লৈবাক অসিগী কোবিদ-১৯ লাইচৎকী ফিবম অমসুং তিকা য়েন্থোক্নবা অমসুং ফংহন্নবা অশিন-অরাংগী থবকশিং ঙসি প্রধান মন্ত্রী শ্রী নরেন্দ্র মোদীনা হন্না য়েংশিনখ্রে। মীফম অদুদা য়ুনিয়ন হেল্থ মিনিস্তর দোক্তর হর্স ভর্ধন, প্রধান মন্ত্রীগী প্রিন্সিপাল সেক্রেতরি, নিতি অয়োগকী মেম্বর(হেল্থ),প্রিন্সিপাল সাইন্তিফিক এদভাইজর, সেনিয়র সাইন্তিস্তশিং, প্রধান মন্ত্রী ওফিসকী ওফিসারশিং অমসুং ভারত সরকারগী অতোপ্পা বিভাগশিংগী ওফিসারশিং শরুক য়াখি।
নুমিৎ খুদিংগী কোবিদ কেস মশিং অমসুং হেনগৎলকপগী চাং তপ্না তপ্না হন্থরক্লিবা অসি প্রধান মন্ত্রীনা ফোঙদোকখি।
ভারত্তা তিকা অহুম পুথোক্নবা খুমাং চাউশিল্লবা তাঙ্ককশিংদা লৈরে, তিকা ২ অনিশুবা তাঙ্কক্তা অমসুং তিকা অমনা অহুমশুবা তাঙ্কক্তা লৈরি। য়ুম্লোন্নরিবা লৈবাকশিং হায়বদি অফগানিস্থান, ভুতান, বঙ্গলাদেস, মালদিবস, মোরিসিয়স, নেপাল অমসুং শ্রী লঙ্কাদা ভারতকী সাইন্তিস্তশিং অমসুং রিছর্স কাংবুনা মতেং পাংলি অমসুং রিছর্সকী থবকশিং মপাঙ্গল কনখৎহল্লি।মখোয়গী লৈবাকশিংদা ক্লিনিকেল ত্রাইয়েলশিং পাংথোক্নবা বঙ্গলাদেস, ম্যান্মার, ক্বাতর অমসুং ভুতান্না মখা তানা হায়জরক্লে। মালেমগী লৈবাকশিং মতেং পাংনবা থবক অমা ওইনা, ঐখোয়গী য়ুম্লোন্নবা লৈবাকশিংদা ঐখোয়গী থবকশিং মতেং পাংবদা ঐখোয়না পনখৈ থমদনবা অমসুং তিকা, হিদাক-লাংথকশিং ফংহনবা অমসুং তিকা ফংহনবগী থবকশিংদা আই.তি প্লেতফোর্মশিং শীজিন্ননবা প্রধান মন্ত্রীনা মখা তানা খঙহনখি।
তিকা পৈদুনা থম্বা, য়েন্থোকপা অমসুং অশিন-অরাংগী মতাংদা নেসনেল এক্সপার্ত গ্রুপ ওন ভেকসিন এদমিনিস্ত্রেসন ফোর কোবিদ-১৯(নেগভাক)না রাজ্য সরকারশিং অমসুং মরী লৈনবশিংনা থৌরাং তৌরে অমসুং অকুপ্পা থৌরাং অমা পুথোক্লে। তিকা হান্না থাগদবা মরুওইবা কাংলুপ মশক খঙদোক্নবা অমসুং তিকা য়েন্থোক্নবগী মতাংদা এক্সপার্ত গ্রুপ অসিনা রাজ্যশিংগা লোয়ন্না নিংথিনা থবক তৌমিন্নরি।
প্রধান মন্ত্রীনা হায়খি লৈবাক অসিগী লম্মিৎ-তুমিৎকী পাক-চাউবা অমসুং খেন্নবশিং অসি য়েংলগা তিকা ফংহনবগী থবক য়াংনা পায়খৎকদবনি। পুথোক-পুনশিন, য়েন্থোকপা অমসুং অশিন-অরাংগী থবকশিং য়াংনা পায়খৎকদবনি। কোল্দ স্তোরেজ চেনশিং, য়েন্থোক্নবা নেতৱার্ক, য়েংশিনবগী থবক, অৱাংবা থাক্কী য়েংশিনবা অমসুং ভেলশি, সিরিঞ্জশিং য়াওনা দরকার ওইবা পোৎলমশিংগী মাংজৌন্না থৌরাং তৌগদবনি।
প্রধান মন্ত্রীনা হায়খি লৈবাক অসিদা মাইপাক্না মীখলশিং পাংথোকখিবা অমসুং অৱা-অনা তারকপা মতমদা থেংনখিবশিং অদুগী লৌশিং ঐখোয়না শীজিন্নগদবনি। মদুগা মান্নবা মওংদা তিকা য়েন্থোকপা অমসুং মরী লৈনবা থবক থৌরমশিং পাংথোক্কদবনি। তিকা য়েন্থোকপগী থবকশিংদা রাজ্যশিং, য়ু.তিশিং, জিলা থাক্কী লৈঙাকশিং, সিবিল সোসাইতি ওর্গনাইজেসনশিং, ভোলুন্তিয়রশিং, মীয়াম অমসুং দরকার ওইবা হিরমশিংগী অখঙ-অহৈশিং শরুক য়াহনগদবনি। থবক পুম্নমক অসিগী অকনবা আই.তিগী ঙাক্লৌ অমা লৈগদবনি অমসুং ঐখোয়গী অনা-লায়েংগী থবকশিংদা তুংকোইনা কান্নবা অমা ফংহৌনবা মওং অমদা থবক পায়খৎকদবনি।
ভারত্তা আই.সি.এম.আর অমসুং বাইও-তেক্নোলোজি দিপার্তমেন্তনা লৈবাক শীনবা থুংনা সার্সকোভ-২(কোবিদ-১৯ ভাইরস)কী জেনোম থিজিনবদা ভাইরস অসি জিনদা অহোংবা লৈত্রি হায়রি অমসুং ভাইরস অসিদা অচৌবা অহোংবা(মিউতেসন)অমতা লৈতে।
কেস মশিং হন্থরকপা অসিদা পেন্থোক্তনবা অমসুং লাইচৎ অসি লাকশিন্নবা হেন্না থবক পায়খৎনবা প্রধান মন্ত্রীনা চেকশিনৱা থমখি। লাক্লিবা কুম্মৈ-ফিয়োং মতম মনুংদা কোবিদকা চুনবা লমচৎ-শাজৎশিং হায়বদি থাপ্না লৈবা, মাক্স উপ্পা, য়াম্না ওইনা খুৎ-শা হাম্বা অমসুং লু-নান্না লৈবা অসি মখা তানা পাংথোক্নবা মহাক্না তকশিনখি।
