প্রধান মন্ত্রী, শ্রী নরেন্দ্র মোদীনা চেন্নৈদা পাংথোকপা G20 ইনভাইরনমেন্ত অমসুং ক্লাইমেত মন্ত্রীশিংগী মীফমদা ঙসি ভিদিও মেসেজকী খুত্থাংদা ৱা ঙাঙখ্রে।
দিগ্নিতরীশিংবু চেন্নৈদা তরাম্না ওক্লদুনা, প্রধান মন্ত্রীনা শহর অসি নাৎ অমসুং পুৱারীগী ওইনা য়াম্না শীংথানীংঙাই ওই হায়না ফোংদোকখি। UNESCO ৱর্ল্দ হেরিতেজ সাইত অমা ওইরিবা মমল্লাপুরমদা মখোয়না শোইদনা চৎপীয়ু অমসুং মদুগী নুংদা হকপশিংগী ফজবগী নুংঙাইবা লৌবীয়ু হায়না মহাক্না হায়খি।
ঙসিদগী চহি লিশিং অনিমুক্কী মমাংদা লৈরম্বা শক্নাইরবা কবি, তিরুবল্লুরগী শৈরেং মতেক অমা পল্লদুনা, প্রধান মন্ত্রীনা হায়খি, “সমুদ্রদগী ঈশিংবু চিংখৎলিবা লৈচিলনা মদুবু নোংগী মওংদা অমুক্কা হন্না পীরক্ত্রবদি, সমুদ্র ফাওবা পীকশিল্লক্কনি”। মহৌশা ইমা অমসুং মহাক্কী পাম্বৈশিংনা ভারতকী লর্নিংগী শোইদ্রবা সোর্স অমা ওইরিবা অসিগী মতাংদা পল্লদুনা, প্রধান মন্ত্রীনা সংস্কৃতকী শ্লোক অমগা অমুক পল্লদুনা অসুম্না শন্দোক্না তাকখি, “তুরেলনা মশাগী ঈশিং থকচদে, উপাল অমনা মশাগী উহৈ চাজদে। লৈচিলসু মখোয়গী ঈশিংনা পুথোক্লিবা চেং-হৱাই চাজদে”। মহৌশা ইমানা ঐখোয়দা পীরিবা অসিগুম্না ঐখোয়নসু মহাক্কীদমক্তা করিগুম্বা খরা পীফম থোকই হায়না মহাক্না হায়খি। মহৌশা ইমাবু ঙাক শেনবা হায়বসিনা ঐখোয়না তঙাই ফদ্রবা থৌদাংনি অমসুং মসিনা ঙসিদি, ক্লাইমেত এক্সনগী মওং-মতৌ লৌরে হায়না মহাক্না হায়খি। থৌওং অসিবু ঐখোয়না মতম কয়াদগী থৌশাদনা লাক্লি। ভারতকী নাৎকী লৌশিংদা মখা পোন্দুনা, খুন্নাইগী খ্বাইদগী অকোনবদা লৈবা মীওইগী চাউখৎ থৌরাং শোইহন্দবা হায়না ৱাহন্থোক লৈরিবা ‘অন্ত্যোদয়া’গী মতুং ক্লাইমেত এক্সন্না ইনগদবনি হায়না প্রধান মন্ত্রীনা হায়খি। গ্লোবেল সাউথকী লৈবাকশিংনা অইং-অশা হোংবা অমসুং অকোয়বগী ফিভমদা অকায়বা লাকপগী চৈথেং অখন্ননা মাইয়োক্নরিবা অসিবু পল্লদুনা, ‘UN ক্লাইমেত কনভেন্সন’ অমসুং ‘পেরিস এগ্রীমেন্ত’কী মখাদা লৈবা থবকশিং খুমাং চাউশিলহনবগী মথৌ য়াম্না হেন্না তারে, অমসুং মসিনা ক্লাইমেত-ফ্রেনলী ওইবা মতৌগা লোয়ননা চাউখৎ-থৌরাং পুরকপগী গ্লোবেল সাউথকী পান্দম ফংবদা তেংবাংগনি হায়না প্রধান মন্ত্রীনা হায়খি।
ভারতনা মশাগী মিৎয়েং শানবা ‘নেস্নেল্লী দিতর্মাইন্দ কন্ত্রিব্যুসন’গী খুত্থাংদা লুচিংবা ওইনা লাক্লিবা অসিদা প্রধান মন্ত্রীনা চাউথোকচৈ হায়না পাউদমখি। ইং 2030 ফাওবদা হায়বা পান্দম থম্লিবা অসিগী চহি 9গী মমাংদা ভারতনা নন-ফোসিল ফুএল সোর্সকী ইন্সতোল ইলেক্ত্রিক কেপাসিতী ফংখ্রে অমসুং অপদেত তৌরবা পান্দম অমগা লোয়ননা অহেনবা মায় পাকপা ফংনবা লেপ্লি হায়না মহাক্না পাউদমখি। ইন্সতোল রিন্যুএবল ইনর্জী কেপাসিতীগী হীরমদা ভারতনা মালেমগী মকোক থোংবা লৈবাক 5কী মনুংদা চল্লে অমসুং লৈবাক অসিনা ইং 2070 ফাওবদা ‘নেত জিরো’ ফংবগী পান্দম থমখ্রে হায়বা ৱাফমসু মহাক্না ফোংদোকখি। ভারতনাঋন্তর্নেস্নেল সোলর এল্লাইএন্স, CDRI, অমসুং ‘লীদর্শিপ গ্রুপ ফোর ইন্দস্ত্রী ত্রাঞ্জিসন’ য়াওনা এল্লাইএন্স কয়াগী খুত্থাংদা মহাক্কী পার্ত্নরশিংগা লেপ্তনা তেংবাংনরিবা অসিদা থাজবা কয়া থম্লি হায়না প্রধান মন্ত্রীনা হায়খি।
“ভারত অসি তোঙান-তোঙানবা মতৌ চেনবা লৈবাক অমনি”, বাইও-দাইবর্সিতী ঙাক শেনবা, হান্নগী মতৌদা হঞ্জিলহনবা অমসুং হেন্না মগুন লৈহনবগী হীরমদা খোঙফম চেৎনা পায়খৎলিবা থবক থৌরম কয়া পল্লদুনা প্রধান মন্ত্রীনা হায়খি। লাম্মৈ চাকপা অমসুং মাইনিং তৌবনা চৈথেং পীরবা প্রাইওরিতী লেন্দস্কেপশিংবু হান্নগী মতৌদা হঞ্জিল্লক্নবা পায়খৎলিবা খোঙথাংবু ‘গান্ধীনগর ইমপ্লিমেন্তেসন রোদমেপ অমসুং প্লেতফোর্ম’গী খুত্থাংদা শকখঙলিবা অসিদা প্রধান মন্ত্রীনা নুংঙাইবা ফোংদোক্লি। গ্ররহ অসিদা লৈরিবা হৌদোং অচৌবা মখল তরেত ঙাক-শেন্নবা হন্দক্তা হৌদোকখিবা “ইন্তর্নেস্নেল বিগ কেত এল্লাইএন্স’কী মতাংদা পনবগা লোয়ননা মহাক্না ঙাক শেনবগী লমজিং খোঙথাং ওইরিবা ‘প্রোজেক্ত তাইগর’না তানখিবা লৌশিংনা এল্লাইএন্স অসি লৈহনখিবনি হায়খি। প্রোজেক্ত তাইগরগী মহৈ অমা ওইনা মালেমগী কৈগী অপুনবা মশিংগী চাদা 70দি ভারত্তা লৈরে হায়না মহাক্না পাউদমখি। প্রোজেক্ত লাইওন অমসুং প্রোজেক্ত দোলফিনগী মতাংদা পায়খৎলিবা থবক কয়াগী মতাংদসু প্রধান মন্ত্রীনা পাউদমখি।
প্রধান মন্ত্রীনা ভারতকী খোঙথাংশিং অসি মীয়াম্না শরুক য়াবদগী পাঙ্গল হাপ্লিবনি হায়না ফোংদোক্লদুনা শুপ্নগী চহি অমগী মনুংদা ৱাতর বোদী 63,000 হেন্না শেমগৎপা ঙমখিবা ঈশিং য়োকশিনবগী তোপ-তোপ্পা খোঙথাং ওইরিবা ‘মিসন অমৃত সরোবর’গী মতাংদা পনখি। খুন্নাইনা শরুক য়াবা অমসুং তেক্নোলোজীনা তেংবাংবনা মপুং ওইবা থৌওং ওইদুনা মিসন অসি পায়খৎপনি হায়না মহাক্না হায়খি। ঈশিং য়োকশিনবগী পান্দমগা লোয়ননা ৱাতর হার্বেস্তিং স্ত্রকচর 280,000 হেন্না শাহনখিবগা লোয়ননা রি-য়ুজ অমসুং রিচার্জ স্ত্রকচর চাউরাকপা 250,000 অমসু শাহনখিবা ‘কেৎচ দি রেন কেম্পেনগী মতাংদসু মহাক্না পনখি। পুম্নমক অসি মীয়াম্না শরুক য়াবা অমসুং মফম-মফমশিংগী লৈবাক লৈহাও অমসুং ঈশিংগী ফিভমদা মিৎয়েং চঙবদগী ওইথোকপা ঙমখিবনি হায়না প্রধান মন্ত্রীনা মখা তাখি। গঙ্গা তুরেলবু শেংদোক্নবগীদমক্তা পায়খৎপা ‘নমামী গঙ্গে মিসন’দা খুন্নাইবু নীংথিনা শরুক য়াহনখিবা অসিগী মতাংদসু মহাক্না পনখি অমসুং মিসন অসিনা মরম ওইরগা তুরেল অসিগী শরুক কয়াদা গঙ্গেতিক দোলফিন অমুক উবা হৌরক্লে। ৱেতলেন্দ কঞ্জর্বেসনগী ওইবা রামসর সাইত হায়না শকখঙলবা ৱেতলেন্দ 75কী মতাংদা পল্লদুনা, প্রধান মন্ত্রীনা এসিয়াগী খ্বাইদগী চাউবা রামসর সাইতকী নেতৱর্ক অসি ভারত্তা লৈ হায়না ফোংদোকখি।
‘স্মোল আইলেন্দ স্তেত’শিংবু ‘লার্জ ওসীন কন্ত্রী’ হায়না কৌরিবা অসিগী মতাংদা পল্লদুনা, প্রধান মন্ত্রীনা সমুদ্র হায়বসিনা মরু ওইবা ইকোনোমিক রিসোর্স অমা ওইবগা লোয়ননা মসিনা মালেমগী মীওই বিলিয়ন অহুমগী পুন্সি মহিংবু শৌগৎলি হায়খি। মসিনা এক্সতেন্সিব বাইওদাইবর্সিতীগী লমদম ওইরি হায়রদুনা সমুদ্রগী রিসোর্সশিংবু থৌদাং খঙনা শিজিন্নগদবগী হায়না প্রধান মন্ত্রীনা হায়খি। প্রধান মন্ত্রীনা ‘G20 হাই লেভেল প্রিন্সিপল ফোর এ সস্তেনেবল এন্দ রেজিলিএন্ত ব্লু এন্দ ওসীন-বেজ ইকোনোমী’ চৎনবদা থাজবা ফোংদোক্লদুনা G20না মালেমগী ওইবা আইন ইন্দুনা চৎপা থৌওং পাংথোক্তুনা প্লাস্তিক পোল্ল্যুসন থিংনবা হোৎনসি হায়না ফোংদোকখি।
প্রধান মন্ত্রীনা মমাংগী চহিদা UN সেক্রেতরী জেনেরেলগা লোয়ননা মিসন LiFE – লাইফস্তাইল ফোর ইনভাইরনমেন্ত হৌদোকখিববু নৌহৌননা নীংশিংখি অমসুং মিসন অসিনা মালেমগী ইহৌ অমা ওইনা অকোয়বগী ফিভম ঙাক শেন্নবা মশা মথন্নতা নত্ত্রগা পুম্নমক পুল্লগা হোৎনমিন্নহনগনি হায়না ফোংদোকখি। ভারত্তা মীওই, কম্পেনী নত্ত্রগা লোকেল বোদী অমা হেক্তনা পায়খৎপা ক্লাইমেত এক্সন খুদিংমক মীয়াম্না লোয়না খঙনৈ হায়না মহাক্না হায়খি। হন্দক্তা লাউথোকখিবা “গ্রীন ক্রেদিত প্রোগ্রামঃগী মখাদা গ্রীন ক্রেদিত তানবা য়ারগনি হায়না মহাক্না পাউদমখি। উ থাবা, ঈশিং য়োকশিনবা অমসুং সস্তেনেবল ওইবা লৌউ-শিংউ পাংথোকপগুম্বা থবকশিংনা হৌজিক্তি মীওই অমা, লোকেল বোদী অমসুং অতোপ্পশিংগী পুন্সি মহিং তালহনবা ঙম্লগনি।
প্রধান মন্ত্রীনা মহাক্কী ৱারোল লোইশিল্লদুনা, ঐখোয়না মহৌশা ইমাগীদমক্তা লৈরিবা থৌদাং কাওবা য়াদে হায়খি। G20 ইনভাইরনমেন্ত অমসুং ক্লাইমেত মন্ত্রীশিংগী মীফম অসি মায় পাকপা অমা ওইগনি হায়না মহাক্না থাজৈ হায়না পাউদমখি। “মহৌশা ইমানা তোখায়-তোখায়বা থৌওং পামদে। মহৌশা ইমানা পাম্বদি ‘বাসুদৈবা কুতুম্বাকম’ – ৱান আর্থ, ৱান ফেমিলী, ৱান ফ্যুচর হায়বসিনি”, শ্রী মোদীনা হায়খি।
