মরুপশিং,
মফম খুদিংমক্তা য়াওশঙ কুহ্মৈগী খোন্থাংনা নীল্লি। ঐহাক্না পুম্নমক্না য়াওশঙনা লাকপদা য়াইফ পাউজেল পীজরি। ঙসিগী থৌরম অসিনস য়াওশঙগী মরু ওইবা কুহ্মৈগা ইরোইননা ইমুং লিশিং কয়াগী হরাও তয়াম্বা হেনগৎহল্লগনি। অতেনবা মতমগী মনুংদা গুজরাত্তা অনিরক শুবা ওইনা রোজগার মেলা পাঙথোক্লি। ঐহাক্না মুখ্য মন্ত্রী শ্রী ভুপেন্দ্র ভাই অমসুং মহাক্কী অপুনবা তীমবু খোঙথাং অসিগীদমক থাগৎপা ফোঙদোকচরি।
মরুপশিং,
মসি ভারতিয় জনতা পার্তীগী সরকারশিং অমসুং ঐখোয় পুম্নমক্না নহারোলশিংদা খুদোংচাবশিং পীনবা অমসুং লৈবাক্কী চাউখৎ-থৌরাংদা মখোয়গী তৌবা ঙম্বা অদু শীজিন্ননবা মাইকৈদা লৌখিবা ফিরেপকী খুদম অমনি। নহারোলশিংদা লেপ্তনা খুদোংচাবশিং পীনবা অমসুং লৈবাক অসি চাউখৎহনবদা মখোয়গী পাঙ্গল অমসুং লৌশিং শীজিন্ননবা সরকারনা থবক পায়খৎলে। থবক খ্বাইদগী য়াম্না ফংহন্নবা কেন্দ্র সরকার অমসুং রাজ্যশিংগী এন.দি.এ সরকারশিংনা লেপ্তনা থবক পায়খৎলিবা অসিদা ঐহাক্না নুংঙাইবা পোকই। কেন্দ্র সরকারনা পায়খৎলিবা মেলাশিংগী মথক্তা এন.দি.এনা পানবা রাজ্য অমসুং য়ুনিয়ন তেরিতোরি ১৪দা থবক হাপ্পগী মেলাশিং লেপ্তনা পাংথোক্লি। ঐহাক্না এপোইন্তমেন্ত লেত্তরশিং পীখিবা নহারোলশিংদা মখোয়গী তুংগী পুন্সি অমসুং মখোয়গী ইমুং মনুংগী নুংঙাইবা অমদি চাউখৎপা ওইনা য়াইফ-মঙ্গোল পীজরি। নহারোলশিংনা অনৌবা থৌদাংশিং লৌদুনা কৎথোকপগা লোয়ননা অমৃত কালগী ৱারেপশিং থবক ওইনা পাংথোক্নবা থৌদাং লৌগনি হায়না ঐহাক্না থাজৈ।
মরুপশিং,
এমপ্লোইমেন্ত একচেঞ্জকী খুত্থাংদা হৌখিবা চহিশিংদা নহারোল লাখ ১৮ রোম ইমপ্লোইমেন্ত একচেঞ্জশিংগী খুৎথাংদা থবক ফংখিবগী মথক্তা হৌখিবা চহি ৫দা গুজরাত্তা নহারোল লাখ ১.৫ হেন্না রাজ্য সরকারগী থবকশিং ফংখ্রে। থবক হাপ্পগী কেলেন্দর অমা শেমদুনা অপীবা মতমগী মনুংদা গুজরাত সরকারনা থবক লৌবগী থবক পুম্নমক লোইশিল্লে। চহি অসিদা রাজ্য সরকারনা নহারোল লিশিং ২৫ হেনবদা থবক পীনবা থৌরাং তৌরি। দিজিতেল প্লেতফোর্মশিং, মোবাইল এপ্পশিং অমসুং ৱেব পোর্তেলশিং শেমগৎতুনা তেক্নোলোজিগী মতেংগা লোয়ননা থবক লৌবগী থবকশিং অরোন-অথুপ লৈতনা পাংথোক্লি।
মরুপশিং,
নহারোলশিংদা অনৌবা খুদোংচাবশিং পীনবা হৌজিক পাল্লিবা সরকার অসিনা থবকশিং পায়খৎলি। চাউখৎ-থৌরাংগী প্রোজেকশিং পায়খৎতুনা, মেনুফেকচরিং হেনগৎহন্দুনা অমসুং লৈবাক অসিদা মশানা মশাবু থবক পীজনবা চুনবা ফিবম অমা শেমগৎতুনা হকথেংন্না অমসুং নাকোয়ন্না থবক পীনবা চপ চাবা লাল্লোং অমা শেম্লে। থবক্কী হোংলক্লিবা মওংশিংগা চুন্নবা নহারোলশিংদা স্কিল হেনগৎহন্নবা অমসুং শেন্থং পীনবা সরকারনা অহেনবা মীৎয়েং থমগদবনি।
মরুপশিং,
চাউখৎপগী কাংখোঙশিং লেংবা হৌরকপদা, সেক্তর খুদিংমক্তা থবক ফংবগী খুদোংচাবশিং ফংলকই। ঙসি লৈবাক অসিদা ইনফ্রাস্ত্রকচর প্রোজেকশিং, ইনফোর্মেসন তেক্নোলোজি অমসুং অতোপ্পা হীরমশিং চাউখৎনবা লুপা করোর লাখ কয়া চাদিং তৌরে। গুজরাত রাজ্য খক্তদা লুপা করোর লাখ ১.২৫ রোমগী প্রোজেকশিং কেন্দ্র সরকারনা পায়খৎলে অমসুং চহি অসিগী বজেৎতা ইনফ্রাস্ত্রকচরগী লুপা করোর লাখ ১০গী শেনফম কাইথোক্লে। লুপা করোর লাখ কয়া ইনভেস্তমেন্ত তৌবনা থবক লাখ কয়া পীরি।
মরুপশিং,
লাক্লিবা চহি খর অসিদা ভারত খ্বাইদগী চাউবা মেনুফেকচরিংগী মফম অমা ওইরক্কনি হায়না মালেম শীনবা থুংবগী অখঙ-অহৈশিংনা থাজনরি। মসিদা গুজরাতনা অচৌবা থৌদাং অমা লৌখি। ভারত্তা মসিগী অওনবা অসি পুরকপদা নহারোলশিংনা মাংজিল থাগনি। হৌজিক গুজরাতকী দাহোদতা লৈবা ঐখোয়গী ত্রাইবেল মফমশিং অসি অমরোমদা শোত্থদুনা লৈরিবা মফমশিংনি। লুপা করোর লিশিং ২০ থাদুনা গুজরাতকী দাহোরদা রেলৱে ইঞ্জিন ফেক্তরি অমা শেমগৎলে অমসুং তুংদা সেমিকন্দক্তরশিং শানবা অচৌবা মফম অমসু ওইরক্লগনি। খোঙথাংশিং অসিনা গুজরাত্তা অনৌবা থবক্কী খুদোংচাবা লিশিং কয়াসু পীরগনি।
মরুপশিং,
ঙসি সরকারনা পায়খৎপা হোলিস্তিক এপ্রোচতগী হেন্না থবক পীবগী খোঙথাং পাকশন্না পায়খৎলি। পোলিসীগী থাক্তা মরু ওইবা অহোংবশিং পুরক্লি অনৌবা অহোংবশিং অসিনা স্তার্দ-অপশিং চাউখৎহন্নবা মাইকৈদা চংশিল্লি। ঙসি লৈবাক অসিদা স্তার্দ-অপ লিশিং ৯০ হেন্না থবক তৌরে অমসুং মখোয়না তায়র ২ অমসুং তায়র ৩ সহরশিংদা শন্দোক্লি। মসিগী ফল ওইনা নহারোল মিল্লিয়ন কয়া মশানা মশাবু থবক পীজনবা পুক্নিং থৌগৎলে। বেঙ্ক গরেন্তি য়াওদনা সরকারনা শেন্থং পীরে। মুদ্রা য়োজনা অমসুং স্তেন্দঅপ ইন্দিয়া য়োজনাদগী সেল্ফ হেল্প গ্রুপশিংদা য়াওদুনা নুপী মিল্লিয়ন কয়া মশা মথন্থ লেপচবা ঙম্লে অমসুং সরকারনা লুপা করোর কয়াগী শেন্থং পীরি।
মরুপশিং,
লৈবাক অসিদা অনৌবা খুদোংচাবা কয়া লাক্কদৌরিবা অসিগীদমক হৈথোই-শিংথোইবা শিন্মীশিং পুথোক্নবা থৌরাং তৌবা মথৌ তাই। নহারোলশিংগী স্কিলশিংগী শক্তিগা লোয়ননা ভারতনা মালেমদা অহুমশুবা খ্বাইদগী চাউবা ইকোনোমি ওইবা ঙমগনি। খুন্নাইগী কাংলুপ খুদিংমক্না স্কিল দিবেলপমেন্তগী কান্নবা ফংহনবা হায়বা অসি ঐখোয়গী খোঙথাংনি। দলিত ইচিম-ইনাওশিংগী, ঐখোয়গী ত্রাইবেল ইচিল-ইনাওশিং, ঐখোয়গী শোত্থরবা কাংলুপশিং, ঐখোয়গী ইমা অমদি ইচে-ইচলশিং, মীপুম খুদিংমক্না মাংদা চংশিন্নবা চপ মান্নবা খুদোংচাবা ফংগনি। মসি খঙনা নহারোলশিংগী স্কিল দিবেলপমেন্ত হেনগৎহন্নবা মরুওইবা মীৎয়েং চঙলে। নহারোলশিং ত্রেনিং পীনবা পি.এম কাউসাল বিকাস য়োজনাগী মখাদা স্কিল ইন্দিয়া ইন্তরনেসনেল সেন্তর ৩০ লিংখৎলগনি। মসিদা ন্যু এজ তেক্নোলোজীগী খুত্থাংদা নহারোলশিংনা ত্রেনিং ফংলি। পি.এম বিশ্বকর্মা য়োজনাগী মখাদা অপীকপা খুৎহৈবশিং ত্রেনিং পীবগী মথক্তা মখোয়বু এম.এস.এম.ই.শিংগী লিঙ্কসু তৌখি। থবকশিংগী মওং মতৌদা হোংলক্লিবা অসিগী মতুংইন্না নহারোলশিং লেপ্তনা থৌরাং তৌনবা ঐখোয়না হোৎনরি। মসিদা ঐখোয়গী আই.তি.আইশিংগী থৌদাং য়াম্না চাউই। গুজরাত্তা আই.তি.আই মশিং অমসুং সিত মশিং লেপ্পা লৈতনা হেনগৎলক্লি। ঙসি গুজরাত খক্তদা আই.তি.আই ৬০০না সিত লাখ ২ রোমদা তোঙান-তোঙানবা স্কিলশিংদা ত্রেনিং পীরি। ত্রেনিং প্রোগ্রাম অসি লৈবাক্কী মথৌ তাবশিংগী মতুং ইন্না অপদেৎ তৌরি। গুজরাত্তা আই.তি.আইশিংদগী থোরকপা নহারোলশিং থবক লাইনা ফংবা অসিদা অপেনবা পোকই।
মরুপশিং,
নিংতম্বা ফংলবা মতুংদা চহি কয়া মীরাইদুনা লাক্লবা থবক পীবা হায়বা হিরম অসি চাউখৎহন্নবা সরকারনা মীৎয়েং চঙলি। রাজ্য অসিদা অনৌবা লমকোয়ফম ৫০ শেমগৎনবা বজেৎতা লাউথোক্লে অমসুং কেবারিয়া-আক্তা নাগরদা লৈরিবা য়ুনিতি মোল অসিগী মওংদা রাজ্য খুদিংমক্তা য়ুনিতি মোল অমমম শাগৎলগনি অমসুং হায়রিবা মোলশিং অদুদা লৈবাক অসিগী অখন্নবা পোৎথোকশিং য়োকখৎকনি। খোঙথাংশিং অসিগা লোয়ননা মীওই লাখ কয়াদা অনৌবা থবক্কী খুদোংচাবশিং পীখি। মসিগী মথক্তা এক্লাব্যা স্কুলশিংদা ওজা লিশিং ৪০ রোম থবক হাপ্নবা প্রোবিজন অমা শেমখি।
মরুপশিং,
গুজরাত সরকারগা লোয়ননা মরী থমদুনা শেবা তৌনবগীদমক নখোয় পুম্নমক্না খুদোংচাবা অমা ফংলি। মসি মহৌশানা অদোম অমদি অদোমগী ইমুং মনুংগী নুংঙাইরবা মীকুপ অমনি। অদুবু মরুপশিংনা নখোয়না নীংশিংগদবদি মসি অহৌবনি। অনৌবা খোঙচৎ অমা হৌরিবনি। করিগুম্বা সরকারগী থবক অমা ফংবা হায়বসিনা মখোয়গী পান্দম ওইরবদি নহারোলশিং মশা মরোমদোম ফগৎলকপা অসি লেপখিগনি। কন্না হোৎনবা অমসুং কৎথোকপদগী মখোয় সরকারগী থবক ফংলকপনি অমসুং মখোয়গী পুন্সি মখা তানা চাউখৎনবা করিগুম্বা অনৌবা খর তমগদবনি। তোঙান-তোঙানবা ওনলাইন কোর্সশিং অয়াম্বা কর্মায়োগী ভারত ওনলাইন প্লেতফোর্মদা তমগদবনি। নহাক থবক তৌরিবা মফম খুদিংমক্তা, নহাক্কী হৈশিংবা হেনগৎনবা অখন্নবা মীৎয়েং চঙগদবনি। সরকারগী থবক তৌরিবা মীওই খুদিংমক অফবা ত্রেনিং পীবা হায়বসি ঐখোয়গী পান্দম্নি। মাইকৈ অসিদা ঐখোয়না কর্ময়োগী ভারত ওনলাইন প্লেৎফোর্ম হৌদোকখি। পোর্তেল অসিদা য়াওরিবা তোঙান-তোঙানবা ওনলাইন কোর্সশিং অসিগী চাউনা কান্নবা লৌবীগদবনি অমসুং লেপ্পা লৈতনা মহৈ তম্বনা নখোয়গী খুমাং চাউশিনবদা অচৌবা খুৎলাই অমা ওইগনি।
মরুপশিং,
য়াইফরবা অহৌবা অসিগীদমক অদোম অমদি অদোমগী ইমুং মনুংগী মীওইশিংদা ঐহাক্না য়াইফ মঙ্গোল পীজরি। ঐহাক্কী গুজরাতকী ইচিল-ইনাওশিংদা ঐহাক্না য়াওশঙগী য়াইফ পাউজেল পীজরি। হন্না-হন্না থাগৎচরি।
