প্রধানমন্ত্রী শ্রী নরেন্দ্র মোদীনা হয়েং ইজরেলগী প্রধানমন্ত্রী শ্রী বেঞ্জামিন নেতন্যাহু অমসুং শ্রীমতী সারা নেতন্যাহুগা লোইননা গুজরাত্তা চৎমিন্নগনি।
অহমদাবাদ শহরনা থৌরম অমদা শ্রী অমসুং শ্রীমতী নেতন্যাহুবু তরাম্না ওক্কনি লোইননা মখোয় অহমদাবাদ এয়রপোর্ত্তগী সাবরমতী আশ্রমদা চৎকনি। মখোয়না সাবরমতী আশ্রমদা মহাত্মা গান্ধীদা লৈ-শু কৎকনি।
প্রধানমন্ত্রী মোদী অমসুং প্রধানমন্ত্রী নেতন্যাহুনা অহমদাবাদতা লৈবা দেব ঘোরেলা খুঙ্গংদা আইক্রিয়েৎ সেন্তর শঙ্গাগনি। মখোয় স্তার্তঅপ এগজিবিসন অমা য়েংবা চৎকনি অমসুং মফম অদুদা ইনোবেতর অমসুং তোঙান তোঙানবা স্তার্তঅপকী সিইওগা লোইননা ৱারি-ৱতাই তৌনগনি। প্রধানমন্ত্রী অনিনা ভিদিও লিঙ্ক অমগী থোংদা বানসকন্থা জিলাগী সুইগম তলুকাদা মোবাইল ৱাতর দিসেলিনেসন ভেন অমা কৎথোক্কনি। লুচীংবা অনিমক্না মীয়ামগী মীফমদসু ৱা ঙাংগনি।
প্রধানমন্ত্রী শ্রী নেতন্যাহু অমসুং প্রধানমন্ত্রী মোদীনা বানসকন্থা জিলাদা লৈবা বদরাদতা মনা মশিংগী থোইদোক-হেন্দোকপা সেন্তর অমদসু চৎকনি। মখোয়দা সেন্তর অসিগী ৱার্ক প্লানগী মরমদা শন্দোক্না তাক্কনি। প্রধানমন্ত্রী অনিনা ভিদিও লিঙ্ককী খুৎথাংদা ভুজ জিলাগী কুকুমাদা লৈবা খজুরগী থোইদোক-হেন্দোকপা সেন্তর অমা শঙ্গাগনি। প্রধানমন্ত্রী অনিনা লৌমীশিংগা লোইননা ৱারি-ৱাতাইসু তৌগনি।
মতুংদা প্রধানমন্ত্রী নেতন্যাহু মুম্বৈদা চৎখিগনি।
