প্রধান মন্ত্রী, শ্রী নরেন্দ্র মোদীনা ঙসি মীয়ামগী ওইবা থৌরম ‘মানগর ধাম কি গৌরব গাথা’দা শরুক য়াখি অমসুং নিংতম লানদা মশক খঙবিদ্রবা আদিৱাসিগী মশক খঙবীদ্রবা অথৌবশিং অমসুং থৱাই থাখ্রবশিংনা কত্থোকখিবশিং অদুবু ইকাইখুম্নবা উৎখি। মফম অদুদা য়ৌরক্লবা মতুংদা, প্রধান মন্ত্রীনা ধুনি দর্শন পাংথোকখি অমসুং গোৱিন্দ গুরুগি মীতম মমাংদা হৈকৎ-লৈকৎ তমখি।
মিতিন অদুদা ৱা ঙাংলদুনা, প্রধান মন্ত্রীনা হায়খি মদুদি তাপস্যা, কত্থোকপা, থৌনা ফবা অমসুং ঐখোয়গী আদিৱাসি থৌনা ফরবশিংনা কত্থোকখিবশিং অদুগী খুদম অমা ওইরিবা মানগরগী শেলবা মফম অসিদা লৈবা হায়বসি মতম পুম্বদা পুক্নিং থৌগৎনিংঙাই ওই। “মানগর অসি রাজস্থান, মহারাস্ত্র, মধ্য প্রদেশ অমসুং গুজরাতকী মীশিংগী অপুনবা হেরিতেজ লৈ”, হায়না মহাক্না হায়খি। প্রধা মন্ত্রীনা গুরু গোৱিন্দবুসু মহাক্না লৈখিদবগী কুমওন থৌরম অদুনা ওক্তোবরগী ৩০ তাবনা মরম ওইরগা হৈকৎ-লৈকৎ তমখি।
গুজরাতকী মুখ্য মন্ত্রী ওইনা লৈরিঙৈ মতমদা প্রধা মন্ত্রীনা গুজরাতকী শরুক অমা ওইরিবা মানগরগি লমদম অদুদা সেবা তৌরিঙৈ মতম অদু নিংশিংলকখি অমসুং খঙহল্লকখি মদুদি গোৱিন্দ গুরুনা মহাক্কী পুনশিগী অওইবা মতমশিং অদু মফম অসিদা লৈখি, অমসুং মহাক্কী এনর্জী অমসুং ৱাখল-লৌশিংশিং অদু লম অসিগী লৈহাওদা হৌজিক ফাওবা ফাওরি। প্রধান মন্ত্রীনা নিংশিংলকখি মদুদি মমাংদা লৈকং লা ওইরম্বা মফম অসি মহাক্না ৱন মাহোতসবকী প্লেতফোর্মগী খুত্থাংদা মীয়ামদা তকশিনখ্রবা মতুংদা অশং-অমান্না থল্লবা মফম অমা ওন্থোক্লে। প্রধান মন্ত্রীনা আদিৱাসি ফুরুপ্পু মসিগী কেমপেন অসিগীদমক্তা মশাগী ওইজবা থাদোক্তুনা থবক তৌবগীদমক্তা থাগৎপা ফোংদোকখি।
প্রধান মন্ত্রীনা হায়খি মদুদি চাউখৎ-থৌরাং অসিনা লমদম অসিগী মীশিংগী পুনশিদা ফগৎহল্লকপদা নত্তনা গোৱিন্দ গুরু জীগী পাউতাক, লমজিং-লমতাকশিং অদুবুসু শন্দোরক্লি। “গুরু গোৱিন্দগুম্বা য়াম্না মমিং লৈরবা অফাওবা নিংতম লানমী অসিনা ভারতকী চৎনবী অমসুং ৱাখল্লোনশিং অসিগী মীহুৎ ওইদুনা মশক তাকখি”, প্রধান মন্ত্রীনা মখা তারকখি “গোৱিন্দ গুরুনা মহাক্কী ইমুং-মনুংশিং কাইনখি অদুবু মহাক্কী থমোইদি কৈদৌনুংদা হন্থখিদে, নিংহন্নবা লৈখিদে অমসুং আদিৱাসি পুম্নমকপু মহাক্কী ইমুং-মনুং ওইহনখি।” গোৱিন্দ গুরুনা আদিৱাসি ফুরুপকীদমক্তা ব্রিতিশশিংগী মায়োক্তা খৎনখি, প্রধান মন্ত্রীনা পল্লকখি, মহাক্না মহাক্কী মশাগী ফুরুপশীংগী মায়োক্তসু কেমপেন তৌখি মরমদি মহাক মশামক সোসিয়েল রিফোর্মর, স্পিরিচুৱল লীদর, সন্ত অমসুং লুচিংবা অমনি। মহাক্কী ইন্তেলেকচুৱল অমসুং ফিলোসোফিকেল ওইবা মগুনশিং অদু মহাক্কী মথৌনা অমসুং সোসিয়েল এক্তিবিজমগুম্না মতিক মগুন য়াম্না লৈ হায়না প্রধান মন্ত্রীনা হায়খি।
মানগরদা ১৯১৩গী নোবেম্বর ১৭তা থোকখিবা মীহাৎ অদুবু নিংশিংলদুনা প্রধান মন্ত্রীনা পনখি মদুদি ভারত্তা ব্রিতিশ রুলগী য়াম্না তমথিবা মচৎ অদুগী খুদম অমনি। শ্রী মোদীনা হায়খি, “নাকল অমদনা নিংখা তম্বা তাল্লিবা ইচম-চমজরবা আদিৱাসিশিং অদুগা নাকল অমরোমদনা মানগরগী চিংশিং অদুবু কোইশিল্লিবা ব্রিতিশকী লোইলম শাসনশিং অদুনা নুংথিল পোবোপতা চমজরবা মীশিং, নুপী, অঙাং, অহল-লমন লিশিং অমগা চামঙা হেন্না হাৎখি।” প্রধান মন্ত্রীনা মরক থৎনা হায়রকখি মদুদি লাইবক থিবা থৌদোক্না মরম ওইরগা, নিংতম লানগী অসিগুম্বা য়াম্না মরু ওইবা অমসুং য়াম্না শোক্নিংঙাই ওইরবা থৌদোক অসি পুৱারিদা মাগী শরুক অমা কনবা ঙমদ্রবনি। প্রধান মন্ত্রীনা পনখি, “আজাদি কা অমৃত মাহোতসব অসিদা, ভারতনা অহাংবা অসিবু মেনশিল্লি অমসুং দিকেদ কবাগী মমাংদা ঐখোয়না তৌখিবা অশোইবা অদুবু চুমথোক্লি।”
প্রধান মন্ত্রীনা মরু ওইনা পনখি মদুদি “ভারতকী হৌখিবা মতম, পুৱারি, হৌজিক্কী মতম অমসুং ভারতকী তুংগী মতম অসি আদিৱাসি ফুরুপ অসি য়াওদনা কৈদৌনুংদা মপুং ফাবা ঙম্লোই। ঐখোয়গী নিংতম লানগী ৱারি লমাই খুদিংমক্তা আদিৱাসিশিংগী মথৌনা-মরিংজেলনা থল্লি।” প্রধান মন্ত্রীনা তিল্কা মাঞ্ঝিগী লুচিং মখাদা সন্থাল সংগ্রামগী লানগী ঙল্লবা ১৭৮০গী মতম অদুগী য়াম্না শিংথানিংঙাই ওইরবা লান অদুবু নিংশিংখি। মহাক্না বুধু ভগতকী লুচিং মখাদা লৈবাক অসিনা লরকা আন্দোলন থেংনখিবা ১৮৩০-৩২ অদুবুসু পনখি। ভগ্বান বির্সা মুন্দানা মহাক্কী এনর্জী অমসুং লাইবক নিংবগী ৱাখল্লোন অদুনা মীপুম খুদিংমকপু পুক্নিং থৌগৎখি। “চহি চা কয়াগী মমাংদা মীনাই নাইথাং হৌরকপগী মতমদগী হৌদুনা চহি চা ২০ ফাওবা অসিগী মরক্তা আদিৱাসি ফুরুপ্না আজাদিগি মৈরা অদুবু চাকহন্দুনা থমদবা মতম অমত্তা নখোয়না থেংনরোই”, হায়না প্রধান মন্ত্রীনা হায়খি। মহাক্না অন্ধ্র প্রদেশকী অল্লুরি সিতারামাবু পনখি। রাজস্থানদা, মসিগী মমাংদা ফাওবা, আদিৱাসি সমাজনা মহারানা প্রতাপকা লোইননা লেপখি। “ঐখোয়না আদিৱাসি ফুরুপ অমসুং মখোয়গী কত্থোকপা অদুগী লমন তোল্লবনি। মসিগী সমাজ অসিনা মহৌশাগী ওইবা মওংদা, এনভাইরনমেন্ত, কলচর অমসুং ত্রেদিশনশিংদা ভারতকী কেরেক্তরপু ঙাক-শেন্দুনা কাইহন্দনা থমখি। ঙসি অসি লৈবাক মীয়াম্না মখোয়গীদমক্তা করিগুম্বা খরা তৌদুনা মখোয়গী সেবা তৌদুনা মখোয়বু থগৎচবা মতম ওইরে”, হায়না প্রধান মন্ত্রীনা হায়খি।
প্রধান মন্ত্রীনা খঙহনখি মদুদি নোবেম্বর ১৫দা, লৈবাক অসিনা ভগ্বান বির্সা মুন্দাগী মপোক কুমওনদা জনজাতিয়া গৌরব দিৱস পাংথোক্লগনি। “জনজাতিয়া গৌরব দিৱস অসি নিংটম লানদা আদিৱাসিশিংগী পুৱারিগী মতাংদা মীয়ামদা খঙহন্নবগী অনৌবা খোংথাং অমনি”, হায়না মহাক্না হায়খি। শ্রী মোদীনা পনখি মদুদি মীয়ামদা আদিৱাসি খুনাইগী পুৱারি খঙহন্নবা লৈবাক শিনবা থুংনা আদিৱাসি নিংতম লানমীশিংগীদমক্তা অখন্ননা কত্থোক্লবা ম্যুজিয়মশিং শাগৎলি। মহাক্না মখাতানা হায়খি মদুদি মখোয়গী য়াম্না চাউরবা লেগেসী অসি হৌজিক্তি ৱাখল খনবগী থৌওং অমগী মনুং চল্লগনি অমসুং নহা ওইরিবা মীরোলশিংগীদমক্তা পুক্নিং থৌগৎনিংঙাই ওইবা অমা পীরগনি।
প্রধান মন্ত্রীনা লৈবাক অসিদা আদিৱাসিশিংগী থৌদাং অদু হেন্না পাক শন্না পাকথোক-চাউথোকহন্নবা অচেৎপা ৱাখল্লোন অমগা লোইননা থবক তৌবগী তঙাইফদবা অদু ফোংদোকখি। মআক্না পনখি মদুদি লৈবাক অসিনা রাজস্থান অমসুং গুজরাত্তগী হৌরগা নোর্থিস্ত অমসুং ওরিশা ফাওবদা লৈরিবা লৈবাক অসিগী শরুক কয়া অমদা লৈরিবা তোঙান-তোঙানবা আদিৱাসিশিংগী খুনাইবু নিংথিনা য়েংশিন্নবা ময়েক শেংলবা পোলিসীশিংদা থবক তৌরি। প্রধান মন্ত্রীনা পনখি মদুদি আদিৱাসি মীশিং অসিদা ঈশিং অমসুং মৈগী কেনক্সনশিং, এজুকেশন অমসুং হেল্থ সর্বিসশিং, অমসুং ৱনবন্ধু কল্যান য়োজনাগী খুত্থাংদা থবক্কী খুদোংচাবসু পীরি। “ঙসি, উমংনা কনবা মফমশিং অসিসু লৈবাক অসিদা হেনগৎলক্লি অমসুং রিসোর্সশিং অসিসু ঙাক-শেন্দুনা থম্লি” হায়না মআক্না মখা তাখি, “লোইন-লোইননা, আদিৱাসিশিংগী মফমশিং অসিসু দিজিতেল ইন্দিয়াগা শম্নহল্লি” । প্রধান মন্ত্রীনসু আদিৱাসি নহাশিংদা মতম অসিগী অনৌবা মহৈ-মশিং তম্বগী কুদোংচাবগা লোইন-লোইননা নাতকী ওইবা হৈ-শিংবা কয়া অমসুং পীরিবা একলৱ্যা রেসিদেন্সিয়েল স্কুলশিংদুসু পনখি। প্রধান মন্ত্রীনা গোৱিন্দ গুরু জীগী মমিংদা ধোনবা য়ুনিভরসিতীগী বাম্না চাউরবা এদমিনিস্ত্রেতিব কেম্পস শঙ্গানবা জম্বুঘোদাদা চৎলগনি হায়না মহাক্না খঙহল্লকখি।
প্রধান মন্ত্রীনা নিংশিংখি মদুদি ঙরাং নুমিদাং খক্তমক মআক্না এহমেদাবাদ-উদয়পুর ব্রোদ গেজ লাইনদা ত্রেন অমা লমথাখি। মহাক্না রাজস্থানগী মীশিংগীদমক্তা কি.মি. ৩০০গী লাইন অসিগী মরু ওইবা অদু পনখি মরমদি মসিনা গুজরাতকি আদিৱাসিগী মফমশিংগা রাজস্থানগি আদিৱাসিশিংগী মফমগা শম্নহল্লগনি অমসুং লমদমশিং অসিদা ইন্দস্ত্রিশিংগী ওইবা চাউখৎ-থৌরাং অমসুং থবক ফংহন্নবগী শাফু অমা পীরগনি।
মানগর ধামগী মপুং ফানা চাউখৎ-থৌরাংগী থবক পাংধোকপগী মতাংদা খন্নবা অদুদা শন্দোক্না তাক্লদুনা, প্রধান মন্ত্রীনা মানগর ধামগী য়াম্না চাউনা পাকথোক-চাউথোকপগীদমক্তা বাম্না কন্না অনিংবা-অপাম্বা অদু ফোংদোকখি। প্রধান মন্ত্রীনা রাজ্য মরি হায়বদি রাজস্থান, গুজরাত, মধ্য প্রদেশ অমসুং মহারাস্ত্রগী সরকারশিংদা পুন্না থবক তৌমিন্ননবা হায়খি অমসুং ৱার্ল্দ মেপতা গোৱিন্দ গুরু জীমেমোরিবেল সাইত অসিনা মফম অমা কনবা ঙম্নবা রোদমেপ অমা শেম্নবগী মতাংদা কুপথনা খন্নখ্রে। “ঐহাক্না থাজৈ মদুদি মানগর ধাম চাউখৎপা অসিনা মফম অসিবু অনৌবা মীরোলগীদমক্তা পুক্নিং থৌনা হাপকদবা মফম অমা ওইরগনি”, হায়না প্রধান মন্ত্রীনা লোইশিনখি।
গুজরাতকী মুখ্য মন্ত্রী, স্রী ভুপেন্দ্র পতেল, রাজস্থানগী মুখ্য মন্ত্রী, শ্রী অশোক গেহলোত, মধ্য প্রদেশকী মুখ্য মন্ত্রী, শ্রী শিবরাজ সিং চৌ্হন, মধ্য প্রদেশকী গোবর্নর, শ্রী মঙ্গুভাই পতেল, কেন্দ্রগী কলচরগী রাজ্য মন্ত্রী, শ্রী আর্জুন রাম মেঘৱাল, কেন্দ্রগী রুরল দেবেলপমেন্তকী রাজ্য মন্ত্রী, শ্রী ফেগগন সিং কুলাস্তে, পার্লিয়ামেন্তকী মেম্বরশিং, এম.এল.এ.শিংনা থৌরম অসিদা ময়ামশিংগী মরক্তা শরুক য়াখি।
বেকগ্রাউন্দ
আজাদি কা অমৃত মাহোতসবকী শরুক অমা ওইনা, সরকার অসিনা নিংতম লানগী মশক খঙবীদ্রবা আদিৱাসিগী অথৌবশিং অদুগী নিংশিং থৌরম পাংথোক্নবা খোংথাং কবা অমা হৌদোকখি। মসিদা কুনাই অসিদা আদিৱাসি মীশিংনা লৌখিয়া থৌদাংশিং অদুবু মশক কঙবীনবা অমসুং নিংতম লানদা মখোয়না কত্থোকখিবশিং অদুগী মতাংদা মিয়ামদা কঙহনবা হেনগৎ্ন্নবগীদমক্তা নোবেম্বর ১৫বু (আদিৱাসি নিংতম লানমী বির্সা মুন্দাগী মপোক নুমিৎ) ‘জনজাতিয়া গৌরৱ দিৱস’ ওইনা লাওথোকপা, লৈবাক শিনবা থুংনা ত্রাইবল ম্যুজিয়মশিং থম্বা অসিনচিংবশিং অসি য়াওরি। মসিগী মাইকৈদা খোংথাং অতোপ্পা খোংথাং অমা ওইনা, প্রধান মন্ত্রীনা নিংতম লানগী মশক খঙবীদ্রবা আদিৱাসিগী অথৌবশিং অমসুং থৱাই থাখিবশিং অদুবু ইকাইখুম্নবা উৎনবা, রাজস্থানগী বনস্বারাগী মানগর চিংদা মীয়ামগী ওইবা থৌরম- ‘মানগর ধাম কি গৌরব গাথা’দা শরুক য়াখি। থৌরম অদুদা, প্রধান মন্ত্রীনা ভিল নিংতম লানমী শ্রি গোৱিন্দ গুরুবু ইকাইখুম্নবা উৎখি অমসুং লমদম অদুগী ভিল আদিৱাসিশিং অমসুং অতোপ্পা আদিৱাসি মীশিংগী মীতিন অমদসু ৱা ঙাংখি।
মানগর চিং অসি ভিল ফুরুপ অমসুং রাজস্থান, গুজরাত অমসুং মধ্য প্রদেশকী অতোপ্পা আদিৱাসিশিংগীদমক্তা য়াম্না মরু ওই। নিংতম লানগী মতমদা, ভিলশিং অমসুং অতোপ্পা আদিৱাসিশিংগা ব্রিতিশকা মতম শাংনা লান্থেংনবা মতমদা, শ্রী গোৱিন্দ গুরুগী লুচিং মখাদা ১৯১৩গী নোবেম্বর ১৭তা মানগর চিংদা ভিল লাখ ১.৫ হেনবনা মফম অদুদা পুনখি ব্রিতিশরশিং য়াম্না তোইনা অসিগুম্বা মীতিনশিং অসিদা নোংমৈ কাপশিনখি, মসিনা মরম ওইরগা মানগরগী মিহাৎ অদু থোকহনখি, মসিদা চাউরাক্না আদিৱাসি ১৫০০ মুক্না থৱাই থাখি।
