প্রধান মন্ত্রী শ্রী নরেন্দ্র মোদীনা ঙসি অঙনবদা দিল্লীদা চীফ সেক্রেতরীশিংগী অনিশুবা জাতিগী থাক্কী মীফমদা ৱা ঙাংখ্রে।
প্রধান মন্ত্রীনা জুন ২০২২দা পাঙথোকখিবা অকোনবা মীফমগী মতুংদা লৈবাক অসিনা চাউখৎপগী লমদা পুরকখিবা মাইপাকপশিংগী মতাংদা নীংশিংখি, ভারনা জি২০গী প্রসিদেন্সী য়ৌবা ঙম্বা, মালেমগী মঙাশুবা খ্বাইদগী চাউবা ইকনোমী ওইরকপা, অনৌবা স্তার্তঅপশিংগী খোঙজেল য়াংনা রেজিস্ত্রেসন তৌবা, স্পেস সেক্তরদা প্রাইবেৎ প্লেয়রশিং চংশিল্লকপা, নেস্নেল লোজিস্তিক্স পোলিসী হৌদোকপা, নেস্নেল গ্রীন হাইদ্রোজেন মিসন অয়াবা পীখিবা অসিগুম্বা খুদম কয়ামরুম পীখি। মহাক্না রাজ্যশিং অমসুং কেন্দ্রনা পুন্না থবক তৌমিন্নগদবনি অমসুং চাউখৎপগী খোঙজেল য়াংশিনহনগদবনি হায়না ফোঙদোকখি।
প্রধান মন্ত্রীনা হায়খি চাউখৎপা ভারত অমা ওইহন্নবগীদমক লৈবাক অসিনা ইনফ্রাস্ত্রকচর, ইনভেস্তমেন্ত, ইন্নোভেসন অমসুং ইনক্লুজনগী য়ুম্বী মরিদা মীৎয়েং চংলি। মহাক্না হায়খি মদুদি ঙসি মালেম পুম্বনা ভারত্তা মাগী থাজবা থম্মি অমসুং ঐখোয়বু গ্লোবেল সপ্লাই চেন চেৎশিনহনবা ঙমগদবা লৈবাক অমা ওইনা উরি। মহাক্না হায় মদুদি করিগুম্বা রাজ্যশিংনা মাংজিল থাদুনা, ক্বালিতীদা মীৎয়েং থমদুনা অমসুং ইন্দিয়া-ফর্স্ত এপ্রোচ অমগা লোয়ননা ৱারেপ লৌরবা খক্তদা লৈবাক অসিনা মসিগী কান্নবা অসি মপুং ফানা লৌবা ঙমগনি। মহাক্না মখা তারদুনা হায় মদুদি রাজ্যশিংনা প্রো-দিবেলপমেন্ত গভর্নান্স, ইজ ওফ দুইং বিজিনেস, ইজ ওফ লিভিং অমসুং মপাঙ্গল কনবা ইনফ্রাস্ত্রকচরগী প্রোভিজন্দা মীৎয়েং থমগদবনি।
এস্পিরেস্নেল ব্লোক প্রোগ্রাম হৌদোক্লদুনা প্রধান মন্ত্রীনা এস্পিরেস্নেল দিস্ত্রিক্ত প্রোগ্রাম মখাদা লৈবাক অসিদা তোঙান-তোঙানবা এস্পিরেস্নেল দিস্ত্রিক্ততা মাইপাকখিবশিং অদুগী মতাংদা পাউদমখি। মহাক্না মখা তারদুনা হায় এস্পিরেস্নেল দিস্ত্রিক্ত মোদেল অসি এস্পিরেস্নেল ব্লোক প্রোগ্রামগী মওংদা ব্লোক্কী থাক্তা হৌজিক পাইখৎকদবনি। মহাক্না মীফম অদুদা য়াওখিবা ওফিসিএলশিংদা মখোয়গী মশাগী রাজ্যশিংদা এস্পিরেস্নেল ব্লোক প্রোগ্রাম ইমপ্লিমেন্ত তৌনবা হায়খি।
এম.এস.এম.ই.শিংগী মতাংদা খন্ন-নৈনরদুনা প্রধান মন্ত্রীনা হায়খি মদুদি রাজ্যশিংনা এম.এস.এম.ই,.শিং ফোর্মেসলাইজেসন তৌনবা মাইকৈদা প্রোএক্তিব ওইনা থবক তৌগদবনি। মহাক্না হায় মদুদি এম.এস.এম.ই.শিং অসিবু মালেমগী থাক্তা চাংদম্নবা ঙম্বা ওইহন্নবা ঐখোয়না ফাইনান্স, তেক্নোলোজী, মার্কেৎ অমসুং স্কিল্লিংগী এক্সেস ফংহনবা মথৌ তাই। মহাক্না জি.ই.এম. পোর্তেলদা এম.এস.এম.ই. হেন্না য়াওহন্নবগী মতাংদসু খন্নখি। মহাক্না হায় মদুদি ঐখোয়না এম.এস.এম.ই.শিংবু গ্লোবেল চেম্পিয়ন ওইহন্নবা অমসুং গ্লোবেল ভেল্যু চেনগী শরুক ওইহন্নবা খোঙথাংশিং লৌখৎপা তাই। এম.এস.এম.ই.শিং চাউখৎহন্নবা ক্লস্তর এপ্রোচ পাইখৎপদা মাইপাকপগী মতাংদা খন্নরদুনা প্রধান মন্ত্রীনা এম.এস.এম.ই. ক্লস্তরশিং অমসুং সেল্ফ হেল্প গ্রুপশিং লিঙ্ক তৌদুনা অখন্নবা লোকেল প্রদক্তশিং থৌগৎনবা অমসুং মখোয়গী জি.আই. তেগশিং রেজিস্ত্রেসন তৌনবা, ‘ৱান দিস্ত্রিক্ত ৱান প্রদক্ত’কী থৌশিলগা মখোয়গা মরী লৈনহন্নবা য়াগনি, মসিনা ভোকেল ফোর লোকেলগী খোঙজং অসিদা শাহৌ পীগনি। মহাক্না হায়খি মদুদি রাজ্যশিংনা মখোয়গী খ্বাইদগী ফবা লোকেল প্রদক্তশিং মশক খঙদোক্কদবনি অমসুং মখোয়বু জাতি অমদি মালেমগী থাক য়ৌনবা হোৎনবদা মতেং পাংগদবনি। মতাং অসিদা মহাক্না স্তেচু ওফ য়ুনিতীদা লৈবা একতা মোল অসি খুদম ওইনা পীখি।
প্রধান মন্ত্রীনা লৈবাক অসিনা মতম অমদা মায়োক্নরম্বা কা হেন্না কাংলোন অমসুং অথিংবশিংগী পোৎলুম পুরম্বা অমসুং কেন্দ্র অমসুং রাজ্যগী থাকশিংদা কমপ্লায়েন্স লিশিং কয়া মুত্থৎনবা রিফোর্মশিং পুরকখিবা অদু নীংশিংখি। মহাক্না অরিবা আইনশিং, নীংতম্বদগী অদুমক লৈরক্লবা খরা মুত্থৎপগী মথৌ তাবগী মতাংদসু ঙাংখি।
তোঙান-তোঙানবা সরকারগী বিভাগশিংনা করম্না চপ মান্নবা চে-চাংশিং পুথোক্নবা হায়বগে হায়বগী মতাংদা খন্নরদুনা প্রধান মন্ত্রীনা হায় ঙসি খ্বাইদগী মরু ওইরিবা অসি সেল্ফ-সর্তিফিকেসন, দীম এপ্রুবেল অমসুং ফোর্মশিং স্তেন্দর্দাইজেসন তৌবগী মাইকৈদা চংশিনবা অসিনি। মহাক্না লৈবাক অসিনা ফিজিকেল অমসুং সোসিএল ইনফ্রাস্ত্রকচর অনিমক ফগৎহন্নবা মাইকৈদা করম্না থবক তৌবগে হায়বগী মতাংদসু ৱা ঙাংখি অমসুং পি.এম. গতিশক্তি নেস্নেল মাস্তরপ্লানগী মতাংদা খন্নখি। মহাক্না দেতা সেক্যুরিতী অমসুং তঙাই ফদবা সর্ভিসশিং অপনবা লৈতনা দেলিভরী তৌনবা সেক্যুর তেক্নোলোজী ইনফ্রাস্ত্রকচর লৈবা মরু ওইবগী মতাংদসু ৱা ঙাংখি। মহাক্না হায় রাজ্যশিংনা মপাঙ্গল কনবা সাইবর সেক্যুরিতী স্ত্রেতেজী পাইখৎকদবনি অমসুং মসি তুংলমচৎকীদমক ইন্সুরেন্স অমগুম্বা ইনভেস্তমেন্তনি। সাইবর সেক্যুরিতী ওদিত মেনেজমেন্ত অমসুং ক্রাইসিস মেনেজমেন্ত প্লানশিং শেমগৎপগা মরী লৈনবা হীরমশিংসু মহাক্না খন্নখি।
প্রধান মন্ত্রীনা লৈবাক্কী সমুদ্র তোর্বানগী মফমশিং চাউখৎহনবগী মতাংদসু খন্নখি। মহাক্না হায়খি লৈবাক্কী অচৌবা এক্সক্লুসিব ইকনোমিক জোন অসিদা রিসোর্সশিং লৈ অমসুং লৈবাক্কীদমক অচৌবা খুদোংচাবশিং পীরি। সর্ক্যুলর ইকনোমীগী মরমদা এৱের্নেস হেনগৎহনবগী মথৌ তাবগী মতাংদা পল্লদুনা প্রধান মন্ত্রীনা মিসন লাইফ (লাইফস্তাইল ফোর এনভাইর্নমেন্ত) অমসুং মসি চাউখৎহন্নবদা রাজ্যশিংনা লৌরিবা মরু ওইবা থৌদাংগী মতাংদা ফোঙদোকখি।
ভারতনা পুখৎপদগী য়ুনাইতেদ নেসন্সনা ২০২৩ অসি ইন্তর্নেস্নেল ইয়র ওফ মিল্লেৎস হায়না লাউথোকখিবগী মতাংদা পল্লদুনা প্রধান মন্ত্রীনা হায় মদুদি মিল্লেৎস অসি স্মার্ত ফুদ ওইবতা নত্তনা মসি অকোইবদা শোকহন্দে অমসুং মসিনা সস্তেনেচল ফ্যুচর ফুদ ওইরকপা য়াই। মহাক্না হায় মদুদি রাজ্যশিংনা প্রোসেসিং, পেকেজিং, মার্কেতিং, ব্রান্দিংনচিংবা অমসুং মিল্লেৎকী পোত্থোকশিংগী অপুনবা ভেল্যু এদিসন অসিগুম্বা মিল্লেৎকী পোত্থোক্কা মরী লৈনবা রিসর্চতা থবক পাইখৎপা হৌগদবনি। প্রধান মন্ত্রীনা মরু ওইবা মীয়াম তিনবা মফমশিং অমসুং লৈবাক শিনবা থুংবদা লৈরিবা রাজ্য সরকারগী লোইশঙশিংদা ‘মিল্লেৎ কেফে’ লিংখৎনবা মতাংদসু খন্নখি, মহাক্না মখা তারদুনা হায় রাজ্যশিংদা পাঙথোক্লিবা জি২০ মীফমশিংদা মিল্লেৎশিংগী মতাংদা খঙহনবা য়াগনি।
রাজ্যশিংদা জি২০ মীফমশিংগা মরী লৈননা শেম-শানবগী মতাংদা প্রধান মন্ত্রীনা মীচম প্রজাশিং য়াওশিনবগী মরু ওইবগী মতাংদা ফোঙদোকখি। মহাক্না হায় মদুদি অসিগুম্বা ‘সিতিজেন কন্নেক্ত’ ফংনবগীদমক ক্রিএতিব সোল্যুসনশিং পুথোক্কদবনি। মহাক্না জি২০গা মরী লৈননা শেম-শানবগীদমক দেদিকেতেদ তীম অমা শেম্নবসু পাউতাক পীখি। প্রধান মন্ত্রীনা দ্রগ, ইন্তর্নেস্নেল ক্রাইম, তেরোরিজম অমসুং মপাল লৈবাক্তগী অরানবা পাউ শন্দোরকপা অসিগুম্বনা পীবা শীংনবশিংদগী চেকশিন্নবা রাজ্যশিংদা হায়খি।
প্রধান মন্ত্রীনা ব্যুরোক্রেসীগী কেপাসিতী হেনগৎহনবা অমসুং মিসন কর্ময়োগী হৌদোকপগী মথৌ তাবগী মতাংদা খন্নখি। মহাক্না হায়খি মদুদি রাজ্য সরকারনা মখোয়গী ত্রেনিং ইনফ্রাস্ত্রকচর য়েংশিনগদবনি অমসুং কেপাসিতী বিল্দিং প্রোগ্রামশিং হৌদোক্কদবনি হায়খি।
প্রধান মন্ত্রীনা হায়খি মদুদি তোঙান-তোঙানবা থাকশিংদা লৈবা ওফিসর ৪০০০না চীফ সেক্রেতরীশিংগী মীফম অসি পাঙথোক্নবা হোৎনখি, মসিগীদমক মেন আৱর লাখ ১ লিশিং ১৫ হেন্না ইনভেস্ত তৌখি। মহাক্না হায় মদুদি খোঙথাংশিং অসি থবক ওইনসু উৎপা হৌগদবনি অমসুং রাজ্যশিংনা মীফম অসিদগী লাকপা সজেসনশিংদা য়ুম্ফম ওইবা এক্সন প্লানশিং শেমগৎনবা অমসুং ইমপ্লিমেন্ত তৌনবা হায়খি। মহাক্না মখা তারদুনা হায় নিতি আয়োগনা হীরম অসিদা রাজ্যশিংগী মরক্তা অফবা কম্পিতিসন অমা শেমগৎকদবনি।
