এক্সেলেন্সীশিং!
ইবেম্মা অমসুং ইবুংঙোশিং!
নমস্কার!
বনক্কম!
পুৱারী অমসুং নাৎকী মশক নাইরবা শহর, চেন্নৈদা ঐহাক্না পুম্নমকপু তরাম্না ওকচরি! অদোম পুম্নমক্না UNESCO ৱর্ল্দ হেরিতেজ সাইত অমা ওইরিবা মমল্লাপুরমদা চৎপগী তাঞ্জা শোইদনা ফংগনি খল্লি। মসিগী নুংদা হকপশিং অসি য়াম্না ফজবনি, মসিদি “চত্তবা য়াদবা” পন্থুংফম অমনি।
মরুপশিং,
ঙসিদগী চহি লিশিং অনিমুক্কী মমাংদা ইরম্বা তিরুকুরলদগী লৌথোকপা ৱাফমদগী হৌজরগে। শক্নাইরবা লম্বোইবা তিরুবল্লুরনা অসুম্না হায়রম্মি, “নেন্দুকর্লুম তন্নি মে ক্রিন্দম তন্দিন্তেদিলী তান নলগা তাগী বিরিন”। মিনা হায়বদি, “সমুদ্রদগী ঈশিংবু চিংখৎলিবা লৈচিলনা মদুবু নোংগী মওংদা অমুক্কা হন্না পীরক্ত্রবদি, সমুদ্র ফাওবা পীকশিল্লক্কনি”। মহৌশা ইমা অমসুং মহাক্কী পাম্বৈশিংনা ভারতকী লর্নিংগী শোইদ্রবা সোর্স অমা ওইরি। মসিমক স্কৃপচর অমসুং ওরেল ত্রেদিসনশিংদা ফংলি। ঐখোয়না তম্লে, মদুদি, পিবন্তী নদ্যঃ স্বয়মেব নাম্ভঃ, স্বয়ন না খাদন্তি ফলানি বৃক্সাঃ নাদন্তি সস্যং খলু বারিবা হাঃ, প্রোপকারায় সন্তা বিভুতয়।।
মসিনা হায়বদি, “তুরেলনা মশাগী ঈশিং থকচদে, উপাল অমনা মশাগী উহৈ চাজদে। লৈচিলসু মখোয়গী ঈশিংনা পুথোক্লিবা চেং-হৱাই চাজদে”। মহৌশা ইমানা ঐখোয়গীদমক্তা পীবিরি। ঐখোয়নসু মহাক্কীদমক্তা করিগুম্বা খরা পীফম থোকই। মহৌশা ইমাবু ঙাক শেনবা হায়বসিনা ঐখোয়না তঙাই ফদ্রবা থৌদাংনি অমসুং মসিনা ঙসিদি, ক্লাইমেত এক্সনগী মওং-মতৌ লৌরে। থৌওং অসিবু ঐখোয়না মতম কয়াদগী থৌশাদনা লাক্লবনি। ভারতকী নাৎকী লৌশিংদা মখা পোন্দুনা, খুন্নাইগী খ্বাইদগী অকোনবদা লৈবা মীওইগী চাউখৎ থৌরাং শোইহন্দবা হায়না ৱাহন্থোক লৈরিবা ‘অন্ত্যোদয়া’গী মতুং ক্লাইমেত এক্সন্না ইনগদবনি হায়না ঐহাক্তি অহেনবা মিৎয়েং থমগনি। গ্লোবেল সাউথকী লৈবাকশিংনা অইং-অশা হোংবা অমসুং অকোয়বগী ফিভমদা অকায়বা লাকপগী চৈথেং অখন্ননা মাইয়োক্নরি। UN ক্লাইমেত কনভেন্সন’ অমসুং ‘পেরিস এগ্রীমেন্ত’কী মখাদা লৈবা থবকশিং খুমাং চাউশিলহনবগী মথৌ য়াম্না হেন্না তারে, অমসুং মসিনা ক্লাইমেত-ফ্রেনলী ওইবা মতৌগা লোয়ননা চাউখৎ-থৌরাং পুরকপগী গ্লোবেল সাউথকী পান্দম ফংবদা তেংবাংগনি।
মরুপশিং,
ভারতনা মশাগী মিৎয়েং শানবা ‘নেস্নেল্লী দিতর্মাইন্দ কন্ত্রিব্যুসন’গী খুত্থাংদা লুচিংবা ওইনা লাক্লিবা অসিদা ঐহাক্না চাউথোকচৈ। ইং 2030 ফাওবদা হায়বা পান্দম থম্লিবা অসিগী চহি 9গী মমাংদা ভারতনা নন-ফোসিল ফুএল সোর্সকী ইন্সতোল ইলেক্ত্রিক কেপাসিতী ফংখ্রে অমসুং অপদেত তৌরবা পান্দম অমগা লোয়ননা অহেনবা মায় পাকপা ফংনবা ঐখোয়না লেপ্লি। ইন্সতোল রিন্যুএবল ইনর্জী কেপাসিতীগী হীরমদা ভারতনা মালেমগী মকোক থোংবা লৈবাক 5কী মনুংদা চল্লে অমসুং ঐখোয়না ইং 2070 ফাওবদা ‘নেত জিরো’ ফংবগী পান্দম থমখ্রে। ঐখোয়না ইন্তর্নেস্নেল সোলর এল্লাইএন্স, CDRI, অমসুং ‘লীদর্শিপ গ্রুপ ফোর ইন্দস্ত্রী ত্রাঞ্জিসন’ য়াওনা এল্লাইএন্স কয়াগী খুত্থাংদা ঐখোয়গী পার্ত্নরশিংগা লেপ্তনা তেংবাংনরি।
মরুপশিং,
“ভারত অসি তোঙান-তোঙানবা মতৌ চেনবা লৈবাক অমনি”, বাইও-দাইবর্সিতী ঙাক শেনবা, হান্নগী মতৌদা হঞ্জিলহনবা অমসুং হেন্না মগুন লৈহনবগী হীরমদা ঐখোয়না খোঙফম চেৎনা থবক কয়া পায়খৎলি। লাম্মৈ চাকপা অমসুং মাইনিং তৌবনা চৈথেং পীরবা প্রাইওরিতী লেন্দস্কেপশিংবু হান্নগী মতৌদা হঞ্জিল্লক্নবা পায়খৎলিবা খোঙথাংবু ‘গান্ধীনগর ইমপ্লিমেন্তেসন রোদমেপ অমসুং প্লেতফোর্ম’গী খুত্থাংদা শকখঙলিবা অসিদা ঐহাক্না নুংঙাইবা ফাওই। গ্রহ অসিদা লৈরিবা হৌদোং অচৌবা মখল তরেত ঙাক-শেন্নবা “ইন্তর্নেস্নেল বিগ কেত এল্লাইএন্স” অমা ভারতবা হন্দক্তা হৌদোকখ্রে। মসিদি ঙাক শেনবগী লমজিং খোঙথাং ওইরিবা ‘প্রোজেক্ত তাইগর’না তানখিবা লৌশিংদা য়ুম্ফন ওইরগা শেম্বনি। প্রোজেক্ত তাইগরগী মহৈ অমা ওইনা মালেমগী কৈগী অপুনবা মশিংগী চাদা 70দি ভারত্তা লৈরে। ঐখোয়না প্রোজেক্ত লাইওন অমসুং প্রোজেক্ত দোলফিনগী মতাংদসু থবক পায়খৎলি।
মরুপশিং,
ভারতকী খোঙথাংশিং অসি মীয়াম্না শরুক য়াবদগী পাঙ্গল হাপ্লিবনি। ‘মিসন অমৃত সরোবর’ অসিদি ঈশিং য়োকশিনবগী তোপ-তোপ্পা খোঙথাং ওইরিবনি। মিসন অসিগী মখাদা, শুপ্নগী চহি অমগী মনুংদা ৱাতর বোদী 63,000 হেন্না শেমগৎপা ঙমখি। মিসন অসিদি খুন্নাইনা শরুক য়াবা অমসুং তেক্নোলোজীনা তেংবাংবনা মপুং ওইবা থৌওং ওইদুনা পায়খৎপনি। ঐখোয়গী ‘কেৎচ দি রেন’ খোঙথাংসু মশক থোক্না মায় পাক্লে। কেম্পেন অসিগী খুত্থাংদগী ঈশিং য়োকশিনবগী পান্দমগা লোয়ননা ৱাতর হার্বেস্তিং স্ত্রকচর 280,000গা লোয়ননা রি-য়ুজ অমসুং রিচার্জ স্ত্রকচর চাউরাকপা 250,000 অমসু শাখ্রে। পুম্নমক অসি মীয়াম্না শরুক য়াবা অমসুং মফম-মফমশিংগী লৈবাক লৈহাও অমসুং ঈশিংগী ফিভমদা মিৎয়েং চঙবদগী ওইথোকপা ঙমখিবনি। গঙ্গা তুরেলবু শেংদোক্নবগীদমক্তা পায়খৎপা ‘নমামী গঙ্গে মিসন’দা খুন্নাইবু নীংথিনা শরুক য়াহনখি অমসুং মিসন অসিনা মরম ওইরগা তুরেল অসিগী শরুক কয়াদা গঙ্গেতিক দোলফিন অমুক উবা হৌরক্লে। ঐখোয়না ৱেতলেন্দ কঞ্জর্বেসনগীদমক্তা পায়খৎপা খোঙথাংশিংসু মহৈ য়াল্লে। রামসর সাইত হায়না শকখঙলবা ৱেতলেন্দ 75কা লোয়ননা, এসিয়াগী খ্বাইদগী চাউবা রামসর সাইতকী নেতৱর্ক অসি ভারত্তা লৈরিবনি। মরুপশিং,
ঐখোয়গী সমুদ্রনা মালেমগী মীওই বিলিয়ন অহুমগী পুন্সি মহিংবু শৌগৎলি। ঐহাক্না ‘লার্জ ওসীন কন্ত্রী’ হায়না কৌরিবা ‘স্মোল আইলেন্দ স্তেত’শিংগী ওইনা অখন্ননা, সমুদ্র হায়বসিনা মরু ওইবা ইকোনোমিক রিসোর্স অমা ওইরিবনি। মখোয় অসি এক্সতেন্সিব বাইওদাইবর্সিতীগী লমদমসু ওইরি। মরম অদুনা, সমুদ্রগী রিসোর্সশিংবু থৌদাং খঙনা শিজিন্নবা হায়বসিনা খ্বাইদগী মরু ওইবনি। ‘G20 হাই লেভেল প্রিন্সিপল ফোর এ সস্তেনেবল এন্দ রেজিলিএন্ত ব্লু এন্দ ওসীন-বেজ ইকোনোমী’ চৎনবদা ঐহাক্না খৌরাংনা ঙাইরি। G20না মালেমগী ওইবা আইন ইন্দুনা চৎপা থৌওং পাংথোক্তুনা প্লাস্তিক পোল্ল্যুসন থিংনবা হোৎনসি।
মরুপশিং,
ঐহাক্না মমাংগী চহিদা UN সেক্রেতরী জেনেরেলগা লোয়ননা মিসন LiFE – লাইফস্তাইল ফোর ইনভাইরনমেন্ত হৌদোকখি। মসিনা মালেমগী ইহৌ অমা ওইনা অকোয়বগী ফিভম ঙাক শেন্নবা মশা মথন্নতা নত্ত্রগা পুম্নমক পুল্লগা হোৎনমিন্নহনগনি। ভারত্তা মীওই, কম্পেনী নত্ত্রগা লোকেল বোদী অমা হেক্তনা পায়খৎপা ক্লাইমেত এক্সন খুদিংমক মীয়াম্না লোয়না খঙনৈ। হন্দক্তা লাউথোকখিবা “গ্রীন ক্রেদিত প্রোগ্রামঃগী মখাদা গ্রীন ক্রেদিত তানবা য়ারগনি। উ থাবা, ঈশিং য়োকশিনবা অমসুং সস্তেনেবল ওইবা লৌউ-শিংউ পাংথোকপগুম্বা থবকশিংনা হৌজিক্তি মীওই অমা, লোকেল বোদী অমসুং অতোপ্পশিংগী পুন্সি মহিং তালহনবা ঙম্লগনি।
মরুপশিং,
ঐহাক্কী ৱারোল লোইশিল্লদুনা, ঐখোয়না মহৌশা ইমাগীদমক্তা লৈরিবা থৌদাং কাওবা য়াদে হায়জনীংই। মহৌশা ইমানা তোখায়-তোখায়বা থৌওং পামদে। মহৌশা ইমানা পাম্বদি ‘বাসুদৈবা কুতুম্বাকম’ – ৱান আর্থ, ৱান ফেমিলী, ৱান ফ্যুচর হায়বসিনি। পুম্নমক্না মায় পাকপা মীফম অমা ফম্বা ওইসনু হায়জরি। থাগৎচরি।
নমস্কার!
