প্রধান মন্ত্রী শ্রী নরেন্দ্র মোদীনা ঙসি অঙনবদা শিল্লোংদা পাঙথোকখিবা নোর্থ ইস্তর্ন কাউন্সিল (এন.ই.সি.)গী মীফমদা ৱা ঙাংখ্রে। মীফম অসিনা ইং কুমজা ১৯৭২দা হৌনবী মতুং ইন্না শেমিবা নোর্থ ইস্তর্ন কাউন্সিলগী গোল্দন জুবিলীগী পালন থৌরম ওইরি।
অৱাং নোংপোক লমদমগী চাউখৎ থৌরাংদা এন.ই.সি.না শরুক তমখিবা অদুবু থাগৎলদুনা প্রধান মন্ত্রীনা হায়খি মদুদি এন.ই.সি.গী গোল্দন জুবিলীগী থৌরম অসি আজাদী কা অমৃত মহোৎসব চত্থরিঙৈদা চান্ননা তাররে। লমদম অসিগী রাজ্য ৮বু মহাক্না অস্ত লক্ষ্মী হায়না তোইনা কৌই ফোঙদোক্লদুনা মহাক্না হায় সরকার অসিনা মাগী চাউখৎ-থৌরাংগী য়ুম্ফম ওইরিবা য়ুম্বী ৮দা থবক পাইখৎকদবনি মখোয় অদুদি, শান্তি, শক্তি, তুরিজম, ফাইবজি কন্নেক্তিবিতী, নাৎ, মহৌশাগী লৌউ পথাপ, শান্ন-খোৎনবা, মতিক ময়াইনি।
প্রধান মন্ত্রীনা হায়খি মদুদি অৱাং নোংপোক অসি খা নোংপোক এসিয়াগী গেৎৱানি অমসুং অপুনবা লমদম অসিগী চাউখৎ-থৌরাংগী ময়োললম অমা ওইবা য়াগনি। অমসুং লমদম অসিগী মতিক ময়াই অসি মঙফাওনবা ঙম্নবা ইন্দিয়ন-ম্যান্মার-থাইলেন্দ ত্রাইলেতরেল হায়ৱে অমসুং অগরতলা-অখৌরা রেল প্রোজেক্তগুম্বা প্রোজেক্তশিংদা থবক পাইখৎলি। প্রধান মন্ত্রীনা হায়খি সরকারনা‘লুক ইস্ত’ পোলিসীবু ‘এক্ত ইস্ত’ ওন্থোকপগী মথক্তা হেন্না পাইখৎখি, হৌজিক মাগী পোলিসী অসি ‘এক্ত ফার্স্ত ফোর নোর্থইস্ত’ অমসুং ‘এক্ত ফর্স্ত ফোর নোর্থইস্ত’ ওইরে। লমদম অসিদা শান্তি পুরক্নবা থৌশিলশিং মাইপাকপা অদুগী মতাংদা পল্লদুনা মহাক্না হায়খি পীচ এগ্রীমেন্ত কয়া খুৎয়েক পীনখ্রে, ইন্তর-স্তেৎ বাউন্দরী এগ্রীমেন্তশিং অয়াবা পীখ্রে অমসুং এক্সত্রিজমগী থৌওংশিংদা চাউনা হন্থরকপা উবা ফংখি।
নেৎ জিরো ওইহন্নবা মাইকৈদা ভারতকী ফিরেপকী মতাংদা খন্নরদুনা প্রধান মন্ত্রীনা হায় অৱাং নোংপোক্না হাইদ্রোপাৱরগী পাৱরহাউস ওইবা ঙমগনি। মসিনা লমদম অসিসী রাজ্যশিংবু পাৱর সর্প্লস ওইহনগনি, ইন্দস্ত্রীশিং পাকথোক চাউথোকহনবা ঙমগনি অমসুং থবক মশিং য়াম্না পীবা ঙমগনি। লমদম অসিগ তুরিজমগী মতিক-ময়াইগী মতাংদা খন্নরদুনা মহাক্না হায় লমদম অসিগী নাৎ অমদি মহৌশা অনিমক্না মালেম শিনবা থুংবদগী লমকোইবশিংগী মীৎয়েং চীংশিনগনি। মহাক্না মখা তারদুনা হায় লমদম অসিদা তুরিজম সর্কিৎশিং মশক খঙদোক্লি অমসুং শেমগৎলি। মহাক্না তোঙান-তোঙানবা লমদমশিংগী মীয়ামবু নকশিন্নবদা মতেং পাংনবা য়ুনিভর্সিতী ১০০দগী মহৈরোয়শিংবু অৱাং নোংপোক্তা থানবগী মতাংদসু খন্নখি। মহৈরোয়শিং অসিনা লমদম অসিগী এম্বেসেদরশিং ওইবা য়াগনি।
লমদম অসিদা কন্নেক্তিবিতী শাহৌ পীনবগী মতাংদা ৱা ঙাংলদুনা প্রধান মন্ত্রীনা হায়খি দিকেদ কয়াদগী পন্দুনা লৈরকখিবা মমিং লৈরবা থোংগী প্রোজেক্তশিং হৌজিক্তি লোইশিনবা ঙম্লে। হৌখিবা চহি ৯ অসিদা লমদম অসিদা এয়রপোর্তশিংগী মশিং ৯দগী ১৬তা হেনগৎহনবা ঙমখি অমসুং ফ্লাইৎশিংগী মশিংসু ২০১৪দা ৯০০ লৈরম্বদগী ১৯০০রোমদা হেনহনখি। অহানবা ওইনা রেলৱে মেপতা অৱাং নোংপোক্কী রাজ্য কয়া য়াওবা ফংজরে অমসুং ৱাতরৱেশিংসু পাকথোক চাউথোকহন্নবা খোঙথাংশিং লৌখৎলি। লমদম অসিদা ২০১৪দগী হৌনা নেস্নেল হায়ৱেশিংগী অশাংবা অসি ৫০% হেনগৎহনখি। মহাক্না হায়খি পি.এম.-দিভাইন স্কিম হৌদোকপগা লোয়ননা অৱাং নোংপোক্কী ইনফ্রাস্ত্রকচর প্রোজেক্তশিং অসি চাউনা খুমাং চাউশিনখি। মহাক্না মখা তারদুনা হায় মদুদি সরকার অসিনা ওপতিকেল ফাইবর নেৎৱার্কশিং হেনগৎহন্দুনা অৱাং নোংপোক্তা দিজিতেল কন্নেক্তিবিতী হেনগৎহন্নবগী থবকসু পাইখৎলি। আত্মনির্ভর ফাইবজি ইনফ্রাস্ত্রকচর চাউখৎলক্লিবা অসিগী মতাংদা ৱা ঙাংলদুনা মহাক্না হায় ফাইবজিনা লমদম অসিদা স্তার্তঅপ ইকোসিস্তেম, সর্ভিস সেক্তর অমদি অতোপ্পা কয়া চাউখৎহনবদা হেন্না মতেং পাংলগনি। মহাক্না হায়খি সরকার অসিনা অৱাং নোংপোকপু ইকনোমিক গ্রোথ খক্তা নত্তনা কলচরেল গ্রোথকী সেন্তর অমা ওইহন্নবা হোৎনরি।
লমদম অসিগী লৌউ-শিংউগী মতিক ময়াইগী মতাংদা ঙাংলদুনা প্রধান মন্ত্রীনা হায়খি মহৌশাগী লৌউ-পথাপকী লম অসিনা অৱাং নোংপোক্তা মরু ওইবা থৌদাং অমা লৌরগনি। মহাক্না হায়খি মদুদি কৃশি উরানগী খুত্থাংদা লমদম অসিগী লৌমীশিংনা মখোয়গী প্রদক্তশিংবু লৈবাক শিনবা থুংনা অমদি মালেমগী তোঙান-তোঙানবা শরুকশিংদা থাবা ঙম্লে। মহাক্না অৱাং নোংপোক্কী রাজ্যশিংদা হৌজিক চত্থরিবা নেস্নেল মিসন ওন ইদিবল ওইল্স – ওইল পামদা শরুক য়াবীনবা হায়খি। মহাক্না দ্রোনশিংনা লৌমীশিংবু লমিৎ-তুমিৎকী ওইবা শীংনবশিং কোকহনবদা অমসুং মখোয়গী পোত্থোকপু কৈথেলদা য়ৌহনবদা করম্না মতেং পাংবগে হায়বগী মতাংদসু ৱা ঙাংখি।
লমদম অসিনা শান্নখোৎনবগী লমদা শরুক তম্লিবা অসিগী মতাংদা মহাক্না হায় সরকার অসিনা অৱাং নোংপোক্তা লৈরিবা ভারতকী অহানবা স্পোর্তস য়ুনিভর্সিতী চাউখৎহনবগী খুত্থাংদা লমদম অসিগী শান্নরোয়শিংদা মতেং পাংনবগী মাইকৈদা থবক তৌরি। লোয়ননা খেলো ইন্দিয়া সেন্তর ২০০ হেন্না লমদম অসিগী রাজ্য ৮দা অয়াবা পীখ্রে অমসুং লমদম অসিগী শান্নরোয় কয়ানা তোপ্স স্কিমগী মখাদা কান্নবশিং ফংলি।
প্রধান মন্ত্রীনা ভারতকী জি২০ প্রসিদেন্সীগী মতাংদা খন্নখি অমসুং মীফমশিং অসিদা অৱাং নোংপোক্তা মালেম শিনবা থুংবদগী মীওই কয়ানা লাকপা উবা ফংলগনি হায়খি। মহাক্না হায়, মসিনা লমদম অসিগী মহৌশাগী ফজবা, নাৎ অমসুং মতিক-ময়াই অদু উৎথোক্নবা চপ চারবা খুদোংচাবা অমা ওইরগনি।
