প্রধান মন্ত্রী, শ্রী নরেন্দ্র মোদীনা ঙসি নই দিল্লীদা জাতিগী ঈশৈ ‘ভন্দে মাতরম’গী চহি ১৫০ মপুং ফারকপগী চহি অমা চুপ্না পাংথোক্কদবা নিংশিং থৌরম হৌদোকখ্রে। থৌরম অদুদা মীয়াম তিনখিবা অদুদা ৱা ঙাংলদুনা শ্রী মোদীনা হায়খি মদুদি ভন্দে মাতরম অসি ৱাহৈ খক্তা নত্তে- মসি মন্ত্র, ইনর্জী, মঙলান অমসুং অচেৎপা ৱারেপ অমনি। মহাক্না হায়খি মদুদি ভন্দে মাতরমনা মা ভারতীগীদমক থম্লিবা ভক্তি অমসুং স্পিরিচুৱল দেদিকেসন অদু উৎলি। প্রধান মন্ত্রীনা হায়খি মদুদি ৱাহৈ অমখক অসিনা ঐখোয়বু ঐখোয়গী পুৱারীগা শম্নহল্লি, ঐখোয়গী হৌজিক্কী মতম অসি থাজবগা লোয়ননা মপুং ফাহল্লি, অমসুং মদুদি ৱারেপ অমত্তা মপুং ফারোইদবা লৈরোই, অমসুং পান্দম অমত্তা ঐখোয়না ফংলোইদবা লৈরোই হায়বা থাজনবগী থৌনাগা লোইননা ঐখোয়গী তুংলমচৎকীদমক্তা পুক্নিং থৌগৎলি।
ময়াম পুন্না ভন্দে মাতরম শকমিন্নবা অসি তশেংনা থোইদোক-হেন্দোক্না ফজরবা, ফোংদোকপা ঙম্বগী ৱাংমদা লৈবা অদুগুম্বা শিংথানিংঙাই ওইরবা এক্সপরিয়েন্স অমনি হায়না শন্দোক্না তাক্লদুনা শ্রী মোদীনা হায়খি মদুদি খোঞ্জেল কয়াগী মরক্তা অখন্নবা তান, অপুনবা খোন্থোক, ময়ামগী অপুনবগী নুংঙাইবা অমসুং অথিংবা-অপনবা লৈতবা ফ্লো অমা থোক্লকখি। মহাক্না পুক্নিংদা ইথিল পীবা রেজোনেন্স অমসুং হার্মোনিগী ৱেবশিংগী মতাংদা ঙাংখি। প্রধান মন্ত্রীনা হায়খি মদুদি নবেম্বর ৭ অসি পুৱারী ওইরবা নুমিৎ অমনি মরমদি লৈবাক অসিনা ভন্দে মাতরমগী চহি ১৫০ মপুং ফারকপগী থৌরম পাংথোক্লি। মহাক্না হায়খি মদুদি মসিগী অশেংবা থৌরম অসিনা ঐখোয়গী নাগ্রিকশিংদা অনৌবা ইথিল অমসুং ইনর্জী পীগনি। পুৱারীগী তাঙ্ককশিংদা নুমিৎ অসিবু হক্তুনা লৈহৌনবগীদমক্তা, ভন্দে মাতরমদা কত্থোকপা অখন্নবা নিংশিং শেলয়েক অমসুং পোস্তেজ স্তাম্প অমা ফোংখি। মা ভারতীগীদমক মখোয়গী পুন্সি কৎথোকখিবা ভারতকী থৌনা ফরবা মীওই পুম্নমক্তা শ্রদ্ধাঞ্জলি কৎলদুনা, শ্রী মোদীনা মফম অসিদা লৈরিবা পুম্নমকপু থাগৎপা ফোংদোকখি অমসুং ভন্দে মাতরমগী চহি ১৫০ মপুং ফারকপদা নাগ্রিক খুদিংমক্তা মহাক্কী য়াইফ-পাউজেল পীখি।
ঈশৈ অমসুং শৈরেং খুদিংমক্তা মরুওইবা ইমোসন অমসুং মরুওইবা পাউজেল অমা য়াওরি হায়না পল্লদুনা প্রধান মন্ত্রীনা ৱাহং অসি হংখি, “ভন্দে মাতরমগী মরুওইবা মগুন করিনো?” মহাক্না হায়খি মদুদি মসিগী মগুনদি ভারত-মাতা ভারতী-ভারতকী মতম চুপ্পগী ওইবা ৱাখল্লোন অসিনি। মহাক্না হায়খি মদুদি মীওইবগী সিভিলাইজেসন হৌরকপা মতমদগী ৱাখল্লোন অসি শেম্বা হৌরকখি, মতম খুদিংমকপু পন্দুপ অমা ওইনা পাদুনা, তোঙান তোঙানবা লৈবাকশিংগী হৌরকপা, তোঙান তোঙানবা শক্তিশিং থোরকপা, অনৌবা সিভিলাইজেসনশিংগী ইভোলুসন, করিশু ওইরমদবদগী য়াম্না অচৌবা অমা ওইরকপগী খোংচৎ, অমসুং মখোয়না কৈশু লৈতনা অমুক তুম্না মাংখিবা। মহাক্না মখা তাখি মদুদি ভারতনা পুৱারী শেমগৎপা অমসুং শেমদোরকপা, মালেমগী জিওগ্রাফী হোংলকপা উবা ফংখি। মীওইবগী অসুম-অসুম চাউখৎপা খোঙচৎ অসিদগী ভারতনা তমখি, অনৌবা ৱারোইশিন কয়া পুরকখি অমসুং মখোয়দা য়ুম্ফম ওইদুনা, মশাগী ওইবা সিভিলাইজেসনগী ভেল্যুশিং অমসুং আইদিয়লশিং শেমদুনা মশাগী ওইবা তোপ-তোপ্পা নাৎকী শক্তম অমা শেমগৎখি। শ্রী মোদীনা হায়খি মদুদি ভারতনা পাঙ্গল অমসুং মোরেলিতীগী মরক্তা লৈরিবা খল অদু খঙই, অমসুং মসিনা মরম ওইদুনা অরিবা মতমগী অশোক-অপনশিং লৈরবসু অশেংবা সনাগুম্না মপুং ফাবা লৈবাক অমা ওইরক্লি।
ভারতকী ৱাখল্লোন অমসুং মসিগী মখাদা লৈরিবা ফিলোসোফিকেল ফোর্স অসি গ্লোবেল পাৱরশিংগী ফাওগৎলকপা অমসুং মরাই চাইথখিবা অসিদগী তোঙান্না মশাগী ওইবা তোপ-তোপ্পা মওংদা লৈ হায়না পল্লদুনা শ্রী মোদীনা হায়খি মদুদি মসিগী ৱাখল্লোন অসি অইবা ওইনা অমসুং তান অমগী মওংদা ফোঙদোকপা মতমদা, মদুগী মমি অদু ভন্দে মাতরমগুম্বা পোৎশক অমা ওইরকখি। শ্রী মোদীনা হায়খি, “মরম অদুনা, লোইলম শন্দোক্লিঙৈ মতমগী মনুংদা, ভন্দে মাতরম্না ভারত অসি নীংখা তমগনি, মা ভারতীগী মখুৎনা মীখা পোনবগী য়োৎহ্লিং অদু থদৎকনি, অমসুং মহাক্কী মচাশিংনা মশাগী তুংগী লাইবক মশানা শেমজগনি হায়বা ফিরেপ অদুগী প্রোক্লেমেসন ওইখি।”
গুরুদেব রবিন্দ্রনাথ তেগোরনা বঙ্কিমচন্দ্রগী অনন্দমথ অসি ৱারী লাইরিক খক্তা নত্তে-মসি নীংতম্লবা ভারত অমগী মঙলান অমনি হায়না হায়রম্বা অদু নীংশিংলদুনা, প্রধান মন্ত্রীনা অনন্দমথকী ভন্দে মাতরমগী মরুওইবা অদু পনখি। বঙ্কিম বাবুগী শৈরেং খুদিংমক্তা ৱাহৈ খুদিংমক্তা অমসুং ইথিল খুদিংমক্তা অরুবা ৱাহন্থোক লৈ হায়না মহাক্না পনখি। মহাক্না হায়খি মদুদি ঈশৈ অসি লোইলম শন্দোক্লিঙৈ মতমদা ইরম্বা ওইরবসু, মসিগী ৱাহৈশিং অসি চহি চা কয়াগী মীখা পোনবগী মতমগী মমি অমত্তদা তাখিদে। মসিনা মখা পোন্না লৈবা ৱাখল্লোনদগী থাপ্না লৈখি, অমসুং মরম অসিনা ভন্দে মাতরম অসি মতম খুদিংদা অমসুং চহি খুদিংদা মরী লৈনরি। শ্রী মোদীনা ঈশৈ অসিগী অহানবা ৱাহৈ পরেং- ‘সুজালাম সুফালাম মালায়াজা সীতালম সাস্যাশ্যামালম মাতরাম” - অসিবু মহৌশাগী লাইরেম্বীনা থৌজানবীরবা ঐখোয়গী ইমা লেবাক অসিদা ইকায় খুম্নবা ওইনা শন্দোক্না তাকখি।
মসিনা চহি লিশিং কয়াগী মমাংদগী ভারতকী মশক তাক্তুনা লাক্লি হায়না পল্লদুনা শ্রী মোদীনা হায়খি মদুদি মসিগী তুরেলশিং, চীংশিং, উমংশিং, উশিং অমসুং লৈহাও লৈরবা লৈবাকশিং অসিনা মতম পুম্নমক্তা মরাং কায়না মহৈ-মরোং পীবগী শক্তি লৈখি। চহি চা কয়াদগী মালেমনা ভারতকী চাউখৎপগী ৱারীশিং তাদুনা লাক্লি। চহি চা খরগী মমাংদা, ভারতনা মালেমগী জি.দি.পি.গী শরুক মরি থোকপগী অমা ওইখি। অদুম ওইনমক, বঙ্কিম বাবুনা ভন্দে মাতরম শেমখিবা মতম অদুদা ভারতনা গোল্দন এজ অদুদগী য়াম্না লাপ্না চৎলম্মি হায়না মহাক্না ফোংদোকখি। মপানগী লৈবাকশিংনা লান্দারকপা, হুরান্দুনা অমসুং কান্নবা লৌথোক্নবা খক্কী ওইবা কলোনিয়েল পোলিসীশিংনা লৈবাক অসিবু লায়র-অনং অমসুং অরাম-খৌরাংবনা থল্লবা অমা ওইহনখি। অদুম ওইনমক, বঙ্কিম বাবুনা শিংনবশিং অদু কয়া য়াম্না চাউবা ওইরবসু, ভারতনা মসিগী গোল্দন এজ অদু অমুক হন্না হিংগৎহনবা ঙম্মি হায়বা মহাক্কী থাজবদগী থৌনা ফরবা ভারত অমগী মঙলান অদু ফোংদোকখি। অসুম্না, মহাক্না ক্লেরিয়ন কোল-ভন্দে মাতরম অসি পীখি।
প্রধান মন্ত্রীনা হায়খি মদুদি লোইলম শন্দোক্লৈঙৈ মতমদা, ব্রিতিশনা ভারতপু হন্থবা অমসুং চাউখত্তবা লৈবাক অমা ওইনা উৎতুনা মখোয়গী শাসন অদুগী বিচার পীনবা হোৎনখি। মহাক্না ভন্দে মাতরমগী খ্বাইদগী ইহান হানবা পরিং অদুনা মখোয়গী অরানবা প্রোপেগান্দা অদুবু থুগাইখি হায়না য়াম্না মরু ওইনা পনখি। মরম অদুনা, ‘ভন্দে মাতরম' অসি নীংতম্বগী ঈশৈ অমা খক্তা নত্তে, মসিনা ভারত মচা কোতি কয়াদা নীংতম্লবা ভারত অমা ওইরকপা য়াবগী মঙলান অমসু পীখি: সুজালাম সুফালাম ভারতকী মঙলান।
শ্রী মোদীনা হায়খি মদুদি ঙসিগী নুমিৎ অসিনা ভন্দে মাতরমগী থোইদোক-হেন্দোকপা খোঙচৎ অমসুং মসিনা পিরিবা ইথিল অদু খঙনবগী খুদোংচাবা অমা পীরি। বঙ্কিম বাবুনা ১৮৭৫দা বঙ্গদর্শন্দা ভন্দে মাতরম ফোঙখিবা মতমদা, মীওই খরনা মসি ঈশৈ খক্তনি হায়না খল্লম্মি। অদুম ওইনমক, অথুবা মতমদা, ভন্দে মাতরম অসি ভারতকী নীংতম লানগী খোঞ্জেল ওইখি। মসি রিভোলভুসনরী খুদিংমক্কী চিনবালদা ঙংবা ঈশৈ ওইখি, ভারত মচা খুদিংমক্কী পুক্নিংগী ইথিলগী ফোংদোক্নবগী মমি অমা ওইখি। মহাক্না হায়খি মদুদি ভন্দে মাতরমনা মওং অমা নত্রগা অমদা য়াওখিদবা নিংতম ইহৌগী চেপ্তর অমত্তা লৈতে। ১৮৯৬দা গুরুদেব রবীন্দ্রনাথ তেগোরনা কলকাতা সেসনদা ভন্দে মাতরম শকখি। ইং ১৯০৫দা, বঙ্গালবু শরুক অনি থোক্না খায়দোকপা মতমদা - লৈবাক অসিবু শরুক অনি থোক্না খায়দোক্নবগী ব্রিতিশকী খুদোংথিনিংঙাই ওইবা চাংয়েং অমদা - ভন্দে মাতরমনা হায়রিবা দিজাইনশিং অদুগী মায়োক্তা লেংদনা লৈখি। প্রধান মন্ত্রীনা নীংশিংখি মদুদি বেঙ্গলগী শরুক অনিগী মায়োক্তা পাঙথোকখিবা প্রোতেস্তকী মতমদা, লম্বীদা অমত্তা ওইবা খোঞ্জেল-“ভন্দে মাতরম”না খোন্থাং য়ৈনা নিনখি।
বরিসাল সেসনগী মনুংদা প্রোতেস্তরশিংদা নোংমৈ কাপ্পা মতমদা ফাওবা, মখোয়গী মচিলদা ‘ভন্দে মাতরম’ হায়বা ৱাহৈ অসি খক্তমক লৈখি হায়না পল্লদুনা শ্রী মোদীনা হায়খি মদুদি, মপাল লমদগী থবক তৌরিবা বীর সাভৱরকরগুম্বা নীংতম লান্মীশিংনা মখোয় মশেলগী মরক্তা ‘ভন্দে মাতরম’ হায়না তরাম্না কৌনদুনা ইকায় খুম্নবা উৎনৈ। রিভোল্যুসনরী কয়ানা, ফাল্লোংদা লেপ্পা মতমদসু, ভন্দে মাতরম হায়রম্মি। প্রধান মন্ত্রীনা হায়খি মদুদি অসিগুম্বা থৌদোক কয়া, পুৱারীগী তাঙ্কক কয়া, তোঙান তোঙানবা লমদমশিং অমসুং লোলশিংগা লোয়ননা পাক চাউরবা লৈবাক অসিদা, স্লোগান অমা, ৱারেপ অমা, ঈশৈ অমা খোঞ্জেল খুদিংমক্তা তাবা ফংখি- ভন্দে মাতরম। মহাক্না মহাত্মা গান্ধীগী ১৯২৭কী ৱারোলশিং পনখি মদুদি ভন্দে মাতরম্না ঐখোয়দা তোখাই-তোখাই তাদবা ভারতকী অক্তম অমা উৎলি। শ্রী ঔরোবিন্দোনা ভন্দে মাতরমবু ঈশৈ অমা ওইনা খক্তা শক্তাকখিদে, মসিবু নুংগী মপাঙ্গল কনখৎহনগদবা মন্ত্র অমনি হায়না মহাক্না পনখি। ভিকাজী কামানা দিজাইন তৌখিবা ফিরাল অদুগী ময়াইদা ‘ভন্দে মাতরম’ হায়বা ৱাহৈশিং অসি য়াওরি হায়নসু প্রধান মন্ত্রীনা পনখি।
ভারতকী জাতিগী ফিরাল অসি মতমগী মতুং ইন্না হোংলক্তুনা, খ্বাইদগী অঙনবা মতমগী মওং অদুদগী ঙসিগী মচু অহুমগী মওং অসি ওইরকখি, শ্রী মোদীনা হায়খি মদুদি করিগুম্বা অমা খক্তি অহোংবা লৈত- মদুদি ফিরাল অসি চিংখৎপা খুদিংদা, ভারত মচা খুদিমক্কী থম্মোয়দগী থোরকপা ৱাহৈশিং অদুদি ভারত মাতা কী জয়! অমসুং ভন্দে মাতরম!। মহাক্না য়াম্না মরু ওইনা পনখি মদুদি লৈবাক অসিনা জাতিগী ঈশৈ 'ভন্দে মাতরম'গী চহি ১৫০ মপুং ফারকপগা লোয়ননা, মসি লৈবাক অসিগী অথৌবশিংবু ইকায় খুম্নবা উৎলি। মসিনা ভন্দে মাতরম শোন্দুনা ফাল্লোংদা থৱায় কৎখিবা, ভন্দে মাতরম শোন্দুনা শাজৈ চৈনা কয়া খাংখিবা, ভন্দে মাতরমগী মন্ত্র শোল্লদুনা বরপ মথক্তা নিংহন্নবা লৈতনা খাংলকখিবা মশিং য়াম্লবা অথৌবশিংবু ইকায় খুম্নবা উৎলি।
প্রধান মন্ত্রীনা হায়খি মদুদি ঙসি ভারত মচা কোতি ১৪০না লৈবাক অসিগীদমক মপুন্সি কৎথোকখিবা, মমিং লৈতবা, শকখঙদবা মীওই খুদিংমক্তা শ্রদ্ধাঞ্জলি কৎলি।
ভেদিক্কী শ্লোক অসি পল্লদুনা, লমদম অসি ঐখোয়গী ইমা, লৈবাক অসি ঐখোয়গী ইমা অমসুং ঐখোয়না মহাক্কী মচাশিংনি হায়না ফোংদোক্লদুনা শ্রী মোদীনা হায়খি মদুদি ভেদিক্কী মতমদগী, ভারতকী মীয়াম্না লৈবাক অসিবু মমাগী মওংদা ইকাই খুম্নদুনা লাক্লি। বেদিক্কী ৱাখল্লোন অসিনা ভন্দে মাতরমগী খুত্থাংদা নীংতম লানফমদা অনৌবা ৱাখল্লোন অমা পীখি হায়না মহাক্না য়াম্না মরু ওইনা পনখি।
প্রধান মন্ত্রীনা ফোংদোকখি মদুদি লৈবাক অসিবু জিওপোলিতিকেল এন্তিতী অমা ওইনা খনবা মীওইশিংগীদমক্তদি, লৈবাক অসিবু মমা অমা ওইনা লৌবগী ৱাখল্লোন অসি অঙকপা ওইনা উবা য়াই। অদুবু ভারত অসি মবামদগী তোঙাল্লি। ভারত্তা, মমা অসি অপোকপী, নাওয়োক-নাওকোনবী, অমসুং মহাক্কী মচাশিং অসি খুদোংথীবা থোকপা মতমদা, মহাক্না ফত্তববু মাংহন-তাকহনবা মীওই অমসুনি। মহাক্না ভন্দে মাতরমগী লাইনশিং পনখি। মহাক্না হায়খি মদুদি মা ভারতীদা অচৌবা শক্তি লৈরি। মহাক্না ঐখোয়বু অৱাবা কয়া মায়োক্নবদা লমজিং-লমতাকপীরি। প্রধান মন্ত্রীনা হায়খি মদুদি জাতি অসি মমা অমনি, অমসুং মমা অসি শক্তিগী লাইগী মওংনি, মসিনা নুপা অমসুং নুপী অনিমক চপ মান্ননা য়াওহন্নবা ৱারেপ লৌখিবা নীংতম লানফম অমদা পুরকখি। মহাক্না মখা তাখি মদুদি ভিজন অসিনা ভারতপু লৈবাক শেমগৎপদা নুপীগী শক্তিনা মাংজিল থাবা লৈবাক অমা ওইহন্নবা অমুক্কা হন্না হোৎনহনখি।
ভন্দে মাতরম অসি নীংতম লানগী অথৌবশিং অদুগী ঈশৈ ওইবগা লোয়ননা ঐখোয়বু নীংতম্বা অসিবু ঙাক-শেন্দুনা থম্নবগী পুক্নিং থৌগৎলি হায়না পল্লদুনা শ্রী মোদীনা বঙ্কিম বাবুগী অশেংবা ঈশৈগী ৱাহৈশিং পনখি। মহাক্না হায়খি মদুদি মা ভারতী অসি লৌশিং পীনবা সরস্বতী, চাউখৎপা পীনবা লক্ষ্মী অমসুং খুৎলাই অমসুং শক্তিগী মপু দুর্গাগী মপুং ওইবা মশকনি। লৌশিং, সাইন্স অমসুং তেক্নোলোজীদা মাংজিল থাবা লৈবাক অমা শেমগৎপা, লৌশিং অমসুং ইনোবেসনগী পাৱরনা মপাঙ্গল কনখৎহনবা অমসুং নেস্নেল সেক্যুরিতীগী লমদা মশা-মরোমদোম লেপচবা লৈবাক অমা শেমগৎপগী মঙলাননি হায়না প্রধান মন্ত্রীনা য়াম্না মরু ওইনা পনখি।
হৌখিবা চহিশিং অসিদা মালেম অসিনা ভারতনা মশাগী অশেংবা মওংদা চাউখৎলকপা উবা ফংলে হায়না পল্লদুনা প্রধান মন্ত্রীনা সাইন্স অমসুং তেক্নোলোজীগী লমদা ভারতনা মমাংদা অমুক্তা ওইখিদ্রিবা মওংদা খুমাং চাউশিল্লকপা অমসুং মালেমগী খ্বাইদগী চাউবা ইকোনোমীগী মঙাশুবা মফমদা য়ৌরকপা অদু পনখি। মহাক্না ফোংদোকখি মদুদি করিগুম্বা বেক্নবশিংনা তেরোরিজমগী খুত্থাংদা ভারতকী সেক্যুরিতী অমসুং ইকাই খুম্নবদা তেমশিংনরক্লবদি, মালেমনা অনৌবা ভারতনা কমলা অমসুং ভিমলাগী ৱাখল্লোনবু মীওইবা খুন্নাইগী সেবা তৌবদা উবা ফংখ, অদুবু ফত্তবশিংগী মাংহন-তাকহনবা ঙম্বা- খুৎলাই তরা পাইবা- দুর্গাগী শক্তমশু লৌবা ঙম্মি হায়না ফোংদোকখি।
ভন্দে মাতরমগা মরী লৈনবা অতোপ্পা মরুওইবা হীরম অমা পল্লদুনা, মসিগী মরুওইবা অদু পল্লদুনা শ্রী মোদীনা হায়খি মদুদি ভন্দে মাতরমগী স্পিরিতনা নীংতম লানগী মতমদা লৈবাক পুম্বদা মঙাল পীখি। অদুম ওইনমক, মহাক্না নুংঙাইতবা ফোংদোকখি মদুদি ইং ১৯৭৩দা, ভন্দে মাতরমগী মরুওইবা ৱাহৈ পরেংশিং - মশাগী থৱায় – অদুমক খাইদোকখি। ঈশৈ অসি মচেৎ মচেৎ খায়দোকখি। মহাক্না হায়খি মদুদি দিভিজন অসিনা লৈবাক অসি শরুক অনি থোক্না খায়দোক্নবগী মরুওইবা মরম ওইখি। প্রধান মন্ত্রীনা অচৌবা নেস্নেল মন্ত্র অসিদা করিগীদমক্তা অসিগুম্বা অচান-মরান লৈরিবনো হায়না হংখি অমসুং ঙসিগী মীরোল অসিনা মসিগী পুৱারী অসি খঙগদবনি হায়না অকনবা ৱাফম থমখি। ঙসি ফাওবদা অসিগা মান্নবা ৱাখল্লোন অসিনা লৈবাক অসিদা শিংনবা অমা ওইদুনা লৈরি হায়না মহাক্না পনখি।
ঐখোয়না চহি চা অসি ভারতকী চহি চা ওইহনগদবনি হায়না মরু ওইনা পল্লদুনা, প্রধান মন্ত্রীনা হায়খি মদুদি মসি ফংনবগী শক্তি অসি ভারত অমসুং মখোয়গী মীয়ামদা লৈরি। মহাক্না মসিগী ফিরেপ অসিভু মঙফাওনহন্নবগীদমক্তা মশাদা থাজবা থম্বা মথৌ তাই হায়না মরুওইনা ফোংদোকখি। খোঙচৎ অসিদা ঐখোয়বু লান্না লমজিংনবা হোৎনবা মীওইশিং অমসুং নিগেতিব মাইন্দসেত লৈবা মীওইশিংনা ঐখোয়দা চিংনবা অমসুং নিংহন্নবা পোকহন্নবা হোৎনগনি হায়না শ্রী মোদীনা খঙহনখি। অসিগুম্বা তাঙ্ককশিংদা, মহাক্না লৈবাক মীয়ামদা ভৱানন্দনা ভন্দে মাতরমগী ঈশৈ শকপা অমসুং অতোপ্পা কেরেক্তর অমনা মীওই অমখক্তনা করি তৌবা ঙম্বগে হায়না ৱাহং হংলকপা অনান্দমথকী থৌদোক অদু নীংশিংনবা হায়খি। “ভন্দে মাতরম”দগী ইথিল অদু লাকখি মদুদি করোর কয়াগী অঙাংশিং অমসুং করোর কয়াগী খুৎশিং পাল্লিবা মমা অমনা করিগুম্বা মতমদা মতৌ করম্না শক্তি লৈতবা ওইগনি? প্রধান মন্ত্রীনা হায়খি মদুদি ঙসি ভারত মাতাদা অঙাং কোতি ১৪০ অমসুং খুৎ কোতি ২৮০ লৈরি, মসিগী মনুংদা চাদা ৬০ হেনবনা নহাশিংনি। ভারতনা মালেমগী খ্বাইদগী চাউবা দেমোগ্রাফিক এদভান্তেজ লৈরে, মসি ঐখোয়গী লৈবাক অমসুং মা ভারতীগী পাঙ্গলনি হায়না মহাক্না ফোংদোকখি। ৱাহং অমা পীরদুনা, শ্রী মোদীনা হায়খি ঙসিদি ঐখোয়গীদমক তশেংনা ওইথোক্তবা করি লৈবগে? ভন্দে মাতরমগী অশেংবা মঙলান অসি মপুং ফাহন্নবগী মায়কৈদা ঐখোয়বু করিনা থিংবা ঙমগনি?
ঙসি, আত্মনির্ভর ভারতকী মঙলান মাই পাক্লকপদা, লৈবাক অসিনা মেক ইন ইন্দিয়াগী ৱারেপ লৌদুনা মাংলোমদা চংশিল্লকপদা, অমসুং ২০৪৭ ফাওবদা চাউখৎপা ভারত অমগী পান্দমদা ঐখোয়না লেপ্পা লৈতনা চংশিল্লকপদা, শ্রী মোদীনা হায়খি মদুদি মমাংদা অমুক্তা ওইখিদ্রিবা মতম অসিদা অনৌবা মাইপাকপা খুদিংমক্না - ভন্দে মাতরম! গী মন্ত্র অসি শোল্লি, মহাক্না হায়খি মদুদি ভারতনা থাগী খা থংবা পোলদা য়ৌখিবা অহানবা লৈবাক ওইরকপা মতমদা, অনৌবা ভারতকী খোন্থাং অসি স্পেসকী অরাপ্পা মফমশিংদা য়ৌরকপা মতমদা, নাগ্রিক খুদিংমক্না চাউথোকচবা ফাওদুনা ‘ভন্দে মাতরম! হায়না চাউথোক্না লাওখি, প্রধান মন্ত্রীনা মখা তারদুনা হায়খি মদুদি ঐখোয়না ঐখোয়গী ইচানুপীশিংবু স্পেস তেক্নোলোজীদগী হৌরগা স্পোর্তস ফাওবগী লমশিংদা মকোক থোংলিবা অদু উবদা, মখোয়না ফাইতর জেৎশিং পাইবা উবদা, ভারত মচা খুদিংমক্কী চাউথোকচনীংঙাই ওইবা খোল্লাওদি -বন্দে মাতরম! নি।
ঙসি ৱান রেঙ্ক ৱান পেন্সন চৎনবা হৌখিবা চহি ১১ মপুং ফারকপা অদু পল্লদুনা শ্রী মোদীনা হায়খি মদুদি ঐখোয়গী আর্মদ ফোর্সশিংনা য়েক্নবনা ফত্তবা পান্দমবু মাইথিবা পীবা মতমদা, তেরোরিজম, নক্সেলিজম অমসুং মাওইস্তকী ইন্সরজেন্সীবু মায়থিবা পীরকপা মতমদা, ঐখোয়গী সেক্যুরিতী ফোর্সশিংনা- ভন্দে মাতরম! লাউই।
মা ভারতীগীদমক ইকায় খুম্নবগী ৱাখল্লোন অসিনা ঐখোয়বু চাউখৎপা ভারত অমগী পান্দমদা লমজিংগনি হায়না পল্লদুনা, প্রধান মন্ত্রীনা ভন্দে মাতরমগী মন্ত্র অসিনা অমৃতকালগী খোঙচৎ অসিদা মা ভারতীগী মচাশিংবু মপাঙ্গল কনখৎহন্দুনা পুক্নিং থৌগৎকনি হায়না থাজবা থমখি। লোইশিল্লকপদা, মহাক্না অমুক্কা হন্না ভন্দে মাতরমগী চহি ১৫০ মপুং ফারকপদা নাগ্রিক পুম্নমকপু নুংঙাইবা ফোংদোকখি।
থৌরম অদুদা কেন্দ্রগী মন্ত্রী, শ্রী গজেন্দ্র সিংহ শেখাৱতৎ, দিল্লীগী লেফতনেন্ত গবর্নর, শ্রী ভিনাই কুমার সাক্সেনা, দিল্লীগী মুখ্য মন্ত্রী, শ্রীমতী রেখা গুপ্তা অমসুং অতোপ্পা অঙম-অথোশিংসু শরুক য়াখি।
বেকগ্রাউন্দ
থৌরম অসিদা প্রধান মন্ত্রীনা নীংশিং খুদম ওইবা স্তাম্প অমসুং শেলয়েক অমসু ফোংখি। থৌরম অসিনা চহি অমা চুপ্না চত্থগদবা লৈবাক শিনবা থুংনা ২০২৫গী নবেম্বর ৭তগী ২০২৬গী নবেম্বর ৭ ফাওবা পাংথোক্কদবা থৌরম অমা হৌদোক্লদুনা, থৌরম অসিনা ভারতকী নীংতম্বগী খোঙজংবু ইথিল পীখিবা অমসুং নেস্নেল প্রাইদ অমসুং য়ুনিতীদা ইথিল পীরকখিবা মতম চুপ্পগী ওইবা কম্পোজিসন অসিগী চহি ১৫০ মপুং ফারকপগী থৌরম পাংথোক্কনি ।
থৌরমশিং অসিদা মীয়াম তিনবা মফমশিংদা মীয়ামগী ওইবা থৌরমগা লোয়ননা খুন্নাইগী কাংলুপ খুদিংমক্কী নাগ্রিকশিংনা শরুক য়াদুনা ‘ভন্দে মাতরম’গী মপুংফাবা ভর্জনবু মীয়াম পুন্না শকমিন্নখি।
চহি ২০২৫ অসিদা ভন্দে মাতরমগী চহি ১৫০ মপুং ফারগনি। বঙ্কিমচন্দ্র চত্তরজীনা ইবা ঐখোয়গী জাতি ঈশৈ ‘ভন্দে মাতরম’ অসি ১৮৭৫কী নোবেম্বর ৭, অক্সয়া নৱমীগী য়াইফরবা থৌরমদা ইখিবনি। ভন্দে মাতরম অসি অহানবা ওইনা মহাক্কী নোভেল অনন্দমথকী শরুক অমা ওইনা লিতররী জর্নেল বঙ্গদর্শন্দা ফোঙখি। পাঙ্গল, নুংঙাই-য়াইফবা অমসুং শেংলবা লাইগী মশক মওং ওইনা ইমা লৈবাক অসিবু ইকায় খুম্নবা উৎলিবা ঈশৈ অসিনা ভারতকী অমত্তা ওইবগী অমসুং ইকাই খুম্নবগী ৱাখল্লোন ফাওহনখিবা অদুবু শৈরেংগী ওইবা মওংদা ফোঙদোকখি। য়াম্না থুনা মসিনা লৈবাক অসিগীদমক কত্থোক্তুনা ইকায় খুম্নবা উৎপগী মতম শাংনা চৎথরকপা খুদম অমা ওইরকখি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
वंदे मातरम् का मूल भाव है...
— PMO India (@PMOIndia) November 7, 2025
भारत! मां भारती।
भारत की शाश्वत संकल्पना! pic.twitter.com/wdktTSByJo
गुलामी के उस कालखंड में... वन्दे मातरम् इस संकल्प का उद्घोष बन गया था कि...
— PMO India (@PMOIndia) November 7, 2025
भारत की आज़ादी का... माँ भारती के हाथों से गुलामी की बेड़ियाँ टूटेंगी!
उसकी संतानें स्वयं अपने भाग्य की विधाता बनेंगी! pic.twitter.com/VDbCRAELAU
वंदे मातरम् भारत के स्वतंत्रता संग्राम का स्वर बन गया।
— PMO India (@PMOIndia) November 7, 2025
एक ऐसा स्वर, जो हर क्रांतिकारी की जबान पर था!
एक ऐसा स्वर, जो हर भारतीय की भावनाओं को व्यक्त कर रहा था! pic.twitter.com/XbN8o8F5D5
वंदे मातरम् आज़ादी के परवानों का तराना होने के साथ ही इस बात की भी प्रेरणा देता है कि हमें इस आज़ादी की रक्षा कैसे करनी है। pic.twitter.com/B9XfALtnuu
— PMO India (@PMOIndia) November 7, 2025
