প্রধান মন্ত্রী শ্রী নরেন্দ্র মোদী দিসেম্বর ১১, ২০২২দা মহারাস্ত্র অমদি গোৱাদা চৎকনি।
অয়ুক পুং ৯:৩০রোম তাবা মতমদা, প্রধান মন্ত্রীনা নাগপুর রেলৱে স্তেসন্দা য়ৌদুনা মফমদুদা বন্দে ভারত এক্সপ্রেস লমথাগনি। অয়ুক পুং ১০রোম তারকপা মতমদা, প্রধান মন্ত্রীনা ফ্রীদম পার্ক মেত্রো স্তেসন্দগী খাপ্রি মেত্রো স্তেসনদা মেত্রো তোংদুনা চত্তুনা, মফমদুদা ‘নাগপুর মোত্রো ফেজ ১’ লৈবাক মীয়ামদা কত্থোক্কনি। থৌরম অদুদা, মহাক্না ‘নাগপুর মেত্রো ফেজ ২’গী উরেপ উয়ুংসু তম্লমগনি। অয়ুক পুং ১০:৪৫রোম তাবদা, প্রধান মন্ত্রীনা নাগপুর অমদি সির্দি শম্নহল্লিবা সম্রুদ্ধি মহামার্গকী ফেজ – ১ শঙ্গাগনি অমদি হায়ৱে অদুদা খোঙচৎ অমসু চৎকনি। প্রধান মন্ত্রীনা অয়ুক পুং ১১:১৫রোম তাবদা এইমস নাগপুর লৈবাক মীয়ামদা কত্থোক্কনি।
অয়ুক পুং ১১:৩০রোম তারকপদা, নাগপুরদা পাঙথোক্কদবা মীয়ামগী থৌরম অমদা, প্রধান মন্ত্রীনা লুপা করোর ১৫০০ হেবগী রেল প্রোজেক্তশিং উরেপ উয়ুং তমগনি অমদি লৈবাক মীয়ামদা কত্থোক্কনি। মহাক্না নেস্নেল ইনস্তিত্যুৎ ওফ ৱন হেল্থ (এন.আই.ও.), নাগপুর অমসুং নাগ রিভর পোলুসন এবেতমেন্ত প্রোজেক্ত, নাগপুরগী উরেপ উয়ুংসু তমগনি। থৌরম অদুদা, প্রধান মন্ত্রীনা ‘সেন্ত্রেল ইন্সতিত্যুৎ ওফ পেত্রোকেমিকেল্স ইঞ্জিনিয়রিং এন্দ তেক্নোলোজী (সিপেত), চন্দ্রপুর’ লৈবাক মীয়ামদা কত্থোক্কনি অমদি ‘সেন্তর ফোর রিছর্চ, মেনেজমেন্ত এন্দ কন্ত্রোল ওফ হিমোগ্লোবিনোপেথিজ, চন্দ্রপুর’ শঙ্গাগনি।
গোৱাদা, নুংথিল পুং ৩:১৫রোম তাবা মতমদা, প্রধান মন্ত্রীনা ৯শুবা ৱর্ল্দ অয়ুর্বেদ কংগ্রেস লোইশিনবগী থৌরমদা ৱা ঙাঙগনি। থৌরম অদুদা মহাক্না নেস্নেল অয়ুস ইনস্তিত্যুৎ অহুমসু শঙ্গাগনি। নুংথিল পুং ৫:১৫রোম তারকপদা, প্রধান মন্ত্রীনা মোপা ইন্তরনেস্নেল এয়রপোর্ত, গোৱা শঙ্গাগনি।
নাগপুরদা প্রধান মন্ত্রী
সম্রুদ্ধি মহামার্গ
প্রধান মন্ত্রীনা কিলোমিতর ৫২০ শাংবা অমদি নাগপুর অমসুং সির্দি শম্নহল্লিবা সম্রুদ্ধি মহামার্গকী ফেজ – ১ শঙ্গাগনি।
সম্রুদ্ধি মহামার্গ নৎত্রগা নাগপুর-মুম্বাই সুপর কম্ম্যুনিকেসন এক্সপ্রেৱে, অসি লৈবাক শিনবা থুংনা কন্নেক্তিভিতী অমদি ইনফ্রাস্ত্রকচর ফগৎহন্নবগী প্রধান মন্ত্রীগী মঙলান মঙফাওনহন্নবগী মায়কৈদা থাংজিনবা অচৌবা খোঙথাঙ অমনি। কিলোমিতর ৭০১ শাংবা এক্সপ্রেসৱে – লুপা করোর ৫৫,০০০রোম চঙনা শেমগৎলিবা – অসি মহারাস্ত্রগী দিস্ত্রিক্ত ১০ অমদি মমিং লৈরবা ময়োল্লমগী মফম অম্রাবতী, ঔরঙ্গবাদ অমসুং নাসিক ফাওনা চত্তুনা, ভারতকী খ্বায়দগী শাংবা এক্সপ্রেৱেশিংগী মরক্তা অমা ওইরি। এক্সপ্রেসৱে অসিনা অতোপ্পা থংনবা দিস্ত্রিক্ত ১৪গী কন্নেক্তিভিতীগী ফীভম ফগৎহনবদসু মতেং ওইদুনা, বিদর্ভা, মরাথ্বারা অমদি অৱাং মহারাস্ত্র রীজন য়াওনা স্তেত অসিগী দিস্ত্রিক্ত ২৪রোমদা চাওখৎপা পুরকপদা মতেংসু ওইগনি।
পি.এম. গতি শক্তিগী মখাদা ইনফ্রাস্ত্রকচর কন্নেক্তিভিতী প্রোজেক্তশিং পুন্না থৌরাং য়াৎমিন্নবা অমদি খুৎশম্ননা পায়খৎমিন্নবা হায়রিবা প্রধান মন্ত্রীগী মীৎয়েঙ অসিগী পরিংদা, সম্রুদ্ধি মহামার্গ অসিনা দিল্লী মুম্বাই এক্সপ্রেসৱে, জৱাহরলাল নেহরু পোর্ত ত্রস্ত অমদি অজন্তা এল্লোরা কেব্স, সির্দি, ভেরুল, লোনারনচিংবা লমকোয় মফমশিং শম্নহনগনি। সম্রুদ্ধি মহামার্গনা মহারাস্ত্রগী শেন্মিৎলোন চাওখৎহনবদা অচৌবা ইনোৎ হাপ্পদা চাউনা মতেং পীগনি।
নাগপুর মেত্রো
অর্বান মোবিলিতীদা অনৌবা য়াওল পুরক্কদবা অতোপ্পা খোঙথাঙ অমদা, প্রধান মন্ত্রীনা ‘নাগপুর মেত্রো ফেজ ১’ লৈবাক মীয়ামদা কত্থোক্কনি। মহাক্না মেত্রো ত্রেন অনি – খাপ্রিদগী ওতোমোতিব স্ক্বার (ওরেঞ্জ লাইন) ফাওবা অমদি প্রজাবতী নগরদগী লোকমান্য নগর (এক্বা লাইন) ফাওবা – খাপ্রি মেত্রো স্তেসন্দগী লমথাগনি। নাগপুর মেত্রোগী ফেজ ১ লুপা করোর ৮৬৫০ হেন্না চঙনা শেমগৎপনি। প্রধান মন্ত্রীনা লুপা করোর ৬৭০০ হেন্না চঙনা শেমগৎকদবা নাগপুর মেত্রো ফেজ-২গী উরেপ উয়ুংসু তমগনি।
এইমস নাগপুর
লৈবাক শিনবা থুংনা হকশেলগী ইনফ্রাস্ত্রকচর মপাঙ্গল কনখৎহন্নবা প্রধান মন্ত্রীগী খোঙফমবু এইমস নাগপুর লৈবাক মীয়ামদা কত্থোকপনা হেন্না চেৎশিনহল্লগনি। জুলাই ২০১৭দা প্রধান মন্ত্রীনা উরেপ উয়ুংসু তমখিবা লায়েংশঙ অসি সেন্ত্রে সেক্তর স্কীম প্রধান মন্ত্রী স্বাস্থ্য সুরক্সা য়োজনাগী মখাদা লিংখৎখিবনি।
লুপা করোর ১৫৭৫ হেন্না চঙনা শেমগৎলিবা এইমস নাগপুর ও.পি.দি., আই.পি.দি., দাইগ্নোস্তিক সর্ভিস, ওপরেসন থিএতর অমদি মেদিকেল সাইন্সকী অচৌবা স্পিসিএল্তী অমদি সুপরস্পিসিএল্তী পুম্নমক কোনশিল্লবা দিপার্তমেন্ত ৩৮ লৈদুনা স্তেত-ওফ-দি-আর্ত ফেসিলিতীশিং লৈবা লায়েংশঙ অমনি। লায়েংশঙ অসিনা মহারাস্ত্রগী বিদর্ভা রীজন্দা মতমগা চুনরবা হকশেলগী ফেসিলিতীশিং ফংহল্লি অমদি অকোয়বদা লৈরিবা গারজিরোলী, গোন্দিয়া অমদি মেলঘাৎকী ত্রাইবেলশিংগীদমক্তা থৌজালগী মশক অমা ওইরি।
রেল প্রোজেক্তশিং
নাগপুর রেলৱে স্তেসন্দা, প্রধান মন্ত্রীনা নাগপুর অমদি বিলাসপুরগী মরক্তা চেনগদবা বন্দে ভারত এক্সপ্রেস লমথাগনি।
নাগপুরদা পাঙথোক্কদবা মীয়ামগী থৌরম অমদা, প্রধান মন্ত্রীনা মথঙশিৎনা লুপা করোর ৫৯০ অমদি লুপা করোর ৩৬০রোম চঙনা অমুক নৌহৌননা শেমগৎকদবা নাগপুর রেলৱে স্তেসন অমদি অজ্নি রেলৱে স্তেসনগী উরেপ উয়ুং তমগনি। প্রধান মন্ত্রীনা গভর্নমেন্ত মেন্তেনেন্স দিপো, অজ্নি (নাগপুর) অমদি নাগপুর-ইতার্সি থর্দ লাইন প্রোজেক্তকী কোহলি-নারখের সেক্সন লৈবাক মীয়ামদা কত্থোক্কনি। হায়রিবা প্রোজেক্তশিং অসি মথঙশিৎনা লুপা করোর ১১০ অমদি লুপা করোর ৪৫০রোম চঙনা শেমগৎপনি।
নেস্নেল ইনস্তিত্যুৎ ওফ ৱন হেল্থ, নাগপুর
প্রধান মন্ত্রীনা নেস্নেল ইন্সতিত্যুৎ ওফ ৱন হেল্থ (এন.আই.ও.), নাগপুর উরেপ উয়ুং তমগদৌরিবা অসি ‘ৱন হেল্থ’ পরিংদা লৈবাকসিদা কেপাসিতী অমদি ইনফ্রাস্ত্রকচর ফগৎহন্নবগী মায়কৈদা থাংজিনবা খোঙথাঙ অমনি।
‘ৱন হেল্থ’ পরিংনা মীওইবগী হকশেল অসি শা-ঙা অমদি অকোয়বগী ফীভমগী হকশেলগা মরী লৈনৈ হায়না শকখঙলি। পরিং অসিনা মীওইবদা নারিবা লৌনগনবা লায়না অয়াম্বা জুনোতিক (শাদগী মীওইবদা) শন্দোরকপা ওইগনি হায়বা ৱাফম থম্লি। লুপা করোর ১১০ হেন্না চঙনা লিংখৎকদৌরিবা ইনস্তিত্যুৎ অসিনা স্তেকহোল্দরশিংগা খুৎশম্নদুনা অমদি তেংবাংনদুনা চৎমিন্নগনি অমদি লৈবাক শিনবা থুংনা ‘ৱন হেল্থ’ পরিংদা থিজিন হুমজিনবা অমদি কেপাসিতী শেমগৎপদা মরুওইবা থৌদাং লৌগনি।
অতৈ প্রোজেক্তশিং
প্রধান মন্ত্রীনা নাগপুরদা নাগ তুরেলগী পোলুসন হন্থহন্নবগী প্রোজেক্ত উরেপ উয়ুং তমগনি। নেস্নেল রিভর কঞ্জার্বেসন প্লান (এন.আর.সি.পি.)গী মখাদা পায়খৎকদৌরিবা প্রোজেক্ত অসি লুপা করোর ১৯২৫ হেন্না থাদদুনা মথৌ তৌহনগদবনি।
বিদর্ভা রীজন্দা, মরুওইনা ত্রাইবেল মীয়ামগী মরক্তা সিকল সেলগী লায়না নাবগী চাং য়াম্না ৱাংই। থলাসেমিয়া অমদি ঐচ.বি.ই.গুম্বা অতৈ হিমোগ্লোবিনোপেথীশিংগা লোয়ননা লায়না অসিনা লৈবাকসিদা লায়নাগী পোৎলুম মশক থোক্না পুহল্লি। ৱাফম অসিগী ৱাখৈ পুরক্নবগীদমক, প্রধান মন্ত্রীনা ফেব্রুৱারী ২০১৯দা ‘সেন্তর ফোর রিছর্চ, মেনেজমেন্ত এন্দ কন্ত্রোল ওফ হিমোগ্লোবিনোপেথিজ, চন্দ্রপুর’গী উরেপ উয়ুং তমখিবনি। হৌজিক প্রধান মন্ত্রীনা, লৈবাকসিদা হিমোগ্লোবিনোপেথীগী লমদা ইনোবেতিব রিছর্চ, তেক্নোলোজী শেমগৎনবা, হ্যুমেন রিসোর্স শেমগৎনবগী সেন্তর ওফ এক্সেলেন্স অমা ওইরক্নবগী মীৎয়েঙ থম্লিবা, সেন্তর অসি লৈবাক মীয়ামদা কত্থোক্লগনি।
প্রধান মন্ত্রীনা সেন্ত্রেল ইনস্তিত্যুৎ ওফ পেত্রোকেমিকেল্স ইঞ্জিনিয়রিং এন্দ তেক্নোলোজী (সিপেত) চন্দ্রপুর লৈবাক মীয়ামদা কত্থোক্কনি। ইনস্তিত্যুৎ অসিনা পোলিমর অমদি এলাইদ ইন্দস্ত্রীশিংগী মথৌ তাবা ফংহন্নবগীদমক হৈ-শিংলবা হ্যুমেন রিসোর্সশিং শেমগৎনবা পান্দম থম্লি।
গোৱাদা প্রধান মন্ত্রী
মোপা ইন্তরনেস্নেল এয়রপোর্ত, গোৱা
লৈবাক শিনবা থুংনা মালেমগী থাক্কী ইনফ্রাস্ত্রকচর অমদি ত্রান্সপোর্ত ফেসিলিতী ফংহনবা হায়বসি প্রধান মন্ত্রীনা লেপ্তনা হোৎনদুনা লাক্লবা অমনি। মায়কৈ অসিদা থাংজিনবা অতোপ্পা খোঙথাঙ অমদা, প্রধান মন্ত্রীনা মোপা ইন্তরনেস্নেল এয়রপোর্ত, গোৱা শঙ্গাগনি। এয়রপোর্ত অসিগী উরেপ উয়ুং প্রধান মন্ত্রীনা নবেম্বর ২০১৬দা তমখিবনি।
লুপাক রোর ২,৮৭০ চঙনা শেমগৎখিবা, এয়রপোর্ত অসি সস্তেনেবল ইনফ্রাস্ত্রকচরগী ৱাখল্লোন্দা য়ুম্ফম ওইদুনা শাগৎখিবনি অমদি সোলার পৱার প্লান্ত, গ্রীন বিল্দিং, রনৱেদা এল.ই.দি. লাইৎ, নোংগী ঈশিং য়োকশিন্নবা, রিসাইক্লিং ফেসিলীতীশিং য়াওবা স্তেৎ ওফ দি আর্ত সিৱেজ ত্রীতমেন্ত প্লান্তনচিংবা ফেসিলিতীশিং য়াওরি। মসিদা ৩-দি মোনোলিথিক প্রিকাস্ত বিল্দিং, স্তেবিলরোদ, রোবোমেতিক হোলো প্রিকাস্ত ফক্লাং, ৫জিগা চুনবা আই.তি. ইনফ্রাস্ত্রকচরনচিংবা খ্বাইদগী ফবা মখলগী তেক্নোলোজী খরসু শীজিন্নরি। এয়রপোর্ত অসিগী ফীচর খরগী মনুংদা মালেমগী খ্বাইদগী চাউবা এয়রক্রাফ্ত তাবা য়াবা রনৱে, এয়রক্রাফ্তশিংগী নুমিদাংগী পার্কিং ফেসিলিতী য়াওবা পার্কিং বে ১৪, সেল্ফ-বেগ্গেজ দ্রোপ ফেসিলিতী, স্তেত ওফ দি আর্ত অমদি মনীং মখা তম্বা এয়র নেভিগেসন ইনফ্রাস্ত্রকচরনচিংবা কয়া য়াওরি।
হৌরকপদা, এয়রপোর্ত অসিগী ফেজ ১না মিলিয়ন পেসেঞ্জর পর এনম (এম.পি.পি.এ.) ৪.৪রোমদা সর্ভিস পীগনি, মসি এম.পি.পি.এ. ৩৩ ফাওবগী চাংদা চাউথোকপা য়াগনি। এয়রপোর্ত অসিনা স্তেত অসিগী সোসিও-ইকনমিক ফীভম ফগৎহনবদা ইনোৎ হাপকনি অমদি তুরিজম ইন্দস্ত্রীগী মথৌ তাবশিংসু ফংহনগনি। মসিদা লমদমসিগী অমদি মালেমগী লমথুংফম কয়া হকথেংননা শম্নহন্দুনা মরুওইবা লোজিস্তিক হব অমা ওইবা য়াবগী মতিং লৈ। এয়রপোর্ত অসিদা মল্তি-মোদেল কন্নেক্তিভিতী লৈহন্নবা থৌরাংসু তৌরি।
মালেমগী থাক্কী এয়রপোর্ত অমা ওইবগা লোয়ননা, এয়রপোর্ত অসিনা মফমসিদা লাক্লিবশিংগীম ফমদা গোৱাগী মশক মওংসু ফাউহনগনি। এয়রপোর্ত অসিদা, গোৱাদা পুথোকচবা, এজুলেজোস তাইল্সশিং মরাং কায়না শীজিন্নরি। চাফম অসিসু গোৱাগী কেফেশিংগী ফজবা মওং মতৌশিংগী পরিংদা শেমগৎপনি। মসিদা লমদমদুগী আর্তিজন অমদি ক্রাফ্তসমেনশিংবু মখোয়গী পোত্থোকশিং থেন্দুনা য়োন্নবা পুক্নিং থৌগৎকদবা খনগৎলবা পোৎলমশিংগী ফ্লী মার্কেৎকী অখন্নবা মফম অমসু য়াওগনি।
৯শুবা ৱর্ল্দ অয়ুর্বেদ কংগ্রেস অমসুং নেস্নেল অয়ুস ইনস্তিত্যুৎশিং
প্রধান মন্ত্রীনা নেস্নেল অয়ুস ইন্সতিত্যুৎ অহুমসু শঙ্গাগনি অমদি ৯শুবা ৱর্ল্দ অয়ুর্বেদ কংগ্রেস লোইশিনবগী থৌরমদা ৱা ঙাঙগনি। ওল ইন্দিয়া ইনস্তিত্যুৎ ওফ অয়ুর্বেদ (এ.আই.আই.এ.), গোৱা, নেস্নেল ইনস্তিত্যুৎ ওফ উননি মেদিসিন (এন.আই.য়ু.এম.), গাজিয়াবাদ অমদি নেস্নেল ইনস্তিত্যুৎ ওফ হোমিওপেথী (এন.আই.ঐচ.), দিল্লী হায়রিবা ইনস্তিত্যুৎ অহুম অসিনা থিজিন হুমজিনবা অমদি মালেমগী তেংবাংনবা হেনগৎহনগনি অমদি মীয়ামগীদমক অহোঙবা মমলদা অয়ুস সর্ভিস পীবদসু মতেং ওইগনি। পুন্না লুপা করোর ৯৭০ চঙনা শেমগৎখিবা ইনস্তিত্যুৎশিং অসিনা অহেনবা লায়েংশঙগী ফমুং ৫০০গা লোয়ননা মহৈরোয় লৌশিনবগী চাং ৫০০রোম হেনগৎহল্লগনি।
ৱর্ল্দ অয়ুর্বেদ কংগ্রেস (দব্লিউ.এ.সি.) অমসুং আরোগ্য এক্সপোগী ৯শুবা ইদিসন অসিদা মপান লৈবাক্তগী মীথুং ৪০০ হেনবনা লৈবাক ৫০ হেনবা, মালেমগী মহৈরোয়শিং অমদি তোঙান তোঙানবা অয়ুর্বেদকী স্তেকহোল্দরশিংগী মহুৎ শিন্দুনা শরুক য়ারি। দব্লিউ.এ.সি.গী ৯শুবা ইদিসন অসিগী থীমদি ‘অয়ুর্বেদ ফোর ৱন হেল্থ’ হায়বসিনি।
