ঙসি ভিদিও মেসেজ অমগী খুৎথাংদা প্রধান মন্ত্রী শ্রী নরেন্দ্র মোদীনা গুজরাতকী রোজগার মেলাদা ৱা ঙাংখ্রে।
থৌরম অদুদা তিনখিবা মীয়ামদা ৱা ঙাংবা প্রধান মন্ত্রীনা হায়খি য়াওশঙ কুহ্মৈ নকশিল্লক্লে অমসুং গুজরাত রোজগার মেলাদা মখোয়গী এপোইন্তমেন্ত লেত্তরশিং ফংলবশিংগীদমক হরাওবা শরুক অনি ওইরগনি। হন্দক পাংথোক্লিবা রোজগার মেলা অসি গুজরাত্তা পাংথোকপা অনিরকশুবনি। নহারোলশিংদা লেপ্তনা খুদোংচাবশিং পীনবা অমসুং লৈবাক অসি চাউখৎহনবদা মখোয়গী পাঙ্গল অমসুং লৌশিং শীজিন্ননবা সরকারনা থবক পায়খৎলে। থবক খ্বাইদগী য়াম্না ফংহন্নবা কেন্দ্র সরকার অমসুং রাজ্যশিংগী এন.দি.এ সরকারশিংনা লেপ্তনা থবক পায়খৎলি। কেন্দ্র সরকারনা পায়খৎলিবা মেলাশিংগী মথক্তা এন.দি.এনা পানবা রাজ্য অমসুং য়ুনিয়ন তেরিতোরি ১৪দা থবক হাপ্পগী মেলাশিং লেপ্তনা পাংথোক্লি।কৎথোকপগা লোয়ন্না অমৃত কালগী ৱারেপশিং থবক ওইনা পাংথোক্নবা নহারোলশিংনা অনৌবা থৌদাং লৌগদবনি।
প্রধান মন্ত্রীনা হায়খি হৌখিবা চহিশিংদা নহারোল লাখ ১৮ রোম ইমপ্লোইমেন্ত একচেঞ্জশিংগী খুৎথাংদা থবক ফংখিবগী মথক্তা হৌখিবা চহি ৫দা গুজরাত্তা নহারোল লাখ ১.৫ হেন্না রাজ্য সরকারগী থবকশিং ফংখ্রে। থবক হাপ্পগী কেলেন্দর অমা শেমদুনা অপীবা মতমগী মনুংদা গুজরাত সরকারনা থবক লৌবগী থবক পুম্নমক লোইশিল্লে। চহি অসিদা রাজ্য সরকারনা নহারোল লিশিং ২৫ হেনবদা থবক পীনবা থৌরাং তৌরি।দিজিতেল প্লেতফোর্মশিং, মোবাইল এপ্পশিং অমসুং ৱেব পোর্তেলশিং শেমগৎতুনা তেক্নোলোজিগী মতেংগা লোয়ন্না থবক লৌবগী থবকশিং অরোন-অথুপ লৈতনা পাংথোক্লি।
নহারোলশিংদা অনৌবা খুদোংচাবশিং পীনবা হৌজিক পাল্লিবা সরকার অসিনা পায়খৎলিবা থবকশিং পল্লদুনা প্রধান মন্ত্রীনা হায়খি ইনফ্রাস্ত্রকচর অমসুং চাউখৎ-থৌরাংগী প্রোজেকশিং পায়খৎতুনা, মেনুফেকচরিং হেনগৎহন্দুনা অমসুং লৈবাক অসিদা মশানা মশাবু থবক পীজনবা চুনবা ফিবম অমা শেমগৎতুনা হকথেংন্না অমসুং নাকোয়ন্না থবক পীনবা চপ চাবা লাল্লোং অমা শেম্লে। থবক্কী হোংলক্লিবা মওংশিংগা চুন্নবা নহারোলশিংদা স্কিল হেনগৎহন্নবা অমসুং শেন্থং পীনবা সরকারনা অহেনবা মীৎয়েং থমগদবনি।
প্রধান মন্ত্রীনা হায়খি চাউখৎপগী কাংখোঙশিং লেংবা হৌরকপদা, হিরম খুদিংমক্তা থবক ফংবগী খুদোংচাবশিং ফংলকই। লৈবাক অসিদা ইনফ্রাস্ত্রকচর প্রোজেকশিং, ইনফোর্মেসন তেক্নোলোজি অমসুং অতোপ্পা হীরমশিং চাউখৎনবা লুপা করোর কয়া চাদিং তৌরে। গুজরাত রাজ্য খক্তদা লুপা করোর লাখ ১.২৫ রোমগী প্রোজেকশিং পায়খৎলে অমসুং চহি অসিগী বজেত্তা ইনফ্রাস্ত্রকচরগী লুপা করোর লাখ ১০গী শেনফম কাইথোক্লে।
প্রধান মন্ত্রীনা হায়খি লাক্লিবা চহি খর অসিদা ভারত খ্বাইদগী চাউবা মেনুফেকচরিংগী মফম অমা ওইরক্কনি হায়না মালেম শীনবা থুংবগী অখঙ-অহৈশিংনা থাজনরি। ভারত্তা মসিগী অওনবা অসি পুরকপদা নহারোলশিংনা মাংজিল থাগনি। লুপা করোর লিশিং ২০ থাদুনা গুজরাতকী দাহোরদা রেলৱে ইঞ্জিন ফেক্তরি অমা শেমগৎলে অমসুং তুংদা সেমিকন্দক্তরশিং শানবা অচৌবা মফম অমসু ওইরক্লগনি।
প্রধান মন্ত্রীনা মখা তানা হায়খি সরকারনা পায়খৎপা অচুম্বা চাউখৎ-থৌরাংনা পাক-শন্না থবক পীরে। স্তার্দ-অপশিং চাউখৎহন্নবা থৌশিল শেম্বদা মরুওইবা অহোংবা পুরক্নবা থৌরাং অমা পায়খৎলে। ঙসি লৈবাক অসিদা স্তার্দ-অপ লিশিং ৯০ হেন্না থবক তৌরে অমসুং মসিগী ফল ওইনা নহারোল মিল্লিয়ন কয়া মশানা মশাবু থবক পীজনবা পুক্নিং থৌগৎলে। বেঙ্ক গরেন্তি য়াওদনা সরকারনা শেন্থং পীরে। সেল্প হেল্প গ্রুপশিংদা য়াওদুনা নুপী মিল্লিয়ন কয়া মশা মথন্থ লেপচবা ঙম্লে অমসুং সরকারনা লুপা করোর কয়াগী শেন্থং পীরি।
লৈবাক অসিদা অনৌবা খুদোংচাবা কয়া লাক্কদৌরিবা অসিগীদমক হৈথোই-শিংথোইবা শিন্মীশিং পুথোক্নবা থৌরাং তৌনবা তকশিল্লদুনা প্রধান মন্ত্রীনা হায়খি ভারতনা মালেমদা অহুমশুবা খ্বাইদগী চাউবা ইকোনোমি ওইনবা খুদোংচাবা লৈরে। স্কিল হেনগৎহনবগী খুদোংচাবশিং খুন্নাইগী কাংলুপ খুদিংমক্না লৌগদবনি, মসিনা দলিদশিং, তোল্লবশিং, ত্রাইবেলশিং অমসুং নু্পীশিংদা চপ মান্নবা খুদোংচাবা পীগনি। নহারোলশিংগী হৈথোই-শিংথোইবা হেনগৎহন্নবা মরুওইবা মীৎয়েং চঙলে। অনৌবা তেক্নোলোজিগী খুৎথাংদা নহারোলশিং ত্রেনিং পীনবা পি.এম কাউসাল বিকাস য়োজনাগী মখাদা স্কিল ইন্দিয়া ইন্তরনেসনেল সেন্তর ৩০ লিংখৎলগনি।
শ্রী মোদীনা মখা তানা হায়খি পি.এম বিশ্বকর্মা য়োজনাগী মখাদা লায়রবা অপীকপা খুৎহৈবশিং ত্রেনিং পীদুনা মখোয়গী পোৎথোকশিং মালেমগী কৈথেলশিংদা য়ৌহন্নবা লম্বী অমা শেম্লে। থবক্কী মওং হোংলক্লিবা অসিগী মতুংইন্না নহারোলশিং লেপ্তনা থৌরাং তৌনবা আই.তি.আইশিংগী থৌদাং য়াম্না চাউই। গুজরাত্তা আই.তি.আই মশিং অমসুং সিত মশিং হেনগৎহল্লে। গুজরাত্তা আই.তি.আই ৬০০না সিত লাখ ২ রোমদা তোঙান-তোঙানবা স্কিলশিংদা ত্রেনিং পীরি। গুজরাত্তা আই.তি.আইশিংদগী থোরকপা নহারোলশিং থবক লাইনা ফংবা অসিদা অপেনবা পোকই।
প্রধান মন্ত্রীনা হায়খি নিংতম্বা ফংলবা মতুংদা চহি কয়া মীরাইদুনা লাক্লবা থবক পীবা হায়বা হিরম অসি চাউখৎহন্নবা সরকারনা মীৎয়েং চঙলে। রাজ্য অসিদা অনৌবা লমকোয়ফম ৫০ শেমগৎনবা বজেত্তা লাউথোক্লে অমসুং কেবারিয়া-আতা নাগরদা লৈরিবা য়ুনিতি মোল অসিগী মওংদা রাজ্য খুদিংমক্তা য়ুনিতি মোল অমমম শাগৎলগনি অমসুং হায়রিবা মোলশিং অদুদা লৈবাক অসিগী অখন্নবা পোৎথোকশিং য়োকখৎকনি। এক্লাব্যা স্কুলশিংদা ওজা লিশিং ৪০ রোম থবক হাপ্নবা থৌরাং অমা লৈরে।
মহাক্কী ৱারোল লোইশিল্লকপদা, প্রধান মন্ত্রীনা হায়খি করিগুম্বা সরকারগী থবক অমা ফংবা হায়বসিনা মখোয়গী পান্দম ওইরবদি নহারোলশিং মশা মরোমদোম ফগৎলকপা অসি লেপখিগনি। কন্না হোৎনবা অমসুং কৎথোকপদগী মখোয় সরকারগী থবক ফংলকপনি অমসুং মখোয়গী পুন্সি মখা তানা চাউখৎনবা করিগুম্বা অনৌবা খর তমগদবনি। তোঙান-তোঙানবা ওনলাইন কোর্সশিং অয়াম্বা কর্মায়োগী ভারত ওনলাইন প্লেতফোর্মদা তমগদবনি। নহাক থবক তৌরিবা মফম খুদিংমক্তা, নহাক্কী হৈশিংবা হেনগৎনবা অখন্নবা মীৎয়েং চঙগদবনি। সরকারগী থবক তৌরিবা মীওই খুদিংমক অফবা ত্রেনিং পীবা হায়বসি ঐখোয়গী পান্দম্নি।
