প্রধান মন্ত্রী শ্রী নরেন্দ্র মোদীনা ঙসিগী অঙনবদা লোক কল্যান মার্গ ৭তা নেসনেল তিচর্স এৱার্দ ফংখ্রবা ওজাশিংগা ৱারী শানখ্রে।
মনা ফংলবশিংনা প্রধান মন্ত্রীগা লোইননা তাকপী তম্বীবগী অৱা নুংঙাইশিং পাউদমখি। মখোয়না লাইরিক তম্ববু হেন্না নুংঙাইনবগীদমক মখোয়না লৌখৎপা পথাপশিং পাউদমখি। নোংমগী তাকপী তম্বীবগী থবকশিংগী মথক্তা মখোয়না লৌখৎপা মীয়ামগী থবকশিংগী খুদমশিংসু পাউদমখি। মখোয়গা ৱারী শানরদুনা প্রধান মন্ত্রীনা তাকপী তম্বীবদা মখোয়গী কত্থোকপা কয়াগীদমক অমসুং চহি কয়া অসিদা মখোয়না উৎখিবা থবকশিং মনা অসিনা শকখঙবীরদুনা শিংথাখি।
প্রধান মন্ত্রীনা ন.ই.পি.গী শাফুশিংগী মতাংদা খন্নখি অমসুং কনাগুম্বা অমগী মমা লোন্দা লাইরিক তম্বগী মরুওইবগী মতাংদা ঙাংখি। মহাক্না ওজাশিংবু লমদম লমদমগী ওইবা ফুঙ্গা ৱারীশিং মহৈরোইশিংদা তোঙান-তোঙানবা লোলদা তাকপীদুনা ভারতকী তোঙান-তোঙানবা লোলশিং অমসুং নাৎ কয়াবু খঙহন্নবগী মতাংদা ফোংদোকখি।
প্রধান মন্ত্রীনা হায়খি মদুদি অঙাংশিংনা লাইরিক তম্বদা নুংঙাইগদবা অমসুং লৈবাক অসিগী তোঙান-তোঙানবা মশকশিং খঙহনবদা মতেং ওইগদবা মহৈরোইশিংবু এজুকেসনেল তুরশিং পুবা য়াই। মহাক্না মখা তারদুনা হায়খি মদুদি মসিনা তুরিজম হেন্না চাউখৎহনগনি অমসুং লমদম লমদমগী শেন্মিৎলোন্দা ফগৎহনগনি।
প্রধান মন্ত্রীনা ফোংদোকখি মদুদি মনা ফংলবা ওজাশিংনা সোসিএল মীদিয়াগী খুত্থাংদা পাউ ফাওনদুনা মীপুম খুদিংমক্না তম্বা য়াবা, লৌখৎপা য়াবা অমসুং কান্নবা ফংগদবা মখোয় মখোয়গী খ্বাইদগী ফবা তাকপগী মওং লান্থোকমিন্ননবা পুক্নিং চিংশিনখি। প্রধান মন্ত্রীনা হায়খি ওজাশিংনা লৈবাক অসিগী খ্বাইদগী মরুইওইবা থৌদাংশিং লৌরি অমসুং ভিক্সিত ভারত অমগীদমক ঙসিগী নহাশিং শেম্বগী থৌদাং অসি ওজাশিংগী খুত্তা লৈ হায়খি।
হৌরকপগী ৱারী
নেসনেল তিচর্স এৱার্দ অসিগী পান্দমদি লৈবাক অসিদা লৈবা মখোয়গী হোৎনজমলনা এজুকেসন সেক্তর ফগৎপদা নত্তনা মহৈরোইশিংগী পুন্সিদা মশক থোকহনবীবা খ্বাইদগী ফরবা ওজাশিংগী অখন্নবা থৌনাশিংবু ইকাইখুম্নবনি। চহি অসিগী মনাগীদমক লৈবাক অসিদগী ওজা ৮২ খনগৎখি, মসিদা ওজা ৫০ না দিপার্ত্মেন্ত ওব স্কুল এজুকেসন অমসুং লিতরেসীনা খল্লি, ১৬না দিপার্ত্মেন্ত ওব হায়র এজুকেসননা অমসুং ১৬ অমনা স্কিল দিবেলপমেন্ত এন্দ ওন্ত্রপ্রিন্যুরশিপনা খনবনি।
