প্রধান মন্ত্রী, শ্রী নরেন্দ্র মোদীনা ঙসি মধ্য প্রদেশকী সাগরদা চাউখৎ-থৌরাংগী প্রোজেক্ত কয়া লৈবাক মীয়ামদা খুৎশিন্নবগা লোয়ননা উরেপ উয়ুংশু তমখ্রে। প্রোজেক্তশিং অসিগী মনুংদা লুপা করোর 100 হেনবগী শেনফম চঙনা শাগদবা সন্ত শিরোমনী গুরুদেব শ্রী রবিদাসজী মেমোরিএলগী উরেপ উয়ুং তম্বা, লুপা করোর 1580 হেনবা শেনফম চঙনা শাগদবা রোদ প্রোজেক্ত অনি অমসুং লুপা করোর 2475 হেন্না চঙনা দব্লিং তৌখিবা কোতা-বিনা রেল লম্বীবু লৈবাক মীয়ামদা খুৎশিন্নবা য়াওরি।
প্রধান মন্ত্রীনা ঙসি তিনখিবা মীয়ামদা ৱা ঙাঙবদা ঙসিদি সন্তশিংনা ঐখোয়গী ইরক্তা তিনবীরিবা, সন্ত রবিদাসজী অমসুং খুন্নাইগী তোঙান-তোঙানবা কাঙলুপ কয়াগী য়াম্লবা মীয়ামগী থৌজালনা মরম ওইরগা সাগর লমদম অসিদা কনাগুম্বা অমা হেক্তনা নুংশি চানবগী ‘সাগর’ (সমুদ্র) উবা ফংলে হায়না ফোংদোকখি। লৈবাক্না নুংঙাই য়াইফরিবা অসিবু পুম্নমক্কী ওইহন্নবা, ঙসিদি, সন্ত শিরোমানী গুরুদেব শ্রী রবিদাসজী মেমোরিএলগী উরেপ উয়ুং তম্লিবনি হায়না মহাক্না পনখি। সন্তশিংগী থৌজানবীদুনা, ঙসিগী অঙনবদা ‘ভুমী পুজন’দা শরুক য়াবা ফংখিবা অসিবু অমুক্কা হন্না পল্লদুনা, চহি খরগী মতুংদা লাইশঙ অসিগী শঙ্গাবদসু শরুক য়াবা ফংগনি হায়বগী প্রধান মন্ত্রীনা থাজবা ফোংদোকখি। ভরানসীদগী থোক্লকপা পার্লিয়ামেন্তরিয়ন অমা ওইনা, প্রধান মন্ত্রীনা সন্ত রবিদাসজীগী পোক্নফম লমদমদা কয়ারক হন্না চৎখ্রে হায়না পাউদম্বগা লোয়ননা ঙসি মধ্য প্রদেশকী সাগর লমদমদগী মহাক্কী মফমদা ইকায় খুম্নবসু উৎখি।
সন্ত রবিদাসজীগী পাউতাকশিংদগী থোক্লকপা দিভিনিতীগা লোয়ননা য়েংবদা নীংথিজবগী মতৌ অনিমক সন্ত শিরোমানী গুরুদেব শ্রী রবিদাসজী মেমোরিএল অসিদা চেনগনি হায়না প্রধান মন্ত্রীনা হায়খি। মেমোরিএল অসি শাবদা খুঙ্গং 20000 অমসুং তুরেল 300গী লৈহাও শিজিন্নখিবনা মরম ওইরগা মেমোরিএল অসিদা ‘সম্রাস্ত’গী ইথিল শাগোন্নরি হায়না মহাক্না পাউদমখি। মধ্য প্রদেশকী ইমুং কয়ানা ‘সম্রাস্ত ভোজ’কীদমক্তা হৱাই-চেংৱাই থারকখি অমসুং ঙসিমকসু সাগরদা য়াত্রা মঙাসু লোইশিনখি। “মসিগী য়াত্রাশিং অসিনা খুন্নাইগী নুংশি চানবগী অনৌবা য়ুগ অমা হৌদোক্লে তাক্লি’, প্রধান মন্ত্রীনা মখা তাখি। ইথিল অমসুং চাউখৎপগী (প্রেরনা অমসুং প্রগতী) মতৌনা অমত্তা ওইরক্লবদা, অনৌবা য়ুগ অমা হৌদোকই হায়না প্রধান মন্ত্রীনা হায়খি। প্রোজেক্তশিং, হায়বদি, রোদ প্রোজেক্ত অনি অমসুং কোতা-বিনা রেল লম্বী দব্লিং তৌবা অসিগী মতাংদা মহাক্না পল্লদুনা মসিগী চাউখৎ থৌরাংগী প্রোজেক্তশিং অসিনা সাগর অমসুং নক্নবা মফমশিংগী মীয়ামদা হেন্না ফরবা খুদোংচাবা কয়া পীগনি হায়না ফোংদোকখি।
লৈবাক্না নিংতম্বগী চহি 75 মপুং ফারকপা অমসুং ঐখোয়গী মমাংদা অমৃত কালগী মথংগী চহি 25না মাঙদা লৈরকপা মতমদা সন্ত রবিদাসজী মেমোরিএলগী উরেপ উয়ুং তম্লি হায়না প্রধান মন্ত্রীনা মীয়ামগী পুক্নিং চীংশিনখি। ঐখোয়গী মমাংগী মতমশিংদগী পারা তম্বগা লোয়ননা লমদম অসিগী হেরিতেজবুসু তুংলমচত্তা পুফম থোকই হায়না মহাক্না হায়খি। লৈবাক অসিনা চহি লিশিং অমগী খোঙচৎ লোইশিনখ্রে হায়না পল্লদুনা, প্রধান মন্ত্রীনা খুন্নাইদা ফত্তবা ইথিল লাকপা হায়বসিদি মহৌশাগী থৌওংনি হায়খি। মসিগুম্বা ফত্তবশিংবু তান্থোকখিনবগীদমক্তা রবিদাসজীগুম্বা সন্ত নত্ত্রগা মহাত্মা অমা মতম মতমগী মতুং ইন্না থোক্লক্লিবা অসিদি ঐখোয়গী ভারতকী খুন্নাইগী মপাঙ্গল কনবননি হায়না মহাক্না ফোংদোকখি। সন্ত রবিদাসজী অসি মুঘলনা লৈবাক অসিদা লৈঙাক্লিঙৈ অমসুং খুন্নাইনা খল কায়বা, হন্থনা য়েংবা অমসুং মীওৎ-মীনৈনা খম থেংবা য়ুগতা পোকখিবনি হায়না মহাক্না পাউদমখি। মসিগুম্বা মতমসিদা খুন্নাইগী ফত্তবশিংবু মীয়ামদা খঙহন্দুনা মসিবু তান্থোকপগী পাম্বৈ তাকখিবা অদুদি সন্ত রবিদাসজীনি হায়না মহাক্না পাউদমখি। সন্ত রবিদাসজীগী ৱাফম পল্লদুনা, প্রধান মন্ত্রীনা হায়খিবদা, নাকল অমদা, মীয়াম্না কাস্ত অমসুং ক্রীদকা মাইয়োক্নরি, অদুগা অতোপ্পা নাকল অমদনা, ফত্তবনা মীওই খুন্নাইবু মাঙ তাকহল্লি। সন্ত রবিদাসজীনা লৈবাক্কী থৱাইবু মিৎকপ থোকহনবগা লোয়ননা খুন্নাইদা চৎনরিবা পামদবা থৌওং কয়াগী মাইয়োক্তা খোল্লাও লাওখি হায়না মহাক্না হায়খি। মুঘল লৈঙাক মতমদা লৈরম্বা সন্ত রবিদাসজীগী মথৌনা অমসুং লৈবাক নীংবগী মতৌদা মিৎয়েং চঙলদুনা, প্রধান মন্ত্রীনা মহাক্কী ৱাফম অমা পল্লদুনা মীখা পোনবা হায়বসিনা খ্বাইদগী চাউবা পাপনি অমসুং মদুবু য়াবা অমদি মদুগী মাইয়োক্তা লেপ্তবা মীওইশিং অদুদি কনা অমত্তনা নুংশিদে হায়খি। প্রধান মন্ত্রীনা হায়খিবদা, সন্ত রবিদাসজীনা খুন্নাইগী মফমদা হন্থনা য়েংবা মিৎয়েংগী মাইয়োক্তা লেপ্নবা থৌনা অমসুং পাঙ্গল হাপখি, অমসুং ছত্রপতি শিবাজীনা মসিবু ইথিল ওইনা শিজিন্নদুনা হিন্দবী স্বরাজ্যগী ফম্বাক শেমখিবনি। ভারতকী নিংতম ইহৌগী মতমদা নিংতম লান্মী কয়াগী থম্মোইনুংদা চঙবা ঙমখ্রিবা ইথিল অদুদি মসিনি হায়না মহাক্না মখা তাখি। “ঙসিদি, লৈবাক অসিনা নিংতম্বগী চপ মান্নবা ইথিল অসিগা লোয়ননা তুংলমচত্তা খোঙদারী অমসুং মীখা পোনবগী ৱাখল্লোনবু তান্থোক্লি”, প্রধান মন্ত্রীনা হায়খি।
সোসিএল ইক্বলিতী অমসুং পুম্নমক্না খুদোংচাবা ফংবগী মতাংদা থমখিবা সন্ত রবিদাসজীগী ৱাফম পল্লদুনা, প্রধান মন্ত্রীনা ঐখোয়না অমৃত কাল অসিদা লৈবাক অসিদগী লাইরবা অমসুং চাবা ফংদবগী ফিভম্বু মুত্থৎনা হোৎনরি হায়খি। মহাক্না লাইচৎ মনুংদা লাইরবা অমসুং শোত্থরবা মীওইশিংদা চানবা পোৎলম পীগে হায়না খোঙফম চেৎখিবা অদুবু ঙসি নীংশিংখি। “লাইরবশিংনা থেংনরিবা চাবা ফংদবা অমসুং মশাবু ইকায় খুম্নবগী থেংনরিবা অৱাবা অসি খঙবা ঙম্মি। ঐহাক্তি অদোমগী ইমুংগী মীওইনি অমসুং ঐহাক্না অদোমগী অৱাবা খঙনবগীদমক্তা লাইরিকশিংদা য়েংবগী মথৌ তাদে”, শ্রী মোদীনা হায়খি। প্রধান মন্ত্রী গরীব কলয়ান য়োজনাগী মখাদা মীওই করোর 80 হেনবগী মফমদা লেম্না রেসন পীখি, অমসুং মসিগী থৌওং অসিবু মালেম পুম্বনা থাগৎনখি হায়না প্রধান মন্ত্রীনা হায়খি।
গরীব কলয়ান স্কিম অসিবু লৈবাক অসিদা চলায়রিবা মওং অসিগী মতাংদা পাউদম্লদুনা, প্রধান মন্ত্রীনা হান্নগী মতমগা মান্নদবা মতৌ অমগুম্না, লৈবাক অসিনা ঙসিদি দলিত, লাইরবা, ত্রাইবেল অমসুং নুপীশিংগী নাকনদা পুন্সিগী থাক খুদিংদা লেপ্লি হায়খি। অঙাং পোকপগী মতমদা, মাত্রু বন্দনা য়োজনানা তেংবাংলি অমসুং নৌনা পোকপা অঙাংশিংগী তোতেল ভেক্সিন সেক্যুরিতী ওইরিবা মিসন ইন্দ্রধনুশ অসিনা মরম ওইরগা, মমা অমসুং অঙাং করোর 5.5 হেনবদা ইম্যুনাইজ তৌখ্রে। ভারত মচা করোর 7পু সিক্কল সেল এনেমিয়াদগী কন্নবা কেম্পেন অমসু ইং 2025 ফাওবদা ভারত্তগী ঊ মুত্থৎপগী কেম্পেন অমগা লোয়ননা পায়খৎলি। কালা-অজার অমসুং এন্সেফেলাইতিস নাবগী চাং হন্থরক্লিবা অসিবুসু প্রধান মন্ত্রীনা পনখি। অয়ুশমান কার্দকী মতাংদা পাউদম্লদুনা, প্রধান মন্ত্রীনা হায়খি, “মীয়াম্না মখোয়না মোদী কার্দ পায় হায়নৈ। লুপা লাক্ষ 5 ফাওবগী লেম্না লাইয়েংবগীদমক্তা অদোমগী ইচানুপা (প্রধান মন্ত্রী) লৈরি”।
পুন্সিদা এজুকেসনগী মরু ওইরিবা অসিদা মিৎয়েং চঙলদুনা, প্রধান মন্ত্রীনা লাইরিক, স্কোলার্শিপ অমসুং মিদ-দে মীলগী চাউরবা পথাপ অমা লোয়নরিবা ত্রাইবেল মফমশিংগী এক্লাবয়া স্কুলগী মতাংদা পনখি। মহাক্না নুপীমচাশিংগী সুকনয়া সামৃধী য়োজনা, SC, ST, OBC মহৈরোইশিংগী স্কোলার্শিপ, MUDRA লোনগী মখাদা SC, STগী মশিং য়াম্লবা কম্ম্যুনিতী মেম্বরশিংদা লোন পীরিবা অসিগুম্বা খোঙথাং কয়াগী মতাংদসু পনখি। স্তেন্দঅপ ইন্দিয়াগী মখাদা SC, ST নহাশিংদা পুন্না লুপা করোর লিশিং 8কী শেলগী তেংবাং পীখিবা, অমসুং MSPগী মনুংদা উমংগী পোত্থোক 90 মনুং চলহনখিবা থৌওংগা লোয়ননা মৈ, ঈশিং অমসুং গ্যাস কন্নেক্সন য়াওবা প্রধান মন্ত্রী অৱস য়োজনাগী মতাংদসু মহাক্না ৱাফম থমখি। “SC-ST খুন্নাইগী মখোয়গুম্বা মীওইশিংনা ঙসিদি মশা মথন্নতা লেপচবা ঙমজরে। মখোয়না মান্নবা থাক লৈদুনা খুন্নাইদা চুনবা ফম অমা ফংজরে”, মহাক্না মখা তাখি।
“সাগর হায়বসি মমিংদসু সাগর য়াওবা জিলা অমনি অমসুং মসিবু একর 400গী লাখা বঞ্জারা পাৎকা লোয়ননা শক্তাক্লি”, প্রধান মন্ত্রীনা হায়খি। লমদম অসিগা অচৌবা মরী লৈনরিবা লাখা বঞ্জারা পাৎকী মতাংদা মহাক্না ৱাফম থম্লদুনা মহাক্না চহি কয়াগী মমাংদগী ঈশিংগী মরু ওইবা খঙখ্রবনি হায়খি। মমাংগী সরকারনা লাইরবশিংদা থক্নবা ঈশিং পীরমদববু য়ানীংদবা ফোংদোক্লদুনা, মহাক্না মসিগী থবক অসিমকপু পাংথোক্লিবা জল জীবন মিসনগী মতাংদা পাউদমখি। দলিত, শোত্থবা খুন্নাই অমসুং ত্রাইবেলগী মফমশিংদা ঙসিদি তোতী ঈশিং য়ৌরে হায়না মহাক্না হায়খি। লাখা বঞ্জারাগী চৎনবী অসিবু খুমাং হেন্না চাউখৎহন্নবগীদমক্তা লৈবাক্কী জিলা খুদিংদা অমৃত সরোবর 75 শাবগী থবক চত্থরি হায়না প্রধান মন্ত্রীনা হায়খি। “মসিগী পাৎশিং অসিনা নিংতম্বগী ইথিলগী খুদম অমা অমসুং নুংশি চান্নবগী ময়োলগী মফম অমা ওইগদৌরিবনি”, মহাক্না হায়খি।
ঙসিদি, দলিত, শোত্থরবা, মীরায়বীরবা নত্ত্রগা ত্রাইবেল ওইরো, ঐখোয়গী সরকারনা মখোয়না ফংফম থোকপা ইকায় খুম্নবা উৎপগা লোয়ননা খুদোংচাবশিং ফংহল্লি হায়না প্রধান মন্ত্রীনা হায়খি। “খুন্নাই অসিগী মীওইশিং অমসুং পুৱারী অনিমক মপাঙ্গল শোনবা অমত্তা নত্তে”, লৈবাক শেম্বগী থৌওংশিংদা মশক থোকপা থৌদাং য়াখিবা, অমসুং অমগী মতুংদা অমা থোকখিবা খুন্নাই অসিগী শক্নাইরবা মীওই কয়াগী মতাংদা পাউদম্লদুনা প্রধান মন্ত্রীনা ফোংদোকখি। মসিনা মরম ওইরগা, লৈবাক অসিনা মখোয়গী পুন্সি ৱারীবু চাউথোকচবগা লোয়ননা ঙাক শেল্লিবনি হায়না প্রধান মন্ত্রীনা হায়খি। মহাক্না বনারসতা লৈবা সন্ত রবিদাসজীগী পোক্নফম লমদমগী লাইশঙ মশক ফজথোকহনবা, সন্ত রবিদাসজীগী মিং লৌদুনা মিংথোল্লিবা ভোপালগী গোবিন্দপুরাদা শারিবা গ্লোবেল স্কিল পার্ক, বাবা সাহেবকী পুন্সিগা মরী লৈনবা মরু অইবা মফমশিংবু পাঞ্চ তীর্থ হায়না শেমগৎলিবা, অমসুং ত্রাইবেল খুন্নাইগী মশক থোক্লবা পুৱারীশিংবু অমর ওইহন্নবা রাজ কয়াদা শারিবা ম্যুজিয়মশিংবু মহাক্না খুদম ওইনা পীখি। লৈবাক অসিনা লোর্দ বির্সা মুন্দাগী মপোক কুমওনবু জঞ্জিতিয় গৌরব দিবস হায়না পাংথোকপা হৌরে হায়না প্রধান মন্ত্রীনা পাউদমখি। মধ্য প্রদেশকী হবিবগঞ্জ রেলৱে স্তেসন অসি গোন্দ খুন্নাইগী মহারানী কমলাপতিগী মিং লৌদুনা মিংথোনবনি অমসুং পতালপানী স্তেসনবুনা তান্ত্য মামাগী মিং লৌদুনা মিংথোনবনি হায়না মহাক্না মখা তাখি। প্রধান মন্ত্রীনা মহাক্কী ৱারোল লোইশিনবা ওইনা, দলিত, শোত্থরবা অমসুং ত্রাইবেলগী চৎনবীশিং অসিবু লৈবাক অসিদা অহানবা ওইনা ইকায় খুম্নবা হৌরক্লে হায়খি। মহাক্না লৈবাক মীয়াম্না ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’কী ৱারেপ লৌদুনা চৎপীয়ু হায়খি অমসুং সন্ত রবিদাসজীগী পাউতাকশিংনা লৈবাক্কী মীয়াম্বু খোঙচৎ অসিদা অমত্তা ওইনা চৎহনবদা তেংবাংখিগনি হায়বগী থাজবা থমখি।
মধ্য প্রদেশকী রাজ্যপাল, শ্রী মঙ্গুভাই পতেল, মুখ্য মন্ত্রী শ্রী শিবরাজ সিংহ চাউহান, কেন্দ্র মন্ত্রী, শ্রী জ্যোতিরাদিত্য সিন্দিয়া অমসুং শ্রী বিরেন্দ্র কুমার, কেন্দ্রগী রাজ্য মন্ত্রী, শ্রী প্রহলাদ সিংহ পতেল, এম.পি., শ্রী ভি.দি. ভর্মা অমসুং মধ্য প্রদেশ সরকারগী মন্ত্রীশিংনা অতোপ্পা মীথুংলেনশিংগা লোয়ননা ঙসিগী থৌরমদা শরুক য়াখি।
বেকগ্রাউন্দ
শক্নাইরবা লাইনীংবা অমসুং খুন্নাইদা অহোংবা পুরকপা মীওইশিংবু ইকায় খুম্নবনা প্রধান মন্ত্রীনা পাংথোকপা থবকশিংগী অখন্নবা শক্তাক অমা ওইদুনা লাক্লি। মসিগুম্বা মিৎয়েং অসিনা লমজিংদুনা, সন্ত শিরোমনী গুরুদেব শ্রী রবিদাসজী মেমোরিএল অসি একর 11.25 হেন্না পাক চাউবা মফম অমদা লুপা করোর 100 হেন্না চঙদুনা শাগদৌরিবনি। নীংথিরবা মেমোরিএল অসিদা সন্ত শিরোমনী গুরুদেব রবিদাসজীগী পুন্সি, ৱাখল্লোন অমসুং পাউতাকশিং উৎপা পুক্নিং হুনীংঙাই ওইরবা আর্ত ম্যুজিয়ম অমসুং গেল্লরী লৈগনি। মসিদা লাকপা মীওইশিংগীদমক্তা ভক্ত নিৱাস, ভোজনালয়নচিংবা ফেসিলিতী কয়াসু মফমসিদা লৈগনি।
কোতা-বিনা রেল লম্বী দব্লিং তৌবগী থবক লোইশিনখিবগা লোয়ননা প্রধান মন্ত্রীনা মসিবু লৈবাক মীয়ামদা খুৎশিন্নখি। চাউরাক্না লুপা করোর 2475 হেন্না চঙখি হায়না পানরিবা প্রোজেক্ত অসিনা রাজস্থানগী কোতা অমসুং বারন জিলা, অমসুং মধ্য প্রদেশকী গুনা, অশোকনগরমসুং সাগর জিলা ফাওদুনা চেনগনি। মসিগী অহেনবা রেল লম্বী অসিনা হান্নদগী হেন্না ফগৎলবা মোবিলিতীগী কেপাসিতী হেনগৎহনগনি অমসুং লম্বী অসিদা চেল্লিবা ত্রেনশিংগী খোঙজেল হেনগৎহনবদসু তেংবাংগনি।
লুপা করোর 1580 হেন্না চঙনা পায়খৎকদবা রোদ প্রোজেক্ত অনিগী উরেপ উয়ুংসু প্রধান মন্ত্রীনা তমগখি। মসিগী মনুংদা মোরিকোরী-বিদিশা-হিনোতিয়া শম্নহনবা লম্বীবু লেন মরিদা ওন্থোকপা অমসুং হিনোতিয়াগা মেহলুৱাগা শম্নহনগদবা রোদ প্রোজেক্ত য়াওরি।
Sant Ravidas Ji awakened the society. pic.twitter.com/hOMaxWJf1m
— PMO India (@PMOIndia) August 12, 2023
आज आजादी के अमृतकाल में हम देश को गरीबी और भूख से मुक्त करने के लिए प्रयास कर रहे हैं। pic.twitter.com/SiaVrgoNU6
— PMO India (@PMOIndia) August 12, 2023
Our focus is on welfare of the poor and empowerment of every section of society. pic.twitter.com/BNDtQwKZ5b
— PMO India (@PMOIndia) August 12, 2023
आज देश का दलित हो, वंचित हो, पिछड़ा और आदिवासी हो, हमारी सरकार इन्हें उचित सम्मान दे रही है, नए अवसर दे रही है। pic.twitter.com/bRnkImOI8h
— PMO India (@PMOIndia) August 12, 2023
