৌদাংগী মতাংদসু ফোঙদোকখি। ওক্তোবর 1দা লৈবাক অসিদা হৌদোকখিবা ক্লীনলিনেস কেম্পেনদা প্রধান মন্ত্রীনা হায়খি প্রজা করোর 9গী ময়ানা শরুক য়াদুনা মফম লাখ 9 হেনবদা লুনানহনবগী প্রোগ্রামশিং পাঙথোকখি। মহাক্না মধ্য প্রদেশকী মীয়াম্না লুনানবদা রাজ্য অসিবু মকোক্তা লৈহনখিবগীদমক থাগৎখি।
মালেম পুম্বদা লৈবাক্কী মাইপাকপশিংগী মতাংদা শোন্নরিঙৈ তানফম অসিদা রাজনিতী দল খরগী ভারতকী মীংচৎ থিন্নবা তৌরিবা এপ্রোচ অসিবু প্রধান মন্ত্রীনা চেকশিনৱা থমখি। মহাক্না দিজিতেল ইন্দিয়া কেম্পেন অমসুং ভারতকী কোবিদ ভেক্সিনগা মরী লৈন্ননা অসিগুম্বা দলশিংনা ৱাহংশিং হংলকপা অসি খুদম ওইনা পীখি। মহাক্না অসিগুম্বা রাজনিতী দলশিংনা লৈবাক্কী য়েক্নবশিংনা ঙাংবা ৱাবু থাজৈ অমসুং ইন্দিয়ন আর্মীদা ফাওবা চীংনরি। মহাক্না ইলিমেন্তশিং অসিনা অমৃত মহোৎসব পালন তৌবা অমসুং অমৃত সরোভর শাবদা ক্রিতিসাইজ তৌবগী মতাংদসু ফোঙদোকখি।
শ্রী মোদীনা নীংখা তম্বদগীনা কলচরেল হেরিতেজ য়োকখৎলিবা ভারতকী ত্রাইবল সমাজগী থৌদাংগী মতাংদা ফোঙদোকখি অমসুং চহি দিকেদ কয়া লৈঙাক পাইদুনা লৈরম্লবা মীওইশিং অদুনা মখোয়বু নাথৈদুনা থম্লম্মিবা অদুগী মতাংদা ৱাহং হংখি। তোঙানবা মন্ত্রালয় অমা শেমখিবা অমসুং ত্রাইবল সমাজগী চাউখৎ থৌরাংগী বদজেত কাইথোকখিবা অদু অতলজীগী সরকারনি হায়না মহাক্না ফোঙদোকখি। হৌখিবা চহি 9 অসিদা বদজেত অসি শরুক কয়ামরুম হেনগৎলে হায়না প্রধান মন্ত্রীনা ফোঙদোকখি। ভারতনা নুপী ত্রাইবল রাস্ত্রপতি অমা ফংখিবা অমসুং ভগৱান মির্সা মুন্দাগী মপোক কুমওনবু জনজাতিয় গৌরব দিৱস হয়না পালন তৌরিবা অদুগী মতাংদা মহাক্না ফোঙদোকখি। শ্রী মোদীনা লৈবাক অসিদা লৈরিবা মতম চুনরবা রেলৱে স্তেনশিংগী মরক্তা অমা রানি কমলাপতিগী মীংদা ওনখিবা, পতালপানি স্তেসনবু জননায়ক তন্ত্যাভিলগী মীংদা ওনখিবা অদুগী মতাংদা পনখি অমসুং ঙসি রানী দুর্গাবতীজীগী মিংদা শাগদৌরিবা অচৌবা মীতম অসিগী প্রোজেক্ত অসি গোন্দ কম্ম্যুনিতীগী ইথিল অমা ওইরগনি হায়না ফোঙদোকখি। ইনাক খুল্লবা গোন্দগী চৎন-লোনচৎকী মতাংদা মীয়ামদা খংহন্নবা পান্দমগা লোয়ননা শাগদৌরিবা ম্যুজিম অসিনা গোন্দগী চৎন-লোনচৎ পুৱারী অমসুং কলা অদু উৎকনি হায়না মহাক্না ফোঙদোকখি। মালেমগী লুচিংবশিংদা গোন্দগী লাইশিং খুদোংল তমখিবা অদুগী মতাংদা প্রধান মন্ত্রীনা ফোঙদোকখি।
পঞ্চটীর্থ অমা ওইরিবা মো য়াওনা মালেমগী মফমশিং অসি দা. বাবা সাহেব অম্বেদকরকা মরি লৈনহল্লিবা অসি হীজিক পাল্লিবা সরকার অসিননি হায়না প্রধান মন্ত্রীনা ফোঙদোকখি। চয়োল খরগী মমাংদা মহাক্না সাগরদা উরেপ উয়ুং তমখিবা সন্ত রবিদাস জীগী নিংশিং খুভম অদুগী মতাংদসু মহাক্না পনখি। “মসিনা সোসিএল হার্মনী অমসুং হেরিতেজদা সরকার অসিনা লৌরিবা থৌদাং অদু উৎলি” হায়না মহাক্না মখা তাখি।
নেপোতিজম অমসুং করপ্সন শৌগৎলিবা পার্তীশিং অসিনা ত্রাইবল খুনাইগী রিসোর্সশিং অসি লুত তৌরি হায়না মহাক্না ফোঙদোকখি। 2014গী মমাংদা উমংগী পোত্থোক 8-10 ফাওবা খক্তং MSP পীরম্মি অদুগা লেমহৌরিবা অদুনা য়াম্না হন্থবা মমলদা য়োল্লম্মি অদুগা ঙসিদি উমংগী পোত্থোক 90না MSPনা কোনশিল্লে হায়না প্রধান মন্ত্রীনা ফোঙদোকখি।
প্রধান মন্ত্রীনা হায় হৌখিবা মতমদা ত্রাইবল অমসুং অপীকপা লৌমীশিংনা পুথোকপা কোরো-কিতকিগুম্বা হৱাই মখলশিং অসি য়াম্না মরুওইনা লৌনরমদে। G20 মীথুংলেনশিংগী চান-থক্নবশিং অদু নখোয়গী কোরো-কিতকিদগী শেম্বনি হায়না মহাক্না ফোঙদোকখি। “হৌজিক লৈরিবা সরকার অসিনা শ্রী অন্নাগী মওংদা কোরো-কুতকি অসি লৈবাক্কী মফম খুদিংমক্তা অমসুং মালেমগী কৈথেলদা ফংহনবা পাম্মি” হায়না মহাক্না মখা তাখি।
“দবল ইঞ্জিন সরকার অসিনা শোত্থরবা কাংলুপতা অহানবা মীয়েং থম্লি” হায়না প্রধান মন্ত্রীনা ফোঙদোকখি। লাইরবশিংগী হেকশেলগীদমক্তা পীরিবা অফবা থক্নবা ঈশিংগী মরুওইবগী মতাংদা পল্লদুনা খুঙ্গং 1600তা থক্নবা ঈশিং পীনবা শেম শারিবা ঙসিগী প্রোজেক্তশিং অসিগী মতাংদা প্রধান মন্ত্রীনা ফোঙদোকখি। মহাক্না নারি শক্তি বন্দন অধিনিয়মগী খুত্থাংদা লোক সভা অমসুং এসেমব্লীদা নুপীশিংদা মখোয়গী হক পীরিবা অসিগী মতাংদা পনখি। লুপা করোর লিশিং 13গী পি.এম. বিশ্বাকর্মা য়োজনাগী মতাংদসু প্রধান মন্ত্রীনা পনখি।
ৱারোল অদুবু তেনশিল্লদুনা প্রধান মন্ত্রীনা মধ্য প্রদেশপু চাউখৎ থৌরাংগী লমদা মকোকথোংবা মফমদা পুরক্নবা প্রজা মীয়ামদা মোদীগী গরেন্তীগী থাজবা পীখি। “মধ্য প্রদেশকী মহাকৌশাল অসিনা মোদী অমসুং সরকারগী ৱারেপ অসিবু হেন্না মপাঙ্গল হাপলগনি হায়না ঐহাক্না থাজবা থম্লি” হায়না মহাক্না ফোঙদোকখি।
থৌরম অসিদা শরুক য়াখিবা মীওইশিংগী মরক্তা মধ্য প্রদেশকী রাজ্যপাল মঙ্গুভাই সি. পতেল অমসুং মধ্য প্রদেশকী মুখ্য মন্ত্রী শ্রী শিভরাজ সিংহ চৌহান য়াওখি।
বেকগ্রাউন্দ
রানী দুর্গাবতীগী 500শুবা মপোক কুমওন অসি ভারত সরকারনা হরাউ তয়াম্বগা লোয়ননা পাংথোকখি। থৌরম অসি পাংথোক্নবগী মতাংদা জুলাই 2023দা প্রধান মন্ত্রী মধ্য প্রদেশকী শাহদোলদা চৎখিবা মহাক্কী খোঙচৎ অমগী মনুংদা ফোঙদোকখি। মসিগী পাউজেল অসি মহাক্না লাল কিলাগী লানবন্দগী পীখিবা চহি অসিগী নীংখা তম্বগী ৱারোলদসু অমুক হন্না ফোঙদোকখি। মসিগী থৌরম অসিগা মরী লৈননা প্রধান মন্ত্রীনা ‘বীরাঙ্গনা রানী দুর্গাবতী স্মারক ওর উদ্যান’গী উরেপ উয়ুং তমখি।
লুপা করোর 100 চংনা জবলপুরদা শাগদৌরিবা ‘বীরাঙ্গনা রানী দুর্গাবতী স্মারক ওর উদ্যান’ অসিনা একর 21 রোমগী মফম কনগনি। মসিদা ফুত 52 ৱাংবা রানী দুর্গাবতীগী শেঞ্জেংনা শাবা মীতম অমা শেমগৎকনি। মসিনা রানী দুর্গাবতীগী মথৌনা মরিংজেল য়াওনা গোন্দৱা রিজনগী পুৱারী উৎকদবা অচৌবা ম্যুজিয়ম অমা য়াওগনি। মসিনা গোন্দ মীয়াম অমসুং অতোপ্পা ত্রাইবল কম্ম্যুনিতীশিংগী ক্যুজিন, নাৎ, চৎন-লোনচৎ অমসুং হিংবগী মওং মতৌসু উৎকনি। ‘বীরাঙ্গনা রানী দুর্গাবতী স্মারক ওর উদ্যান’ মফম অসিদা হীদাক কান্নরবা পাম্বীশিংগী লৈকোল, কেক্তসকী লৈকোল অমসুং নুংগী লৈকোলনচিংবা য়াওনা পার্ক অমসুং লৈকোল কয়ামরুম লৈগনি। রানী দুর্গাবতী অসি 16শুবা চহিচাগী ময়াই চল্লকপদা গোন্দৱানদা পাল্লম্বা মহারানিনি। মহাক অসি মুঘলশিংগা লান্থেংনখিবী থৌনা ফবী, অকিবা খংদবা অমসুং মথৌনা লৈবা লান্মী অমা ওইনা নীংশিংদুনা লৈহৌরি।
মধ্য প্রদেসকী ইন্দোরদা লাইৎ হাওস প্রোজেক শঙ্গাদুনা ‘মীওই খুদিং য়ুম ফংহনবা’ প্রধান মন্ত্রীগী পান্দম মপাঙ্গল কনখৎহনগনি। প্রধান মন্ত্রী অৱাস য়োজনা-অর্বানগী মখাদা লুপা করোর 128 রোম চঙনা পায়খৎপা প্রোজেক অসিনা ইমুং 1000 হেন্না কান্নবা পীরগনি। প্রোজেক অসিদা খুদোংচাবা খুদিংম য়াওরবা মগুন লৈবা য়ুমশিং শানবা ‘প্রি-ইঞ্জনিয়ার স্তিল স্ত্রকচরেল সিস্তেমগা লোয়ননা প্রি-ফেব্রিকেতেদ সেন্দৱিচ পনেল সিস্তেম’গী অনৌবা তেক্নোলোজি শীজিন্নরি অমসুং মসিনা য়ুম শাবদা চঙবা মতম হন্থহল্লে।
লনাই য়ুমশিংদা তোতি শমদুনা অফবা থক্নবা ঈশিং মরাং কাইনা ফংহন্নবা প্রধান মন্ত্রীগী মঙলান মঙফাওনবা ঙম্নবা মাইকৈদা থাংজিনবা খোঙথাং অমদা, মন্দলা, জবলপুর অমসুং দিন্দোরি জিলাশিংদা লুপা করোর 2350 হেনবগী তোঙান-তোঙানবা জল জীবন মিসন প্রোজেকশিং উরেপ-উয়ুং তমখ্রে। প্রধান মন্ত্রীনা সিওনি জিলাদা লুপা করোর 100 হেনবগী জল জীবন মিসন প্রোজেক মীয়ামদা কৎথোকখ্রে। হায়রিবা প্রোজেকশিং অসিনা মধ্য প্রদেসকী খুঙ্গং 1575 রোম কান্নবা পীরগনি।
মধ্য প্রদেসতা লম্বীগী ইনফ্রাস্ত্রকচর চাউখৎহন্নবা লুপা করোর 4800 হেনবগী তোঙান-তোঙানবা প্রোজেকশিং প্রধান মন্ত্রীনা উরেপ-উয়ুং তমখ্রে অমসুং মীয়ামদা কৎথোকখ্রে। প্রধান মন্ত্রীনা উরেপ-উয়ুং তমগদবা প্রোজেকশিংগী মনুংদা NH-346গী ঝারখেদা-বেরাসিয়া-ধোলখেরি শম্নবা লম্বী ফগৎহনবা; NH-543গী বালাঘাত-গোন্দিয়া সেক্সন লেন মরি ওনখৎপা; রুধি অমসুং দেসগাউন শম্নবা খান্দৱা বাইপাস লেন মরি ওনখৎপা; NH-47গী তেমাগাউনদগী চিচোলি ফাওবগী সেক্সন লেন মরি ওনখৎপা; বোরেগাউনদগী সাহপুর ফাওবা শম্নবা লম্বী লেন মরি ওনখৎপা অমসুং সাহপুরদগী মুকতাইনাগর শম্নবা লম্বী লেন মরি ওনখৎপা য়াওরি। NH-347Cগী খালঘাত-সার্ৱারদিউলা শম্নবা লম্বী ফগৎহনবগী প্রোজেক প্রধান মন্ত্রীনা মীয়ামদা কৎথোকখ্রে।
প্রধান মন্ত্রীনা লুপা করোর 1850 হেনবগী রেল প্রোজেকশিং জাতি মীয়ামদা কৎথোক্কনি। হায়রিবা প্রোজেকশিং অসিগী মনুংদা কাত্নি-বিজয়সোতা (102 km) শম্নবা রেল লাইন অমসুং মার্ৱাসগ্রাম-শিংগ্রাউলি (78.50 km) রেল লাইন য়াওরি। হায়রিবা প্রোজেকশিং অসিনা মধ্য প্রদেসকী রেল ইনফ্রাস্ত্রকচর চাউখৎহন্দুনা রাজ্য অসিদা ললোন-ইতিক অমসুং তুরিজমদা কান্নবা পীগনি।
প্রধান মন্ত্রীনা বিজয়পুর-ঔরাইয়ান-ফুলপুর পাইপলাইন প্রোজেক জাতি মীয়ামদা কৎথোক্কনি। 352 km শাংবা পাইপলাইন অসি লুপা করোর 1750 চঙনা শেমগৎপনি। প্রধান মন্ত্রীনা মুম্বাই নাগপুর ঝারসুগুরা পাইপলাইন প্রোজেক্কী নাগপুর জবলপুর সেক্সন (317 km)গী উরেপ-উয়ুংশু তমগনি। প্রোজেক অসি লুপা করোর 11000 হেন্না চঙনা শেমগৎকদবনি। গ্যাস পাইপলাইন প্রোজেকশিং অসিনা উদোগশিং অমসুং য়ুমশিংদা মৈখু থাংদবা অমসুং মমল হোংবা নেচরেল গ্যাস ফংহনগনি অমসুং মহৌশাগী অকোয়বদা মৈখু থাদোকপা হন্থহন্নবা মাইকৈদা থাংজিনবা খোঙথাং অমনি। জবলপুরদা লুপা করোর 147 রোম চঙনা শেমগৎপা অনৌবা বোত্তলিং প্লান্ত অমসু প্রধান মন্ত্রীনা জাতি মীয়ামদা কৎথোক্কনি।
