প্রধান মন্ত্রী শ্রী নরেন্দ্র মোদীনা লৌউ-শিংউ অমসুং খুঙ্গংগী অওনবা পুরকপদা মীৎয়েং থম্বা বজেত মতুংগী অহুমসুবা ৱেবিনারদা ৱা ঙাংখ্রে। তেক্নোলোজি অমসুং শেন-থুম চাউখৎপগী মতাংদা মমাঙদা পাংথোকখিবা সেসনশিং পল্লদুনা, প্রধান মন্ত্রীনা হায়খি মদুদি মরী লৈনবশিংনা বজেত শেম-শাবদা মমল য়াম্লবা মতেং পাংখি। হৌজিক, বজেত মতুংদা, লৈবাক অসিনা বজেতকী কান্নবশিং মপুংফানা লৌবা মরুওই অমসুং মাইকৈ অসিদা অদোমগী পাউতাকশিং অমসুং ৱেবিনার অসি য়াম্না মরুওই।
প্রধান মন্ত্রীনা হায়খি মদুদি লৌউ-শিংউনা ভারতকী শেন্মিৎলোন্দা মরুওইবা মফম অমা কল্লি অমসুং লৈবাক অসিগী শাংলবা চাউখৎপগী খোঙচৎকী মরুওইবা য়ুম্বী অমনি। পি.এম কিষান সম্মান নিধি অমসুং মিনিমম সপোর্ত প্রাইজগুম্বা অওনবশিং থবকশিংনা লৌমীশিংদা শেন্দোং শরুক ১.৫ ফংহল্লে। ঐখোয়গী সরকারনা লেপ্তনা লৌউ-শিংউগী হিরম মপাঙ্গল কনখৎহল্লে।
হৌজিক পায়খৎলিবা স্কিমশিং মাইপাকপগী দেতা পীরদুনা, প্রধান মন্ত্রীনা হায়খি মদুদি পি.এম কিষান সম্মানগী মখাদা লৌমী করোর ১০ হেনবনা লুপা করোর লাখ ৪ হেন্না ফংখ্রে অমসুং পি.এম ফাসাল বিমা য়োজনাগী মখাদা লুপা করোর লাখ ২ রোমগী ইন্সুরেন্স ক্লেমশিং পীখ্রে। বেঙ্কশিংনা শেন্থং পীবা চাদা ৭৫ হেন্না কোনশিল্লে। অসিগুম্বা মরুওইবা থবকশিংনা লৌমীশিংগী অৱাবশিং হন্থহল্লে অমসুং মখোয়দা তঙাইফদবা শেন-থুমগী মতেং পাংলে।
রেকোর্দ ওইনা চানবা মহৈ-মরোংশিং অমসুং হৱায়শিং পুথোকপগী মতাংদা, প্রধান মন্ত্রীনা হায়খি মদুদি ২১শুবা চহিচাগী অনিশুবা ক্বাতর হৌরকপগা লোয়ননা অনৌবা থৌনাগা লোয়ননা হিরম অসিদা চঙশিনগদবনি। চহি অসিগী কেন্দ্রগী বজেত্ত অনৌবা থবকশিং মাইকৈ অসিদা পায়খৎলে। ৱেবিনারগী খন্ন-নৈনবশিংনা বজেতকী ৱাফমশিং থবক ওইনা পায়খৎপগী খোঙ্গুল লীগনি। ৱেবিনার অসিদা অদোমগা লোয়ননা খন্নগনি অমসুং বজেতকী ৱাফমশিং অথুবা মতমদা থবক ওইনা পায়খৎপদা পাউতাকশিংনা মতেং পাংগনি হায়না ঐনা থাজৈ।
প্রধান মন্ত্রীনা হায়খি মদুদি মালেমগী দরকার ওইবা হোংলকপগী মতুংইন্না ভারতকী লৌউ-শিংউগী থবক মপান্দা থাদোক্নবা মীৎয়েং থম্লে। পোৎথোক হেনগৎনবা অমসুং মপান্দা থাদোকপা হেনগৎহন্নবা ভারতকী তোঙান তোঙানবা নোংজু-নুংশাগী ফিবমশিং মপুংফানা শীজিন্নগদবনি। ৱেবিনার অসিদা, ঐখোয়গী লৌউ-শিংউগী থবক মপান্দা থাোক্নবা মীৎয়েং থম্নবা মপুংফানা খন্নবা তঙাইফদে।
শেন য়াম্না ফংগদবা লৌউ-শিংউগী থবক্ত মীৎয়েং থম্লদুনা, প্রধান মন্ত্রীনা হায়খি মদুদি কোকোৱা, কাজু অমসুং সেন্দলৱুদগুম্বা লমদম অমগী অকক্নবা মহৈ-মরোশিংগীদমক বজেত্ত য়াওরে। অৱাং-নোংপোক্ত অগরৱুদ অমসুং হিমালায়াগী রাজ্যশিংদা তেম্পেরেত নতশিং থানবা বজেত্ত হাপ্লে। মপান্দা থাদোক্নবা পোৎথোক পুথোকপা হেনগৎলকপগা লোয়ননা, শেম-শাবা অমসুং মগুন হেনগৎহনবগী খুৎথাংদা খুঙ্গংশিংদা থবক ফংহনগনি। করিগুম্বা ঐখোয়না শেন য়াম্না ফংবা য়াবা লৌউ-শিংউগী থবকশিং পুনশিল্লবদি, মসিনা লৌউ-শিংউ মালেমগী থাক্ত চাংদম্নবা ঙম্বা হিরম অমা ওইহনগনি।
প্রধান মন্ত্রীনা হায়খি মদুদি মালেমগী ব্রান্দ ওইনবা অমসুং মগুনশিং য়ৌনবা অখঙ-অহৈশিং, উদ্যোগ অমসুং লৌমীশিং শরুক য়াদুনা অমতা ওইনা চঙশিনগদবনি। লমদম অসিগী লৌমীশিং মালেমগী কৈথেলশিংগা শম্ননবা নাখৈ শেংবা পান্দমশিং থম্বা মরুওই। হায়রিবা হিরমশিং খন্ন-নৈনবনা মখাদা তানা ৱেবিনার অসিগী মরুওইবা হেনগৎহনগনি।
ঙা য়োকপগী হিরমগী মতাংদা, প্রধান মন্ত্রীনা হায়খি মদুদি ভারত মালেমদা অনিশুবা ঙা খ্বাইদগী য়াম্না পুথোকপা লৈবাকনি। ঐখোয়গী তোঙান তোঙানবা পুখ্রিশিং অমসুং ঈশিং লৈবা মফমদগী হৌজিক চাউরাক্না ঙা তন লাখ ৪.৫ রোম পুথোক্লি, অহেনবা তন লাখ ২০ রোম পুথোকপা ঙমগনি। মপান্দা থাদোকপা হেনগৎহন্নবা, খুঙ্গং চাউখৎনবা, কান্নবা য়াম্না পীনবা ঙা য়োকপা অচৌবা থবক অমা ওইবা য়াগনি।
প্রধান মন্ত্রীনা হায়খি মদুদি ব্লু ইকোনোমিগী খুদোংচাবশিং লৌনবা ঙা মচা পুথোকপা, মচীঞ্জাক অমসুং পুথোক-পুশিন্দা ললোন-ইতিক্কী অনৌবা নমুনাশিং দরকার ওইরে। ফিসরি দিপার্তমেন্ত অমসুং মীয়ামগী মরক্ত অচেৎপা মরী লৈনগদবনি। মসি খুঙ্গং নুংঙাই য়াইফনবা য়াম্না কান্নবা হিরম অমা ওইবা য়াগনি অমসুং মসি অদোম্না অপুনবা ওইনা থবক ওইনা পাংথোক্কদবনি।
প্রধান মন্ত্রীনা হায়খি মদুদি ঙসি মালেমদা ভারতনা শঙ্গোম খ্বাইদগী য়াম্না পুথোকপা লৈবাক ওইরে অমসুং য়েরুম পুথোকপদা অনিশুবদা লৈরি। মসি মখা তানা চাউখৎনবা, ব্রিদিং ক্বালিতি, লাইনা-তিন্না ঙাকথোকপা অমসুং সাইন্তিফিক ওইনা থবক পায়খৎপদা মীৎয়েং চঙগদবনি। শা-ষনশিং মশা-মউ ফনা থম্বা হায়বা য়াম্না মরুওইবা হিরম অমনি। ঐনা ‘মালেম অমা, হকশেল অমা’ গী ৱা ঙাংবা মতমদা, মসিদা শা-ষনশিংগী হকশেলসু য়াওরি।
ভারতনা মশাগী ওক্নবা তিকা পুথোকপা পল্লদুনা, প্রধান মন্ত্রীনা হায়খি মদুদি নেসনেল গোকুল মিসনগী মখাদা তেক্নোলোজি পাকথোক-চাউথোক্লে অমসুং শা-ষন লোইবা লৌমীশিংদা কিষান ক্রেদিদ কার্দশিং ফংহল্লে। শা-ষনশিং মচিন-মরৈ নাবা লাইনাদগী ঙাকথোক্নবা তিকা দোজ করোর ১২৫ হেন্না থাখ্রে। লনাই কাংবু শেন থাদবা পুক্নিং থৌগৎনবা, এনিমেল হসবেন্দরি ইনফ্রাষ্ট্রকচর দিবলপমেন্ত ফন্দসু লিংখৎলে।
প্রধান মন্ত্রীনা হায়খি মদুদি খুদোংথিবশিং মায়োক্নবা ঙম্নবা, মখল অমতগী মহৈ-মরোং থাবগী মথক্ত মহৈ-মরোং মখল কয়া থোক্না থাগদবনি। পোৎথোক হেন্না পুথোক্নবা অচাথাউশিং, হৱায়শিং অমসুং মহৌশাগী লৌউ পথাপকী মিসনশিংনা খুৎলায়শিং ওইরে। মরম অদুনা মহৈ-মরোং মখল কয়া থোক্না থানবা ঐখোয়না মীৎয়েং চঙলে।
প্রধান মন্ত্রীনা হায়খি মদুদি লৌউ-শিংউগী থবক অসি রাজ্যগী হিরম অমা ওইবনা, মখোয়গী বজেতকী থৌদাংশিং মপুংফানা পাংথোক্নবা রাজ্যশিংগী পুক্নিং থৌগৎকদবনি। কান্নবা খ্বাইদগী য়াম্না ফংনবা জিলা থাক্ত বজেত্ত পনখিবশিং থবক ওইনা পাংথোকপা হেনগৎহনগদবনি।
প্রধান মন্ত্রীনা হায়খি মদুদি লৌউ-শিংউগী থবক্ত তেক্নোলোজি শীজিন্নবগী চৎনবী অমা লৈরে। ই-নাম লৈরে অমসুং দিজিতেল পব্লিক ইনফ্রাষ্ট্রকচর শেমগৎলে। অওনবা থবকশিং ওইনা কিযান আই.দিশিং অমসুং দিজিতেল লেন্দ সর্ভে পায়খৎলে। লৌউ-শিংউগী থবক্ত ‘তেক্নোলোজি শীজিন্নবগী চৎনবী’ অমা পুরক্নবা সরকারনা অকনবা থবক পায়খৎলি।
এ.আইদা য়ুম্ফম ওইবা থবকশিং অমসুং দিজিতেল সর্ভেশিংগী থৌদাংগী মতাংদা, প্রধান মন্ত্রীনা হায়খি মদুদি মহৈলোয়শঙশিং অমসুং ওন্ত্রেপ্রেন্যুরশিংনা তেক্নোলোজি শীজিন্নরবা মতম খক্তদা তেক্নোলোজিগী কান্নবা ফলশিং ফংই। কমদৌনা মমাংঙৈগী থবকশিংগা তেক্নোলোজিগা পুনশিনগনি হায়বা খঙবা দরকার ওই। কমদৌনা ঐখোয়না চুম্না তেক্নোলোজিগা পুন্না থবক তৌমিন্নগনি হায়বদা ৱেবিনার অসিনা মরুওইবা থৌদাং অমা লৌগনি।
প্রধান মন্ত্রীনা হায়খি মদুদি পি.এম অৱাস য়োজনা অমসুং পি.এম গ্রাম সরক য়োজনাগুম্বা স্কিমশিংগী খুৎথাংদা খুঙ্গং নুংঙাই য়াইফনবা সরকারনা থবক পায়খৎলি। খুঙ্গংগী শেন্মিৎলোন্দা সেল্ফ হেল্প গ্রুপশিংনা কান্নবা পীরি। খুঙ্গংগী শেন-থুমগী ফিবম ফগৎনবা ঐখোয়গী সরকারনা থবক পায়খৎলে।
লাখপতি দিদি খোঙজংগী মতাংদা পল্লদুনা, প্রধান মন্ত্রীনা হায়খি মদুদি ২০২৯ ফাওবা মাইপাক্লবা নুপী ওন্ত্রেপ্রেন্যুর করোর ৩ রোম শেমগৎনবা পান্দম অমা থম্লি। খোঙজেল য়াংনা কমদৌনা পান্দম অসি ফংবা ঙমগনি হায়বগী মতাংদা পাউতাকশিং পীরক্কদবনি। কমদৌনা খোঙজেল য়াংনা পান্দম অসি ফংবা ঙমগনি হায়বগী মতাংদা অদোমগী পাউতাকশিং য়াম্না কান্নগনি।
লোইশিল্লকপদা, প্রধান মন্ত্রীনা হায়খি মদুদি এগ্রি-ফিন্তেক অমসুং সপ্লাই চেনশিংদা অনৌবা থবকশিং পায়খৎপা দরকার ওইরে। খুঙ্গংগী ফিবম ফগৎহন্নবা হায়রিবা মরুওইবা হিরমশিংদা ওন্ত্রেপ্রেন্যুরশিংনা শেন হেন্না থাদগদবনি। অদোমগী খন্ন-নৈনবশিংদগী ফংলকপা ফল অদুনা খুঙ্গংগী শেন্মিৎলোন্দা অনৌবা থৌনা হাপকনি হায়বা ঐনা থাজৈ।
