প্রধান মন্ত্রী, শ্রী নরেন্দ্র মোদীনা ঙসি মুম্বাইদা 141শুবা ইন্তর্নেস্নেল ওলিম্পিক কম্মিত্তি (IOC) সেসন হৌদোকখ্রে। সেসন অসিনা স্পোর্তসকা মরী লৈনবা তোঙান-তোঙানবা স্তেকহোল্দরশিংদা ৱারী-ৱাতাই শানবা অমসুং লৌশিং শিয়র তৌনবা খুদোংচাবা অমা পীরি।
থৌরম অসিদা ৱা ঙাংলদুনা প্রধান মন্ত্রীনা চহি 40গী মতুংদা ভারত্তা সেসন অসি পাঙথোক্লিবা অসি মরু ওই হায়না ফোঙদোকখ্রে। মহাক্না ভাবোক্তা অহমদাবাদতা লৈবা মালেম খ্বাইদগী চাউবা স্তেদিয়মদা হরাও তয়াম্না পুক্নীং থৌগৎপগা লোয়ননা ভারতনা ক্রিকেৎ ৱর্ল্দ কপ ফিক্সরদা থোইখিবগী মতাংদসু পাউদমখি। “ঐহাক্না তীম ভারত অমসুং ভারত মচা খুদিংমক্তা পুৱারী ওইরবা মাইপাকপা অসিগীদমক নুংঙাইবা ফোঙদোকচরি”, হায়না মহাক্না ফোঙদোকখ্রে।
প্রধান মন্ত্রীনা হায়খি মদুদি স্পোর্তস অসি ভারতকী নাৎ অমসুং পুন্সি মহিংগী মরু ওইবা শরুক অমনি। ভারতকী খুঙ্গংদা ঐখোয়না চৎপা মতমদা কনাগুম্বা অমনা হরাও-কুহ্মৈ অমা হেক্তা অসি স্পোর্তস য়াওদনা মপুং ফাদবা উবা ফংগনি হায়না প্রধান মন্ত্রীনা ফোঙদোকখ্রে। “ভারত মচাশিং অসি শান্ন-খোৎনবা পামজবা খক্তা নত্তনা ঐখোয়না মসিগা শাগোন্নদুনা হিংলি”, হায়না শ্রী মোদীনা ফোঙদোকখ্রে। মহাক্না ভারতকী চহি লিশিং কয়া শুরবা পুৱারীগী খুত্থাংদা মমি তারিবা স্পোর্তিং কলচর অদুসু ফোঙদোকখ্রে। ইন্দস ভেল্লী সিভিলাইজেসন ওইরবসু, বেদিক মতম নত্ত্রগা মসিগী মতুংদা লাকপা চহিচাদসু ভারতকী স্পোর্তিং লেগেসী অসি য়াম্না খুমাং চাউশিনলমখি হায়না প্রধান মন্ত্রীনা ফোঙদোকখ্রে। মহাক্না হায় চহি লিশিং কয়াগী মমাংদা ইরমখিবা বেদশিংদা শগোল থৌবা, ইরোইবা, তেন কাপ্পা, মুক্নানচিংবা য়াওনা মশান্নশিং বাওবা জোনর 64দা প্রোফিসিএন্ত ওই হায়না পল্লমখি অমসুং মখোয় অসিদা মীকোক থোংন্নবা মীৎয়েং চংনরমখি। মহাক্না হায়খি ‘ধনুর বেদ সমহিতা’ হায়বদি কোদ ফোর অর্চরী অসি তেন কাপ্পগী মশানা তম্নবা ফোঙলমখি, মসিদা মমিং ওইনা পল্লবদা ধনুশবান, চক্র, ভালা, ফেন্সিং, দেগ্গর, মেস অমসুং রেস্তলিং মেন্দতরী স্কিল 7 অসি তেন কাপ্পা তম্নবা মথৌ তাই হায়না পল্লমখি।
প্রধান মন্ত্রীনা ভারতকী অরিবা স্পোর্ত লেগেসী অসিগী সাইন্তিফিক ওইবা খুদমসু পীখি। মহাক্না ধোলাবিরা UNESCO ৱর্ল্দ হেরিতেজ সাইৎকী মতাংদা ফোঙদোকখি অমসুং চহি 5000 শুরবা সহর অসিগী অর্বান প্লান্নিংদা লৈরম্বা স্পোর্তস ইনফ্রাস্ত্রকচরগী মতাংদা ঙাংখি। এক্সকাবেসন অসিদা স্তেদিয়ম অনি থেংনখি অমনা মতম অদুগী মালেমগী খ্বাইদগী অরিবা অমসুং অচৌবা স্তেদিয়ম ওইরমখি। মতৌ অসুম্না রাখিগারহিদা স্পোর্তসকা মরী লৈনবা স্ত্রকচরশিং থেংনখি। “ভারতকী স্পোর্তিং লেগেসী অসি মালেম পুম্বগীনি”, হায়না শ্রী মোদীনা ফোঙদোকখ্রে।
প্রধান মন্ত্রী মোদীনা হায়খি, “স্পোর্তস্তা মাইথীবা হায়বা অমা লৈতে, অথোইবা অমসুং লর্নর খক্তা লৈগনি। স্পোর্তসকী লোল অমসুং ৱাখল্লোন অসি য়ুনিভর্সেল ওই। স্পোর্তস অসি শুপ্নগী কম্পিতিসন খক্তা নত্তে। স্পোর্তসনা মীওইবা খুন্নাইদা পাকথোক চাউথোক্নবা খুদোংচাবা অমা পীরি”। “মরম অসিদনা রেকোর্দশিং অসি মালেম শিনবা থুংবদা পালন তৌরি। স্পোর্তসনা ‘বসুধৈব কুতুম্বকম’ – ৱান আর্থ, ৱান ফেমিলী, ৱান ফ্যুচরগী ৱাখল্লোন অসি মপাঙ্গলসু কনখৎহল্লি, হায়না মহাক্না মখা তাখি। প্রধান মন্ত্রীনা ভারত্তা স্পোর্তসকী চাউখৎ-থৌরাংগীদমক হন্দক্তা লৌখৎখিবা খোঙথাংশিংসু পাউদমখি। মহাক্না খেলো ইন্দিয়া গেম্স, খেলো ইন্দিয়া য়ুথ গেম্স, খেলো ইন্দিয়া ৱিন্তর গেম্স, মেম্বর ওফ পার্লিয়ামেন্ত স্পোর্তস কম্পিতিসনশিং অমসুং পাঙথোক্কদৌরিবা খেলো ইন্দিয়া পেরা গেম্সকী মতাংদা পনখি। “ভারত্তা ঐখোয়না স্পোর্তসকী ওইনা ইনক্লুসিবিতী অমসুং দাইভর্সিতীদা মীৎয়েং চংলি”, হায়না প্রধান মন্ত্রীনা ফোঙদোকখি।
প্রধান মন্ত্রীনা স্পোর্তসকী লমদা ভারতকী ফজরবা পরফোর্মেন্সকীদমক সরকারগী খোঙথাংশিংবু থাগৎখি। মহাক্না ওলিম্পিক্সকী অকোনবা ইদিসন্দা শান্নরোয় কয়ানা ফজরবা পরফোর্মেন্স পীখিবা অমসুং হন্দক্তা লোইশিনখিবা এসিয়ন গেম্সতা ভারতকী খ্বাইদগী ফজবা পরফোর্মেন্স উৎখিবা অমসুং ৱর্ল্দ য়ুনিভর্সিতী গেম্সতা ভারতকী নহা ওইরিবা শান্নরোয়শিংনা থমখিবা অনৌবা রেকোর্দশিং অদু নীংশিংখি। মহাক্না অফবা অহোংবশিং অসিনা ভারতকী স্পোর্তসকী লেন্দস্কেপতা খোঙজেল য়াংনা অহোংবা পুরক্লি হায়বগী খুদম অমা ওইরি হায়না ফোঙদোকখি।
শ্রী মোদীনা ভারতনা গ্লোবেল স্পোর্তস তোর্নামেন্তশিং পাঙথোকপা ঙম্বগী মতিক ময়াই লৈ হায়না মাইপাক্না উৎপা ঙমখ্রে হায়না ফোঙদোকখি। লৈবাক 186না শরুক য়াখিবা চেস ওলিম্পিয়দ, ফুতবোল অন্দর-17 ৱুমেন্স ৱর্ল্দ কপ, হোক্কী ৱর্ল্দ কপ, ৱুমেন্স ৱর্ল্দ বোক্সিং চেম্পিয়নশিপ, শুতিং ৱর্ল্দ কপ অমসুং হৌজিক চত্থরিবা ক্রিকেৎ ৱর্ল্দ কপগুম্বা গ্লোবেল তোর্নামেন্তশিংগী য়ুম্বু ওইখিবা অদু পনখি। মহাক্না লৈবাক অসিনা চহি খুদিংগী মালেমগী খ্বাইদগী চাউবা ক্রিকেৎ লীগ পাঙথোক্লি হায়নসু ফোঙদোকখি। প্রধান মন্ত্রীনা IOC একজিক্যুতিব বোর্দনা ওলিম্পিক্সতা ক্রিকেৎ য়াওহন্নবা রিকম্মেন্দ তৌখি হায়না পাউদমখি অমসুং রিকম্মেন্দেসন অসি য়ারক্কনি হায়বগী থাজবা ফোঙদোকখি।
গ্লোবেল ইভেন্তশিং অসিনা মালেমবু ওক্নবগী ভারতকী খুদোংচাবা অমনি হায়রদুনা প্রধান মন্ত্রীনা ভারতনা মাগী খোঙজেল য়াংনা খুমাং চাউশিল্লিবা ইকনোমী অমসুং নীংথিনা শেমগৎ শাগৎলবা ইনফ্রাস্ত্রকচরনা মরম ওইরগা গ্লোবেল ইভেন্তশিংগী য়ুম্বু ওইনবা শেম শারি। মহাক্না লৈবাক অসিগী সহর 60 হেনবদা ইভেন্তশিং পাঙথোকখিবা G20 সম্মিৎ অসি খুদম ওইনা পীখি অমসুং সেক্তর খুদিংমক্তা ভারতনা শিনলাংবগী কেপাসিতী লৈ হায়বগী খুদম ওইখি হায়না ফোঙদোকখি। প্রধান মন্ত্রীনা ভারতকী প্রজা করোর 140গী থাজবা অদু থমখি।
“ভারতনা লৈবাক অসিদা ওলিম্পিক্স পাঙথোক্তুনা য়ুম্বু ওইবগী অপাম্বা লৈ। 2036তা ওলিম্পিক্স মাইপাক্না পাঙথোক্নবগীদমক শেম শাবদা হোৎনবা য়াবা হোৎনগনি। মসি ভারত মচা করোর 140গী মঙলান্নি”, হায়না প্রধান মন্ত্রীনা ফোঙদোকখি। মহাক্না হায়খি লৈবাক অসিনা স্তেকহোল্দর পুম্নমক্কী সপ্পোর্তকা লোয়ননা মঙলান অসি থুংহনবা পাম্মি। “ভারতনা 2029দা পাঙথোক্কদৌরিবা য়ুথ ওলিম্পিক্সকীসু য়ুম্বু ওইনীংলি”, হায়না শ্রী মোদীনা ফোঙদোককি অমসুং IOCনা মখা তানা ভারত্তা মাগী সপ্পোর্ত পীগনি হায়বগী থাজবা থমখি।
প্রধান মন্ত্রীনা হায়খি, “স্পোর্তস অসি শুপ্নগী মেদলশিং লৌবা নত্তে মসিদি থমোয়শিং জয় তৌনবা মেদিয়ম অমনি। মসিনা চেম্পিয়নশিং শেমগৎপা খক্তা নত্তনা শান্তি, চাউখৎপা অমসুং মশা-মউ ফনা থম্বসু প্রমোৎ তৌরি। মরম অসিনা স্পোর্তস অসি মালেমবু পুনশিন্নবা পাম্বৈ অমা ওইরি”। দেলিগেৎশিংবু তরাম্না ওক্লদুনা প্রধান মন্ত্রীনা সেসন অসি হৌরে হায়না লাউথোকখি।
ইন্তর্নেস্নেল ওলিম্পিক কম্মিত্তিগী প্রসিদেন্ত, শ্রী থোমাস বাচ অমসুং ইন্তর্নেস্নেল ওলিম্পিক কম্মিত্তিগী মেম্বর, শ্রীমতি নিতা অম্বানিসু থৌরম অসিদা শরুক য়াখি।
বেকগ্রাউন্দ
The IOCগী সেসন অসিনা ইন্তরনেস্নেল ওলিম্পিক কম্মিতীগী (IOC) মেম্বরশিংগী মরুওইবা মীফম অমা ওইরি। তুংদা পাংথোক্কদবা ওলিম্পিক গেম্সকা মরী লৈনবা ৱারেপশিং IOCগী সেসনশিং অসিদা লৌই। ভারতনা চহি 40 লৈরবা মতুংদা অনিরকশুবা ওইনা IOC সেসন অসি পাংথোক্লি। 1983দা নই দিল্লীদা 86শুবা IOC সেসন পাংথোকখি।
ভারত্তা পাংথোক্লিবা 141শুবা IOC সেসন অসিনা মালেগী কোওপরেসন হেনগৎহন্নবা লৈবাক অসিনা লৌরিবা থৌদাং, স্পোর্তিং এক্সিলেন্স লৈহনবা অমসুং মরুপ, ইকাই খুম্নবা অমসুং এক্সিলেন্সকী ওলিম্পিক্কী ৱাখল্লোনশিং অদু হেনগৎহনবগী মশক তাক্লি। মসিনা শান্ন-খোৎনবগা মরী লৈনবা স্তেকহোল্দর কয়ামরুমগী মরক্তা অমগা অমগা ৱাখল্লোন শিয়র তৌনবা খুদোংচাবা অমা ফংহল্লি।
মসিগী সেসন অসিদা ইন্দিয়ন ওলিম্পিক এসোসিএসন য়াওনা স্পোর্ত ফেদরেসন কয়ামরুমদগী ভারতকী মমিং লৈরবা শান্নরোইশিং অমসুং মীহুৎশিং য়াওনা ইন্তরনেস্নেল ওলিম্পিক কম্মিতীগী প্রসিদেন্ত মিস্তর থোমাস বাহ অমসুং IOCগী অতোপ্পা মেম্বরশিংনা শরুক য়াখি।
Sports is an important aspect of Indian culture and lifestyle. pic.twitter.com/3L7zswdgDZ
— PMO India (@PMOIndia) October 14, 2023
In sports there are no losers, there are only winners and learners. pic.twitter.com/6dabjDqLcl
— PMO India (@PMOIndia) October 14, 2023
With special focus on sports, today India is performing brilliantly in international events. pic.twitter.com/9KJZjW6QW0
— PMO India (@PMOIndia) October 14, 2023
India eagerly anticipates hosting the Olympics. pic.twitter.com/NOAIcau7SK
— PMO India (@PMOIndia) October 14, 2023
