প্রধান মন্ত্রীনা তোঙান তোঙানবা হেল্থ কেয়র স্কিমশিংগী কান্নবা ফংলবা মীওইশিংগা ভিদিওগী থোংদা ৱারী শানখ্রে

প্রধান মন্ত্রী শ্রী নরেন্দ্র মোদীনা ঙসি প্রধান মন্ত্রী ভার্তীয় জনঔশধী পরিয়োজনা অমসুং কেন্দ্র সরকারগী অতোপ্পা হেল্থ কেয়র স্কিমশিংগী কান্নবা ফংলবা মীওইশিংগা ভিদিওগী থোংদা ৱারী শানখ্রে। মসিনা সরকারগী স্কিমশিংগী তোঙান তোঙানবা কান্নবা ফংলবা মীওইশিংগা ভিদিওগী থোংদা প্রধান মন্ত্রীগা লোইননা ৱারী শানবগী মঙাশুবা পরিংনি।
হকচাং ফবা অমসুং য়াইফবগী মরুওইবা অদু শুগাইনা তাক্লদুনা হকচাং ফবা অসি মায় পাকপা অমসুং চাউখৎপগী হৌরকফম্নি হায়না প্রধান মন্ত্রীনা ফোংদোকখি। ভারতকী মীওই কোতি ১২৫না মশা-মউ ফনা লৈরবা মতমদা ভারতসু মশা-মউ ফবা ওইগনি হায়না মহাক্না মখা তাখি।

কান্নবা ফংলবা মীওইশিং অদুগা ৱারী শানরদুনা শ্রী মোদীনা হায়খি মদুদি, অনা অয়েক য়াওবনা ইমুংশিং অদুদা শেলগী অচৌবা পোৎলুম অমা নলহনবতা নত্তনা ঐখোয়গী সোসিও ইকোনোমিক সেক্তরদসু অচৌবা পোৎলুম অমা ওইহল্লি। মরম অদুনা মীওই খুদিংমক্তা অহোংবা হেল্থকেয়র ফংহনবা অসি সরকারগী মথৌনি। প্রধান মন্ত্রী ভার্তীয় জনঔশধী পরিয়োজনা অসি লাইরবশিং, লৱর ক্লাস অমসুং মিদল ক্লাসকী মীওইশিংদা অহোংবা মমলদা হিদাক লাংথক ফংহন্দুনা মখোয়গী শেল থুমগী পোৎলুম অদু হন্থহন্নবা পান্দমদা হৌদোকখিবনি হায়না প্রধান মন্ত্রীনা মখা তাখি।

লৈবাক্কী মফম পুম্নমক্তা সরকারনা জন ঔশধী কেন্দ্র ৩৬০০ হেন্না হাংদোক্লে, মফমশিং অদুদা জেনরিক মেদিসিন ৭০০ হেন্না অহোংবা মমলদা ফংহল্লে। জন ঔশধী কেন্দ্রদা ফংলিবা হিদাকশিংগী মমল অসি কৈথেলগী মমলদগী চাদা ৫০দগী ৯০ ফাওবা তাথরি হায়না প্রধান মন্ত্রীনা হায়খি। অথুবা মতমগী মনুংদা জন ঔশধী কেন্দ্রগী মশিং অসি ৫০০০ হেল্লগনি হায়না মহাক্না মখা তাখি।

হেল্থ স্তেন্তসকী মতাংদা ঙাংলদুনা প্রধান মন্ত্রীনা হায়খি মদুদি মমাংদদি মীয়াম্না হেল্থ স্তেন্তস লৈনবগীদমক মখোয়গী মরন মথুম য়োন্থোক্নরম্মি নত্রগা বন্ধান থম্নরম্মি। লাইরবা অমসুং মিদল ক্লাসতা মতেং ওইনবগীদমক সরকারনা স্তেন্তসকী মমল অসি চাউনা হন্থহল্লে হায়না মহাক্না মখা তাখি। হার্ত স্তেন্তসকী মমল অসি লুপা লাখ ২দগী লুপা ২৯,০০০দা হন্থহল্লে।
ৱারী শানখিবা অদুদা প্রধান মন্ত্রীনা ফোংদোকখি মদুদি সরকার অসিনা খুউ ত্রান্সপ্লান্ত তৌবগী মমল চাদা ৬০দগী ৭০ ফাওবা হন্থহন্দুনা লুপা লাখ ২.৫দগী লুপা ৭০,০০০- ৮০,০০০দা পুথরক্লে। ভারত্তা চহি খুদিংগী খুউগী ওপরেসন লাখ ১দগী লাখ ১.৫ ফাওবা পাংথোকই হায়না পানরি। খুউ ত্রান্সপ্লান্ত তৌবগী মমল হন্থহনবনা মীয়াম্না লুপা কোতি ১৫০০গী শেনফম কনবা ঙমলে।

প্রধান মন্ত্রী রাষ্ট্রীয় দাইলাইসিস প্রোগ্রামগী খুত্থাংদা সরকারনা জিলা ৫০০ হেনবদা অনাবা মীওই লাখ ২.২৫গীদমক দাইলাইসিস সেসন লাখ ২২ হেন্না পাংথোকখ্রে। মিসন ইনদ্রধনুশকী খুত্থাংদা জিলা ৫২৮দা অঙাং কোতি ৩.১৫ অমদি মীরোনবী নুপী লাখ ৮০ হেন্না তিকা থাদোকখ্রে। হোস্পিতাল অমসুং দাক্তরগী মশিং হেঙ্গৎহন্নবা সরকারনা মেদিকেল কোলেজ ৯২ হাংদোক্লে অমদি এম বি বি এসকী সিৎ মশিং ১৫০০০ হেঙ্গৎহল্লে।

অয়ুশ্মান ভারতকী মখাদা ইমুং কোতি ১০বু লুপা লাখ ৫গী হেল্থ ইন্সুরেন্সনা কোনশিল্লগনি হায়না প্রধান মন্ত্রীনা ফোংদোকখি। স্বচ্ছ ভারত মিসনগী মতাংদা ঙাংলদুনা মশা-মউ ফবা ভারত অমা শেমগৎপদা স্কিম অসিনা মরুওইবা থৌদাং অমা লৌরি হায়না প্রধান মন্ত্রীনা হায়খি। স্বচ্ছ ভারত অভিয়ান্না মরম ওইরগা ভারত্তা হৌজিক্তি মপানদা মাংশিন্দবা খুঙ্গং লাখ ৩.৫ লৈরে অমদি সেনিতেসন কোভরেজ তৌবগী চাং চাদা ৩৮ হেঙ্গৎলে।

প্রধান মন্ত্রীগা ৱারী শানখিবা অদুদা মতৌ করম্না প্রধান মন্ত্রী ভার্তীয় জনঔশধী পরিয়োজনানা হিদাক্কী মমল হন্থহন্দুনা অহোংবা মমলদা ফংহনবগে হায়বগী মতাংদা কান্নবা ফংলবশিং অদুনা শন্দোক্না পাউদমখি। হার্ত স্তেন্ত অমসুং খুউ ত্রান্সপ্লান্তকী মমল হন্থহনবনা মতৌ করম্না মখোয়গী পুন্সিদা অহোংবা পুরকপগে হায়বগী মতাংদসু কান্নবা ফংলবশিং অদুনা পাউদমখি।

প্রধান মন্ত্রীনা মীয়ামগী মফমদা যোগবু পুন্সি মহিংগী শরুক অমা ওইহন্দুনা মশা-মউ ফবা খুন্নাই অমা শেমগৎপদা মতেং পাংনবা অপিল তৌখি।