প্রধান মন্ত্রী শ্রী নরেন্দ্র মোদীনা ঙসি নই দিল্লীগী লোক কল্যান মার্গতা শ্রী অলতাফ বুখারীনা লুচিংবা জম্মু অমসুং কশ্মীরদগী লাকপা অপনী পার্তীগী মীওই ২৪না শাবা মীহুৎ কাংবু অমগা উনখ্রে।
ৱারী শানখিবা অদুদা প্রধান মন্ত্রীনা জম্মু-কশ্মীরদা অহোংবা পুরকপদা মীয়াম্না শরুক য়ানবা ৱাফম থমখি অমদি মীয়ামদা খোঞ্জেল পীরিবা এদমিনিস্ত্রেসনগী মরুওইবদা অকনবা ৱাফম থমখি। প্রধান মন্ত্রীনা মসিমসু হায়খি মদুদি পোলিতিকেল ইন্তিগ্রেসনগী খোংজেল য়াংনা চংশিল্লিবা থৌওংগী খুত্থাংদা লমদম অসিদা দেমোক্রেসী হেন্না চেৎশিলহনবা ঙমগনি।
নহাশিংদা শক্তি শিন্নবগী মতাংদা ঙাংলদুনা প্রধান মন্ত্রীনা হায়খি মদুদি নহাশিংনা জম্মু অমসুং কশ্মীরগী দিবেলপমেন্তকীদমক কেতলাইতিক এজেন্তগুম্না এক্ত তৌগদবনি। জম্মু অমসুং কশ্মীরগী হিরম খুদিংমক্তা অহোংবা পুরক্নবা নহাশিংগীদমক স্কিল দিবেলপমেন্ত অমসুং অনৌবা এম্প্লোইমেন্তকী খুদোংচাবা শেমগৎপগী মরুওইবা অদু মহাক্না ফোংদোকখি।
প্রধান মন্ত্রীনা মীহুৎ কাংবু অদুদা থাজবা পীখি মদুদি সরকারনা ইনফ্রাস্ত্রকচর দিবেলপমেন্তদা অহেনবা মিৎয়েং থম্বা অমসুং তুরিজমগুম্বা সেক্তরশিংদা অনৌবা ইনবেস্তমেন্ত খুদোংচাবশিং শেংগৎপগী থোংদা রিজন অসিগী ইকোনোমিক দিবেলপমেন্ত পুরক্নবা ৱাফম থম্লি। জম্মু অমসুং কশ্মীরনা মায়োক্নরিবা হিরম খুদিংমক ৱারোইশিন পুরক্নবা সরকারনা মপুং ফানা শৌগৎলি হায়না মহাক্না থাজবা পীখি।
প্রধান মন্ত্রীনা মীহুৎ কাংবু অদুগা লোয়ননা দেমোগ্রাফিক চেঞ্জেস, দেলিমিতেসন এক্সর্সাইজ অমসুং স্তেত দোমিসাইল পীবা অসিনচিংবশিংগা মরী লৈনবা তোঙান-তোঙানবা ইশুশিংদা ৱারী শানখি। পর্লিয়ামেন্তদা মহাক্না থমখিবা ৱাফম অদু ফোংদোক্লদুনা প্রধান মন্ত্রীনা হায়খি মদুদি সরকারনা কাংলুপ খুদিংমক্কী মীওইশিংগা পুন্দুনা জম্মু অমসুং কশ্মীরগীদমক স্তেত হুদকী আশা অদু অথুবা মতমদা মপুং ফাহন্নবগীদমক থবক তৌগনি।
অপনী পার্তীগী প্রসিদেন্ত শ্রী অলতাফ বুখারীনা হায়খি মদুদি ২০১৯গী ওগস্ত ৫দা আর্তিকল ৩৭০ অমসুং আর্তিকল ৩৫-এ মুত্থৎনবা ৱারেপ লৌখিবা মতম অদু জম্মু অমসুং কশ্মীরগী পুৱারীদা ঈশিংদা চেন্থখিবা মীকুপ অমা ওইখি।
মীহুৎ কাংবু অদুনা প্রধান মন্ত্রীবু জম্মু অমসুং কশ্মীরগী দিবেলপমেন্তকী মায়কৈদা হোৎনরিবশিং অদুগীদমক মহাকপু থাগৎপা ফোংদোকখি। মখোয়না রিজন অসিদা শান্তি অমসুং তংদু লৈতাবা ঙাক্তুনা থম্বগী মায়কৈদা সরকার, সেক্যুরিতী এজেন্সীশিং অমসুং জম্মু অমসুং কশ্মীরগী মীয়াম্না হোৎনরিবা অদুবুসু থাগৎপা ফোংদোকখি।
