প্রধান মন্ত্রী শ্রী নরেন্দ্র মোদীনা ভিদিও কনফরেন্সকী থোংদা ইন্তর্নেস্নেল ভারতী ফেস্তিবেল ২০২০দা ৱা ঙাংখ্রে অমসুং ভরতীয়ারদা মহাক্কী মকোপ নুমিৎনা লাকপদা শ্রদ্ধাঞ্জলি কৎখ্রে। মহাকবি সুব্রমন্য ভারতীগী ১৩৮শুবা মপোক নুমিৎ পাংথোক্নবা বনবিল কলচর সেন্তরনা থৌরম পাংথোক্লি। প্রধান মন্ত্রীনা চহি অসিগী ভারতী এৱার্দ ফংলবা স্কোলর শ্রী সীনি বিশ্বনাথন্দা থাগৎপা ফোংদোকখি, মহাকপু থৌরম অসিদা এৱার্দ অদু লান্থোকখি।
প্রধান মন্ত্রীনা হায়খি মদুদি সুব্রমন্য ভারতীগী মরমদা হায়বা অসি য়াম্না অরুবা অমনি। শ্রী মোদীনা হায়খি মদুদি ভরতীয়ারবু শিনফম অমত্তগা নত্ত্রগা মিৎয়েং অমত্তগা চাংদম্নবা য়ারোই। মহাক্না হায়খি, মহাক কবি, অইবা, এদিতর, জর্নেলিস্ত, সোসিএল রিফোর্মর, ফ্রীদম ফাইতর, হ্যুমেনিস্ত অমসুং ময়াম অমনি।
প্রধান মন্ত্রীনা পনখি মদুদি কনাগুমবা অফাওবা কবিনা, মহাক্কী শৈরেংদা, ৱাংঙুলোন্দা অমসুং মহাক্কী পুন্সিগী থবক্তা অঙকপা থবক তৌবা য়াই। শ্রী মোদীনা বারানসীগা লোইননা মহাকবি অসিগী অনকপা মরী অদুবু নীংশিংখি। ভারতীবু থাগৎলদুনা প্রধান মন্ত্রীনা হায়খি মদুদি চহি ৩৯গী তেল্লবা মতম পুন্সিদা মহাক্না কয়া অমা ইরম্মি, ময়াম অমা তৌরম্মি অমসুং মহাক্না থোইদোক্না মায় পাকপা ফংখি। মহাক্কী খুৎইদা মঙাল নাইবা তুংলমচৎকী মায়কৈদা ঐখোয়বু লমজিংবীরি।
প্রধান মন্ত্রীনা ফোংদোকখি মদুদি সুব্রমন্য ভারতীদগী ঙসি নহারোলনা ময়াম অমা তমজবা য়াই। মহাক্না হায়খি মদুদি মরুওইবদি থৌনা ফবনি। সুব্রমন্য ভারতীগীদমক্তদি অকিবা অসি মশক খঙদে। ভারতীবু পল্লদুনা প্রধান মন্ত্রীনা হায়খি মদুদি, “ঐ অকিবা ফাওদে, মালেম অপুনবা অসিনা ঐগী মায়োক্তা লেপ্লবসু, ঐ অকিবা ফাওদে।” প্রধান মন্ত্রীনা হায়খি মদুদি ঙসি মহাক্না ইনোবেসন অমসুং এক্সিলেন্সতা মাং থারিবা য়ং ইন্দিয়াদা ৱাখল্লোন অসি উরি। মহাক্না হায়খি মদুদি স্তার্ত-অপকী লমদা মীওইবা খুন্নাইদা করিগুম্বা খরা পীরিবা অকিবা লৈতবা নহাশিংতনা থল্লি। মহাক্না হায়খি মদুদি ‘তৌবা ঙম্মি’গী ৱাখল্লোন অসি ঐখোয়গী লৈবাক অমসুং ঐখোয়গী মালেম অসিগীদমক্তা অঙকপা ফল পীগনি।
প্রধান মন্ত্রীনা হায়খি মদুদি ভারতীয়ারনা অরিবা অমসুং অনৌবা অনিগী মরক্তা তিনশিন্নবদা থাজবা থম্মি। মহাক্না হায়খি মদুদি ভারতীনা লৌশিংবু ঐখোয়গী মখোংদা মরা তাদুনা লৈবগা লোইননা তুংলমচৎকী মায়কৈদা উখি অমসুং তমিল লোন অমসুং ইমা ভারতপু মহাক্কী মিৎ অনি ওইনা লৌখি। ভারতীনা অরিবা ভারতকী মগুন, বেদ অমসুং উপনিশদশিংগী মগুন, ঐখোয়গী নাৎ, চৎনবী অমসুং ঐখোয়গী মঙাল নাইরবা হৌখ্রবা মতমগী ঈশৈ শকখি। অদুবু মসিগা লোইননা মহাক্না ঐখোয়দা চেকশিন-ৱাসু হায়খি মদুদি শুপ্নগী হৌখ্রবা মতমগী মঙাল নাইবা অদুদা হিংবা খক্তনা মতিক চাবা ওইদে। শ্রী মোদীনা সাইন্তিফিক ওইবা মওং শেমগৎনবা, থিজিনবগী ৱাখল্লোন অমসুং চাউখৎপগী মায়কৈদা চংশিনবগী তঙাইফদবা অদুদা শাফু পীখি।
প্রধান মন্ত্রীনা হায়খি মদুদি মহাকবি ভরতীয়ারগী চাউখৎপগী ৱাহন্থোক্তা নুপীশিংগী চাউরবা থৌদাং য়াওরি। মহাক্কী খ্বাইদগী মরুওইবা মিৎয়েংদি মনীং তম্বা অমসুং নুপীদা পাঙ্গল হাপ্পনি। মহাকবি ভরতীয়ারনা ইখি মদুদি নুপীশিংনা মখোয়গী মকোক থাংগৎতুনা চৎকদবনি। প্রধান মন্ত্রীনা হায়খি মদুদি সরকার মিৎয়েং অসিদগী ইথিল পোকচরি অমসুং নুপীশিংনা লুচিংবা মপাঙ্গল অদু ফংহন্নবগীদমক্তা থবক পায়খৎলি।
প্রধান মন্ত্রীনা ফোংদোকখি মদুদি মহাকবি ভরতীয়ারনা খঙখি মদুদি মচেৎ তারবা খুন্নাই অমত্তা চাউখৎপা ঙম্লোই। প্রধান মন্ত্রীনা ভারতীগী মতাংদা পল্লদুনা হায়খি, “হৌজিক ঐখোয় কাংলোন শেমগনি অমসুং মদু নোংমা শোইদনা চৎনহনগনি, করিগুম্বা মীওই অমনা চরা হেনবা তারবদি, মালেম অসিনা মাং তাকপগী চৈনা খাংবা তাই।” প্রধান মন্ত্রীনা হায়খি মদুদি মহাক্না তম্বীরম্বশিং অদুনা ঐখোয়বু অমত্তা ওইনা পুন্না লৈহন্নবগীদমক্তা অমসুং খোংফম চেৎনবগীদমক্তা নীংশিংহল্লি।
প্রধান মন্ত্রীনা হায়খি মদুদি ঐখোয়গী নহারোলশিংনা ভারতীদগী তমজনবগীদমক ময়াম অমা লৈরি। ঐখোয়গী লৈবাক্তা পুম্নমক্না মহাক্কী থবকশিং অদু পাবীয়ু অমসুং ইথিল লৌবীয়ু। মহাক্না ভরতীয়ারগী পাউজেল অদু শেন্দোকপদা পাংথোক্লিবা মখোয়গী অঙকপা থবক অদুগীদমক বনবিল কলচরেল সেন্তরবু থাগৎপা ফোংদোকখি। মহাক্না থাজবা ফোংদোকখি মদুদি ফেস্তিবেল অসিদা ভারতপু অনৌবা তুংলমচৎ অমদা পুবদা মতেং ওইগদবা কান্নরবা ৱারী-ৱাতাই পাংথোক্কনি।
