ঙসি প্রধান মন্ত্রী শ্রী নরেন্দ্র মোদীনা উত্তর প্রদেসকী লাখনৌদা বিকসিত ভারত বিকসিত উত্তর প্রদেস থৌরমদা ৱা ঙাংখ্রে। মহাক্না ফেব্রুৱারি ২০২৩দা পাংথোকখিবা য়ু.পি গ্লোবেস ইনভেস্তরস সম্মিৎ ২০২৩গী ৪শুবা গ্রাউন্দব্রিক্কিং থৌরমদা উত্তর প্রদেস শীনবা থুংনা লুপা করোর লাখ ১০ হেনবগী প্রোজেক ১৪০০ হৌদোকখ্রে। প্রোজেকশিং অদু মেনুফেকচরিং, রিনিউএবল ইনর্জি, আই.তি অমসুং আই.তি.ই.এস, চীঞ্জাক শেম-শাবা, হাওসিং অমসুং রিএল স্তেৎ, হোস্পিতেলিতি অমসুং হরাও-কুহ্মৈ, লাইরিক-লাইশু অমসুং অতৈ কয়া য়াওখি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি ঙসিগী থৌরম অসি বিকসিত উত্তর প্রদেসকী খুৎথাংদা বিকসিত ভারতকী ৱারেপ লৌনবা মাইকৈদা থাংজিনবা খোঙথাংনি। ভিদিও কনফরেন্সকী খুৎথাংদা উত্তর প্রদেসকী কেন্দ্র ৪০০ হেনবগী মীওই লাখ কয়া শরুক য়াখিবা মীওইশিং তরাম্না ওক্লদুনা প্রধান মন্ত্রীনা হায়খি চহি ৭-৮গী মমাঙদা ৱাখলদা ফাওবা শাগৎখিদবা তেক্নোলোজিগী মতেংদগী মীয়াম থৌরম অসি শরুক য়াবা ফংলে। মমাঙদা উত্তর প্রদেসতা মীহাৎ-মীপুনগী থৌদোকশিং চাং য়াম্না ৱাংনা থোকখি। ঙসিদি রাজ্য অসিদা শেন থাদবা অমসুং থবক ফংবগী খুদোংচাবশিং য়াওনা অফবা ফিবমশিং লৈরে।
প্রধান মন্ত্রীনা হায়খি ঙসি উত্তর প্রদেসতা লুপা করোর লাখ কয়া থাদরকপা উরে। মহাক বরানাসীদগী এম.পি অমা ওইবগা লোয়ননা রাজ্য অসিগী চাউখৎপদা মহাক অপেনবা পোকই। ঙসি হৌদোক্লিবা প্রোজেকশিং অসিনা উত্তর প্রদেসতা অহোংবা পুরকপা ঙমগনি অমসুং মসিগীদমক ইনভেস্তরশিং অমসুং নহারোলশিং হরাওবা ফোঙদোকচরি।
উত্তর প্রদেসতা চহি ৭ দবল ইঞ্জিন সরকার লৈরকপা অসি পল্লদুনা, প্রধান মন্ত্রীনা হায়খি মতম অসিগী মনুংদা ‘রেদ তেপ কলচর’গী মহুৎ ‘রেদ কার্পেত কলচর’না শীল্লে। হৌখিবা চহি ৭তা উত্তর প্রদেসতা মীহাৎ-মীপুন হন্থরে অমসুং ললোন-ইতিক চাউখৎলে। হৌখিবা চহি ৭ তা, উত্তর প্রদেসতা ললোন-ইতিক, চাউখৎপা অমসুং থাজবগী ফিবম অমা শেমগৎলে। করিগুম্বা তশেংনা অহোংবা পুরক্কে হায়না চপ য়ুংনা খল্লবদি মসি কনাগুম্বা অমতনা থিংবা ঙম্লোই হায়বা দবল ইঞ্জিন সরকারনা উৎলে। হায়রিবা মতম অসিগী মনুংদা রাজ্য অসিদগী মপান্দা পোৎ-চৈ থাদোকপা শরুক অনি হেনগৎলে।
প্রধান মন্ত্রীনা হায়খি উত্তর প্রদেসতা মৈ পুথোকপা অমসুং ত্রান্সমিসনগী থবক য়াম্না ফগৎলে। লৈবাক অসিদা উত্তর প্রদেস অসি এক্সপ্রেসৱেশিং অমসুং ইন্তরনেসনেল এয়রপোর্তশিং মশিং খ্বাইদগী য়াম্না লৈবা রাজ্যনি। রাজ্য অসিদা লৈবাক অসিগী অহানবা রেপিদ রেল চেল্লি। রাজ্য অসিদা ইস্তর্ন অমসুং ৱেস্তর্ন পেরিফেরেল এক্সপ্রেসৱেগী অয়াম্বা শরুক লৈরি। রাজ্য অসিদা তুরেলগী ঈশিং লম্বীশিং শীজিন্নবদগী চৎথোক-চৎশিনগী খুদোংচাবা হেনগৎহল্লে অমসুং চৎথোক-চৎশিন হেন্না লাইহল্লে।
প্রধান মন্ত্রীনা হায়খি ঙসিগী চাউখৎ-থৌরাংগী প্রোজেকশিং অসি শেন থাদরকপা খক্তা য়েংলোইদবনি, প্রোজেকশিং অসিদা তুংগী য়াইফনবা অফবা পান্দম অমা য়াওরি অমসুং ইনভেস্তরশিংগী থাজবগী মঙাল অমা ওইরি। মালেমগী ওইনা, মমাঙদা অমুক্তা ওইখিদ্রিবা মওংদা ভারতকী মরমদা ফনা খল্লে। ভারতকী চাউখৎপগী ৱারিদা লৈবাক খুদিংমক থাজবা ফাওরে। ঙসি লৈবাক শীনবা থুংনা ‘মোদী কি গরেন্তি’ পাক-শন্না ঙাংনরবশু, মালেম্না ভারত অসি হেন্না শেন্দোং ফংনবগী গরেন্তি অমা ওইনা উরে।
ইনভেস্তরশিংগী থাজবা অমুক হন্না পল্লদুনা, প্রধান মন্ত্রীনা হায়খি মীখল মতম য়ৌরকপদা সরকারনা শেন থাদবা তোকপগী চৎনবী অদু ভারত্তা লৈত্রে। মালেম শীনবা থুংবগী ইনভেস্তরশিংনা সরকারগী থৌশিলশিং অমসুং তুংদু-লৈতাবা পাম্মী। মসিগা চপ মান্নবা ফিবম অমা উত্তর প্রদেসতা লৈরে।
প্রধান মন্ত্রীনা হায়খি বিকসিত ভারতকী অনৌবা ৱাখল্লোন অমসুং মাইকৈ দরকার ওই। মীয়াম মমিংতগী ওইনা হিংহনবা অমসুং চাউখৎপা থোং মান্নদবা হান্নগী ফিবম অদু লৈবাক অমা চাউখৎনবগীদমক চুনদে। উত্তর প্রদেসশু মসিগী থৌওং অসিগী অৱাবা নংখি। ইমুং খুদিংমক্কী পুন্সি হিংবদা লাইহন্নবা অমসুং ললোন-ইতিক পাংথোকপা লাইহন্নবা হৌজিক দবল ইঞ্জিন সরকার শরুক য়ারে। পি.এম অৱাস য়োজনাগী মখাদা পাক্কাগী য়ুম করোর ৪ শারে অমসুং মশাগী য়ুম লৈনবগী মখোয়গী মঙলানশিং মঙফাউন্নবা সহরগী মিদল-ক্লাস ইমুংশিংদা লুপা করোর লিশিং ৭গী শেন্থং পীখ্রে। মসিগী খুৎথাংদা উত্তর প্রদেসগী ইমুং লাখ ১.৫ য়াওনা বেনিফিসরি ইমুং লাখ ২৫ শেন্দোয়গী রিবেত ফংলে। ২০১৪দা ইনকম তেক্স কোমথোক্নবগী লিমিত লুপা লাখ ২ ওইরম্বা অউ হৌজিক লুপা লাখ ৭ ওইহন্দুনা মিদল ক্লাসশিং মতেং পাংলে।
হিংবদা লাইহনবা অমসুং ললোন-ইতিক চৎথবদা লাইহনবা অনিমক চপ মান্ননা মরুওইনা লৌরিবা অসিগী মতাংদা প্রধান মন্ত্রীনা হায়খি বেনিফিসরি খুদিংমক্তা কান্নবা খুদিংমক ফংহন্নবা দবল ইঞ্জিন সরকারনা থবক পায়খৎলে। কান্নবশিং বেনিফিসরিশিংগী থোংজিলদা য়ৌহন্দুনা বিকসিত ভারত সংকল্প যাত্রানা উত্তর প্রদেসকী মীওই লাখ কয়া কান্নবা ফংহল্লে। খুঙ্গংশিং অমসুং সহর খুদিংমক মোদী কি গরেন্তি গারি য়ৌরে। সরকারগী স্কিমশিংগী কান্নবশিং চাদা ১০০ ফংহনবা হায়বসি খুন্নাইগী অচুম্বগী খ্বাইদগী অচুম্বা মওংনি। মসি অচুম্বা সেকুলারিজমনি। মমাঙগী সরকারশিংদা শেঞ্জা-থুমজা অমসুং মীচং-মীখাই নাইবা লৈবদগী বেনিফিসরশিং খুদোংচাদবা কয়া মায়োক্নবনি। পাক্কাগী য়ুমশিং, মৈ, গ্যাস নত্ত্রগা তোতি ঈশিং ওইবা য়াই, মখোয়না ফংফম থোকপশিং বেনিফিসরি খুদিংমক্না ফংদ্রি ফাওবা সরকার পোথারোই হায়বসি মোদীগী থাজবনি।
প্রধান মন্ত্রীনা হায়খি মমাঙদা মীরাইবীরম্লবা মীওইশিং মোদীনা য়েংশিল্লি। পি.এম শ্বানিধি য়োজনাগী মখাদা লম্বী মতাইদা পোৎ য়োল্লিবশিংদা লুপা করোর ১০,০০০গী মতেং পীখ্রে। উত্তর প্রদেসতা, লম্বী নাকলদা পোৎ-চৈ য়োল্লিবা মীওই লাখ ২২ রোম স্কিম অসি কান্নবা ফংলে। য়োজনাগী অসিগী বেনিফিসরিশিং চহি অমদা লুপা ২৩,০০০রোমগী অহেনবা শেনফম তানবা ঙম্লে। পি.এম শ্বানিধিগী বেনিফিসরিশিংগী চাদা ৭৫ দি এস.সি.এস.তি অমসুং ত্রাইবেল ফুরুপশিংনি অমসুং তঙ্খায় অমনা নুপীশিংনি। মমাঙদা বেঙ্কশিংগী মখোয়গী গরেন্তি অমতা লৈরমদে, ঙসি মখোয় মোদীগী গরেন্তি লৈরে। মসি জয় প্রকাস নরায়ন অমসুং রাম মনোহর লোহিয়াগী মঙলানশিংগী খুন্নাইগী অচুম্বনি।
লাখপতি দিদি স্কিমগী মতাংদা, প্রধান মন্ত্রীনা হায়খি দবল ইঞ্জিন সরকারগী থৌশিলশিং অমসুং ৱারেপশিংনা খুন্নাইগী অচুম্বা অমসুং শেন্মিৎলো অনিমক কান্নবা ফংলে। নুপী করোর ১০ হেন্না সেল্ফ-হেল্প গ্রুপশিংদা শরুক য়ারে অমসুং হৌজিক ফাওবদা নুপী করোর ১ হেন্না লাখপতি দিদি ওইরে। লাখপতি দিদি করোর ৩ শেমগৎনবা সরকারগী ৱারেপ অসিনা খুঙ্গংগী শেন্মিৎলোন মপাঙ্গল কনখৎহনগনি।
প্রধান মন্ত্রীনা হায়খি উত্তর প্রদেসকী স্মোল, মাইক্রো অমসুং কোতেচ ইন্দস্ত্রিশিং মপাঙ্গল কনখৎহন্নবা থবক পায়খৎলে অমসুং দিফেন্স কোরিদোরগুম্বা প্রোজেকশিং য়াওনা রাজ্য অসিগী এম.এস.এম.ই সেক্তরদা মতেং কয়া পীরে। ৱান দিস্ত্রিক ৱান প্রদক স্কিমগী মখাদা জিলা খুদিংমক্কী মফম অদুগী পোৎথোকশিং ফগৎহল্লে। লুপা করোর ১৩,০০০গী বিশ্বকর্মা স্কিম্না উত্তর প্রদেসকী বিশ্বকর্মা ইমুং লাখ কয়া মতমগা চুনবা থবকশিং পায়খৎহল্লে।
প্রধান মন্ত্রীনা হায়খি ভারত্তা শান্নপোৎশিং শাবগী হিরমদা সরকারনা মীৎয়েং চঙলে। বরানাসীদা উগী শান্নপোৎশিং শাবগী থবক য়োকখৎনবা থবক পায়খৎলে। লৈবাক অসিদা শান্নপোৎ শাবগী ইনাকখুল্লবা চৎনবীশিং লৈরবশু অমসুং মীরোল কয়া শান্নপোৎশিং শাবা হৈরবশু ভারতনা মপান লৈবাকশিংদগী শান্নপোৎশিং পুশিল্লক্লি। ভারতকী শান্নপোৎশিং য়োকখৎতবা অমসুং মালেমগী অহোংবশিং চুশিন্নবা ঙম্নবা শান্নপোৎ শাবা খুৎহৈবশিং মতেং পাংদবদগী মপান লৈবাকশিংদা শাবা শান্নপোৎশিনা ভারতকী শান্নপোৎশিং কৈথেল নমথবনি। মসিদা অহোংবা পুরক্নবা লৈবাক শীনবা থুংনা লৈরিবা শান্নপোৎ শারিবশিংনা মপান্দা শান্নপোৎশিং থাদোকপা হেনগৎহন্নবা মতেং পাংগদবনি।
প্রধান মন্ত্রীনা হায়খি ভারতকী খ্বাইদগী চাউবা তুরিজমগী মফম অমা ওইনবা খুদোংচাবশিং উত্তর প্রদেসতা লৈরি। লৈবাক অসিগী মীওই খুদিংমক বরানাসী য়েংবা পাম্মী অমসুং ঙসিদি অযোধ্যাদা মীওই লাখ কয়া লাক্লে। মসিনা মরম ওইদুনা, উত্তর প্রদেসতা অপীকপা ওন্ত্রেপ্রেনিউয়রশিং, এয়রলাইন কম্পেনিশিং অমসুং হোতেল-রেসতুরান্ত মপুশিং মমাঙদা অমুক্তা ফংখিদ্রিবা খুদোংচাবশিং ফংলে। উত্তর প্রদেসগী লোকেল, নেসনেল অমসুং ইন্তরনেসনেলগী চৎথোক-চৎশিনগী খুদোংচাবা য়াম্না ফগৎলে অমসুং মালেমদা খ্বাইদগী শাংবা ক্রুইজ সর্বিস বরানাসী ফাওদুনা চৎখ্রে। ২০২৫ দা পাংথোক্কদৌরিবা কুম্ভ মেলা অসি রাজ্য অসিগী শেন্মিৎলোনগী য়াম্না মরুওইগনি। তুংদা তুরিজম অমসুং হোস্পিতেলিতি সেক্তরদা রাজ্য অসিদা মশিং য়াম্লবা থবকশিং ফংহনগনি।
ইলেক্ত্রিক মোবিলিতি অমসুং গ্রিন ইনর্জিদা ভারতনা মীৎয়েং চঙলিবা অসিগী মতাংদা, প্রধান মন্ত্রীনা হায়খি অসিগুম্বা তেক্নোলোজি অমসুং মেনুফেকচরিংগী লমদা ভারত মালেমগী মফম অমা ওইহন্নবা সরকারনা মীৎয়েং চঙলে। ঐখোয়গী থবক্তি লৈবাক অসিগী ইমুং খুদিংমক অমসুং য়ুম খুদিংমক সোলার পৱার পুথোকপা অমা ওইহনবনি। পি.এম সুর্য়াঘর স্কিমগী মখাদা ইলেক্তিসিতি য়ুনিত ৩০০ লেম্না পীগনি অমসুং মীয়াম্না অহেনবা মৈ সরকারদা য়োনবা য়াগনি। স্কিম অসিগী মখাদা হৌজিক ইমুং করোর ১ শরুক য়ারে অমসুং ইমুং খুদিংমক্কী বেঙ্ক একাউন্তশিংদা হকথেংননা লুপা ৩০,০০০ দগী লুপা ৮০,০০০ ফাওবা হাপচিনগনি। থা অমদা মৈ য়ুনিত ১০০ পুথোকপা ইমুংশিং লুপা ৩০,০০০গী শেন্থং ফংগনি অমসুং মৈ য়ুনিত ৩০০ নত্ত্রগা মসিদগী হেন্না পুথোকপা ইমুংশিংনা লুপা ৮০,০০০ ফংগনি।
প্রধান মন্ত্রীনা হায়খি সরকারনা ই.ভি সেক্তর চাউখৎনবা মীৎয়েং চঙলে অমসুং ইলেক্ত্রিক গারিশিং লৈবদা তেক্স লৌদনবা গারি শারিবশিংগী পি.এল.আই স্কিম হৌদোক্লে। মসিগী ফল ওইনা, হৌখিবা চহি ১০দা ইলেক্ত্রিক গারি লাখ ৩৪.৫ য়োনখ্রে। ঐখোয়না খোঙজেল য়াংনা ইলেক্ত্রিক বসশিং শীজিন্নবা হৌরে। মসি সোলার নত্ত্রগা ই.ভি ওইগেরা, হিরম অনিমক উত্তর প্রদেসতা খুদোংচাবা কয়া লৈরি।
প্রধান মন্ত্রীনা হায়খি হন্দক চৌধুরি চরন সিংহদা ভারত রত্ন পীনবা সরকারনা ৱারেপ লৌখ্রে। উত্তর প্রদেসকী মপারি চৌধুরি চরন সিংহ জি ইকায়খুম্নবা উৎপা অসি লৈবাক অসিগী লৌমী করোর কয়া ইকায়খুম্নবা উৎপনি। চৌধুরি চরন সিংহনা লায়রবা লৌমীশিংগী য়াইফনবা থবক কয়া পাংথোক্লমখি। চৌধুরি সাহেবনা ইথিল পীদুনা ঐখোয়না লৈবাক অসিগী লৌমীশিংদা শক্তি পীরে।
প্রধান মন্ত্রীনা হায়খি লৌউ-শিংউদা অনৌবা থবকশিং পায়খৎনবা লৌমীশিং সরকারনা শৌগৎলি। ঐখোয়গী লৈবাক্কী লৌউ-শিং অনৌবা লম্বী অমদা চৎনবা ঐখোয়না লৌমীসিং মতেং পাংলি অমসুং পুক্নিং থৌগৎলি। ওর্গানিক লৌউ অমসুং মিল্লেতশিংদা সরকারনা মীৎয়েং চঙলে। উত্তর প্রদেসতা গঙ্গা মপান্দা পাক-শন্না মহৌশাগী লৌউ মখল পায়খৎপা অসিনা লৌমীশিং খক কান্নবতা নত্তনা ঐখোয়গী শেংলবা তুরেলশিং লু-নান্না থম্বদা মতেং পাংগনি।
ফুদ প্রোসেসিং ওন্ত্রেপ্রেনিউয়রশিংনা মখোয়গী থবকশিংদা “জিরো ইফেক, জিরো দিফেক”গী লাইৱা মরুওইনা লৌগদবনি। মালেম শীনবা থুংবগী দাইনিং তেবলশিংদা ভারতকী চীঞ্জাকশিং য়াওহন্নবা চপ মান্নবা পান্দম অমগী মখাদা থবক তৌবা মরুওই। সিদ্ধার্থ নাগরগী কালা নমক রাইজ অমসুং চান্দাউলিগী চাকহাও হৌজিক শিংথাবা য়ানা মপান লৈবাকশিংদা থাদোক্লে।
মিল্লেতশিং সুপরফুদশিং ওইনা শীজিন্নবা হেনগৎলক্লিবা অসিগী মতাংদা, প্রধান মন্ত্রীনা হায়খি হিরম অসিদা শেন থাদবা দরকার ওইরে। মিল্লেতশিংগুম্বা সুপরফুদশিংদা শেন থাদবা চপ চারবা মতমনি। ওন্ত্রেপ্রেনিউয়রশিংনা লৌমীশিংগা পুন্না থবক তৌমিন্নগদবনি অমসুং ফার্মর প্রদুসর ওর্গনাইজেসন(এফ পি ও) অমসুং কোওপরেতিপ সোসাইতিশিংগী খুৎথাংদা অপীকপা লৌমীশিংগী ফিবম ফগৎহন্নবা সরকারনা থবক পায়খৎলে। লৌমীশিং অমসুং লৌউ-শিংউদা কান্নবা ফংহনবা হায়বসি অদোমগী ললোন-ইতিক্কীশু অফবনি।
ভারতকী খুঙ্গংগী শেন্মিৎলোন অমসুং লৌউ-শিংউদা য়ুম্ফম ওইবা শেন্মিৎলোন চাউখৎহনবদা উত্তর প্রদেসনা লৌরিবা থৌদাংগী মতাংদা প্রধান মন্ত্রীনা হায়খি মরী লৈনবশিংনা মসিগী খুদোংচাবা অসি খ্বাইদগী য়াম্না লৌনবা হোৎনগদবনি। উত্তর প্রদেসকী মীয়ামগী তৌবা ঙম্বদা মহাক্কী থাজবা লৈরি অমসুং দবল ইঞ্জিন সরকারগী থবকশিংনা রাজ্য অসিগী অমসুং লৈবাক্কী চাউখৎনবা য়ুম্ফম থোল্লে।
থৌরম অদুদা উত্তর প্রদেসকী রাজ্যপাল শ্রীমতি অনন্দিবেন পতেল, উত্তর প্রদেসকী চীফ মিনিস্তর শ্রী য়োগী অদিত্যানাথ, য়ুনিয়ন দিফেন্স মিনিস্তর শ্রী রাজনাথ সিংহ অমসুং উত্তর প্রদেস সরকারগী মিনিস্তরশিং শরুক য়াখি। শক্নাইরবা উদোগপতিশিং, মালেমগী অমসুং ভারতকী কম্পেনিশিংগী মকোক থোংবা লুচিংবশিং, এম্বেসেদরশিং অমসুং হায় কম্মিসন্নরশিং অমসুং অতোপ্পা শক্নাইরবা মীওইশিং য়াওনা মীওই ৫০০০ রোম থৌরম অদুদা শরুক য়াখি।
बीते 7 वर्षों में यूपी में व्यापार, विकास और विश्वास का माहौल बना है। pic.twitter.com/AKCArS2DvA
— PMO India (@PMOIndia) February 19, 2024
डबल इंजन सरकार ने दिखाया है कि अगर बदलाव की सच्ची नीयत है तो उसे कोई रोक नहीं सकता। pic.twitter.com/r9zd0J802H
— PMO India (@PMOIndia) February 19, 2024
आप दुनिया में कहीं भी जाएं, भारत को लेकर अभूतपूर्व पॉजिटिविटी दिख रही है। pic.twitter.com/zAIJorIM4e
— PMO India (@PMOIndia) February 19, 2024
हमने यूपी में ease of living और ease of doing business पर समान बल दिया है। pic.twitter.com/fqPLYik684
— PMO India (@PMOIndia) February 19, 2024
जबतक हर लाभार्थी को उसका हक नहीं मिल जाता, हमारी सरकार शांत नहीं बैठेगी: PM @narendramodi pic.twitter.com/MjGASy7BOQ
— PMO India (@PMOIndia) February 19, 2024
यूपी में भारत का सबसे बड़ा टूरिज्म हब बनने का सामर्थ्य है। pic.twitter.com/rbPsL0zYGw
— PMO India (@PMOIndia) February 19, 2024
फूड प्रोसेसिंग से जुड़े उद्यमियों से विशेष आग्रह... pic.twitter.com/5L5nDjf9dl
— PMO India (@PMOIndia) February 19, 2024
