ঐহাক্কী নুংশিরবা লৈবাক মীয়াম, নমস্কার!
ঐহাক্না অদোম পুম্নমকপু ‘মন কী বাত’তা অমুক্কা হন্না তরাম্না ওক্লি। হন্দক্কী প্রোগ্রাম অসিনা ৯৫শুবা তাঙ্কক্নি। ঐখোয়না ১০০শুবা ‘মন কী বাত’কী মাইকৈদা খোঙজেল য়াঙনা চঙশিল্লি। মসিগী প্রোগ্রাম অসিদি ঐহাক্কা লৈবাক মীয়াম করোর ১৩০গা পাউ ফাওনবগী অতোপ্পা পাম্বৈ অমনি। তাঙ্কক খুদিংগী মমাংদা খুঙ্গং অমসুং শহরশিংদগী লাকপা চিথী পাবা, অঙাং অমসুং অহলশিংনা থারকপা ওদিও মেসেজ তাবনা ঐহাক্কী স্পিরিচুএল এক্সপেরিএন্স অমা ওইরি।
মরুপশিং, ঐহাক্না তোপ-তোপ্পা খুদোলপোৎ অমগী মতাংদা পন্দুনা ঙসিগী থৌরম হৌদোক্নিংই। তেলঙ্গানাগী রাজন্না সির্সিলা জিলাদা ফিশা-লোন্সা তৌবা মরুপ অমা লৈ – য়েলদি হরিপ্রসাদ গারু হায়দনা। মহাক মশামক্না লোনবা জি.২০গী লোগো অমা মহাক্না ঐহাক্কী ইফমদা থারকই। নিংথিরবা খুদোল অদু উবদা ঐহাক্তি অঙকপা পোকখ্রে। হরিপ্রসাদজী অসি মহাক্কী আর্ত্তা অসুক্কী মতিক হৈ, মহাক্না মীপুম খুদিংগী পুক্নিং চিংশিল্লে। মখুৎমক্না লোনবা লোগোগা লোয়ননা মহাক্না চিথী অমসু থারক্লি। ভারতনা মথংগী চহিদা জি.২০ সম্মিতকী য়ুম্বু ওইগদৌরিবসি য়াম্না চাউথোচনীংঙাইনি হায়না মহাক্না ইরকখি। লৈবাক্কী মায় পাকপা কয়াগী মরকসিদা মহাক মশামক্না জি.২০গী লোগো শেম্লি। মহাক্না মসিগুম্বা ফি-লোনবগী নিংথীরবা মহৈ অসি মহাক্কী মপাবুংদগী ফংজবনি, অমসুং ঙসিদি মহাক্না মসিবু থৱাই য়াওনা মখা চত্থরি।
মরুপশিং, ঐহাক্না নুমিৎ খরনিগী মমাংদা ভারতকী জি.২০ লোগো অমসুং প্রসিদেন্সীগী ৱেবসাইত লোঞ্চ তৌবগী খুদোংচাবা ফংজখি। লোগো অসি মীয়ামগী কন্তেস্ত অমদগী খনখিবনি। হরিপ্রসাদজীনা থাবীরকপা খুদোলপোত অসি ফংবা মতমদা, ঐহাক্কী পুক্নিংদা অতোপ্পা ৱাখলোন অমসু লাকখি। তেলঙ্গানাদা ফমদুনা লৈরিবা মীওই অমনা ফাওবা জি.২০গুম্বা সম্মিতকা কয়া য়াম্না নক্নবা মরী লৈবগে খঙবদা ঐহাক্না নুংঙাইবা ফাওখি। ঙসিদি, হরিপ্রসাদ গারুগুম্বা অতোপ্পা মীওই কয়ানা লৈবাক অসিনা অসিগুম্বা অচৌবা সম্মিতকী য়ুম্বু ওইবসিদা চাউথোকচবা ফাওই হায়দুনা চিথী কয়া ইরক্লি। পুনেদগী সুব্বা রাও চিল্লারা অমসুং কোলকতাদগী তুশার জগমোহন্না ইরকপা ৱারোলশিং মীয়ামদা পঞ্জগে। মখোয়না ভারতনা জি.২০গা মরী লৈননা থৱাই য়াওনা হোৎনবগী থৌওংশিংবু থাগৎলকখি।
মরুপশিং, জি.২০ পার্তনরশিপ অসিদা মালেমগী অপুনবা মীশিংগী শরুক অহুম থোকপগী অমা, মালেমগী ত্রেদকী শরুক অহুম থোকপগী অমা, মালেমগী জি.দি.পি.গী ৮৫%না শরুক য়ারি। মসিগুম্বা মপাঙ্গল লৈরবা কাঙলুপ অমবু ভারতনা ঙসিদগী হুম্নিশুবা নুমিৎকী মতুংদা, হায়বদি দিসেম্বর ১দগী লুচিংগদৌরিবনি। ভারত অমসুং ভারত মচাশিংগী মফমদা কয়াদা চাওরবা খুদোংচাবা অমা লাক্লিবনো! নিংতম্বগী অমৃত কালগী মতমসিদা থৌদাং অসি শিন্নরকপা অসিনা হেন্না অখন্নবা ওইহল্লবনি।
মরুপশিং, জি.২০ প্রসিদেন্সীনা ঐখোয়দা অচৌবা খুদোংচাবা অমা পীরবনি। ঐখোয়না মসিগী মপুং ফাবা কান্নবা লৌগদবনি অমসুং মালেমগী য়াইফদবা মিৎয়েং চঙগদবনি। শান্তি পুরকপা নত্ত্রগা অমত্তা ওইদুনা লৈবা ওইরো, ইনভাইরনমেন্তকীদমক্তা খনবা ওইরো, নত্ত্রগা সস্তেনেবল দিভেলপমেন্ত ওইরো, ভারতনা হায়রিবা হীরমশিং অসিগা মরী লৈনবা ৱারোইশিন পুম্নমক লৈ। ঐখোয়না থীম ওইরিবা “পৃথিবী অমা, ইমুং অমা, তুংগী অমা”গী ৱারোলনা ঐখোয়না বাসুদৈবা কুতুম্বাকমগীদমক্তা খোঙফম চেৎলিবসিগী মতৌ উৎলি। ঐখোয়না মতম পুম্বদা হায়দুনা লাক্লিঃ
ওম সর্বেশম স্বস্তিরভবতু।
সর্বেশম শান্তি ভবতু।
সর্বেশম পুর্নমভবতু।
সর্বেশম মঙ্গলমভবতু।
ওম শান্তিঃ শান্তিঃ শান্তি ।।
মসিনা হায়বদি, মীপুম খুদিং য়াইফ নুংঙাইগদবনি, শান্তি লৈগদবনি, অনিংবা অপাম্বা পুম্নমক ফংগদবনি হায়বনি। লাক্কদৌরিবা মতমশিংদা, লৈবাক্কী তোঙানবা মফমশিংদা জি.২০গা মরী লৈনবা থৌরম কয়া পাংথোক্কনি। মালেমগী তোঙানবা মফমদগী লাকপা মীওইশিংনা মতমসিগী মনুংদা অদোমগী রাজ্য উবগী খুদোংচাবা ফংগনি। অদোম্না মালেমগী মফমদা অদোমগী চৎনবীগী তোঙানবা অমসুং তোপ-তোপ্পা মতৌ উৎকনি হায়না ঐহাক্না থাজৈ। মখোয়না হৌজিক দেলিগেত ওইনা লাক্লবসু, মখোয়না মথংদদি তুরিস্ত ওইনা লাক্কনি। ঐহাক্না অদোম পুম্নমক্কী মফমদা, অখন্ননা, নহাশিংগী মফমদা করিগুম্বা ৱাফম অমা থমজনীংই। ভারতকী জি.২০ লোগো অসি ফিরোলদা য়াম্না নিংথিজনা নম্বা য়াবনি, শাবা য়াবনি, প্রিন্ত তৌবা য়াবনি। ঐহাক্না স্কুল, কোলেজ অমসুং য়ুনিভর্সিতীশিংনা মখোয় মশাগী মফমশিংদা জি.২০গা মরী লৈনবা দিবেত, খন্ন-নৈনবা অমসুং কম্পিতিসন পাংথোকপগী খুদোংচাবা শীনবীয়ু হায়জনীংই। অদোম্না জি.২০ ৱেবসাইত্তা চঙবা মতমদা, অদোমগী অপাম্বগী মতুং ইনবা নুংঙাইবা পোৎলম কয়া থেংনগনি।
ঐহাক্কী নুংশিরবা লৈবাক মীয়াম, নবেম্বর ১৮দা স্পেস সেক্তরদা অনৌবা পুৱারী শেমখিববু লৈবাক পুম্বনা উখ্রে। নুমিৎ অসিদা ভারতনা লৈবাক অসিগী প্রাইভেত সেক্তরনা শেম-শাবা খ্বাইদগী অহানবা রোক্কেত থাগৎখি। রোক্কেত অসিগী মমিংসু –‘বিক্রম-এস.’ থোনখি। ইন্দিজিনিয়স স্পেস স্তার্তঅপকী অহানবা রোক্কেত্না শ্রিহরিকোতাদগী পুৱারী ওইরবা ফ্লাইত পায়হনখিবগা ভারত মচা খুদিংগী থম্মোইনা পেঞ্জখি, চাউথোকচখি।
মরুপশিং, ‘বিক্রম-এস’তা তোঙানবা ফীচর কয়া হাপ্লি। মসিনা অতোপ্পা রোক্কেতশিংদগী য়াংই অমসুং হোঙবসু হেল্লি। স্পেস মিসন পাংথোকপা অতোপ্পা লৈবাকশিংনা চঙবা শেলদগী ঐখয়গীসিনা য়াম্না হেন্না তাই। স্পেস তেক্নোলোজীদা অহোঙবা মমলদা মালেমগী থাক্তা লৈবা স্তেন্দর্দ য়ৌবা হায়বসিনা ভারতকী হোলমার্ক ওইরবনি। রোক্কেত অসি শাবদা অতোপ্পা মোদর্ন তেক্নোলোজী অমসু শিজিন্নখি। রোক্কেত অসিগী মরু ওইবা পার্ত খরদি ৩দি প্রিন্তিং শিজিন্নদুনা শাখি তাবদা অদোম্না ঙকপা ফাওগনি। ‘বিক্রম-এস’ থাগৎপগী মিসন্দা ‘প্রারম্ভ’ হায়না মিংথোল্লিবা অসি তসেংনা য়াম্না চান্নৈ। মসিদি লৈবাক্না মশাদা থাজবগী য়ুগ অমা হৌরকপনি। চেনা প্লেন শাদুনা পায়হল্লম্বা অঙাংশিংনা হৌজিক ভারত্তা প্লেন শাবগী খুদোংচাবা ফংলগনি। অতিয়াদা উবা মওং-মতোউ কয়াবু য়েকপগী হৈনবী লৈরম্বা অঙাংশিংনা হৌজিক্তি ভারত মক্তদা রোক্কেত শাবা ঙম্লক্লবনি। স্পেসপু প্রাইভেত সেক্তরদা হাংদোকখিবা মতুংদা, ঐখোয়গী নহাশিংগী মঙলান মঙফাওনবা হৌরক্লে। অতিয়ানা পনখৈ নত্তে হায়না রোক্কেত শারিবা নহাশিংনা হৌজিক হায়বা হৌরবনি।
মরুপশিং, ভারতনা স্পেস সেক্তরদা মায় পাকপশিংবু য়ুম্লোন্নবা লৈবাকশিংগা শেয়র তৌনরি। ভারত অমসুং ভুতান্না পুন্না শামিন্নবা সেতিলাইত অমা ঙরাং থাগৎখ্রে। সেতিলাইত অসিনা রিজোল্যুসন ৱাংবা ফোতো কয়া থারক্কনি, মসিনা ভুতানগী মহৌশাগী পোত্থোকশিং শেন্নবদা ভুতান্দা য়াম্না কান্নবা পীগনি। সেতিলাইত থাগৎখিবসিনা ভারত-ভুতানগী মপাঙ্গল মরী লৈবগী শক্তম উৎলি।
মরুপশিং, ঐখোয়না মমাংগী ‘মন কী বাত’কী তাঙ্ককশিংদা স্পেস, তেক, ইন্নোভেসনগী মতাংদা অয়াম্বা ৱারী শাখিবগী মতৌ উরমগনি। মসিগী অখন্নবা মরম অনি লৈঃ অমনা, ঐখোয়গী নহাশিংনা হীরম অসিদা মশক থোকপা থবক কয়া পাংথোক্লি। মখোয়না চাউনা খন্দুনা চাউনা মায় পাকপসু ফংলি। হৌজিক্তি, মখোয়না অপীকপা মায় পাকপদা পেল্লরোই। অনিশুবা, মসিগী ইন্নোভেসন অমসুং ভেল্যু ক্রিএসন তৌবগী নুংঙাইরবা খোঙচৎ অসিদা, মখোয়না মখোয়গী কলিগ অমসুং স্তার্তঅপশিংবুসু পুক্নিং থৌগৎলি।
মরুপশিং, তেক্নোলোজীগা মরী লৈনবা ইন্নোভেসনগী মতাংদা ৱারী শারবনিনা, ঐখোয়না মসিদা দ্রোন করম্না কাওগনি? ভারতনা দ্রোনগী লমদসু খোঙজেল য়াঙনা চঙশিল্লি। হিমাচল প্রদেশকী কিন্নোউরদা দ্রোন শিজিন্নদুনা শেম পুথোক-পুশিন তৌবগী মতৌ নুমিৎ খরনিগী মমাংদা ঐখোয়না উখ্রে। কিন্নাউর অসি হিমাচলগী মনুং হঞ্জিনবা জিলা অমনি অমসুং হৌজিক্কী কুমজাসিদা মফমসিদা উন য়াম্না কন্না তাই। মদুনা রম ওইরগা, কিন্নাউরগা রাজ্যসিগী অতোপ্পা মফমগা শম্নবদা চয়োল কয়া অৱাবা ওই। মসিগুম্বা মতমসিদা, শেম পুথোক-পুশিন তৌবসু মান্ননা অৱাবা ওই। অদুবু, দ্রোন তেক্নোলোজীগী মতেংদগী মহাও লৈবা হিমাচলগী কিন্নাউরী শেম মীপুম খুদিংগী মফমদা য়াম্না থুনা য়ৌবা ঙমহল্লগনি। মসিনা ঐখোয়গী লৌমী ইচিল-ইনাওশিংগী চাদিংদা হন্থহনবগা লোয়ননা শেমশিংনা কৈথেলদা মতম চানা য়ৌবা ঙম্লগনি, শেম মাঙবগী য়াম্না হন্থরগনি।
মরুপশিং, ঐখোয়না মমাংদা ৱাখলনা লাম্বা ফংলমদবা কয়া অমা ঐখোয়গী লৈবাক মীয়াম্না মখোয়গী ইন্নোবেসনগী মতেংদগী পাংথোকপা ঙম্লে। মসিবু কনানা উবা পাম্লোইদগে? মমাংগী চহি খরদা ঐখোয়গী লৈবাক্না মায় পাকপগী শাংলবা খোঙচৎ অমা চৎখ্রে। ঐখোয় ভারত মচাশিং, মরু ওইনা, ঐখোয়গী নহা ওইরিবা চারোন শুরোনশিংনা হৌজিক লেপ্তুনা লৈররোই হায়না ঐহাক্না থাজবা থম্লি।
নুংশিরবা লৈবাক মীয়াম, ঐহাক্না অদোমগীদমক্তা ক্লিপ মচা অমা থাগে.....
##(ঈশৈ)##
অদোম পুম্নমক্না ঈশৈ অসি মফম অমদা নত্ত্রগা অমদা শোইদনা তারম্লগনি। মসিদি বাপুগী খ্বাইদগী পামজবা ঈশৈনি। অদুবু, ঈশৈসিবু শক্লিবা শৈশকপশিং অসি গ্রীস্তগীনি তাবদা অদোম ঙক্কনি। লোয়ননা, অদোম্বু চাউথোকহনগনি। ঈশৈ অসি গ্রীসকী শৈশকপা, ‘কোন্সতান্তিনোস কলাইতজিস’না শকপনি। মহাক্না বাপুগী ১৫০শুবা মপোক কুমওন মনুংদা ঈশৈসি শকখিবনি। অদুবু, ঐহাক্না মসিগী ৱারী ঙসি শারিবসিদি অতোপ্পা মরমগীনি। মহাক্না ভারত অমসুং ভারতকী ঈশৈ নোংমাইবু য়াম্না পামজৈ। মহাক্না ভারতপু কয়াম্না পামজবগে হায়বদা মহাক্না মমাংগী চহি ৪২দগী ভারত্তা চহিদা অনিরক লাকই। মহাক্না ভারতকী ঈশৈ-নোংমাইগী হৌরকফম, তোঙান-তোঙানবা ভারতকী ম্যুজিকেল সীস্তেম, রাগা, তাল অমসুং রাসা মখল কয়াগা লোয়ননা ঘরানা কয়াসু কুপ্না নৈনরবনি। মহাক্না ভারতকী ঈশৈ নোংমাইগী মশক নাইবা মীওই কয়াগী মতাংদা নৈনরে, মহাক্না ভারতকী জগোইশিংগী তোঙানবা ৱাফম কয়াসু খঙলবনি। মহাক্না খঙলিবা লৌশিং অমসুং এক্সপেরিএন্স পুম্নমকপু হৌজক্তি মহাক্না লাইরিক অমদা য়াম্না ফজনা ইথোক্লে। ইন্দিয়ন ম্যুজিক হায়না মিংথোনবা লাইরিক অসিদা ফোতো ৭৬০ য়াওই। ফোতো অয়াম্বসি মহাক মশানা নম্বা ঙাক্তনি। অতোপ্পা লৈবাক্না ঐখোয়গী ভারতকী চৎনবীবু অসুক য়াম্না পামজবগী মতৌসি উবদা য়াম্না নুংঙাইবা ফাওই।
ঐখোয়বু য়াম্না চাউথোকচহনবগদবা পাউ অমা ঐখোয়না চয়োল খরগী মমাংদা ফংখি, মরুপশিং। মমাংগী চহি ৮ অসিদা, ভারতকী ম্যুজিকেল ইন্সত্রুমেন্ত এক্সপোর্ত তৌবগী চাংনা হান্নদগী শরুক অহুম মখায়গী চাংদা হেনগৎলে তাবদা অদোম্না নুংঙাইবা ফাওগনি। ইলেক্ত্রিক ম্যুজিক ইক্বিপমেন্ত মতাংদা হায়রগদি, মখোয়না শরুক ৬০ হেনগৎলে। ভারতকী কলচর অমসুং ম্যুজিকপু মালেম পুম্বনা কয়া য়াম্না পাম্নরবগে হায়বা মসিনা তাক্লি। ভারতকী ম্যুজিকেল ইন্সত্রুমেন্তপু খ্বাইদগী য়াম্না লৈরিবা লৈবাকশিংদি য়ু.এস.এ., জর্মনী, ফ্রান্স, জাপান অমসুং য়ু.কে.গুম্বা চাউখৎপা লৈবাকশিংনি। ঐখোয়গী লৈবাক্না ম্যুজিক, দান্স অমসুং আর্তকী ইনাক খুল্লবা হেরিতেজ লৈবসি ঐখোয়গী লৈবাক্কী লাইবক ফবনি।
মরুপশিং, ঐখোয়না অথোইবা কবি মুনি ভারতীহরিবু মহাক্কী ‘নিতি শতক’কীদমক্তা নিংথিনা খঙনরি। মহাক্কী ভর্স অমদা মহাক্না মীওই অমনা আর্ত, ম্যুজিক অমসুং লিতরেচরদা থৱাই য়াওবগী মতৌনা মীওইবা খুন্নাইগী তসেংবা শক্তাক্নি হায়না ইরমখি। তসেংবদি, ঐখোয়গী চৎনবীনা মসিবু মীওইবা খুন্নাইদগী হেন্না ৱাংনা শিবা নাইদবা থাক্তা পুখৎলিবনি। সামবেদবু বেদশিংগী মরক্তা ঐখোয়গী তোঙানবা ঈশৈ নোংমাইগী হৌরকফম্নি হায়রিবনি। ইমা সরস্বতীগী বীনা, ভগ্বান কৃষ্ণগী বাশি, নত্ত্রগা ভোলেনাথকী দমরু ওইরো, ঐখোয়গী লাইনিংথৌ অমসুং লাইরেম্বীশিংগা ঈশৈ নোংমাইগা মরী লৈনদুনা লাক্লি। ঐখোয় ভারত মচাশিংনা হীরম খুদিংদা ঈশৈ নোংমাই উবা ফংই। তুরেল ইচেলগী ৱা ৱা চেনবা মখোল ওইরো, নোংলিক মখোল, উচেকশিংনা খোংবা নত্ত্রগা নুংশিৎ শিৎপগী মখোল ওইরো, ঐখোয়গী সিভিলাইজেসনগী হীরম খুদিংদা ঈশৈ নোংমাই য়াওই। ঈশৈ নোংমাইনা ঐখোয়গী হকচাংবু পোত্থাহনবতা নত্তনা, ঐখোয়গী পুক্নিংবুসু লৈতাহল্লি। ঈশৈ নোংমাইনা ঐখোয়গী খুন্নাইবু অমত্তা ওইহন্নবা শম্নরি। ভঙ্গরা নত্ত্রগা লাবনীনা হরাও-নুংঙাইবগী মতৌ চেল্লি, রবিন্দ্র সঙ্গিৎনা ঐখোয়গী পুক্নিং শুমহৎলি। লৈবাক শিনবা থুংবগী ত্রাইবেলশিংগীসু মশাগী ঈশৈ নোংমাইগী তোঙানবা চৎনবী অদুমক লৈজৈ। মখোয়না ঐখোয় মশেল অমসুং মহৌশা ইমাগা নুংশি চাননা লৈমিন্নবগী ইথিল পী।
ঐখোয়গী ঈশৈ নোংমাইগী শক্তমশিংনা ঐখোয়গী কলচরবু হেন্না ফজহনবতা নত্তনা, মালেমগী ঈশৈ নোংমাইগী হীরমদসু মুত্থৎপা য়াররোইদবা খুভম অমা থমখ্রবনি। ভারতকী ম্যুজিকপু মালেমগী মফম খুদিংদা শকখঙনরি, পাম্নরি। ঐহাক্না অদোমগী মফমদা ওদিও ক্লিপ অমগা থাজগে।
##(ঈশৈ)##
অদোমগী কৈরোই-লৈকায়গী লাইশঙ খরদা ভজন-কির্তন শকপা অদোম্না তারম্লগনি, উরম্লগনি। অদুবু, হায়রিবা নোতশিং অসি ভারত্তগী মাইল লিশিং কয়া লাপ্না লৈবা খা-অমেরিকাগী লৈবাক, গুয়ানাদগী লাকপনি। ১৯ অমসুং ২০শুবা চহি-চাদা ঐখোয়গী লমদমগী মীওই মশিং য়াম্বনা গুয়ানাদা চৎখি। মখোয়না ভারতকী তোঙানবা চৎনবী কয়াসু মফমদুদা মখোয়গা লোয়ননা পুখি। খুদম ওইনা হায়রবদা, ঐখোয়না ভারত্তা হোলি পাংথোকপগুম্না, গুয়ানাদসু হোলি কুহ্মৈগী মচুশিংনা নুংঙাই য়াইফবগী ইথিল শন্দোকই। হোলিগী মচু লৈবা খুদিংদা, ফাগুৱাগী ঈশৈ নোংমাইসু অদুম লোয়নৈ। গুয়ানাগী ফাগ্বাদা ভগ্বান রাম অমসুং কৃষ্ণগা মরী লৈনবা লুহোং-খোংদোংবগী ঈশৈ শকপগী অখন্নবা চৎনবী লৈ। হায়রিবা ঈশৈশিং অসি চাউতাল কৌই। ঐখোয়না মফমসিদা শকপগুম্না, মখোয়সু মান্নবা ত্যুন মখল অমসুং অৱাংবা পিৎচতা শকই। মসিদা নত্তনা, গুয়ানাদা চাউতালগী চাংয়েংনবসু পাংথোকই। মান্নবা মতৌ ওইনা, ভারত মচা অয়াম্বনা, উত্তর প্রদেশ অমসুং বিহারগী মীওইশিংনা মরু ওইনা, ফিজিদসু চৎনৈ। মখোয়সু রামচরিতমানস্তগী লৌথোকপা কপ্লেতশিংনা মরু ওইনা, নাৎকী ভজন-কির্তন শকই। মখোয়না ফিজিদা ভজন-কির্তনগা মরী লৈনবা মন্দালী কয়া অমসু শেম্লি। রমায়ানা মন্দালিগী মিং লৌদুনাশেম্বা ভজন-কির্তন মন্দালি লিশিং অনি হেনবসু ফিজিদা ঙসিগী মতমসিদসু লৈরি অমসুং খুঙ্গং অমসুং লৈকায় খুদিংদা উবসু ফংগনি।
ঐহাক্না পীরিবা খুদমসিদি খরা খক্তনি। অদোম্না মালেম শিনবা থুংবদা য়েংলবদি, ভারতকী ঈশৈ নোংমাইবু পামজবশিংগী পরিং অসি য়াম্না শাংই।
ঐহাক্কী নুংশিরবা লৈবাক মীয়াম, ঐখোয়গী লৈবাক অসিদা মালেমগী খ্বাইদগী অরীবা চৎনবী লৈ হায়না ঐখোয়না চাউথোকচরি। অদুনা, হায়রিবা নাৎকী চৎনবী অমসুং লৌশিং কয়াসিবু ঙাক শেনবা, খুমাং চাউশিলহনবা অমসুং য়ারিবমখৈ চাউখৎহনবা হায়বসি ঐখোয়গী থৌদাং ওইরে। ঐখোয়গী অৱাং নোংপোক রাজ্য, নাগালেন্দগী মরুপ খরনা মান্নবা থৌওংসিমক পাংথোক্লি। মখোয়গী হোৎনজমন্সু ঐহাক্না য়াম্না পামজৈ, অদুনা ঐহাক্না ‘মন কী বাত’ তারিবশিংদসু খঙহন্নীংই।
মরুপশিং, নাগালেন্দগী নাগা খুন্নাইগী পুন্সি মহিং, মখোয়গী আর্ত অমসুং কলচর অমসুং ঈশৈ নোংমাইনা মীপুম খুদিংগী পুক্নিং চিংশিল্লি। ঐখোয়গী লৈবাক্কী নিংথিরবা হেরিতেজকী শরুক অমা মসিসু ওইরিবনি। নাগালেন্দগী মীয়াম অমসুং মখোয়গী হৈ-শিংবগী মতৌসি সস্তেনেবল পুন্সি মহিংগীদমক্তা য়াম্না মরু ওইবা হীরম অমসু ওইরিবনি। মখোয়গী মসিগুম্বা চৎনবী কন্নবগীদমক্তা, অমসুং মহৈশিং অসিবু মখা তারকপা চারোন শুরোন্দা থংথনবগীদমক্তা লমদমসিগী মীয়াম্না লুপ অমা শেম্লে, লুপসিগী মমিংনা ‘লিদি-সিরো-উ’ কৌই। লুপ অসিনা নাগাগী মাঙখিগদৌরবা চৎনবগীগী ফজরবা শক্তাকশিংবু য়োকখৎনবা থৌদাং লৌরি। খুদম ওইনা হায়রবদা, নাগাগী খুনুং ঈশৈ অসিমক য়াম্না নিংথিরবা জোনর অমনি। লুপ অসিনা নাগা ম্যুজিক এল্বম লোঞ্চ তৌবগী থবক তৌবা হৌখ্রে। মখোয়না হৌজিক ফাওবদা মসিগুম্বা এল্বম অহুম পুথোকখ্রে। মখোয়না খুনুং ঈশৈ অমসুং জগোইগা মরী লৈনবা ৱর্কশোপ কয়াসু শীন-লাঙলি। হীরম অসিগী মতাংদা মখোয়না নহাশিংদসু ত্রেনিং পীরি। মসিদা নত্তনা, নাগাগী চৎনবী মতুং ইন্না ফিরোল শেম-শাবা, তুবগী ত্রেনিংসু পীরি। অৱাং নোংপোক লমদমদা তোঙানবা পোত্থোক কয়া ৱাদগী শাবগী চৎনবী লৈ। হৌজিক্কানগী নহাশিংদা ৱাগী পোত্থোক শাবগী ত্রেনিংসু পীরি। পুম্নমক অসিনা নহাশিংগা মখোয়গী চৎনবীগা নক্ননা লৈহনবদা তেংবাংবতা নত্তনা, মখোয়গীদমক্তা থবক্কী অনৌবা খুদোংচাবা কয়াসু শেম্বীরি। লিদি-সিরো-উদা লৈরিবা মীওইশিংনা মীওই মশিং য়াম্বদা নাগাগী খুনুংগী চৎনবীগী মতাংদা খঙহন্নবা কন্না হোৎনরি।
মরুপশিং, অদোমগী মফমশিংদসু মসিগুম্বা নাৎকী চৎন-লোনচৎ কয়া শোইদনা লৈরমগনি। অদোমসু ইশাগী মফমশিংদা মসিগুম্বা খোঙথাং পায়খৎপা য়াই। অতোপ্পা মফম অমা হেক্তদা মসিগুম্বা থৌওং পাংথোকপগী ৱাফম অদোম্না খঙবা লৈরবদি, অদোম্না ই-পাউ অসি শেয়র তৌগদবনি, মরী লৈনবা পাউজেল শন্দোক্কদবনি।
ঐহাক্কী নুংশিরবা লৈবাক মীয়াম, হায়নবী অমদি লৈ – বিদ্যাধনম সর্ব ধনম প্রধানম।
মসিনা হায়বদি, করিগুম্বা মীওই অমনা লৌশিং পীবা মতমদা, মহাক্না খুন্নাইগীদমক্তা কান্নবা থবক অমা তৌই হায়বনি। এজুকেসনগী হীরমদা থানবা অপীকপা থাউমৈ অমনসু খুন্নাই পুম্ববু ঙালহনবা ঙম্মি। মসিগুম্বা থবক কয়া লৈবাক শিনবা থুংবদা পাংথোকপা উবদা ঐহাক্না য়াম্না নুংঙাইবা ফাওই। বন্সা হায়বসি য়ু.পি.গী কোনুং, লখনৌদগী কিমি. ৭০-৮০ থাপ্না লৈবা হার্দোইগী খুঙ্গং অমনি। খুঙ্গং অসিদা লৈবা জতিন ললিতজীগী মতাংদা ঐহাক্না ৱাফম খরা খঙবা ঙমজরে, মহাক অসি এজুকেসনগী মঙাল অমুক হন্না ঙালহন্নবা হোৎনবগী থবক থৌরমদা খোঙদাবা মীওই অমনি। মহাক্না মফমসিদা চহি অনিগী মমাংদা ‘কম্ম্যুনেল লাইব্রেরী অমসুং রিসোর্স সেন্তর’ অমা হৌদোকখি। মহাক্কী সেন্তরদা হিন্দি অমসুং ইংলিশ লিতরেচর, কম্প্যুতর, লো অমসুং সরকারগী পরিক্ষা কয়াগী শেম-শাবগা মরী লৈনবা লাইরিক ৩০০০ হেন্না লৈ। মহাক্কী লাইব্রেরী অসিদা অঙাংশিংগী অপাম্বগী হীরমদসু থৱাই চঙলি। মফমসিদা লৈবা কোমিক লাইরিক নত্ত্রগা মহৈ-মশিং তম্বগা মরী লৈনবা শান্নপোৎশিং ওইরো, অঙাংশিংনা মখোয়বু য়াম্না পাম্মি। অপীকপা অঙাং কয়ানা শান্ন-শান্ননা অনৌবা লৌশিং তান্নবা মফমসিদা লাকই। ওফলাইন নত্ত্রগা ওনলাইন এজুকেসনগী মতাংদা ওইরো, চাউরাকপা বলন্তিয়র ৪০না সেন্তর অসিদা অঙাংশিংবু লমজিং লমতাকপগী থবক তৌরি। খুঙ্গং অসিগী মীওই ৮০মুক্না সেন্তর অসিদা নুমিৎ খুদিংগী লাকই।
মরুপশিং, ঝার্খন্দগী সঞ্জয় কশ্যপজীনা লাইরবা অঙাংশিংগী মনিং থুংহল্লি। সঞ্জয়জীনা মহৈরোই ওইরিঙৈ মতমদা, অফবা লাইরিক ফংদবগী খুদোংচাদবা মাইয়োক্নখি। লাইরিক ফংদবনা মরম ওইরগা মহাক্কী মফমগী অঙাংশিংগী তুংগী পুন্সিদা অমম্বা অমুক হন্না লৈহল্লোই হায়না মহাক্না তাঞ্জাদুদা ৱারেপ লৌখি। মহাক্কী থৌওং অসিনা মরম ওইদুনা, মহাক অসি ঙসিদি ঝার্খন্দগী জিলা কয়াগী অঙাংশিংগী ‘লাইব্রেরী মেন’ হায়না খঙনরে। সঞ্জয়জীনা মহাক্কী থবক হৌরকপা মতমদা, মহাক্কী পোক্নফম লমদমদা খ্বাইদগী অহানবা লাইব্রেরী শাখি। মহাক্কী থবক্কী মতুং ইন্না মহাক্না ত্রান্সফর চৎপা খুদিংদা, মহাক্না মফমদুগী লাইরবা অমসুং ত্রাইবেল অঙাংশিংগী লাইব্রেরী শাবগী থবক পাংথোক্তুনা লাকখি। অসুম্না মখা চত্থরকপনা, মহাক্না ঝার্খন্দগী তোঙানবা জিলাশিংদা ঙসিদি অঙাংগী লাইব্রেরী কয়া হাংলে। লাইব্রেরী হাংবগী মহাক্কী অসিগুম্বা থবক অসিনা ঙসিদি খুন্নাইগী ইহৌ অমা ওইরক্লে। সঞ্জয়জী নত্ত্রগা জতিন ললিতজী ওইরো, মখোয়গী মসিগুম্বা হোৎনবগী মতৌশিংবু ঐহাক্না থাগৎচরি।
ঐহাক্কী নুংশিরবা লৈবাক মীয়াম, রিসর্চ অমসুং ইন্নোভেসনগা লোয়ননা মতমগা চুননা চাউখৎলবা তেক্নোলোজী অমসুং খুৎলায় কয়ানা মরম ওইরগা, মেদিকেল সাইন্সনা ঙসিদি খুমাং য়াম্না চাউশিল্লে। অদু ওইরবা ফাওবদা, লাইনা খরদি ঐখোয়না ঙসি ফাওবদা অচৌবা শিংনবা ওইদুনা মাইয়োক্নরি। মসিগুম্বা লাইনা মখল অমদি মস্ক্যুলর দীস্ত্রোপীনি। মসিদি চহি মতাং অমদা হেক্তা নাবা য়াবা জেনেতিক লাইনা অমনি। মসিদা হকচাংগী মসলশিংগী মপাঙ্গল শোন্থরকই। মসিগী অনাবশিংনা পুন্সিগী অচম্বা থবক অমা পাংথোকপা ফাওবদা খুদোংচাদবা য়াম্না থেংনৈ। মখোয়গুম্বা অনাবশিংবু লাইয়েংবা অমসুং শেন্নবদা সেবাগী ৱাখল্লোন নিংথিনা খঙবগী মথৌ তাই। মস্ক্যুলর দীস্ত্রোপী নাবা মীওইশিংগী থাজবগী অনৌবা মঙাল ওইরিবা মরী লৈনবা লাইয়েংশঙ অমা হিমাচল প্রদেশকী সোলন্দা হৌজিক লৈরে। সেন্তর অসি ‘মানব মন্দির’ কৌই; মসিদি ইন্দিয়ন এসোসিএসন ওফ মস্ক্যুলর দীস্ত্রোপীনা চলায়বনি। মানবম মন্দির অসি মমিংমক্কা চান্নবা মীওইবা খুনাইগী তেংবাংবগী ফজরবা খুদম অমনি। মফমসিদা ও.পি.দি. অমসুং লাইয়েংবগী মিং চনবগী থবক অসি চহি অহুম মরিগী মমাংদগী হৌখ্রে। মানব মন্দিরদা অনাবশিং লাইয়েংনবা ফমুং ৫০গী খুদোংচাবা লৈ। ফিজিওথেরাপী, ইলেক্ত্রোথেরাপী অমসুং হাইদ্রোথেরাপীগা লোয়ননা, মফমসিদা অনাবশিংবু য়োগ-প্রনয়ামাগী মতেংদগীসু লাইয়েংলি।
মরুপশিং, মসিগুম্বা হাই-তেক ফেসিলিতীগী মখল কয়াগী মতেংদগী সেন্তর অসিনা অনাবশিংগী পুন্সিদা অফবা অহোংবা পুরক্নবা হোৎনরি। লাইনা অসিগা মরী লৈনবা অতোপ্পা অরুবা শিংনবা অমদি মসিগী মতাংদা মীয়াম্না খঙবা ৱাতপসিনি। সেন্তর অসিনা মরম অসিগীদমক্তা হিমাচল প্রদেশ খক্তা নত্তনা লৈবাক শিনবা থুংবদা মসিগী অনাবশিংগী এৱিয়র্নেস কেম্প শীন-লাঙলি। লুপ অসিবু শেন্নবগী থবকশিং অসি লাইনা অসিনা নাবা মীওইশিংনা মরু ওইনা পাংথোকপগী মতৌনা লুপ অসিগী খ্বাইদগী পুক্নিং থৌগৎনীংঙাই ওইবা মতৌনি। অসিগুম্বা মীওইশিংগী খুদম খরা হায়রবদি, সোসিএল ৱর্কর, উর্মিলা বালদীজী; ইন্দিয়ন এসোসিএসন ওফ মস্ক্যুলর দীস্ত্রোপীগী প্রসিদেন্ত, ইচল সঞ্জনা গোয়লজী; লুপ অসিগী অতোপ্পা মেম্বরশিংনি। সেন্তর অসিবু হৌদোকপদা মরু ওইবা থৌদাং লৌখিবা শ্রীমান বিপুল গোয়লজীনা ইন্সতিত্যুসন অসিগী মরু ওইবা থৌদাং কয়া হৌজিক লৌরি। মানব মন্দিরবু হোস্পিতাল অমসুং রিসর্চ সেন্তর অমা ওইনা শেমগৎনবা য়াম্না কন্না হোৎনরি। মসিনা করিগুম্বা ওইথোকপা মতমদা, অনাবশিংনা মফমসিদা হান্নদগী হেন্না নীংথিনা লাইয়েংবগী খুদোংচাবা ফংগনি। মাইকৈ অসিদা হোৎনরিবা মীপুম খুদিংগী হোৎনজমনশিংবু ঐহাক্না থম্মোই শেংনা থাগৎচরি অমসুং মস্ক্যুলর দীস্ত্রোপীনা নাবা মীওইশিংসু নীংথিনা নাবা ফবা ওইসনু হায়নবা য়াইফ পাউজেল পীজরি।
ঐহাক্কী নুংশিরবা লৈবাক মীয়াম, ঐখোয়না ঙসিগী ‘মন কী বাত’ অসিদা ৱারী শাখ্রিবা লৈবাক মীয়ামগী ক্রিএতিব ওইবা অমসুং খুন্নাইগীদমক্তা খন্দুনা থবক তৌবগী মতৌশিংনা লৈবাক্কী পাঙ্গল অমসুং থৱাই য়াওবগী খুদম্নি। ঙসিদি, লৈবাক মীয়াম খুদিংনা হীরম অমা নত্ত্রগা অমদা, থাক অমদা নত্ত্রগা অমদা, লৈবাক্কীদমক্তা করিগুম্বা অমা পাংথোক্নবা হোৎনরি। ঙসিগী ৱারী-ৱাতাই অসিমক্তদসু, জি.২০গুম্বা মালেমগী থৌরমগা মরী লৈননা মশাগী থৌদাং খঙদুনা মদুমক পাংথোক্নবা মাং থানা থোক্লকপা ফিশা-লোন্সা তৌবা ঐখোয়গী মরুপ অমগী খুদম উখ্রে। মান্নবা মতৌ ওইনা, মীওই খরনা ইনভাইরনমেন্তকা মরী লৈনবা, ঈশিংগা মরী লৈনবা থবক কয়া পাংথোক্লি। এজুকেসন, মেদিসিন, সাইন্স অমদি তেক্নোলোজীদগী নাৎকী চৎনবী ফাওবগী হীরমদা মীওই খরা অমনা মীয়ামগা মান্নদবা তোপ-তোপ্পা থবক কয়াসু পাংথোক্লি। পুম্নমক অসি ওইথোক্লিবগী মরমদি, ঙসিদি মীয়াম খুদিংনা মশাগী থৌদাং করিনো মশক খঙবগীনি। মসিগুম্বা ৱাখল্লোন অসি লৈবাক মীয়াম খুদিংদা লাকপা মতমদা, লৈবাক্কী সনাগী য়ুগী মতম অমা হায়বসিদি শোইদনা লাক্লগদবনি। লৈবাক্কী সনাগী য়ুগতা ঐখোয়গী সনাগী য়ুগসু অদুমক য়াওরবনি।
ঐহাক্না লৈবাক মীয়াম্বু মখোয়গী হোৎনজমনশিংগীদমক্তা অমুক্কা হন্না থাগৎচরি। ঐখোয়না মথংগী থাদা অমুক উন্নসি অমসুং পুক্নিং থৌগৎনীংঙাই ওইরবা মসিগুম্বা হীরম কয়াগী মতাংদা ৱারী অমুক শাসি। অদোমগী ৱাখল্লোন লেপ্তনা থাজিনবীরকউ। পুম্নমকপু থাগৎচরি!
PM @narendramodi begins #MannKiBaat by referring to a unique gift he received all the way from Telangana. pic.twitter.com/vwBXaBV4ZW
— PMO India (@PMOIndia) November 27, 2022
The Presidency of G20 has arrived as a big opportunity for us. We have to make full use of this opportunity and focus on global good. #MannKiBaat pic.twitter.com/HicnxxNp6m
— PMO India (@PMOIndia) November 27, 2022
Sky is not the limit for India's youth. #MannKiBaat pic.twitter.com/kOJFw1v2mL
— PMO India (@PMOIndia) November 27, 2022
India is sharing its success in the space sector with its neighbouring countries as well. Just yesterday, India launched a satellite, which has been jointly developed by India and Bhutan. #MannKiBaat pic.twitter.com/OxFgeoiQfe
— PMO India (@PMOIndia) November 27, 2022
India's youth are thinking big and achieving big. #MannKiBaat pic.twitter.com/N52UKE2YMi
— PMO India (@PMOIndia) November 27, 2022
During #MannKiBaat, PM @narendramodi mentions about Konstantinos Kalaitzis, an artist from Greece, who sang Bapu's favourite ‘Vaishnava Jana To’. https://t.co/ThE7PSoo9Y
— PMO India (@PMOIndia) November 27, 2022
Music not only relaxes the mind but also connects our society. #MannKiBaat pic.twitter.com/UhMOfzm8w9
— PMO India (@PMOIndia) November 27, 2022
Indian music has not only enriched our culture, but have also left an indelible mark on the music across the world. #MannKiBaat pic.twitter.com/4S7oqqbJmC
— PMO India (@PMOIndia) November 27, 2022
The art, culture and music of Nagaland attracts everyone. Commendable effort is being made in the northeastern state. #MannKiBaat pic.twitter.com/QCPEMu2yCs
— PMO India (@PMOIndia) November 27, 2022
Imparting knowledge is the noblest work in the interest of the society. PM @narendramodi highlights praiseworthy efforts being made across the country to further this cause. #MannKiBaat pic.twitter.com/rolN8KNNbl
— PMO India (@PMOIndia) November 27, 2022
PM @narendramodi mentioned about Muscular Dystrophy in #MannKiBaat and appreciated the efforts of 'Manav Mandir' in Himachal Pradesh in spreading awareness about it. pic.twitter.com/fVDWCkyQVU
— PMO India (@PMOIndia) November 27, 2022
