প্রধান মন্ত্রী নরেন্দ্র মোদী অমসুং মোরিসসকী প্রধান মন্ত্রী প্রবিন্দ জগন্নাথনা শগোলশেল নুমিৎ, জুলাই ৩০, ২০২০দা মোরিসসকী সুপ্রীম কোর্তকী অনৌবা বিলদিং পুন্না শঙ্গামিন্নগনি। শঙ্গাবগী থৌরম অসি মোরিসসকী জুদিসিয়রীগী সেনিয়র মেম্বরশিং অমসুং লৈবাক অনি অসিগী শক্নাইরবা মীওইশিং য়াওদুনা ভিদিও কনফরেন্সিংগী খুত্থাংদা পাংথোক্কদবনি। বিলদিং অসি ভারতনা শেলগী তেংবাং পীদুনা শাখিবনি অমসুং মসিনা মোরিসস লৈবাক্কী কোনুং পোর্ত লুইসকী মনুংদা লৈবা ভারতনা তেংবাংবা অহানবা ইনফ্রাস্ত্রকচর ওইরগনি।
সুপ্রীম কোর্তকী অনৌবা বিলদিং অসি ইং ২০১৬তা ভারত সরকারনা মোরিসস্তা পীখিবা য়ু.এস.দি. মিলিয়ন ৩৫৩গী ‘অখন্নবা ইকোনোমিক পেকেজ’কী মখাদা পায়খৎপা প্রোজেক্ত মঙাগী মনুংদা অমনি। প্রোজেক্ত অসি লোয়শিনবগী পানবা মতমগী মনুংদা হান্না খন্নরম্বা শেনফমদগী হন্থনা চংদুনা লোয়শিনখি। বিলদিং অসি এস.ক্যু.এম. ৪৭০০গী পাক চাউবদা শন্দোক্তুনা মথোল ১০ লৈদুনা অমসুং চাউরাক্না এস.ক্যু.এম. ২৫,০০০গী চাংদা মথক্লোমদা শাগত্তুনা লৈ। বিলদিং অসি থর্মেল অমসুং সাউন্দ ইন্স্যুলেসন অমদি অৱাংবা ইনর্জী ইফিসিএন্সীগী হীরমদা মিৎয়েং চংবা হৌজিক্কী মতমগী ওইবা মওং-মতৌ চেল্লি। অনৌবা বিলদিং অসিদা মোরিসসকী সুপ্রীম কোর্তকী দিবিজন অমসুং ওফিস খুদিংমক বিলদিং অমত্তদা লৈহন্দুনা থবক তৌবগী চাং হেনগৎহল্লগনি।
ওক্তোবর ২০১৯দা প্রধান মন্ত্রী মোদী অমসুং মোরিসস্কী পি.এম.না অখন্নবা ইকোনোমিক পেকেজ অসিগী মখাদা শারিবা মেত্রো এক্সপ্রেস প্রোজেক্তকী ফেজ-১ অমসুং অনৌবা ই.এন.তি. হোস্পিতাল প্রোজেক্ত অমসু পুন্না শঙ্গামিন্নখ্রবনি। মেত্রো এক্সপ্রেস প্রোজেক্তকী ফেজ-১গী মখাদা মমাং চহিগী সেপ্তেম্বরদা মেত্রো লম্বি কিলোমীতর ১২ শাবা লোয়খ্রবনি অমসুং কিলোমীতর ১৪গী মেত্রো লম্বি শাবগী ফেজ-২গী হৌজিক থবক চত্থরিবনি। ভারতনা ই.এন.তি. প্রোজেক্ত অসিগী খুত্থাংদা মোরিসস্তা লৈবা ফমুং ১০০ লৈবা মতমগা চান্নরবা ই.এন.তি. হোস্পিতাল অমা লৈহনবদা তেংবাংলি।
ভারতনা তেংবাংদুনা মোরিসস্তা লৈবা মগুন লৈরবা ইনফ্রাস্ত্রকচর প্রোজেক্ত অয়া অমা মায় পাক্না অমসুং মতম চানা লোয়শিনবা ঙম্বা অসিনা মোরিসস্তা লৈবা ভারতকী কম্পেনীশিং অমসুং মফম অসিদা খুদোংচাবা কয়া পীগনি। সুপ্রীম কোর্তকী অনৌবা বিলদিং অসিনা লৈবাক অনিগী মরক্তা লৈনরিবা তেংবাংনবগী মরী অসিবু শক তাকপা শহরগী ময়োলদা লৈবা মরু ওইবা লেন্দমার্ক অমা ওইরগনি।
