প্রধান মন্ত্রী শ্রী নরেন্দ্র মোদীনা ঙসি অরুনাচল প্রদেশকী ইতানগরদা লুপা করোর 5100 হেনবগী তোঙান তোঙানবা চাউখৎ-থৌরাংগী থবক কয়াগী উরেপ উয়ুং তমখ্রে অমসুং শঙ্গাখ্রে। থৌরম অদুদা তিনখিবা মীয়ামদা ৱা ঙাংলদুনা মহাক্না ঈশ্বর দোনয়ি পোলোদা ইকায় খুম্নবা উৎখি অমসুং মীপুম খুদিংমক্তা য়াইফ-মঙ্গোল পীনবগীদমক্তা থৌনিখি।
প্রধান মন্ত্রীনা হায়খি মদুদি হেলিপেদতগী গ্রাউন্দ ফাওবগী খোঙচৎ, লম্বীদা মশিং য়াম্লবা মীওইশিং উবা, অমসুং অঙাংশিং অমসুং নহারোলশিংনা লৈবাক্কী ফিরাল পাইবা উবা অসি অরুনাচল প্রদেশকী মীয়োক মীচান ফবা মতৌনা মরম ওইদুনা মহাকপু চাউথোকচবা পোকহল্লি। মহাক্না হায়খি মদুদি অরুনাচল অসি লেন্দ ওফ রাইজিং সন খক্তা নত্তনা লৈবাক নুংশিবগী লম অমসুনি। জাতিগী ফিরালগী অহানবা মচু অসি সেফ্রোন ওইবগুম্না, অরুনাচলগী স্পিরিতসু সেফ্রোনদগী হৌই। শ্রী মোদীনা হায়খি মদুদি অরুনাচলদা লৈরিবা মীওই খুদিংমক থৌনা অমসুং ইচম চম্বা মতৌগী খুদম অমনি। মহাক্না রাজ্য অসিগীদমক মহাক্না থম্মোয়দা ফাওরিবা নুংশিবা ফোংদোকখি। মহাক্না হায়খি মদুদি মফম অসিদা লাকপা খুদিংমক্না মহাকপু য়াম্না নুংঙাইহল্লি অমসুং মীয়ামগা লোইননা লৈখিবা মতম খুদিংমক নীংশিংবা য়াবা অমনি। মহাক্না মঙোন্দা উৎখিবা নুংশিবা অসি অচৌবা ইকাই খুম্নবা অমনি হায়না লৌখি। “তৱাং মোনাস্ত্রীদগী হৌরগা নামসাইদা লৈরিবা গোল্দন পাগোদা ফাওবদা, অরুনাচল প্রদেশনা শান্তি অমসুং কলচরগী ইতিনফমগী মফম অমা ওইরি," হায়না প্রধান মন্ত্রীনা হায়খি।
অরুনাচল প্রদেশতা ঙসিগী মহাক্কী খোঙচৎ অসি তোঙান তোঙানবা মরম অহুমগীদমক অখন্নবা অমনি হায়না পল্লদুনা প্রধান মন্ত্রীনা হায়খি মদুদি অহানবদা, নবরাত্রিগী য়াইফরবা অহানবা নুমিত্তা, মহাকপু ফজরবা চীংশাং পরেংশিং উবগী খুদোংচাবা ফংখি। ঙসিগী নুমিৎ অসিদা ভক্তাশিংনা হিমালয়গী মচানুপী, মা শৈলপুত্রিবু ইকায় খুম্নবা উৎলি হায়না মহাক্না ফোংদোকখি। অনিশুবদা, মহাক্না লৈবাক শিনবা থুংনা নেক্স-জেনরেসন GSTগী রিফোর্মশিং চৎনহন্নবা অমসুং GST সেভিং ফেস্তিবেল হৌদোক্নবা লাউথোকখি। শ্রী মোদীনা হায়খি মদুদি কুহ্মৈগী মতম অসিদা, নাগরিকশিংনা দবল বোনাঞ্জা অমা ফংলি। অহুমশুবদা, মহাক্না অরুনাচল প্রদেশতা পাৱর, কনেক্তিবিতী, তুরিজম অমসুং হকশেল য়াওনা সেক্তর কয়াদা চাউখৎ-থৌরাংগী প্রোজেক্ত কয়া শঙ্গাখিবগী মতাংদা পনখি। প্রধান মন্ত্রীনা হায়খি মদুদি মসিনা কেন্দ্র অমসুং রাজ্যগী সরকারগী অনিমক্কী কান্নবা ফংলিবা অদু উৎলি। প্রোজেক্তশিং অসিগীদমক অরুনাচলগী মীয়ামদা থম্মোয় শেংনা থাগৎপা ফোংদোকখি। GST সেভিং ফেস্তিবেল অসিনা ভারতকী মীয়ামদা নুংঙাইবা, চাউখৎপা অমসুং মাইপাকপা পুরক্কনি হায়না মহাক্না ফোংদোকখি।
অরুনাচল প্রদেশনা নুমিৎকী মঙাল অহানবা ওইনা ফংলবসু, লমদম অসিদা খোঙজেল য়াংনা চাউখৎপগী মঙাল অসি চহি তরাগী খুজিং কয়াগী মতুং ইন্না ফংলকপা অসি য়াম্না নুংঙাইতবা অমনি হায়না পল্লদুনা শ্রী মোদীনা 2014গী মমাংদা অরুনাচলদা কয়ারক হন্না লাকখিবা অমসুং মফম অসিগী মীয়ামগী মরক্তা লৈখিবা অদু নীংশিংখি। মহাক্না হায়খি মদুদি রাজ্য অসি মহৌশাগী থৌজালগা লোয়ননা মাগী লমদম, কন্না হোৎনরিবা নাগরিকশিং অমসুং অচৌবা পোতেন্সিএল লৈ। অসিগুম্বা মপাঙ্গলশিং অসি লৈজরবসু, মমাংগী মতমশিংদা দিল্লীদগী লৈঙাক পায়রম্বা মীওইশিংনা অরুনাচলবু লেপ্পা লৈতনা মীরাইপীদুনা লাকখি হায়না প্রধান মন্ত্রীনা ফোংদোকখি। অরুনাচলগী মীশিং য়ামদবা অমসুং লোক সভাগী সিৎ অনী খক্তমক লৈবা অসিনা মীৎয়েং চংখিদবা পোলিতিকেল পার্তী খরগী ৱাখল্লোনগীদমক মহাক্না য়ানীংদবা ফোংদোকখি। মহাক্না হায়খি মদুদি মসিগী থৌওং অসিনা অরুনাচল অমসুং চাউখৎপগী খোঙচৎতা য়াম্না শোত্থরনা লৈরিবা অৱাং-নোংপোক লমদম পুম্নমক্তা চাউনা খুদোংচাদবা থোকহল্লি।
শ্রী মোদীনা হায়খি মদুদি 2014দা লৈবাক অসিগী সেবা তৌবগী খুদোংচাবা ফংলবা মতুংদা, মহাক্না লৈবাক অসিবু মমাংগী মতমগী ৱাখল্লোনদগী লৌথোক্নবা ৱারেপ লৌখি। মহাক্না অকনবা ৱাফম থমখি মদুদি মহাক্কী সরকারগী লমজিংলিবা ইথিল অসি রাজ্য অমহেক্তদা লৈরিবা ভোৎ নৎত্রগা সিৎ মশিং অদু নত্তে, অদুবু "নেসন ফার্স্ত"কী ৱাখল্লোন অদুনি। মহাক্না সরকারগী মরুওইবা মন্ত্র 'নগরিক দেবোভবা' অমুক হন্না ফোংদোকখি। প্রধান মন্ত্রীনা হায়খি মদুদি মমাংদা কনাগুম্বা অমত্তনা শকখঙদবা মীওইশিং অদু হৌজিক্তি মোদীনা শকখঙলি। মহাক্না হায়খি মদুদি ওপোজিসনগী লৈঙাক্কী মতমদা য়েংশিনবিদ্রবা অৱাং নোংপোক লমদম অসি 2014গী মতুংদা চাউখৎ থৌরাংগী মরুওইবা মফম অমা ওইরকখি। লমদম অসিগী চাউখৎ থৌরাংগীদমক বজেৎ অসি শরুক কয়া হেনগৎহনখি, অমসুং লাস্ত মাইলগী কনেক্তিবিতী অমসুং দেলিভরী অসি ঐখোয়গী এদমিনিস্ত্রেসনগী ময়েক লারবা শক্তম ওইখি। মহাক্না মখা তানা হায়খি মদুদি লৈঙাক অসি দিল্লী খক্তদা কনফাইন তৌই। ওফিসরশিং অমসুং মন্ত্রীশিংনা অৱাং নোংপোক লমদমদা তোইনা চৎকদবনি অমসুং লৈগদবনি।
মমাংগী দিসপেন্সনগী কাংলোনগী মনুংদা, কেন্দ্রগী মন্ত্রী অমনা থা অনিদগী অহুমগী মনুংদা অমুক্তং অৱাং-নোংপোক লমদমদা চৎলম্মি হায়না মহাক্না ফোংদোকখি। মসিগী ওন্ন-তৈনবদা শ্রী মোদীনা হায়খি, ঐখোয়গী সরকারগী মখাদা কেন্দ্রগী মন্ত্রীশিংনা অৱাং-নোংপোক লমদমদা 800 হেন্না চৎখ্রে। মহাক্না অকনবা ৱাফম থমখি মদুদি ভিজিৎশিং অসি সিম্বোলিক ওইবা নত্তে; মিনিস্তরশিংনা মফম অদুদা লৈনবা হোৎনরি অমসুং লমদম অদুদা কান্নবা পীনবা হোৎনরি। প্রধান মন্ত্রীনা হায়খি মদুদি মহাক মশামক্না অৱাং-নোংপোক লমদমদা 70দগী হেন্না চৎখ্রে। মহাক্না হায়খি মদুদি হৌখিবা চয়োলদা মহাক মিজোরাম, মনিপুর অমসুং অসামদা চৎখি অমসুং গুৱাহাতিদা অহিং অমা লেনখি। মহাক্না অৱাং নোংপোক লমদমগীদমক মহাক্কী নুংশিবা ফোংদোকখি। মহাক্কী সরকারনা ইমোস্নেল গেপ অদু কোকহনখ্রে অমসুং দিল্লীবু মীয়ামগা হেন্না নকশিন্নহনখ্রে হায়না মহাক্না হায়খি।
অৱাং-নোংপোক্কী রাজ্য 8 অসি অশ্তলক্ষ্মীগী মফমদা ইকাই খুম্নবা উৎলি হায়না পল্লদুনা প্রধান মন্ত্রীনা হায়খি মদুদি মরম অসিনা চাউখৎপগী খোঙচৎ অসিদা মখোয়বু মাংলোমদা চংশিনবা য়ারোই। কেন্দ্র সরকারনা লমদম অসিগী চাউখৎ-থৌরাংগীদমক শেনফম য়াম্না থাদরি হায়না মহাক্না অকনবা ৱাফম থমখি। মহাক্না খুদম অমা পীরদুনা হায়খি মদুদি কেন্দ্রনা লৌবা তেক্সকী শরুক অমা রাজ্যশিংদা য়েন্থোকই। মমাংগী লৈঙাক্কী মতমদা, অরুনাচল প্রদেশনা চহি তরাগী মনুংদা সেন্ত্রেল তেক্সতগী লুপা করোর 6,000 খক্তমক ফংখি। মসিগী ওন্ন-তৈনবদা, শ্রী মোদীনা মরুওইনা ফোংদোকখি মদুদি ঐখোয়গী সরকারগী মখাদা, অরুনাচলনা চপ মান্নবা মতমগী মনুংদা লুপা করোর লাখ 1 হেন্না ফংখ্রে। শেনফম অসি তেক্সকী শরুক খক্তনি, অমসুং মসিদা রাজ্য অসিদা পায়খৎলিবা তোঙান তোঙানবা স্কিমশিং অমসুং মরুওইবা ইনফ্রাস্ত্রকচর প্রোজেক্তশিংগী মখাদা অহেনবা শেনফমশিং য়াওদে হায়না মহাক্না ফোংদোকখি। প্রধান মন্ত্রীনা হায়খি মদুদি মসিনা মরম ওইদুনা অরুনাচলনা ঙসি অসিগুম্বা পাক চাউবা অমসুং খোঙজেল য়াংনা চাউখৎপা অমা উবা ফংলি।
ৱাখল্লোনশিং অসি অফবা অমসুং পুকচেল শেংনা হোৎনরবদি মহৈশিং অদু উবা ফংই হায়না পল্লদুনা শ্রী মোদীনা হায়খি মদুদি অৱাং নোংপোক লমদম অসি অফবা লৈঙাক্লোনদা অকনবা মীৎয়েং চংদুনা লৈবাক্কী চাউখৎ-থৌরাংগী দ্রাইভিং ফোর্স অমা ওইনা থোরক্লি। মহাক্কী সরকারগীদমক্তা, নাগরিকশিংগী য়াইফ-থৌরাংদগী হেন্না মরুওইবা করিগুম্বা অমত্তা লৈতে হায়না মহাক্না ফোংদোকখি। শ্রী মোদীনা হায়খি মদুদি পুন্সি মহিং লায়থোকহন্নবগীদমক, সরকারনা ইজ ওফ লিভিংদা থবক তৌরি। চৎথোক চৎশিনগী খুদোংচাদবশিং হন্থহন্নবগীদমক, ইজ ওফ ত্রেভেল; হকশেলগী লমদা খুদোংচাবশিং ফগৎহন্নবগীদমক, মেদিকেল ত্রিৎমেন্তকী ইজ ওফ ত্রিৎমেন্ত; এজুকেসনদা মতেং পাংনবা, ইজ ওফ এজুকেসন; অমসুং ললোন-ইতিক তৌবদা লায়থোকহন্নবগীদমক, ইজ ওফ দুইং বিজিনেসকীদমক থবক তৌরি। প্রধান মন্ত্রীনা হায়খি মদুদি কেন্দ্র অমসুং রাজ্য সরকারশিংনা হায়রিবা পান্দমশিং অসি ফংনবা কন্না হোৎনরি। মমাংদা লম্বী লৈরমদবা মফমশিংদা হৌজিক্না অফবা হাইৱেশিং শারি। মতম অমদা ওইথোক্লোই হায়না লৌনরম্বা সেলা তনেলগুম্বা ইনফ্রাস্ত্রকচর অসি হৌজিক্তি অরুনাচলগী চাউখৎপগী খুদম অমা ওইরে হায়না প্রধান মন্ত্রীনা ফোংদোকখি।
কেন্দ্র সরকারনা অরুনাচল প্রদেশ অমসুং অৱাং নোংপোক্কী অরাপ্পা মফমশিংদা হেলীপোর্তশিং লিংখৎনবা থবক পায়খৎলি হায়না পল্লদুনা শ্রী মোদীনা হায়খি মদুদি হোলোংগী এয়রপোর্ত্তা অনৌবা তর্মিনেল বিল্দিং অমা শাগৎখ্রে, মসিনা হৌজিক দিল্লীগী দাইরেক্ত ফ্লাইৎশিং লৈহল্লে। মসিগী চাউখৎ-থৌরাং অসিনা চাং নাইনা চৎপা মীওইশিং, মহৈরোইশিং অমসুং তুরিস্তশিংদা কান্নবা পীবতা নত্তনা মফম অদুগী লৌমীশিং অমসুং অপীকপা ইন্দস্ত্রীশিংদা মতেং পাংলি। প্রধান মন্ত্রীনা হায়খি মদুদি লৈবাক অসিগী মরুওইবা কৈথেলশিংদা মহৈ-মরোং, মনা-মশিং অমসুং অতোপ্পা পোত্থোকশিং পুথোক পুশিন তৌবা অসি হৌজিক য়াম্না লায়থোক্লে।
প্রধান মন্ত্রীনা হায়খি মদুদি লৈবাক অসিনা 2047 ফাওবদা চাউখৎলবা লৈবাক অমা ওইনবা পান্দম থমদুনা পুন্না থবক তৌরি। মসিগী পান্দম অসি রাজ্য খুদিংমক্না লৈবাক অসিগী পান্দমগা চুনবা মওংদা খুমাং চাউশিল্লকপা মতমদা ফংবা ঙমগনি। অৱাং-নোংপোক লমদমনা পান্দমশিং অসি ফংবদা মরু ওইবা থৌদাং অমা লৌরিবা অসিদা মহাক্না নুংঙাইবা ফোংদোকখি। পাৱর সেক্তরবু মরুওইবা খুদম অমা ওইনা পল্লদুনা প্রধান মন্ত্রীনা হায়খি মদুদি ভারতনা 2030 ফাওবদা সোলর, ৱিন্দ অমসুং হায়দ্রো পাৱর য়াওনা নন-কনভেন্সনেল সোর্সশিংদগী 500GWগী ইলেক্ত্রিসিতী পুথোক্নবা পান্দম থম্লি। শ্রী মোদীনা হায়খি মদুদি অরুনাচল প্রদেশনা মিসন অসিদা এক্তিব ওইনা মতেং পাংলি। মহাক্না অনৌবা পাৱর প্রোজেক্ত অনিগী উরেপ উয়ুং তম্বগী থৌরম পাংথোকখ্রে। মসিনা অরুনাচলবু পাৱর পুথোকপা লৈবাক অমা ওইনা মপাঙ্গল কনখৎহল্লগনি। মসিনা নহা লিশিং কয়াদা থবক ফংহল্লগনি। অরুনাচল অমসুং অৱাং-নোংপোক পুম্বদা অকায়বা পীরিবা অরুবা চাউখৎ-থৌরাংগী থবকশিং লৌথোকপদা মতম শাংনা হোৎনরকখিবা ওপোজিসন পার্তীবু প্রধান মন্ত্রীনা য়ানীংদবা ফোংদোকখি। মহাক্না পনখি মদুদি খুদোংচাদবা লমদমশিং হায়বদি চীংগী লমশিং, উমংগী মফমশিং অসি ওপোজিসন পার্তীনা শোত্থরে হায়না লাউথোকখি অমসুং নাথৈদুনা থমখি। শ্রী মোদীনা মখা তানা হায়খি মদুদি অৱাং-নোংপোক্কী ত্রাইবেল লমদমশিং অমসুং জিলাশিং অসিনা খ্বাইদগী অৱাবা মায়োক্নখি অমসুং ঙমখৈগী মনাক নকপা খুঙ্গংশিং অসি "অরোইবা খুঙ্গংশিং" ওইনা লৌথোকখি। মসিনা মমাংগী দিসপেন্সনশিংবু মখোয়গী থৌদাং লৌদনবা অমসুং মখোয়গী অশোয়বশিং অদু লোৎশিন্নবগী খুদোংচাবা পীখি। হায়রিবা মীৎয়েং চংদবা অসিনা ত্রাইবেল অমসুং ঙমখৈগী মফমশিংদগী লেপ্পা লৈতনা মাইগ্রেসন থোকহল্লি।
মহাক্কী সরকারনা রিজনেল দিবেলপমেন্তকী মায়কৈদা হান্নগী থৌওং অদু হোংদোক্লে হায়না পল্লদুনা শ্রী মোদীনা হায়খি মদুদি হান্নগী দিসপেন্সনশিংনা 'শোত্থবা' হায়না লেবেল তৌরম্বা দিস্ত্রিক্তশিংবু 'এস্পিরেস্নেল দিস্ত্রিক্ত' হায়না অমুক হন্না মশক তাক্লে অমসুং চাউখৎপগীদমক মরুওইবা মীৎয়েং থম্মি। মতম অমদা "অরোইবা খুঙ্গংশিং" হায়না লৌনরম্বা ঙমখৈগী খুঙ্গংশিং অসি হৌজিক্তি লৈবাক অসিগী "অহানবা খুঙ্গংশিং" ওইনা খঙনরে। প্রধান মন্ত্রীনা মসিগী অহোংবা অসিগী পোজিতিব ওইবা মহৈশিং অদু পনখি। ঙমখৈগী মফমশিংদা চাউখৎপগী খোঙজেল য়াঙখৎলক্লিবা অদু মহাক্না পনখি। ভাইব্রেন্ত ভিলেজ প্রোগ্রামগী মায় পাকপা অসিনা পুন্সি মহিংদা মশক থোক্না ফগৎহল্লে। অরুনাচল প্রদেশ খক্তদা, অসিগুম্বা ঙমখৈগী খুঙ্গং 450 হেনবনা খোঙজেল য়াংনা খুমাং চাউশিল্লক্লি। লম্বী, মৈ অমসুং ইন্তরনেতগুম্বা তঙাই ফদবা ইনফ্রাস্ত্রকচর অসি হৌজিক মফমশিং অসিদা য়ৌরে। প্রধান মন্ত্রীনা হায়খি মদুদি করিগুম্বা মতমদা ঙমখৈগী মফমশিংদগী শহরশিংদা মাইগ্রেসন তৌনরম্মি, অদুবু হৌজিক্তি হায়রিবা খুঙ্গংশিং অসি তুরিজমগী অনৌবা হবশিং ওইরক্লি।
অরুনাচল প্রদেশতা তুরিজমগীদমক চাউনা পোতেন্সিএল লৈ হায়না পল্লদুনা প্রধান মন্ত্রীনা হায়খি মদুদি অনৌবা মফমশিংদা কনেক্তিবিতী হেনগৎলকপগা লোয়ননা তুরিজম লেপ্তনা হেনগৎলক্লি। হৌখিবা চহি তরা অসিদা অরুনাচলদা লাকপা তুরিস্ত মশিং শরুক অনি হেনগৎলকপদা মহাক্না নুংঙাইবা ফোংদোকখি। মহাক্না অকনবা ৱাফম থমখি মদুদি অরুনাচলগী তুরিজমগী মপাঙ্গল অসি মহৌশা অমসুং কলচর খক্তা নত্তে। মহাক্না কনফরেন্স অমসুং কন্সর্ত তুরিজম অসি মালেমগী থাক্তা হেনগৎলক্লিবা অদু পনখি। মতাং অসিদা শ্রী মোদীনা তৱাংদা শেমগৎলিবা মোদর্ন কনভেন্সন সেন্তর অসিনা রাজ্য অসিগী তুরিজমগী লমদা অনৌবা দাইমেন্সন অমা হাপকনি হায়না লাউথোকখি। ভারত সরকারনা হৌদোকখিবা ভাইব্রেন্ত ভিলেজ প্রোগ্রাম অসি ঙমখৈদা লৈবা খুঙ্গংশিংগীদমক মাইলস্তোন অমা ওইরি হায়না মহাক্না মখা তানা ফোংদোকখি। মসিনা অরুনাচলগী চাউখৎ-থৌরাংদা চাউনা মতেং পাংলি।
ঙসি অরুনাচল প্রদেশতা উবা ফংলিবা খোঙজেল য়াংনা চাউখৎপা অসি দিল্লী অমসুং ইতানগর অনিমক্তা থবক তৌরিবা মখোয়গী সরকারশিংগী মহৈনি হায়না পল্লদুনা প্রধান মন্ত্রীনা হায়খি মদুদি কেন্দ্র অমসুং রাজ্যগী অপুনবা ইনর্জী অসি চাউখৎপদা শীজিন্নরি। মহাক্না মফম অসিদা কেন্সর ইন্সতিত্যুৎ অমা অমসুং মেদিকেল কোলেজশিং লিংখৎপগী থবক হৌরকখিবগী মতাংদা পনখি। শ্রী মোদীনা হায়খি মদুদি আয়ুশ্মান ভারত স্কিমগী মখাদা নাগরিক কয়া অমা লেম্না অনালায়েং ফংলি। মহাক্না হায়খি মদুদি হায়রিবা মায়পাকপশিং অসি কেন্দ্র অমসুং রাজ্যগী লৈঙাকশিংনা ওইথোকহল্লে।
কেন্দ্র অমসুং রাজ্যগী সরকারশিংনা হোৎনরিবশিং অদুগী মতুং ইন্না, শ্রী মোদীনা অরুনাচল প্রদেশনা লৌউ-শিংউ অমসুং হোর্টিকলচরদা চাউখৎপা কয়া অমা উবা ফংলে হায়না ফোংদোকখি। মহাক্না হায়খি মদুদি কিৱি, কোমলা, ইলাইচি, অমসুং কিহোমকুম্বা লোকেল প্রদক্তশিংনা রাজ্য অসিদা অনৌবা মশক অমা পীরি। পি.এম.-কিসান সম্মান নিধি স্কিম অসিনা লমদম অসিগী লৌমীশিংগীদমক য়াম্না কান্নবা ওইরি হায়না মহাক্না ফোংদোকখি।
ইমাশিং, ইচে-ইচলশিং অমসুং ইচানুপীশিংবু মপাঙ্গল কনখৎহনবা অসি মহাক্কী সরকারগী মরুওইবা পান্দম অমনি হায়না প্রধান মন্ত্রীনা অকনবা ৱাফম থমখি। মহাক্না লৈবাক শিনবা থুংনা 'লাখপতি দিদি' করোর অহুম শেম্নবা মহাক্কী মিসন অদু অমুক হন্না ফোংদোকখি অমসুং মুখ্য মন্ত্রী পেমা খন্দু অমসুং মহাক্কী তীমনা মিসন অসি এক্তিব ওইনা মাংলোমদা চংশিল্লিবা অসিদা নুংঙাইবা ফোংদোকখি। মহাক্না রাজ্য অসিদা ৱার্কিং ৱুমেন হোস্তেল কয়া অমা হৌদোকখিবগী মতাংদসু পনখি। মসিনা নহা ওইরিবা নুপীশিংদা চাউনা কান্নবা ফংহল্লগনি।
থৌরম অদুদা নুপী কয়া শরুক য়াখিবগীদমক থাগৎপা ফোংদোক্লদুনা অমসুং GST সেভিং ফেস্তিবেল অসিগীদমক অমুক্কা হন্না থাগৎপা ফোংদোক্লদুনা শ্রী মোদীনা হায়খি মদুদি নেক্স-জেনরেসন GST রিফোর্মশিংগী কান্নবা অসিনা মখোয়দা চাউনা কান্নবা পীরগনি। মহাক্না হায়খি মদুদি ইমুংশিংনা হৌজিক মখোয়গী থাগী বজেৎতা চাউনা হন্থহনবা ঙমলগনি। পি.এম.না হায়খি মদুদি দরকার ওইবা পোৎলমশিং হায়বদি কিৎচন সপ্লাইশিং, অঙাংশিংগীদমক্তা এজুকেস্নেল মেতরিএলশিং, অমসুং ফুতৱেয়র অমসুং ফি-রোলশিং অসি হেন্না অহোংবা মমল ফংহল্লে।
নাগরিকশিংদা 2014গী মমাংগী মতম অদু নীংশিংনবা তকশিনখি। মতম অদুদা থেংনখিবা অৱাবা কয়া অদু পনখি। প্রধান মন্ত্রীনা হায়খি মদুদি ইনফ্লেসন ৱাংখৎলকখি, অচৌবা স্কেম কয়া থোকখি অমসুং মতমদুগী সরকারনা মীয়ামদা তেক্সকী পোৎলুম হেনগৎহনখি। মহাক্না হায়খি মদুদি চহিগী ওইবা ইনকম লুপা লাখ 2 ফাওবা ইনকম তেক্স থিহল্লি অমসুং তঙাই ফদবা পোৎলম কয়াদা 2014গী মমাংগী কাংলোনগী মখাদা চাদা 30দগী হেনবা তেক্স লৌরি।
নাগরিকশিংগী ইনকম অমসুং সেভিংস অনিমক হেনগৎহন্নবা মহাক্কী ফিরেপ অদু নৌহৌনা নীংশিংলদুনা শ্রী মোদীনা হায়খি মদুদি চহি কয়া অসিদা অচৌবা শীংনবশিং মায়োক্নরবসু মহাক্কী সরকারনা ইনকম তেক্স রেৎশিং লেপ্পা লৈতনা হন্থহল্লি। চহি অসিদা, চহিগী ওইবা ইনকম লুপা লাখ 12 ফাওবা অসি মপুং ফানা তেক্স ফ্রী ওইহনখ্রে। মহাক্না GST অসি হৌজিক্তি স্লেব অনিখক্তদা, 5% অমসুং 18%দা লাইথোক্লে হায়না লাউথোকখি। শ্রী মোদীনা হায়খি মদুদি পোৎলম কয়া অমা তেক্স ফ্রী ওইরে অমসুং অতোপ্পা পোৎলমশিংগী তেক্সসু য়াম্না হন্থরে। মহাক্না হায়খি মদুদি য়ুম অমা শাবগী, স্কুতর নৎত্রগা বাইক অমা লৈবগী, মপান্দা চাক চাবা অমসুং চৎথোক-চৎশিন তৌবগী মমল অসি হন্থরক্লি। GST সেভিং ফেস্তিবেল অসি মীয়ামগীদমক কাউঙমদ্রবা মাইলস্তোন অমা ওইরগনি হায়না মহাক্না ফোংদোকখি।
অরুনাচল প্রদেশকী লৈবাকনীংবগী ইথিলগীদমক থাগৎপা ফোংদোক্লদুনা শ্রী মোদীনা হায়খি মদুদি মফমসিগী মীয়াম্না 'নমস্কার'গী মমাংদা 'জয় হিন্দ' হায়দুনা লৈবাক অসিবু মশাদগী হেন্না লুম্না লৌরি। লৈবাক অসিনা চাউখৎলবা ভারত অমা শেমগৎনবা পুন্না হোৎনরিঙৈদা, মশা-মরোমদোম লেপচবগী নেস্নেল এক্সপেক্তেসন লৈরি হায়না মহাক্না অকনবা ৱাফম থমখি। মহাক্না হায়খি মদুদি ভারত অসি মশা-মরোমদোম লেপচবা ঙম্লবা খক্তদা চাউখৎলগনি অমসুং মসিগীদমক্তা স্বদেশীগী মন্ত্র অসি তঙাইফদে। প্রধান মন্ত্রীনা নাগরিকশিংদা স্বদেশী শিজিন্ননবা তকশিনখি। মহাক্না ভারত্তা শাবা পোৎলমশিং খক্তমক লৈবা অমসুং য়োনবগী মরুওইবা অদু পনখি অমসুং মখোয়শিং অসি স্বদেশীনি হায়না চাউথোক্না লাউথোকখি। মহাক্না হায়খি মদুদি মন্ত্র অসিবু ঙাক্না চৎপনা লৈবাক অসিগী, অরুনাচল প্রদেশকী অমসুং অৱাং নোংপোক্কী চাউখৎ থৌরাং খোঙজেল য়াংখৎহল্লগনি। মহাক্না নৌনা হৌদোকখিবা চাউখৎ-থৌরাংগী প্রোজেক্তশিংগীদমক মহাক্কী য়াইফ-পাউজেল পীদুনা ৱারোল পীবা লোইশিনখি।
থৌরম অদুদা অরুনাচল প্রদেশকী গভর্নর, লেফতেনেন্ত জেনরেল কে.তি. পার্নাইক (রিতায়র্দ), অরুনাচল প্রদেশকী মুখ্য মন্ত্রী শ্রী পেমা খাণ্ডু, কেন্দ্রগী মন্ত্রী শ্রী কিরেন রিজিজু অমসুং অতোপ্পা মশক নাইরবশিংসু শরুক য়াখি।
বেকগ্রাউন্দ
লমদম অসিগী হায়দ্রোইলেক্ত্রিক্কী কান্নবা লৌনবা অমসুং তুংকোইনা চৎনবা য়াবা ইনর্জী পুথোকপা য়োকখৎনবা, প্রধান মন্ত্রীনা ইতানগরদা লুপা করোর 3,700 হেনবগী অচৌবা হায়দ্রো পৱার প্রোজেক্ত অনি উরেপ-উয়ুং তমখ্রে। অরুনাচল প্রদেসকী সিয়োম সব-বেসিন্দা হিও হায়দ্রো ইলেক্ত্রিক প্রোজেক্ত (240 মেগাৱাত) অমসুং তাতো-I ইলেক্ত্রিক প্রোজেক (186 মেগাৱাত) পায়খৎকনি।
প্রধান মন্ত্রীনা তৱাংদা অনৌবা কনভেন্সন সেন্তর অমগী উরেপ-উয়ুংসু তমখ্রে। তৱাংদগী ফ্রন্তিয়র দিষ্ট্রিক্ত ফিত 9.820 হেন্না ৱাংবা মফমদা শাগদৌরিবা সেন্তর অসিনা লৈবাক অসিগী অমসুং মালেমগী মীফমশিং, নাৎকী কুহ্মৈশিং অমসুং একজিবিসনশিং পাংথোক্নবা খুদোংচাবা লৈগনি। মীওই 1,500 হেন্না চনগদবা সেন্তর অসি মালেমগী থাকশিং য়ৌনবা শেমগৎকনি অমসুং লমদম অসিগী তুরিজম অমসুং নাৎকী খুদোংচাবশিং শৌগৎকনি।
লম্বী-থোঙ, হকশেল, মৈ কনবা, থবক তৌবী নুপীশিংগী হোষ্টেলশিং য়াওনা তোঙান তোঙানবা হিরমশিংগী লুপা করোর 1,290 হেনবগী মরুওইবা ইনফ্রষ্ট্রকচর প্রোজেকশিং প্রধান মন্ত্রীনা হৌদোকখ্রে। হায়রিবা থবকশিং অসিনা লমদম অসিগী শেন-থুমগী থবকশিং ফগৎহনগনি, হিংবগী থাক ৱাংখৎহনগনি অমসুং লম্বী-থোঙ ফগৎহনগনি।
ললোন-ইতিক পাংথোকপা লাইহন্নবা অমসুং অফবা ওন্তপ্রিন্যুওরসিপকী থবকশিং লৈহন্নবা মহাক্কী পান্দমগী পরিংদা, প্রধান মন্ত্রীনা মফম অদুগী তেক্স থিরিবা মীওইশিং, ললোনবশিং অমসুং ইন্দস্ত্রীশিংগী মীহুৎশিংগা হন্দক GSTগী অহোংবা পুরকপনা পীবা কান্নবগী মতাংদা ৱারি শানগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
Arunachal Pradesh is a confluence of peace and culture... it is the pride of India. pic.twitter.com/vOal8eceHR
— PMO India (@PMOIndia) September 22, 2025
North East is the Ashtalakshmi of India. pic.twitter.com/ZuadicQ9YQ
— PMO India (@PMOIndia) September 22, 2025
The North East is becoming the driving force of the nation's development. pic.twitter.com/HYlMNyyrmd
— PMO India (@PMOIndia) September 22, 2025
The success of the Vibrant Village Programme has made people's lives easier. pic.twitter.com/mUXaDCalqc
— PMO India (@PMOIndia) September 22, 2025
GST is now simplified to 5% and 18%, reducing taxes on most items. pic.twitter.com/GAceR303cd
— PMO India (@PMOIndia) September 22, 2025
