প্ৰধানমন্ত্ৰী শ্ৰী নৰেন্দ্ৰ মোদীয়ে আজি মধ্যপ্ৰদেশৰ জবলপুৰত ১২,৬০০ কোটি টকাৰ অধিক মূল্যৰ পথ, ৰে'ল, গেছ পাইপলাইন, গৃহ আৰু বিশুদ্ধ খোৱা পানীৰ দৰে উন্নয়ন প্ৰকল্পৰ আধাৰশিলা স্থাপন কৰে আৰু দেশবাসীৰ প্ৰতি উৎসৰ্গা কৰে। শ্ৰী মোদীয়ে ৰাণী দুৰ্গাৱতীৰ ৫০০ তম জন্ম শতবাৰ্ষিকী উদযাপনৰ সৈতে সংগতি ৰাখি জবলপুৰত 'বীৰাংগনা ৰাণী দুৰ্গাৱতী স্মাৰক আৰু উদ্যান'ৰ 'ভূমি পূজা' সম্পন্ন কৰে। প্ৰকল্পসমূহৰ ভিতৰত আছে ইন্দোৰত লাইট হাউচ প্ৰকল্পৰ অধীনত নিৰ্মাণ কৰা ১০০০ তকৈও অধিক গৃহ উদ্বোধন, মাণ্ডলা, জবলপুৰ আৰু দিনদোৰী জিলাত একাধিক জল জীৱন মিছন প্ৰকল্পৰ আধাৰশিলা স্থাপন আৰু চিঅ’নি জিলাত জল জীৱন মিছন প্ৰকল্পৰ উৎসৰ্গা, মধ্য প্ৰদেশত পথ আন্তঃগাঁথনি উন্নত কৰাৰ বাবে ৪৮০০ কোটি টকাৰ অধিক মূল্যৰ একাধিক প্ৰকল্পৰ আধাৰশিলা স্থাপন আৰু উৎসৰ্গা কৰা। ১৮৫০ কোটি টকাৰ অধিক মূল্যৰ ৰে'ল প্ৰকল্প, বিজয়পুৰ-ঔৰেয়া-ফুলপুৰ পাইপলাইন প্ৰকল্প আৰু জবলপুৰত এটা নতুন বটলিং প্ৰকল্প উৎসৰ্গা কৰা, আৰু মুম্বাই নাগপুৰ ঝাৰচুগুড়া পাইপলাইন প্ৰকল্পৰ নাগপুৰ জবলপুৰ শাখাৰ (৩১৭ কিলোমিটাৰ) আধাৰশিলা স্থাপন কৰা।
প্ৰধানমন্ত্ৰীয়ে অনুষ্ঠানটোত প্ৰদৰ্শিত প্ৰদৰ্শনীখন প্ৰত্যক্ষ কৰে আৰু বীৰাংগনা ৰাণী দুৰ্গাৱতীৰ প্ৰতিমূৰ্তিত পুষ্পাঞ্জলি অৰ্পণ কৰে। অনুষ্ঠানত সমবেত লোকসকলক সম্বোধন কৰি প্ৰধানমন্ত্ৰীয়ে মা নৰ্মদাৰ পূণ্য ভূমিৰ সন্মুখত শিৰ নত কৰি কয় যে তেওঁ জবলপুৰক সম্পূৰ্ণ নতুন ৰূপত প্ৰত্যক্ষ কৰিছে, কিয়নো চহৰখন আবেগ, উৎসাহ আৰু উত্তেজনাৰে পৰিপূৰ্ণ, যিয়ে চহৰখনৰ চেতনাক প্ৰতিফলিত কৰে। প্ৰধানমন্ত্ৰীয়ে কয় যে সমগ্ৰ দেশে বীৰাংগনা ৰাণী দুৰ্গাৱতীৰ ৫০০ তম জন্ম জয়ন্তী উৎসাহ-উদ্দীপনাৰে উদযাপন কৰিছে। ৰাণী দুৰ্গাৱতী গৌৰৱ যাত্ৰাৰ সমাপ্তিৰ সময়ত প্ৰধানমন্ত্ৰীয়ে কয় যে তেওঁ ৰাষ্ট্ৰীয় পৰ্যায়ত তেওঁৰ জয়ন্তী উদযাপন কৰিবলৈ আহ্বান জনাইছিল আৰু আজিৰ সমাৱেশে একেই চেতনাৰ প্ৰতীক। প্ৰধানমন্ত্ৰীয়ে কয়, "ভাৰতৰ পূৰ্বপুৰুষসকলক আমাৰ ঋণ পৰিশোধ কৰিবলৈ আমি ইয়াত একত্ৰিত হৈছো"। বীৰাংগনা ৰাণী দুৰ্গাৱতী স্মাৰক আৰু উদ্যানৰ প্ৰকল্প পৰিকল্পনা সন্দৰ্ভত ভাষণ প্ৰদান কৰি প্ৰধানমন্ত্ৰীয়ে কয় যে দেশৰ প্ৰতিগৰাকী মাতৃৰ লগতে যুৱপ্ৰজন্মই সেই স্থান পৰিদৰ্শন কৰিব বিচাৰিব আৰু ই তীৰ্থযাত্ৰালৈ পৰিণত হ'ব বুলি বিশ্বাস ব্যক্ত কৰে। তেওঁ ৰাণী দুৰ্গাৱতীৰ জীৱনৰ কথা উল্লেখ কৰে আৰু কয় যে দুৰ্গাৱতীৰ জীৱনে আমাক আনৰ হিতৰ বাবে জীয়াই থাকিবলৈ শিকায় আৰু মাতৃভূমিৰ বাবে কাম কৰিবলৈ অনুপ্ৰাণিত কৰে। ৰাণী দুৰ্গাৱতীৰ ৫০০ সংখ্যক জন্ম জয়ন্তী উপলক্ষে প্ৰধানমন্ত্ৰীয়ে সমগ্ৰ জনজাতীয় সমাজ, মধ্যপ্ৰদেশৰ জনসাধাৰণ আৰু দেশৰ ১৪০ কোটি নাগৰিকলৈ শুভেচ্ছা জ্ঞাপন কৰে। প্ৰধানমন্ত্ৰীয়ে ভাৰতৰ স্বাধীনতাৰ পিছত এই ভূমিৰ পূৰ্বপুৰুষসকলক দিয়া স্থানৰ অভাৱৰ বাবে দুখ প্ৰকাশ কৰি কয় যে দেশৰ নায়কসকলক পাহৰি পেলোৱা হৈছিল।
আজি প্ৰায় ১২,০০০ কোটি টকাৰ প্ৰকল্পৰ সন্দৰ্ভত ভাষণ প্ৰদান কৰি প্ৰধানমন্ত্ৰীয়ে কয় যে ই কৃষক আৰু যুৱপ্ৰজন্মকে ধৰি লাখ লাখ লোকৰ জীৱন সলনি কৰিব। "অঞ্চলটোত নতুন উদ্যোগৰ আগমনৰ লগে লগে যুৱপ্ৰজন্মই এতিয়া ইয়াত চাকৰি পাব", তেওঁ লগতে কয়।
প্ৰধানমন্ত্ৰীয়ে কয় যে মাতৃ আৰু ভগ্নীসকলৰ বাবে পাকঘৰত ধোঁৱামুক্ত পৰিৱেশ প্ৰদান কৰাটো বৰ্তমান চৰকাৰৰ সৰ্বোচ্চ অগ্ৰাধিকাৰ। এক গৱেষণা অধ্যয়নৰ উদ্ধৃতি দি প্ৰধানমন্ত্ৰীয়ে জানিবলৈ দিয়ে যে ধোঁৱা নিৰ্গত কৰা ষ্টোভে ২৪ ঘণ্টাত ৪০০ টা চিগাৰেট সেৱন কৰাৰ সমান উৎপাদন কৰে। তেওঁ মহিলাসকলৰ বাবে এক সুৰক্ষিত পৰিৱেশ প্ৰদান কৰাৰ বাবে পূৰ্বৰ চৰকাৰৰ প্ৰচেষ্টাৰ অভাৱৰ বাবেও দুখ প্ৰকাশ কৰে।
উজ্জ্বলা আঁচনিৰ সন্দৰ্ভত ভাষণ প্ৰদান কৰি প্ৰধানমন্ত্ৰীয়ে পূৰ্বে গেছ সংযোগ লাভৰ ক্ষেত্ৰত হোৱা অসুবিধাৰ কথা স্মৰণ কৰে। তেওঁ বৰ্তমানৰ চৰকাৰৰ দ্বাৰা ৰক্ষা বন্ধন উৎসৱৰ সময়ছোৱাত গেছৰ মূল্য হ্ৰাস কৰাৰ কথাও উল্লেখ কৰে যিয়ে উজ্জ্বলা হিতাধিকাৰীসকলৰ বাবে গেছ চিলিণ্ডাৰ ৪০০ টকা সস্তা কৰি তুলিছিল। তেওঁ আগন্তুক উৎসৱৰ বতৰ আৰম্ভ হোৱাৰ লগে লগে গেছ চিলিণ্ডাৰৰ মূল্য ১০০ টকা হ্ৰাস কৰাৰ চৰকাৰৰ সিদ্ধান্তৰ বিষয়েও অৱগত কৰে। প্ৰধানমন্ত্ৰীয়ে কয়, "যোৱা কেইসপ্তাহমানত উজ্জ্বলা হিতাধিকাৰীসকলৰ বাবে গেছ চিলিণ্ডাৰৰ মূল্য ৫০০ টকা হ্ৰাস কৰা হৈছে"। ৰাজ্যখনত গেছ পাইপলাইন স্থাপনৰ কথা উল্লেখ কৰি প্ৰধানমন্ত্ৰীয়ে কয় যে কেন্দ্ৰীয় চৰকাৰে পাইপলাইনৰ জৰিয়তে সস্তীয়া ৰন্ধন গেছৰ যোগানৰ ক্ষেত্ৰত বৃহৎ অগ্ৰগতি লাভ কৰিছে।
পূৰ্বৰ চৰকাৰৰ সময়ৰ কেলেংকাৰী সন্দৰ্ভত আলোকপাত কৰি প্ৰধানমন্ত্ৰীয়ে কয় যে দৰিদ্ৰ লোকসকলৰ বাবে নিৰ্ধাৰিত পুঁজিয়ে দুৰ্নীতিগ্ৰস্তসকলৰ ভাণ্ডাৰ পূৰণ কৰিছিল। তেওঁ দহ বছৰ আগৰ বাতৰিৰ শিৰোনামবোৰৰ অনলাইনৰ জৰিয়তে চোৱাৰ পৰামৰ্শ দিছিল, যিবোৰ বিভিন্ন কেলেংকাৰীৰ বিষয়ে বাতৰিৰে ভৰি আছিল।
প্ৰধানমন্ত্ৰীয়ে উল্লেখ কৰে যে ২০১৪ চনৰ পিছত বৰ্তমানৰ চৰকাৰে দুৰ্নীতিপূৰ্ণ প্ৰথাবোৰ আঁতৰ কৰাৰ বাবে 'স্বচ্ছতা' অভিযান চলাইছিল। "কোনো অস্তিত্ব নোহোৱা ১১ কোটি ভুৱা হিতাধিকাৰীক প্ৰযুক্তিৰ ব্যৱহাৰেৰে চৰকাৰী তালিকাৰ পৰা আঁতৰাই দিয়া হৈছিল", প্ৰধানমন্ত্ৰীয়ে জোৰ দি কয়, "২০১৪ চনৰ পিছত মোদীয়ে নিশ্চিত কৰিছিল যে দৰিদ্ৰলোকৰ বাবে নিৰ্ধাৰিত পুঁজি কোনেও লুণ্ঠন কৰিব নোৱাৰিব।" তেওঁ দুৰ্নীতিগ্ৰস্ত ব্যৱস্থাৰ বিলুপ্তিৰ কৃতিত্ব জন ধন, আধাৰ আৰু ম'বাইলৰ ত্ৰিমূৰ্তিক দিয়ে।"আজি এই ত্ৰিশক্তিৰ বাবে ২.৫ লাখ কোটি টকাৰ অধিক টকা ভুল হাতত পৰাৰ পৰা ৰক্ষা কৰা হৈছে", প্ৰধানমন্ত্ৰীয়ে পুনৰ কয়। তেওঁ লগতে উল্লেখ কৰে যে কেন্দ্ৰীয় চৰকাৰে মাত্ৰ ৫০০ টকাত উজ্জ্বলা চিলিণ্ডাৰ প্ৰদানৰ বাবে কোটি কোটি টকা ব্যয় কৰিছে, কোটি কোটি পৰিয়ালক বিনামূলীয়া ৰেচন প্ৰদানৰ বাবে ৩ লাখ কোটি টকা ব্যয় কৰা হৈছে, আয়ুষ্মান আঁচনিৰ অধীনত দেশৰ প্ৰায় ৫ কোটি পৰিয়ালৰ বিনামূলীয়া চিকিৎসাৰ বাবে ৭০,০০০ কোটি টকা ব্যয় কৰা হৈছে, কৃষকসকলে সস্তীয়া ইউৰেয়া পোৱাটো নিশ্চিত কৰিবলৈ ৮ লাখ কোটি টকা ব্যয় কৰা হৈছে। প্ৰধানমন্ত্ৰী কিষাণ সন্মান নিধিৰ অধীনত ক্ষুদ্ৰ কৃষকসকলৰ বেংক একাউণ্টত ২.৫ লাখ কোটি টকাৰ অধিক জমা, আৰু দৰিদ্ৰ পৰিয়ালবোৰক স্থায়ী ঘৰ প্ৰদান কৰাৰ বাবে ৪ লাখ কোটি টকা ব্যয় কৰা হৈছে। তেওঁ লগতে উল্লেখ কৰে যে ইন্দোৰৰ দৰিদ্ৰ পৰিয়ালসমূহে আধুনিক প্ৰযুক্তিৰে নিৰ্মিত ১,০০০ স্থায়ী ঘৰ লাভ কৰিছে।
মধ্যপ্ৰদেশৰ বাবে এয়া এক সংকটজনক সময় বুলি উল্লেখ কৰি প্ৰধানমন্ত্ৰীয়ে কয় যে উন্নয়নৰ ক্ষেত্ৰত যিকোনো বাধাই বিগত দুটা দশকৰ কঠোৰ পৰিশ্ৰম নষ্ট কৰিব। ২৫ বছৰৰ তলৰ লোকসকলক সম্বোধন কৰি প্ৰধানমন্ত্ৰীয়ে কয় যে অহা ২৫ বছৰত তেওঁলোকৰ সন্তানে যাতে উন্নত মধ্য প্ৰদেশ দেখাৰ বাবে ডাঙৰ হয় সেয়া সুনিশ্চিত কৰাটো তেওঁলোকৰ দায়িত্ব। তেওঁ জানিবলৈ দিয়ে যে বৰ্তমানৰ চৰকাৰে বিগত বছৰবোৰত কৃষিজাত ৰপ্তানিৰ ক্ষেত্ৰত মধ্যপ্ৰদেশক শীৰ্ষস্থানলৈ লৈ গৈছে আৰু লগতে ঔদ্যোগিক বিকাশত ৰাজ্যখনে নেতৃত্ব বহন কৰাৰ গুৰুত্বৰ ওপৰতো জোৰ দিছে। বিগত বছৰবোৰত ভাৰতৰ প্ৰতিৰক্ষা উৎপাদন সম্বন্ধীয় ৰপ্তানি বহু গুণ বৃদ্ধিৰ কথা উল্লেখ কৰি প্ৰধানমন্ত্ৰীয়ে কয় যে ইয়াত জবলপুৰৰ এক ডাঙৰ অৱদান আছে। তেওঁ ইয়াত থকা প্ৰতিৰক্ষা সম্পৰ্কীয় সামগ্ৰী নিৰ্মাণ কৰা ৪টা কাৰখানাৰ অৱদানৰ কথা স্বীকাৰ কৰে। তেওঁ কয় যে কেন্দ্ৰীয় চৰকাৰে সেনাবাহিনীক 'মেড ইন ইণ্ডিয়া' অস্ত্ৰ প্ৰদান কৰি আছে আৰু বিশ্বত ভাৰতৰ প্ৰতিৰক্ষা সামগ্ৰীৰ চাহিদাও বৃদ্ধি পাইছে। তেওঁ কয়, "মধ্য প্ৰদেশেও ইয়াৰ পৰা যথেষ্ট লাভান্বিত হ'ব, ইয়াত হাজাৰ হাজাৰ নতুন নিযুক্তিৰ সুযোগ সৃষ্টি হ'ব।"
"আজি ভাৰতৰ আত্মবিশ্বাস এক নতুন উচ্চতাত আছে। খেলপথাৰৰ পৰা পথাৰ আৰু শস্য ভৰাঁললৈকে সকলোতে ভাৰতৰ পতাকা উৰি আছে", প্ৰধানমন্ত্ৰীয়ে কয়। তেওঁ চলিত এছিয়ান গেমছত ভাৰতৰ উৎকৃষ্ট প্ৰদৰ্শনৰ ওপৰত আলোকপাত কৰি কয় যে ভাৰতৰ প্ৰতিজন যুৱক-যুৱতীয়ে অনুভৱ কৰে যে এই সময় ভাৰতৰ। তেওঁ উল্লেখ কৰে যে যেতিয়া যুৱসপ্ৰজন্মই এনে সুযোগ লাভ কৰে, তেতিয়া উন্নত ভাৰত গঢ়ি তোলাৰ প্ৰতি তেওঁলোকৰ আগ্ৰহো বৃদ্ধি পায়। তেওঁ জি-২০ৰ দৰে এক বিশাল অনুষ্ঠান আয়োজন আৰু ভাৰতৰ চন্দ্ৰযানৰ সফলতাৰ উদাহৰণ দি কয় যে এনে সফলতাৰ পৰা লোকেল ফৰ ভোকেল হোৱাৰ মন্ত্ৰ দূৰদূৰলৈ প্ৰতিধ্বনিত হ'বলৈ আৰম্ভ কৰে। প্ৰধানমন্ত্ৰীয়ে কয় যে গান্ধী জয়ন্তী উপলক্ষে দিল্লীৰ এখন দোকানত ১.৫ কোটি টকাৰ অধিক মূল্যৰ খাদী সামগ্ৰী বিক্ৰী কৰা হৈছিল।"স্বদেশীৰ অনুভূতি, দেশক আগুৱাই নিয়াৰ অনুভূতি আজি সকলো ঠাইতে বৃদ্ধি পাইছে", শ্ৰী মোদীয়ে গুৰুত্ব কয়। তেওঁ ষ্টাৰ্টআপৰ জগতত সফলতা অৰ্জনৰ ক্ষেত্ৰত ভাৰতৰ যুৱপ্ৰজন্মৰ ভূমিকাৰ বিষয়েও আলোকপাত কৰে। প্ৰধানমন্ত্ৰীয়ে জানিবলৈ দিয়ে যে ১ অক্টোবৰত দেশে আৰম্ভ কৰা স্বচ্ছতা অভিযানত প্ৰায় ৯ কোটি নাগৰিকৰ অংশগ্ৰহণেৰে ৯ লাখতকৈও অধিক স্থানত পৰিষ্কাৰ-পৰিচ্ছন্নতা কাৰ্যসূচী অনুষ্ঠিত কৰা হয়। তেওঁ পৰিষ্কাৰ পৰিচ্ছন্নতাৰ ক্ষেত্ৰত ৰাজ্যখনক শীৰ্ষস্থানলৈ লৈ যোৱাৰ বাবে মধ্য প্ৰদেশৰ জনসাধাৰণক কৃতিত্ব দিয়ে।
যি সময়ত সমগ্ৰ বিশ্বতে দেশৰ সাফল্যৰ বিষয়ে আলোচনা চলি আছে তেনে এক সময়ত কিছুমান ৰাজনৈতিক দলৰ ভাৰত-আঘাতৰ দৃষ্টিভংগীৰ বিৰুদ্ধে প্ৰধানমন্ত্ৰীয়ে সতৰ্ক কৰি দিয়ে। তেওঁ ডিজিটেল ইণ্ডিয়া অভিযান আৰু ভাৰতৰ কোভিড ভেকছিন সম্পৰ্কীয় এনে দলসমূহে উত্থাপন কৰা প্ৰশ্নৰ উদাহৰণ দিয়ে। তেওঁ লগতে উল্লেখ কৰে যে এনে ৰাজনৈতিক দলসমূহে দেশৰ শত্ৰুসকলৰ কথা বিশ্বাস কৰে আৰু ভাৰতীয় সেনাক প্ৰশ্ন কৰা পৰ্যায়লৈকে গুচি যায়। তেওঁ অমৃত মহোৎসৱ উদযাপন আৰু অমৃত সৰোবৰ সৃষ্টিৰ সমালোচনা কৰা এই লোকসকলৰ কথাও ব্যক্ত কৰে।
শ্ৰী মোদীয়ে স্বাধীনতাৰ পৰা সাংস্কৃতিক ঐতিহ্যৰ সমৃদ্ধিলৈকে ভাৰতৰ জনজাতীয় সমাজৰ ভূমিকাৰ ওপৰত আলোকপাত কৰে আৰু দশকজুৰি শাসন কৰাসকলে স্বাধীনতাৰ পিছৰে পৰা তেওঁলোকক অৱহেলা কৰাক লৈ প্ৰশ্ন উত্থাপন কৰে। তেওঁ উল্লেখ কৰে যে অটলজীৰ চৰকাৰেই এটা পৃথক মন্ত্ৰালয় গঠন কৰিছিল আৰু জনজাতীয় সমাজৰ কল্যাণৰ বাবে বাজেট আৱণ্টন কৰিছিল। শ্ৰী মোদীয়ে জনায় যে যোৱা ৯ বছৰত বাজেট বহুগুণে বৃদ্ধি কৰা হৈছে। তেওঁ ভাৰতক ইয়াৰ প্ৰথম মহিলা জনজাতীয় ৰাষ্ট্ৰপতি আৰু ভগৱান বিৰচা মুণ্ডাৰ জন্ম জয়ন্তী জনজাতি গৌৰৱ দিৱস হিচাপে উদযাপন কৰাৰ কথাও ব্যক্ত কৰে। শ্ৰী মোদীয়ে ৰাণী কামলাপতিৰ নামেৰে দেশৰ অন্যতম আধুনিক ৰে'ল ষ্টেচনৰ নাম সলনি কৰা, পাটালপানি ষ্টেচনৰ নাম সলনি কৰি জননায়ক তান্তিয়াভিল ৰখা আৰু গণ্ড সম্প্ৰদায়ৰ অনুপ্ৰেৰণা হৈ থকা ৰাণী দুৰ্গাৱতীজীৰ নামত নিৰ্মাণ কৰা বিশাল স্মৃতিস্তম্ভৰ আজিৰ প্ৰকল্পৰ কথাও উল্লেখ কৰে। তেওঁ কয় যে সংগ্ৰহালয়টোৱে সমৃদ্ধ গণ্ড পৰম্পৰা সম্পৰ্কে সজাগতা সৃষ্টিৰ লক্ষ্যৰে গণ্ড সংস্কৃতি, ইতিহাস আৰু কলা প্ৰদৰ্শন কৰিব। প্ৰধানমন্ত্ৰী মোদীয়ে বিশ্বৰ নেতাসকলক গণ্ড চিত্ৰ উপহাৰ দিয়াৰ কথাও উল্লেখ কৰে।
প্ৰধানমন্ত্ৰীয়ে পুনৰ কয় যে বৰ্তমানৰ চৰকাৰেই সমগ্ৰ বিশ্বতে ডঃ বাবা চাহেব আম্বেদকাৰৰ সৈতে জড়িত স্থানসমূহ নিৰ্মাণ কৰিছে, যাৰ ভিতৰত আছে মহু, এক পঞ্চতীৰ্থ। তেওঁ কেইসপ্তাহমান আগতে সাগৰত সন্ত ৰবিদাসজীৰ স্মাৰক স্থানৰ ভূমি পূজন কৰাৰ কথাও স্মৰণ কৰে। তেওঁ লগতে কয়, "ই সামাজিক সম্প্ৰীতি আৰু ঐতিহ্যৰ প্ৰতি চৰকাৰৰ প্ৰতিশ্ৰুতি প্ৰদৰ্শন কৰে"।
তেওঁ উল্লেখ কৰে যে স্বজনপোষণ আৰু দুৰ্নীতিক প্ৰশ্ৰয় দিয়া দলবোৰে জনজাতীয় সমাজৰ সম্পদ লুণ্ঠন কৰিছে। প্ৰধানমন্ত্ৰীয়ে কয় যে ২০১৪ চনৰ পূৰ্বে কেৱল ৮-১০ টা বনজাত সামগ্ৰীৰ বাবে এমএছপি দিয়া হৈছিল, আনহাতে বাকীবোৰ অতি কম মূল্যত বিক্ৰী কৰা হৈছিল। কিন্তু আজি প্ৰায় ৯০ টা বনজাত সামগ্ৰী এমএছপিৰ পৰিধিৰ অধীনলৈ অনা হৈছে।
প্ৰধানমন্ত্ৰীয়ে কয় যে অতীতত জনজাতীয় আৰু ক্ষুদ্ৰ কৃষকসকলে উৎপাদন কৰা কোডো-কুটকীৰ দৰে মোটা শস্যক বিশেষ গুৰুত্ব দিয়া হোৱা নাছিল। তেওঁ কোডো-কুটকীৰ পৰা জি-২০ অতিথিসকলৰ বাবে খাদ্য প্ৰস্তুত কৰাৰ বিষয়ে আলোকপাত কৰে। তেওঁ লগতে কয়, "বৰ্তমানৰ চৰকাৰে কোডো-কুটকীক শ্ৰী অন্নৰ ৰূপত দেশ-বিদেশৰ বজাৰত বিতৰণ কৰিব বিচাৰে"।
প্ৰধানমন্ত্ৰীয়ে কয়, "দ্বৈত ইঞ্জিনৰ চৰকাৰে দুখীয়া লোকসকলক অগ্ৰাধিকাৰ দিয়ে"। দৰিদ্ৰ লোকসকলৰ স্বাস্থ্যৰ বাবে বিশুদ্ধ খোৱা পানী যোগানৰ গুৰুত্বৰ কথা উল্লেখ কৰি প্ৰধানমন্ত্ৰীয়ে আজিৰ প্ৰকল্পসমূহৰ কথা উল্লেখ কৰে য'ত প্ৰায় ১৬০০ খন গাঁৱলৈ পানী যোগান ধৰাৰ ব্যৱস্থা কৰা হৈছে। তেওঁ নাৰী শক্তি বন্দন অধিনিয়মৰ জৰিয়তে লোকসভা আৰু বিধানসভাত মহিলাসকলক তেওঁলোকৰ অধিকাৰ দিয়াৰ কথাও ব্যক্ত কৰে। প্ৰধানমন্ত্ৰীয়ে প্ৰধানমন্ত্ৰী ১৩ হাজাৰ কোটি টকাৰ বিশ্বকৰ্মা আঁচনিৰ কথাও উল্লেখ কৰে।
ভাষণৰ সামৰণিত প্ৰধানমন্ত্ৰীয়ে উন্নয়নৰ ক্ষেত্ৰত মধ্যপ্ৰদেশক শীৰ্ষ স্থানলৈ লৈ যোৱাৰ বাবে মোদীৰ গেৰাণ্টিৰ বিষয়ে নাগৰিকসকলক আশ্বাস দিয়ে। "মই নিশ্চিত যে মধ্য প্ৰদেশৰ মহাকৌশলে মোদী আৰু চৰকাৰৰ এই সংকল্প শক্তিশালী কৰিব", তেওঁ কয়।
মধ্যপ্ৰদেশৰ ৰাজ্যপাল মংগুভাই চি পেটেল আৰু মধ্যপ্ৰদেশৰ মুখ্যমন্ত্ৰী শ্ৰী শিৱৰাজ সিং চৌহান অনুষ্ঠানটোত উপস্থিত আছিল।
পৃষ্ঠভূমি
ৰাণী দুৰ্গাৱতীৰ ৫০০তম জন্ম জয়ন্তী ভাৰত চৰকাৰে অতি উলহ-মালহেৰে উদযাপন কৰিছে। ২০২৩ চনৰ জুলাই মাহত মধ্যপ্ৰদেশৰ শ্বাহডোল ভ্ৰমণৰ সময়ত প্ৰধানমন্ত্ৰীয়ে এই উদযাপন সন্দৰ্ভত ঘোষণা কৰে। তেওঁ এই বছৰৰ ঐতিহাসিক স্বাধীনতা দিৱসৰ ভাষণত লালকিল্লাৰ প্ৰাচীৰৰ পৰা দেশবাসীলৈ পুনৰবাৰ এই ঘোষণা কৰে। এই উদযাপনৰ লগত সংগতি ৰাখি প্ৰধানমন্ত্ৰীয়ে 'বীৰাংগনা ৰাণী দুৰ্গাৱতী স্মাৰক আৰু উদ্যান'ৰ ভূমি পূজা সম্পন্ন কৰে।
জবলপুৰত প্ৰায় ১০০ কোটি টকা ব্যয়েৰে নিৰ্মাণ হ'বলগীয়া 'বীৰাংগনা ৰাণী দুৰ্গাৱতী স্মাৰক আৰু উদ্যান' প্ৰায় ২১ একৰ এলেকাজুৰি ব্যাপ্ত হব। ইয়াত ৰাণী দুৰ্গাৱতীৰ ৫২ ফুট ওখ ব্ৰঞ্জৰ এক আকৰ্ষণীয় মূৰ্তি প্ৰদৰ্শন কৰা হ'ব। ইয়াত ৰাণী দুৰ্গাৱতীৰ বীৰত্ব আৰু সাহসকে ধৰি গণ্ডৱানা অঞ্চলৰ ইতিহাসৰ ওপৰত আলোকপাত কৰা এটা সুন্দৰ সংগ্ৰহালয় থাকিব। ই গণ্ড লোক আৰু অন্যান্য জনজাতীয় সম্প্ৰদায়ৰ ৰন্ধনপ্ৰ ণালী, কলা, সংস্কৃতি, জীৱন ধাৰণৰ পদ্ধতি আদিৰ ওপৰতো আলোকপাত কৰিব। 'বীৰাংগনা ৰাণী দুৰ্গাৱতী স্মাৰক আৰু উদ্যান'ৰ চৌহদত ঔষধি উদ্ভিদৰ বাবে এখন বাগিচা, এখন কেকটাছ বাগিচা আৰু ৰক বাগিচাকে ধৰি একাধিক উদ্যান আৰু বাগিচাও থাকিব। ৰাণী দুৰ্গাৱতী ষোড়শ শতিকাৰ মাজভাগত গণ্ডৱানাৰ শাসনাধিষ্ঠ ৰাণী আছিল। তেওঁক এগৰাকী সাহসী, নিৰ্ভীক আৰু সাহসী যোদ্ধা হিচাপে জনা যায়, যিয়ে মোগলৰ বিৰুদ্ধে স্বাধীনতাৰ বাবে যুঁজ দিছিল।
মধ্যপ্ৰদেশৰ ইন্দোৰত লাইট হাউচ প্ৰকল্পৰ উদ্বোধনৰ লগে লগে 'সকলোৰে বাবে গৃহ' প্ৰদানৰ প্ৰধানমন্ত্ৰীৰ দৃষ্টিভংগী শক্তিশালী হৈ পৰিল। প্ৰধানমন্ত্ৰী আৱাস যোজনা-নগৰৰ অধীনত প্ৰায় ১২৮ কোটি টকা ব্যয়েৰে নিৰ্মাণ কৰা এই প্ৰকল্পটোৱে ১০০০ ৰো অধিক হিতাধিকাৰী পৰিয়ালক লাভান্বিত কৰিব। ই সকলো মৌলিক সুবিধাৰ সৈতে মানসম্পন্ন ঘৰ নিৰ্মাণৰ বাবে অভিনৱ প্ৰযুক্তি 'প্ৰি-ইঞ্জিনীয়াৰ্ড ষ্টীল ষ্ট্ৰাকচাৰেল চিষ্টেমৰ সৈতে প্ৰি-ফেব্ৰিকেটেড চেণ্ডউইচ পেনেল চিষ্টেম' ব্যৱহাৰ কৰে আৰু নিৰ্মাণৰ সময় যথেষ্ট হ্ৰাস কৰে।
ব্যক্তিগত ঘৰুৱা টেপ সংযোগৰ জৰিয়তে সুৰক্ষিত আৰু পৰ্যাপ্ত খোৱা পানী যোগান ধৰাৰ প্ৰধানমন্ত্ৰীৰ দৃষ্টিভংগী সাকাৰ কৰাৰ দিশত এক পদক্ষেপ হিচাপে মাণ্ডলা, জবলপুৰ আৰু দিনডোৰী জিলাত ২৩৫০ কোটি টকাৰ একাধিক জল জীৱন মিছন প্ৰকল্পৰ আধাৰশিলা স্থাপন কৰা হয়। প্ৰধানমন্ত্ৰীয়ে চিঅ’নি জিলাৰ জল জীৱন মিছন প্ৰকল্পটো দেশবাসীৰ প্ৰতি উৎসৰ্গা কৰে। ৰাজ্যখনৰ চাৰিখন জিলাৰ এই প্ৰকল্পসমূহে মধ্য প্ৰদেশৰ প্ৰায় ১৫৭৫ খন গাঁৱক লাভান্বিত কৰিব।
প্ৰধানমন্ত্ৰীয়ে মধ্যপ্ৰদেশত পথ আন্তঃগাঁথনি উন্নত কৰাৰ বাবে ৪৮০০ কোটি টকাৰ অধিক মূল্যৰ একাধিক প্ৰকল্পৰ আধাৰশিলা স্থাপন কৰে আৰু দেশবাসীক উৎসৰ্গা কৰে। প্ৰধানমন্ত্ৰীয়ে ঝাৰখেদা-বেৰাছিয়া-৩৪৬ নং ৰাষ্ট্ৰীয় ঘাইপথৰ ঢোলখেদি সংযোগী পথ উন্নীতকৰণকে ধৰি প্ৰকল্পসমূহৰ আধাৰশিলা স্থাপন কৰে; ৫৪৩ ৰাষ্ট্ৰীয় ঘাইপথৰ বালাঘাটৰ-গণ্ডিয়া শাখা চাৰি লেনযুক্ত কৰা; ৰুধি আৰু দেশগাঁওক সংযোগ কৰা খাণ্ডৱা বাইপাছ চাৰি লেনযুক্ত কৰা; ৰাষ্ট্ৰীয় ঘাইপথ ৪৭-ৰ তেমাগাঁৱৰ পৰা চিচোলি শাখালৈ চাৰি লেনযুক্ত কৰা; বৰেগাঁৱক শ্বাহপুৰৰ সৈতে সংযোগ কৰা চাৰি লেনৰ পথ; আৰু শ্বাহপুৰক মুক্তাযইনগৰৰ সৈতে সংযোগ কৰা চাৰি লেনৰ পথ। প্ৰধানমন্ত্ৰীয়ে উন্নীতকৰণ কৰা ৩৪৭ চি ৰাষ্ট্ৰীয় ঘাইপথৰ খালঘাটৰ পৰা চাৰৱাদেৱলালৈ সংযোগী পথছোৱা ৰাষ্ট্ৰৰ প্ৰতি সমৰ্পিত কৰে।
প্ৰধানমন্ত্ৰীয়ে ১৮৫০ কোটি টকাৰ অধিক মূল্যৰ ৰে'ল প্ৰকল্পসমূহ দেশবাসীৰ প্ৰতি উৎসৰ্গা কৰে। ইয়াৰ ভিতৰত আছে কাটনি-বিজয়চোটা (১০২কিমি) আৰু মাৰৱাচগ্ৰাম-চিংৰাউলি (৭৮.৫০ কিমি) সংযোগী ৰে'ল লাইন দ্বৈতকৰণ কৰা। এই দুয়োটা প্ৰকল্প কাটনি-চিংৰাউলি শাখাক সংযোগ কৰা ৰে'ল লাইন দ্বৈতকৰণ কৰা প্ৰকল্পৰ অংশ। এই প্ৰকল্পসমূহে মধ্য প্ৰদেশত ৰেল আন্তঃগাঁথনি উন্নত কৰিব, যাৰ ফলত ৰাজ্যখনৰ বাণিজ্য আৰু পৰ্যটন লাভান্বিত হ'ব।
প্ৰধানমন্ত্ৰীয়ে বিজয়পুৰ-ঔৰেয়া-ফুলপুৰ পাইপলাইন প্ৰকল্প দেশবাসীৰ বাবে উৎসৰ্গা কৰে। ৩৫২ কিলোমিটাৰ দীঘল পাইপলাইনটো ১৭৫০ কোটি টকাতকৈও অধিক ব্যয়েৰে নিৰ্মাণ কৰা হৈছে। প্ৰধানমন্ত্ৰীয়ে মুম্বাই নাগপুৰ ঝাৰচুগুড়া পাইপলাইন প্ৰকল্পৰ নাগপুৰ জবলপুৰ শাখাৰ (৩১৭ কিলোমিটাৰ) আধাৰশিলা স্থাপন কৰে। প্ৰকল্পটো ১১০০ কোটি টকাতকৈও অধিক ব্যয়েৰে নিৰ্মাণ কৰা হ'ব। গেছ পাইপলাইন প্ৰকল্পসমূহে উদ্যোগৰ লগতে পৰিয়ালসমূহক পৰিষ্কাৰ আৰু সুলভ প্ৰাকৃতিক গেছ প্ৰদান কৰিব আৰু পৰিৱেশত নিৰ্গমন হ্ৰাস কৰাৰ দিশত এক পদক্ষেপ হ'ব। প্ৰধানমন্ত্ৰীয়ে জবলপুৰত এটা নতুন বটলিং প্ৰকল্পও উৎসৰ্গা কৰে যিটো প্ৰায় ১৪৭ কোটি টকা ব্যয়েৰে নিৰ্মাণ কৰা হৈছে।
