প্রধান মন্ত্রী, শ্রী নরেন্দ্র মোদীনা ঙসি উত্তর প্রদেশকী ভরানসীগী রুদ্রক্স ইন্তর্নেস্নেল কোওপরেসন অমসুং কনভেন্সন সেন্তরদা পাংথোকপা কাশী সন্সদ সংস্কৃতী মহোৎসব 2023 লোইশিনবগী থৌরমদা ৱা ঙাঙখ্রে। উত্তর প্রদেশ শিনবা থুংবদা পুন্না লুপা করোর 1115 চঙনা শাখিবা অতল অৱসিয় বিদ্যলায় 16সু প্রধান মন্ত্রীনা ঙসিগী থৌরম অসিদা শঙ্গাখি। শ্রী মোদীনা কাশী সন্সদ খেল প্রতিয়োগিতাগীদমক্তা রেজিস্ত্রেসন তৌবগী পোর্তেলসু হৌদোকখি। মহাক্না কাশী সন্সদ সংস্কৃতী মহোতসবকী মকোক মথং তারবশিংদা মনাসু য়েন্থোকখি। প্রধান মন্ত্রীনা থৌরমগী মমাংদা অতল অৱসিয় বিদ্যালয়গী মহৈরোইশিংগা উন্নদুনা ৱারি শাখি।
প্রধান মন্ত্রীনা ঙসি তিনখিবা মীয়ামদা ৱা ঙাঙবদা, ভগ্বান মহাদেবগী থৌজালদগী কাশীবু মীয়াম্না ইকায় খুম্নবগী মতৌসু য়াম্না হেনগৎলে অমসুং শহর অসিগী থৌশিল থৌরাংশিংনা হান্নদগী হেন্না ৱাংবা থাক্তা য়ৌরে হায়না ফোংদোকখি। প্রধান মন্ত্রীনা G20 সম্মিৎনা মায় পাকপদা কাশীনা লৌখিবা থৌদাংশিং পনখি অমসুং শহর অসিদা লাক্লম্বা খুদিংনা কাশীগী সেবা, মহাও, নাৎ অমসুং ঈশৈ নোংমাইবু মশাগা লোয়নদুনা হন্নখি হায়না ফোংদোকখি। ভগ্বান মহাদেবগী থৌজালদগী G20 সম্মিৎনা মায় পাকখিবনি হায়না মহাক্না ফোংদোকখি।
কাশীনা মহাদেবগী থৌজালদগী মমাংদা অমুক্তা লৈরমদ্রিবা চাউখৎ থৌরাংগী ৱারি ইরি হায়না মহাক্না হায়খি। মহাক্না ঙসি ভরানসীদা উরেপ উয়ুং তমখিবা ইন্তর্নেস্নেল ক্রিকেত স্তেদিয়ম অমসুং অতল রেসিদেন্সিএল স্কুল 16পু লৈবাক মীয়ামদা খুৎশিন্নখিবগী মতাংদা পল্লদুনা, প্রধান মন্ত্রী মোদীনা কাশী, উত্তর প্রদেশ অমসুং শ্রামিকশিংগী ইমুং মনুংগী মফমদা থাগৎপা ফোংদোকখি।
প্রধান মন্ত্রীনা মহাক্না কনস্তিত্বেন্সী অসিগী এম.পি. অমা ওইনা ইং 2014দগী হৌনা কাশীগী চাউখৎ থৌরাং অমসুং হেরিতেজকী মতাংদা মঙজখিবা মঙলান অদু হৌজিক্তি তপ্না তপ্না মঙফাওনবা হৌরক্লে হায়না ফোংদোকখি। কাশী সংস্কৃতী মহোৎসবতা মীয়াম মশিং য়াম্বনা শরুক য়াবগী মতৌবু মহাক্না থাগৎলদুনা লমদম অসিগী মখল কয়াগী তেলেন্তশিংগা পুনবা ফংবগী খুদোংচাবা পীবিবগীদমক্তা তৌবীমল খঙবসু উৎখি। মসিনা মহোৎসব অসিগী খ্বাইদগী অহানবা তাঙ্কক্নি হায়না পল্লদুনা, প্রধান মন্ত্রীনা চাউরাকপা আর্তিস্ত 40,000না মসিদা শরুক য়াখি অমসুং মীওই মিলিয়ন কয়ানা মসিবু য়েংবা লাক্নখি হায়না ফোংদোকখি। মীয়াম্না শৌগৎপীবদগী কাশী সংস্কৃতী মহোৎসব অসিনা লাক্কদৌরিবা মতমশিংদা মশামক্কী শক্তাক অমা শেমজবা ঙমগনি হায়বগী থাজবা লৈ হায়না মহাক্না ফোংদোকখি। কাশীনা হৌজিক্তি মালেম পুম্বগী লমকোয়বশিংগী খ্বাইদগী পাম্নবা মফম অমা ওইরক্লি হায়না প্রধান মন্ত্রীনা মখা তাখি।
কাশী অমসুং নাৎ হায়বসি চপ মান্নবা ইনর্জীগী তোঙানবা মমিং অনিনি অমসুং কাশীনা ভারতকী নাৎকী চৎনবীগী কোনুং ওইবগী শক্তাক অমসু ফংজরি হায়না শ্রী মোদীনা হায়খি। শহর অসিগী অকোয়বা খুদিংদা ঈশৈ নোংমাইগী ইচেল চেল্লিবা অসিদি মহৌশানা তাবনি, মরমসি শহর অসিমক নত্রাজ মশামক্কী শহরনি হায়না মহাক্না হায়খি। মহাদেবনা আর্তকী মখল খুদিংগী হৌরকফম্নি হায়না মহাক্না ফোংদোক্লদুনা, মসিগুম্বা আর্তশিং অসিদি ভারত মুনীগুম্বা অরিবা মতমগী লাইনীংবশিংনা শেমগত্তুনা পথাপ অমা ওইহল্লম্বনি হায়না প্রধান মন্ত্রীনা পাউদমখি। লমদমসিগী কুহ্মৈ অমসুং নুংঙাইবা ফোংদোকপগী মতৌশিং পল্লদুনা, প্রধান মন্ত্রীনা কাশীদা লৈবা হীরম খুদিংমক ঈশৈ নোংমাই অমসুং আর্তকা অরুবা মরী লৈনৈ হায়না ফোংদোকখি।
প্রধান মন্ত্রীনা শহর অসিগী মশক নাইরবা ক্লাসিকেল ম্যুজিক্কী চৎনবী, লমদমসিগী ঈশৈগী মতাংদা পল্লদুনা, শহর অসিদি তব্লা, শেহনাই, সিতার, সারঙ্গী অমসুং বীনাগুম্বা ঈশৈ নোংমাইগী জন্ত্রশিংগী পুনফম্নি হায়না ফোংদোকখি। ভরানসীনা খয়াল, থুমরী, দদ্রা, চাইতী অমসুং কজরীগী ঈশৈ নোংমাইগী মওং-মতৌবু চহি চা কয়াদগী ঙাক শেন্দুনা লাক্লি, মসিগা লোয়ননা ভারতকী খোইথুম্লবা থৱাইবু চারোন শুরোন কয়াগী হিংহন্দুনা লাক্লিবা গুরু-শিশ্যগী চৎনবীবুসু ঙাক শেন্দুনা লাক্লি হায়না শ্রী মোদীনা মখা তাখি। প্রধান মন্ত্রীনা তেলিয়া ঘরানা, পিয়ারী ঘরানা, রামপুরা কবিরচৌরা মুহল্লাগী ঈশৈ নোংমাইগী মীওইশিংগী মতাংদা প্রধান মন্ত্রীনা পল্লদুনা ভরানসীনা মালেমগী থাক্তা মিংচৎ শেমখ্রবা ঈশৈ নোংমাইগী অথোইবা মীওই কয়া অমসু পুথোকখ্রে হায়না ফোংদোকখি। প্রধান মন্ত্রীনা ভরানসীগী শক্নাইরবা ঈশৈ নোংমাইগী মীওই কয়াগা উন্নবা ফংবগী খুদোংচাবা পীবগীদমক্তা নুংঙাইবসু ফোংদোকখি।
ঙসি হৌদোকখিবা কাশী সন্সদ খেল প্রতিয়োগীতাগী পোর্তেলগী মতাংদা প্রধান মন্ত্রীনা পল্লদুনা, খেল প্রতিয়োগীতা ওইরো নত্ত্রগা কাশী সন্সদ সংস্কৃতী মহোৎসব ওইরো, মসিদি কাশীগী অনৌবা চৎনবী অমগী অহৌবনি হায়খি। হৌজিক্তি, কাশী সন্সদ গ্যান প্রতিয়োগীতাসু শিল্লগনি হায়না মহাক্না লাউথোকখি। “হোৎনরিবা খুদিংমক কাশীগী চৎনবী, চাবগী মথেল অমসুং আর্তকী মতাংদা মীয়ামদা খঙহনবনি”, মহাক্না হায়খি। “কাশী সন্সদ গ্যান প্রতিয়োগীতা অসি কাশীগী খুঙ্গং অমসুং শহরগী মফমশিংদা তোঙান-তোঙানবা থাক্তা পাংথোক্লগনি”।
শহরগী মীয়াম অসিদি কাশীগী মতাংদা খ্বাইদগী হেন্না খঙবা মীওইশিংনি অমসুং মফমসিগী মীওই খুদিংমক কাশীগী অশেংবা এম্বেসেদরনি, পাউজেল্লোইনি হায়না প্রধান মন্ত্রীনা হায়খি। লৌশিং অসিবু অতোপ্পা মীওইদা মমুৎ তানা তম্বা ঙমহন্নবগীদমক্তা, প্রধান মন্ত্রীনা মগুন লৈবা তুরিস্ত গাইদকী পথাপ অসিগী মপাঙ্গল কনখৎহনসি, মখোয়না শহর অসিগী মতাংদা নীংথিজনা তাকপী ঙমহনসি হায়বা ৱাফম হৌদোকখি। “ঐহাক্না মসি পাংথোকপা পাম্লিবসি ঐহাক্না মালেম্না ঐহাক্কী কাশীগী মতাংদা খঙহন্নীংবা অসিননি। ঐহাক্না কাশীগী তুরিস্ত গাইদশিংবু মালেম্না খ্বাইদগী ইকায় খুম্নবা ওইহনবা পাম্মি”, মহাক্না হায়খি।
মালেমগী অখঙ-অহৈ কয়ানা কাশীদা সংস্কৃত তম্নবা লাক্নৈ হায়না প্রধান মন্ত্রীনা ফোংদোক্লদুনা, মসিগুম্বা ৱাফম অসি মপুং ওইনা খন্নদুনা ঐখোয়না ঙসি লুপা করোর 1100 চঙনা শাখিবা অতল অৱসিয় বিদ্যালয় শঙ্গাখ্রিবনি। শ্রামিকশিং য়াওনা খুন্নাইগী শোত্থবা মীওইশিংগী অঙাংসিংগী মফমদা মগুন লৈবা এজুকেসন ফংহন্নবগীদমক্তা মসিগী স্কুলশিং অসি শঙ্গাখিবনি হায়না মহাক্না অহেনবা মিৎয়েং চঙখি। “কোবিদ লাইচৎ মনুংদা পুন্সি মাঙখিবশিংগী অঙাংশিংবু স্কুলশিং অসিদা ফী অমত্তা লৌদনা তমহনগনি”, প্রধান মন্ত্রীনা হায়খি। মহৌশানা তাকপীবা মহৈগী মথক্তা ঈশৈ-নোংমাই, আর্ত, ক্রাফ, তেক্নোলোজী অমসুং স্পোর্তকী খুদোংচাবশিংসু স্কুলশিং অসিদা লৈগনি হায়না মহাক্না হায়খি। ত্রাইবেল খুন্নাইগীদমক্তা এক্লাব্যা রেসিদেন্সিএল স্কুল লাখ 1 শেমগৎলিবা অসিগী মতাংদসু প্রধান মন্ত্রীনা পনখি। “এজুকেসনগী অনৌবা পোলিসী অসিগা লোয়ননা, ৱাখল খনবগী মতৌবু সরকারনা মপুং ফানা হোংদোকখ্রে। স্কুলশিং পুম্নমক মোদর্ন ওইরক্লি, ক্লাসশিংসু স্মার্ত ওইরক্লি”, মহাক্না হায়খি। লৈবাক অসিদা তেক্নোলোজীগী মতেং লৌদুনা স্কুল লিশিং কয়াবু মতমগা চুনহন্নবা হোৎনরিবা পি.এম. শ্রী কেম্পেনগী মতাংদা শ্রী মোদীনা মীয়ামগী পুক্নিং চীংশিনখি।
প্রধান মন্ত্রীনা মহাক্না শহর অসিগীদমক্তা পায়খৎলকপা খোঙথাং খুদিংদা কাশীগী মীয়াম্না মতেং পাংবীয়ু হায়খি।
মাইগ্রেন্ত শিন্মীশিংগী অঙাশিংবু শেন্ননবগীদমক্তা রাজ্যশিংগী মফমদা লৈরিবা বজেৎকী মতাংদা পল্লদুনা, শ্রী মোদীনা রাজ্য কয়া অমনা মসিগী ফন্দশিং অসিবু মীখলগী খুদোংচাবা লৌনবা শিজিন্নরি, অদুবু মুখ্য মন্ত্রী য়োগীজীগী মখাদা উত্তর প্রদেশনা ফন্দশিং অসিবু খুন্নাইগী শোত্থবা কাঙলুপশিংগী অঙাংগী তুংগী অফবা মতম পীনবগীদমক্তা শিজিন্নরি হায়খি। প্রধান মন্ত্রীনা রেসিদেন্সিএল স্কুলশিং অসিগী মহৈরোইশিংবু মখোয়না মশাদা থাজরিবা অসিগীদমক্তা থাগৎপা ফোংদোকখি। “ঐহাক্কী ৱাফম অসি নীংশিংবীয়ু, মথংগী চহি 10সিদা কাশীগী মিংচত্তি স্কুলশিং অসিদগী লাক্কনি”, মহাক্না ৱারোল লোইশিনখি।
উত্তর প্রদেশকী মুখ্য মন্ত্রী, শ্রী য়োগী অদিত্যনাথ অমসুং উত্তর প্রদেশ সরকারগী মন্ত্রী কয়াসু ঙসিগী থৌরম অসিদা শরুক য়ানখি।
বেকগ্রাউন্দ
কাসিগী নাৎকী থবকশিং মপাঙ্গল কনখৎহন্নবা প্রধান মন্ত্রীগী পান্দমনা লমজিংদুনা কাসি সংসদ সংস্কৃতিক মহোৎসব পায়খৎলকপনি। ঈশৈ শকপা, ইন্সত্রুমেন্তশিং খোঙবা, নুক্কাদ নাতক, জগোয় শাবা অসিনচিংবা হৈবা মীওইশিংনা হিরম 17দা মীওই 37,000 হেন্না মহোৎসব অসিদা শরুক য়াখি। রুদ্রক্ষ ইন্তরনেসনেল কোওপরেসন এন্দ কনভেন্সন সেন্তরদা পাংথোকপা থৌরমদা হৈথোই-শিংথোইবা মীওইশিংনা মখোয়গী কলচরগী হৈজবশিং উৎনবগী খুদোংচাবা অমসু ফংনখি।
মখা তানা মগুন লৈবা লাইরিক-লাইশু তম্বগী খুদোংচাবা ফংবা হেনগৎহন্নবা পান্দম অমদা, শিন্মীশিংগী মচাশিং অমসুং কোবিদ-19 লাইচৎতা মমা-মপা লৈখিদ্রবা অঙাংশিংগী অখন্ননা লুপা করোর 1115 চঙনা উত্তর প্রদেস শীনবা থুংনা শেমগৎপা অতল অৱাসিয়া বিদ্যলায়া 16 থবক হৌরে। লম একর 10-15 পাক-চাউবা মফমদা স্কুল অমমম শাবনি মসিদা কাশিং, শান্নবুং, পোথাফম, মিনি ওদিতোরিয়ম অমা, হোস্তেল কমপ্লেক্স, মেস অমসুং স্তাফশিংগী লৈফম ফ্লেতশিং য়াওরি। হায়রিবা রেসিদেন্সিএল স্কুল অমমমদা মহৈরোয় 1000 তম্বা য়াগনি।
बाबा की कृपा से काशी अब विकास के ऐसे आयाम गढ़ रही है, जो अभूतपूर्व हैं। pic.twitter.com/sVatuqxAWk
— PMO India (@PMOIndia) September 23, 2023
2014 में जब मैं यहाँ आया था, तो मैंने जिस काशी की कल्पना की थी, विकास और विरासत का वो सपना अब धीरे-धीरे साकार हो रहा है: PM @narendramodi pic.twitter.com/WsaB5vZQGD
— PMO India (@PMOIndia) September 23, 2023
Varanasi has been a centre of learning for centuries. pic.twitter.com/Sona7VFkYq
— PMO India (@PMOIndia) September 23, 2023
नई राष्ट्रीय शिक्षा नीति के जरिए हमने शिक्षा व्यवस्था की पुरानी सोच को भी बदला है। pic.twitter.com/ThPr6hrdem
— PMO India (@PMOIndia) September 23, 2023
