শক্নাইরবশিং,
অফ্রিকাগী লমদম অসিদা অদোমগী মরক্তা শরুক য়াবা অসিদা ঐ য়াম্না হরাওই।
ব্রিক্স আউতরিচ সম্মিৎতা অফ্রিকা, এসিয়া, লেতিন অমেরিকা লৈবাকশিংগা লোয়ননা অনৌবা ৱাখল্লোনশিং শরুক য়ামিন্ননবা মঙোন্দা খুদোংচাবা পীবগীদমক ঐনা রাস্ত্রপতি রামাফোসা থাগৎচরি।
হৌখিবা নুমিৎ নিনিদা , ব্রিক্সকী খন্ন-নৈনবশিংদা, গ্লোবেল সাউথকী লৈবাকশিংগী মরুওইবশিং অমসুং মরী লৈনবা ৱাফমশিংদা ঐখোয়না মীৎয়েং চঙলে।
হায়রিবা ৱাফমশিং অসিদা অখন্নবা মীৎয়েং চঙবা হায়বসি হৌজিক তঙাইফদবনি হায়বা ঐখোয়না থাজৈ।
ব্রিক্স ফোরম পাংথোক-চাউথোক্নবা ঐখোয়না ৱারেপ লৌরে। ঐখোয়না চৎমিন্নরিবা লৈবাক পুম্নমক তরাম্না ওকচরি।
মালেমগী লুপশিং অমসুং ফোরমশিং শেম্বা অমসুং মীহুৎশিং শরুক য়াহনবা হায়বসি কোক ঙাওবা থবক অমনি।
শক্নাইরবশিং,
ঐখোয়না ‘গ্লোবেল সাউথ’ হায়রিবা তার্ম অসি শীজিন্নবা মতমদা, মসি শুপ্নগী দিপ্লোমেতকী তার্ম অমা নত্তে।
ঐখোয়গী মান্নবা পুৱারিদা, ঐখোয় অপুনবা ওইনা লোয়লম লৈঙাক অমসুং জাৎ-কুচু খায়বগী ময়োক্তা লৈখি।
অফ্রিকা লৈবাক্তা মহাত্মা গান্ধীনা শক্তি লৈরবা অহিংশা অমসুং সত্য গ্রহ শেমগৎখি অমসুং মখোয় অদু ভারতকী নিংতম ইহৌদা শীজিন্নখি।
মহাক্কী ফিদমশিং অমসুং ৱাখল্লোলশিংনা নেলসন মন্দেলাগুম্বা অচৌবা লুচিংবশিং ইথিল পীখি।
পুৱারিগী অকনবা য়ুম্ফম অসিদা, ঐখোয়গী অনৌবা মতমগী মরীশিং ঐখোয়না অমুক হন্না শেমগৎলি।
শক্নাইরবশিং,
অফ্রিকাগা লৈনবা মরীশিং ভারতনা লুম্না লৌরি।
অৱাংবা থাক্কী মীফমশিং পাংথোকপগা লোয়ননা, ঐখোয়না অফ্রিকাদা অনৌবা এম্বেসি ১৬ হাংদোক্লে।
ঙসিদি ভারত অফ্রিকাগী মরিশুবা খ্বাইদগী চাউবা ললোন-ইতিক্কী মরুপ, শেন য়াম্না থাদবা মঙাশুবা লৈবাক ওইরে।
লৈবাক অসিগী পৱার প্রোজেকশিং সুদান, বুরুন্দি অমসুং রৱান্দাদা লৈরি নত্তগ্রগা ইথোপীয়া অমসুং মালাৱিদা সুগর প্লান্তশিং লৈরি।
মোজাম্বীক, ইভাইরো কোস্ত অমসুং ইস্বাতিনিদা তেক্নোলোজি পার্কশিং লিংখৎলে, তাঞ্জানিয়া অমসুং উগান্দাদা ভারতকী য়ুনিভর্সিতিশিংগী কেম্পসশিং লিংখৎলে।
অফ্রিকা লৈবাকশিংগী কেপাসিতি বিল্দিং অমসুং ইনফ্রাস্ত্রকচর শেমগৎপদা মতম পুম্নমক্তা ভারতনা মরুওইনা লৌরি।
এজেন্দা ২০৩০গী মখাদা অফ্রিকা তুংগী মালেমগী পৱারহাওস অমা ওইনবা খোঙচৎতা ভারতনা থাজবা য়াবা অমসুং অচেৎপা মরুপ অমা ওইরি।
অফ্রিকাদা দিজিতেলগী খেন্নবশিং হন্থহন্নবা তেলি-ইজুকেসন অমসুং তেলি-মেদিসিন্দা ঐখোয়না স্কোলারশিপ লিশিং ১৫ হেন্না পীরে।
ঐখোয়না নাইজেরিয়া, ইথোপিয়া অমসুং তাঞ্জানিয়াদা দিফেন্স একাদেমিশিং অমসুং কলেজশিং শেমগৎলে।
বোতসৱানা, নামিবিয়া, উগান্দা, লেসোথো, জাম্বিয়া, মৌরিসিয়স, সিচিলিস অমসুং তাঞ্জানিয়াদা ত্রেনিং পীবা তিমশিং থম্লে।
অফ্রিকাদা শান্তি অমসুং তুংদু-লৈতাবা পুরকপদা মতেং পাংনবা নুপীশিং য়াওনা চাউরাক্না ভারতকী পীছ কিপ্পর ৪৪০০ রোম লৈরি।
তেরোরিজম অমসুং পাইরেসি থেংননবা ঐখোয়না অফ্রিকাগী লৈবাকশিংগা চেৎনা থবক তৌমিন্নরি।
কোবিদ লাইচৎকী অৱাবা তারবা মতমদা ঐখোয়না লৈবাক কয়াদা চানবা পোৎলমশিং অমসুং তিকাশিং পীখি।
হৌজিক ঐখোয়না অফ্রিকাগী লৈবাকশিংগা লোয়ননা পুন্না কোবিদ ভেক্সিন অমসুং অতোপ্পা ভেক্সিনশিং পুথোক্নবা থবক তৌরি।
মোজাম্বীক অমসুং মালাৱিদা নোংলৈ-নুংশিৎ লাকপদা নত্ত্রগা মাদাগাস্কারদা ইচাউ থোকপদা, অহানবা মতেং পাংবা লৈবাক ওইনবা ভারতনা মতম পুম্নমক্তা অফ্রিকাগী লৈবাকশিংগা নক্না থবক তৌমিন্নরি।
শক্নাইরবশিং,
লেতিন অমেরিকাদগী সেন্ত্রেল এসিয়া ফাওবা;
ৱেস্ত এসিয়াদগী সাউথ-ইস্ত এসিয়া ফাওবা;
ইন্দো-পেসিফিক্তগী ইন্দো-এতলান্তিক ফাওবা;
ভারতনা লৈবাক পুম্নমক ইমুং অমা ওইনা উরি।
ভসুধাইব কুতুম্বকম-মালেম অসি ইমুং অমনি- মসি চহি লিশিং কয়া ঐখোয়গী পুন্সি মহিং ওইদুনা লাক্লি।
মসি ঐখোয়না জি-২০গী প্রসিদেন্ত ওইবগী পান্দম্নি।
গ্লোবেল সাউথকী মরুওইবা থবকশিং খন্ননবা ঐখোয়না অফ্রিকাগী লৈবাক ৩ অমসুং চাউখৎলক্লিবা লৈবাক কয়া গেস্ত কন্ত্রিশিং ওইনা শরুক য়ানবা চেবাউ পীখ্রে।
অফ্রিকান য়ুনিয়ন জি-২০গী লেংদবা মেম্বর ওইহন্নবা ভারতনা পুখৎলে।
শক্নাইরবশিং,
ঙসি মফম অসিদা তিল্লিবা ব্রিক্স অমসুং মরুপ-মপাং ওইরিবা লৈবাকশিংনা মালেমগী লুপশিং মপাঙ্গল কনখৎহন্নবা মতেং পাংনগনি হায়না ঐনা থাজৈ।
মালেমগী লুপশিংদা শরুক য়ানবা অমসুং মরী লৈনবা থবকশিং পাংথোক্নবা, লুপশিং অওনবা পুরক্কদবনি।
তেরোরিজম থেংনবা, অকোয়বগী ফিবম ঙাক-শেনবা, ক্লাইমেত এক্সন, সাইবর সেকুরিতি, ফুদ অমসুং হেল্থ সেকুরিতি, ইনর্জি সেকুরিতি, সপ্লাই চেনগী থবকশিংদা ঐখোয় পুন্নবা হোৎমিন্নবা দরকার ওইরি। হায়রিবা হিরমশিং অসিদা মতেং পীনবগী খুদোংচাবা কয়া লৈরি।
ঐনা অদোমদা ইন্তরনেসনেল সোলার এল্লাইন্স; ৱান সন, ৱান ৱার্ল্দ, ৱান গ্রিদ; কোলিএসন ফোর দিজাস্তর রিসিলিয়েন্ত ইনফ্রাস্ত্রকচর; ৱান আর্থ ৱান হেল্থ; বিগ কেত এল্লাইন্স শক তাক্লি। গ্লোবেল সেন্তর ফোর ত্রেদিসনেল মেদিসিনগুম্বা ঐখোয়না পায়খৎলিবা মালেমগী থবকশিংদা অদোম শরুক য়ানবা ঐখোয়না হায়জরি।
অদোমগী লৈবাক চাউখৎনবা ভারতকী দিজিতেল পব্লিক ইনফ্রাস্ত্রকচর শরুক য়ানবা ঐনা অদোমগী মফমদা হায়জরি।
ঐখোয়গী থবকশিং অমসুং তৌবা ঙম্বশিং অদোমগী মফমদা খঙহনবদা ঐখোয় হরাওই।
ঐখোয়না অপুনবা ওইনা পায়খৎলিবা থবকশিংনা অৱাবশিং অপুনবা ওইনা থেংননবা ঐখোয়দা অনৌবা থাজবা অমা পীগনি হায়না ঐনা থাজৈ।
মসিগী খুদোংচাবা অসি পীবগীদমক, ঐনা অমুক হন্না অদোম, মরুওইনা রাস্ত্রপতি রামাফোসা ঐগী তৌবীমল খঙবা উৎচরি।
অদোম থাগৎচরি।
