ঙসি প্রধান মন্ত্রী শ্রী নরেন্দ্র মোদীনা গুজরাতকী গান্ধীনগরদা লৈবা মহাত্মা মন্দিরদা ৪শুবা গ্লোবেল রিন্যুএবল ইনর্জি ইনভেস্তরস মিত অমসুং এক্সপো (রি-ইনভেস্ত) হৌদোকখ্রে। নুমিৎ ৩ গী মীফম অসিদা ভারতনা মাইপাক্না গিগাৱাত ২০০গী নন-ফোসিল ফুয়েল পুথোকপা ঙম্বগী মরুওইবা থবক অসি ইকায়খুম্নবা উৎলি। সরকার অমসুং লনাই কম্পেনিশিং, স্তার্দ-অপশিং অমসুং অচৌবা ইন্দস্ত্রিশিংগী অৱাংবা থাক্কী অনৌবা থবকশিং উৎপা একজিবিসন অমশু প্রধান মন্ত্রীনা য়েংখ্রে।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা রি-ইনভেস্তকী ৪শুবা ইদিসনগী শক্নাইরবশিং তরাম্না ওকখি অমসুং ইনর্জি, তেক্নোলোজি অমসুং থৌশিলশিংগী তুংলমচৎকীদমক মথং নুমিৎ হুম্নিদা মরুওইবা ৱাফমশিং খন্ন-নৈনগনি হায়বগী থাজবা ফোঙদোকখি। শ্রী মোদীনা হায়খি মদুদি মীফম অসিদা খন্ন-নৈনবা অমসুং তম্লকপগী ফংলকপশিং অদুনা অপুনবা মীওইবা খুন্নাইদা কান্নবা পীগনি। মাইপাক্না খন্ন-নৈনবশিং পাংথোক্নবা মহাক্না য়াইফ-পাউজেল পীখি।
প্রধান মন্ত্রীনা হায়খি চহি ৬০গী মতুংদা ভারতকী মীয়াম্না রেকোর্দ অমা ওইনা চপ মান্নবা সরকার অমা অহুমলকশুবা ওইনা খল্লে। সরকার অমা অহুমশুবা তার্মগী অমুক হন্না খল্লকপা অসিগী মরমদি ভারতকী অনিংবশিং অদুনি। লৈবাকমী করোর ১৪০, নহারোল অমসুং নুপীশিংগী থাজবা অমসুং অনিংবশিং অদু মসিগী অহুমশুবা তার্ম অসিদা অনৌবা খোঙচৎ অমা পাংথোক্লগনি। সরকারগী অহুমশুবা তার্ম অসিদা ইকায়খুম্নবা পুন্সি অমা শোইদনা ফংলগনি হায়না লায়রবশিং, দলিতশিং অমসুং তোল্লবশিংনা থাজবা থম্লে। ভারত মালেমদা অহুমশুবা খ্বাইদগী চাউবা ইকোনোমি অমা ওইহন্নবা ৱাশক্কা লোয়ননা ভারতকী মীয়াম করোর ১৪০ না থবক শুরি। ঙসিগী থৌরম অসি অচম্বা অমা নত্তে, মসি ভারত ২০৪৭ দা চাউখৎলবা লৈবাক অমা ওইহন্নবা অচৌবা মঙলান, পান্দম অমসুং থৌরাংগী শরুক অমনি। সরকারনা অসিনা ওফিস পায়রকপা অহানবা নুমিৎ ১০০ মপুংফারকপগী ৱারেপ কয়াশু লৌরে।
প্রধান মন্ত্রীনা হায়খি অহানবা নুমিৎ ১০০ দা, ঐখোয়না মরুওইনা লৌরিবশিং ময়েক শেংনা উরে। মসি ঐখোয়গী খোঙজেল অমসুং পাক-চাউবগী মমি অমশুনি। ভারতকী চাউখৎপগী খোঙজেল য়াংখৎহনগদবা দরকার ওইবা সেক্তর খুদিংমক মরুওইনা লৌরে। অহানবা নুমিৎ ১০০ অসিদা, লৈবাক অসিদা ফিজিকেল অমসুং সোসিএল ইনফ্রাস্ত্রকচর পাকথোক-চাউথোক্নবা ৱারেপ কয়া লৌর। লৈবাক কয়াগী অপুনবা মীশিংদগী হেনবা য়ুম করোর ৭ হেন্না শানবা লম্বী অমদা ভারত চঙশিল্লি অমসুং হৌখিবা তার্ম অনিদা মীয়ামদা য়ুম করোর ৫ শীন্নখ্রে। অনৌবা উদ্যোগকী সহর ১২ শেমগৎনবা ৱারেপ লৌরে, খোঙজেল য়াংবা লম্বীগী কোরিদোর প্রোজেক ৮ অয়াবা পীরে, সেমি-হায় স্পিৎ বন্দে ভারত ত্রেন ১৫ হেন্না হৌদোক্লে, থিজিনবগী থবক পুক্নিং থৌগৎনবা লুপা ত্রিল্লিয়ন ১ রোমগী রিছার্স ফন্দ অমা লিংখৎলে, ই-মোবিলিতি ফগৎনবা, অফবা মখলগী বাইওমেনুফেকচরিং য়োকখৎনবা তোঙান-তোঙানবা থবকশিং লাউথোক্লে অমসুং বাইও ই-৩ থৌশিল অয়াবা পীরে।
হৌখিবা নুমিৎ ১০০ দা গ্রিন ইনর্জিগী লমদা পাংথোকখিবা অফবা থবকশিংগী মতাংদা, প্রধান মন্ত্রীনা হায়খি মদুদি লুপা করোর ৭০০০ হেনবগী ওফসোর ৱিন্দ ইনর্জি প্রোজেকশিংগী ভাইএবেলিতি গেপ ফন্দিং স্কিম অমা হৌদোক্লে। লুপা করোর ১২,০০০গী শেনফম অমা কাইথোক্তুনা, তুংদা মেগাৱাত ৩১,০০০গী হায়দ্রোপৱার পুথোক্নবা ভারতনা থবক পায়খৎলে।
ভারতকী খেন্নবা, পাক-চাউবা, থবক ঙম্বা, শক্তি অমসুং থবক ওইনা পাংথোকপা অসি ময়ামদগী তোঙাল্লি অমসুং ভারতনা পুথোকপা পাম্বৈশিং মালেমগী লৈবাকশিংনা শীজিন্ননবা লম্বী শেম্লে। ভারত খক নত্তনা, “ভারত ২১শুবা চহিচাদা খ্বাইনা পাম্নবা লৈবাক ওইরে হায়বদা মালেম শীনবা থুংনা থাজরে। হৌখিবা থাদা ভারতনা য়ুম্বু ওইদুনা পাংথোকখিবা মালেমগী থৌরমশিংগী মতাংদা প্রধান মন্ত্রীনা হায়খি, থা অসিগী অঙনবা শরুক্তা গ্লোবেল ফিনতেক ফেস্ত পাংথোকখ্রে, অহানবা ইন্তরনেসনেল সোলার ফেস্তিবেল, গ্লোবেল সেমিকন্দক্তর সম্মিৎতা মালেম শীনবা থুংবগী মীওইশিং শরুক য়াখ্রে অমসুং ভারতনা য়ুম্বু ওইদুনা ২শুবা এসিয়া-পেসিফিক সিবিল এভিএসন মিনিস্তরিয়েল কনফরেন্স পাংথোকখ্র অমসুং ঙসি ভারতনা য়ুম্বু ওইদুনা গ্রিন ইনর্জিগী মীফম অমা পাংথোক্লি।
প্রধান মন্ত্রী মোদীনা হায়খি গুজরাত্তা হৌদোকখিবা ৱাইত রিভোলুসন, শ্বুইত(হনি) রিভোলুসন, সোলার রিভোলুসন হৌজিক ৪শুবা গ্লোবেল রিন্যুএবল ইনর্জি ইনভেস্তরস মিত অমসুং এক্সপোদা উবা ফংবা অসিদা হরাওই। মশাগী সোলার পোলিসি লৈজবা ভারতকী অহানবা রাজ্য গুজরাতনা ওইরে। রাজ্য অসিগী মতুংদা সোলারগী নেসনেল পোলিসিশিং শেম্লকপনি। অইং-অশাগী মতাংদা থবক পায়খৎনবা মিনিস্ত্রি অমা লিংখৎনবা মালেমদা মাংজিল থানবা হোৎনরিবশিংগী মনুংদা গুজরাত অমনি। মালেম্না ৱাখলদা ফাওবা খন্দ্রিঙৈদা গুজরাতনা মাঙজৌননা সোলার প্লান্তশিং লিংখৎপা হৌখ্রে।
ঙসিগী থৌরম অসি পাংথোক্লিবা মফম মহাত্মা মন্দির হায়না থোল্লিবা অসিগী মতাংদা, শ্রী মোদীনা হায়খি অইং-অশাগী খল হোংলকপগী অৱাবগী হিরম অসি পোক্ত্রিঙৈদা মালেমদা মিকুপ-নাহুম শিংহনখিবা লুচিংবা মহাত্মা গান্ধীগী মমিং লৌদুনা মফম অসি থোনখিবনি। মহাত্মাগী ৱারোল অমা পল্লদুনা, প্রধান মন্ত্রীনা হায়খি-“ঐখোয়গী দরকার ওইবশিং ওক্নবা মালেম অসিদা লন-থুমশিং লৈরি, অদুবু ঐখোয়গী মিহৌ চাউবগী ওক্নবদি লৈতে”। ভারতকী অফবা চৎনবীদগী মহাত্মা গান্ধীগী পান্দম অসি থোক্লকখিবনি। গ্রিন ফ্যুচর, নেত জিরোগুম্বা ৱাহৈশিং অসি অচম্বা ৱাহৈশিং নত্তে অদুবু ভারত সরকার অমসুং ভারতকী রাজ্য খুদিংমক্কী দরকার ওইবা অমসুং থাজবশিংনি।
প্রধান মন্ত্রীনা হায়খি চাউখৎলক্লিবা লৈবাক অমা ওইনা, থাজবশিং অসি থবক ওইনা পাংথোক্তবা য়াবগী ভারতকী মরম অমা লৈরি অদুবু হায়রিবা থবক অদু পাংথোক্তে। ঙসিগী ভারত অসিনা ঙসি খক্তগী য়ুম্ফম অমা থোনবা নত্তে, মথং চহি লিশিং কয়াগী য়ুম্ফম থোল্লি। ভারতকী পন্দমদি মতোন য়ৌবা অদু খক নত্তে, ঐখোয় ইশামক মতোন অদুদা তুংকোইনা হিংনবা শেম-শাবা অদুনি। লৈবাক অসি ২০৪৭ দা চাউখৎলবা লৈবাক অমা ওইনবা লৈবাক অসিগী দরকার ওইবা ইনর্জি অদু ভারতনা নিংথিনা খঙলে। সোলার পৱার, ৱিন্দ ইনর্জি, ন্যুক্লিয়ার অমসুং হায়দ্রো পৱারগুম্বা রিন্যুএবল ইনর্জিদা য়ুম্ফম ওইবা অমসুং থাউ অমসুং গ্যাস রিজার্বশিং মরাংকাইনা লৈবদা য়ুম্ফম ওইদুনা লৈবাক অসিগী তুংলমচৎ শেমগৎনবা ভারতনা ৱারেপ লৌরে।
প্রধান মন্ত্রীনা হায়খি থানখিবা মতমদগী চহি ৯ ঙনখৎনা, পেরিসতা য়ানখিবা ক্লাইমেতগী ৱাফম থবক ওইনা পাংথোকপা অহানবা জি-২০ লৈবাক ভারতনা ওইরে। ২০৩০ ফাওবদা গিগাৱাত ৫০০গী রিন্যুএল ইনর্জি পুথোক্নবা লৈবাক অসিনা পান্দম থম্লি অমসুং মৈখু থাংদবা থবকশিংগী অওনবা অমা পুরকপা অসি সরকারনা মীয়ামগী ইহৌ অমা ওইহল্লে। ভারত সরকারগী পি.এম সু্র্য়া ঘর ফ্রি ইলেক্ত্রিসিতি স্কিম অসিনা ইমুং খুদিংদা রুপতোপ সোলার থম্বদা সরকারনা শেন্থং পীরে অমসুং ভারতকী য়ুমথোং খুদিং মৈ পুথোকপা য়ুমশিং ওইরে। স্কিম অসিগী মখাদা ইমুং করোর ১.৩০ রেজিস্তার তৌরে অমসুং হৌজিক ফাওবদা য়ুম লাখ ৩.২৫ তা পানখৎপা লোইরে।
পি.এম সু্র্য়া ঘর ফ্রি ইলেক্ত্রিসিতি স্কিমগী কান্নবশিংগী মতাংদা, প্রধান মন্ত্রীনা হায়খি অপীকপা ইমুং অমনা থা অমদা মৈ য়ুনিত ২৫০ শীজিন্নৈ, য়ুনিত ১০০ পুথোকপা ঙম্মী অমসুং মসি অমুক গ্রিদতা য়োন্দুনা চহি অমদা লুপা লিশিং ২৫ রোম কনবা ঙম্মী। মীয়াম্না ইলেক্ত্রিসিতি বিলদগী লুপা লিশিং ২৫ রোম কনবা ঙমগনি। শেন চাদিং তৌদবা অসি শেন তানবনি। করিগুম্বা শেনফম অসি চহি ২০ পব্লিক প্রোবিদেন্ত ফন্দদা থাদরবদি, অপুনবা শেনফম অদু লুপা লাখ ১০ হেন্না ফংদুনা মদুনা অঙাংশিংগী লাইরিক তম্বা অমসুং লুহোংবদা শীজিন্নবা য়াগনি।
শ্রী মোদীনা মখা তানা হায়খি মদুদি পি.এম সু্র্য়া ঘর ফ্রি ইলেক্ত্রিসিতি স্কিম থবক পীনবা অমসুং মহৌশাগী অকোয়বগী ফিবম ঙাক-শেন্নবা পাম্বৈ অমনি অমসুং মসিনা চাউরাক্না থবক লাখ ২০ লোম পীগনি। স্কিম অসিগী মখাদা নহারোল লাখ ৩ হৈথোই-শিংথোইবা শিন্মীশিং ওইনা শেমগৎনবা সরকারনা পান্দম থম্লি। নহারোল লাখ ৩ অসিগী মনুংদা, নহারোল লাখ ১ সোলার পি.ভি তেক্নিসিয়ানশিং ওইগনি। সোলার ইলেক্ত্রিসিত কিলোৱাত ৩ পুথোকপা খুদিংগী কার্বোনদাইওক্সাইদ তন ৫০-৬০ থাদোকপা থিংগনি। অইং-অশাগী খল কাইথরকপা থেংনবদা ইমুং খুদিংমক্কী থৌদাং য়াম্না মরুওই।
প্রধান মন্ত্রীনা হায়খি মদুদি ২১শুবা চহিচাগী পুৱারি ইরকপা মতমদা ভারতকী সোলারগী রিভোলুসন অসি সনাগী ময়েকশিংনা ইদুনা লৈহৌরগনি। ভারতকী অহানবা সোলার ভিলেজ মোধেরাদা চহিচা কয়া শুরবা নুমিৎকী লাইশঙ অমশু লৈরি। ঙসিদি খুঙ্গং অসিগী দরকার ওইবা খুদিংমক সোলার পৱারনা পীরে। লৈবাক শীনবা থুংবগী খুঙ্গংশিং অসিগুম্বা সোলার খুঙ্গংশিং ওন্থোক্নবা ইহৌ অমা চৎথরি।
সুর্যবংশী অমা ওইরিবা, ভাগবান রামগী পোক্নফম লমদম অয়োধ্যা সহরগী মতাংদা, শ্রী মোদীনা হায়খি শাগৈ অসিদগী ইথিল অমা ওইদুনা অয়োধ্যা অসি মোদেল সোলার সিতি অমা ওইনা শেমগৎনবা সরকারনা পান্দম থম্লি। অয়োধ্যাগী য়ুম খুদিং, ওফিস খুদিং, থবক খুদিং সোলার পৱার শীজিন্ননবা পান্দম থম্লি। অয়োধ্যাগী য়ুমশিং অমসুং থবক কয়া সোলার ইনর্জি শীজিন্নবদা হরাওবা ফাওই। অয়োধ্যাদা মশিং য়াম্লবা সোলার লাইতশিং, সোলার ইন্তরসেক্সনশিং, সোলার বোতশিং, সোলার ৱাতর এ.তি.এমশিং অমসুং সোলার বিল্দিংশিং উবা ফংলে।
প্রধান মন্ত্রীনা মখা তানা হায়খি চপ মান্নবা মওং অমদা সোলার সিতিশিং ওইনা শেমগৎনবা সরকারনা অসিগুম্বা সহর ১৭ মশক খঙদোক্লে। লৌ উনরিবা লৌবুকশিং, ইঙ্খোলশিং সোলার পৱার পুথোক্নবা পাম্বৈ অমা ওইহন্নবা থৌরাংশিং লৈরে। ঙসিদি লৌমীশিংদা ইথৈ-লৌখোং ফংহন্নবা সোলার পম্পশিং অমসুং অপীকপা সোলার প্লান্তশিং পানখৎপদা মতেং পাংলে।
প্রধান মন্ত্রীনা হায়খি রিন্যুএবল ইনর্জি সেক্তরগা মরী লৈনবা হিরম খুদিংমক্তা খোঙজেল য়াম্না য়াংনা অমসুং পাক-চাউনা ভারতনা থবক তৌরি। হৌখিবা চহি ১০দা মমাঙগা চাংদম্নবদা ভারতনা ন্যুক্লিয়ার ইনর্জিদগী ইলেক্ত্রিসিতি চাদা ৩৫ হেন্না পুথোক্লে অমসুং গ্রিন হায়দ্রোজেনগী লমদা মালেমগী লুচিংবা অমা ওইনবা ভারতনা চঙশিল্লি। মাইকৈ অসিদা লুপা করোর লিশিং ২২ রোমগী গ্রিন হায়দ্রোজেন মসিন হৌদোক্লে। ভারত্তা অমোৎপশিংদগী ইনর্জি পুথোক্নবা অচৌবা খোঙজঙ অমসু পায়খৎলি। ক্রিতিকেল মিনরেলশিংগা মরী লৈনবা খুদোংচাদবশিং কোকহন্নবা থবকশিং পায়খৎলে। রি-য়ুজ অমসুং রিসাইক্লিংগা মরী লৈনবা হেন্না ফবা তেক্নোলোজি পুথোক্নবা স্তার্দ-অপশিংদা মতেং পাংবগা লোয়ননা খুদিংমক কোনশিনবা থৌরাং অমা সরকারনা পায়খৎলে।
প্রধান মন্ত্রী মোদীনা হায়খি মদুদি গ্রহ অসিগী য়াইফনবা খনবা মীয়ামগী অচুম্বা ফিদমশিংদা সরকারনা থাজবা থম্লি। মিসন লাইফ হায়বদি লাইফস্তাইল ফোর ইনভাইরোনমেন্তগী ভারতনা থবক কয়া পায়খৎলে। ভারতনা জি-২০গী প্রসিদেন্ত ওইবা মতমদা ভারতনা লুচিংদুনা ইন্তরনেসনেল সোলার এল্লাইন্স হৌদোক্লে অমসুং জি-২০ মীফম মনুংদা গ্লোবেল বাইফুয়েল এল্লাইন্স হৌদোক্লে। চৎলিবা দিকেদ অসিগী অরোইবদা ভারতকী রেলৱেজ নেত জিরো ওইহন্নবা ভারতনা পান্দম অমা থম্লে। ২০২৫ ফাওবগী মনুংদা পেত্রোদা ইথানোল চাদা ২০ য়ানশিন্নবগী পান্দম ফংনবা ভারতনা ৱারেপ লৌরে। ঈশিং লোকশিন্দুনা থম্নবা খুঙ্গং খুদিংমক্তা অমৃত সরোভর লিশিং কয়া শেমগৎলে। সরকারনা এক পের মা কে নাম কৌবা কেম্পেন অমা হৌদোক্লে অমসুং মসিদা মীওই খুদিংমক শরুক য়াবীয়ু।
ভারত্তা রিন্যুএল ইনর্জ দরকার ওইবা হেনগৎলক্লিবা অসিগী মতাংদা, প্রধান মন্ত্রীনা হায়খি মদুদি দরকার ওইবশিং ফংহন্নবা দরকারনা অনৌবা থৌশিলশিং শেম্লে অমসুং হিরম খুদিংমক্তা মতেং পাংলে। ইনর্জি পুথোকপা খক নত্তনা মেনুফেকচরিং সেক্তরদশু ইনভেস্তরশিংগী খুদোংচাবা কয়া মরাংকাইনা লৈরি। মপুংফাবা মেদ ইন ইন্দিয়াগী পাম্বৈশিং পুথোক্নবা অমসুং খুদোংচাবা কয়া শেমৎনবা ভারতনা হোৎনরি। ভারত অসি তশেংনা পাকথোক-চাউথোকপা অমসুং শন্দোং হেন্না ফংনবগী গরেন্তি অমনি। ভারতকী গ্রিন ত্রান্সসিসন্দা শেন হেন্না থাদবা মতম ওইরে।
থৌরম অদুদা শরুক য়াখিবশিংগী মনুংদা গুজরাতকী রাজ্যপাল অচার্য়া দেবব্রাত, গুজরাতকী চীফ মিনিস্তর শ্রী ভুপেন্দ্র পতেল, নিউ অমসুং রিন্যুএবল ইনর্জিগী য়ুনিয়ন মিনিস্তর শ্রী প্রাহলাদ জোসি, অন্ধ্র প্রদেস, রাজস্থান, মধ্য প্রদেস, ছতিসগর অমসুং গৱাগী চীফ মিনিস্তরশিং য়াওখি।
নুঙগীৱারোল
৪শুবা গ্লোবেল রিন্যুএবল ইনর্জি ইনভেস্তরস মিত অমসুং এক্সপো (রি-ইনভেস্ত) না ভারতকী রিন্যুৱেবল ইনর্জী মেন্যুফেচরিং অমসুং দিপ্লোইমেন্ততা শিংথানিংঙাই ওইরবা মওংদা খুমাং চাউশিনখিবা অদুবু উৎলগনি। মসিনা মালেম শিনথুংনদগী দেলিগেতশিংগী পুক্নিং চিংশিনগদবা নুমিৎ নিনিগা তঙ্খাইগী কনফরেন্স অমা পাংথোক্লগনি। মদুদা শরুক য়ারিবশিং অদুনা চীফ মিনিস্তরিয়েল প্লেনরী, সি.ই.ও রাউন্দতেবল, অমসুং ইনোভেতিব ফাইনান্সিং, গ্রীন হাইদ্রোজেন, অমসুং তুংগী ইনর্জী সোল্যুসনশিংগি মতাংদআ অখন্নবা খন্ন-নৈনবশিং অসি য়াওনা কমপ্রেহেন্সিব ওইবা থৌরম অমদা শরুক য়াগনি। জর্মনী, ওস্ত্রেলিয়া, দেনমার্ক অমসুং নোর্ৱেনা থৌরম অদুদা পার্তনর ওইনা শরুক য়ারি। গুজরাত রাজ্যনা থৌরম অসিগী থৌবু ওইরি অমসুং অন্ধ্র প্রদেশ, কর্নাতকা, মধ্য প্রদেশ, মহারাস্ত্র, রাজস্থান, তেলঙ্গনা অমসুং উত্তর প্রদেশনা পার্তনর ওইনা শরুক য়ারি।
মসিদা সরকার অমসুং প্রাইভেত সেক্তর কম্পেনিশিং, স্তার্ত-অপশিং অমসুং মরু ওইবা ইন্দস্ত্রী প্লেয়রশিংদগী খ্বাইদগী নৌবা তেক্নোলজীশিং উৎপা একজিবিশন অমা পাংথোক্লগনি। একজিবিশন অদুনা সস্তেনেবল ফ্যুচর অমগীদমক্তা ভারতনা লেপ্লিবা ফিরেপ অদুগী মরু ওইবা অদুশু উৎলগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
In the first hundred days, our priorities are clearly visible. It is also a reflection of our speed and scale: PM @narendramodi pic.twitter.com/JCuQGxLu5t
— PMO India (@PMOIndia) September 16, 2024
Indian solutions for global application. pic.twitter.com/1re7rmDEic
— PMO India (@PMOIndia) September 16, 2024
India is the best bet of the 21st century. pic.twitter.com/jc7to46ol6
— PMO India (@PMOIndia) September 16, 2024
Green future and net zero are India's commitment. pic.twitter.com/drwFno5kQG
— PMO India (@PMOIndia) September 16, 2024
India is the first nation in the G-20 to achieve the climate commitments set in Paris, 9 years ahead of the deadline. pic.twitter.com/vOKwpLVhiZ
— PMO India (@PMOIndia) September 16, 2024
With PM Surya Ghar Muft Bijli Yojana, every home in India is set to become a power producer. pic.twitter.com/wIWTRUFFZ8
— PMO India (@PMOIndia) September 16, 2024
