প্রধান মন্ত্রীনা ফংলকপা মেমেন্তোশিং ই-ওক্সন অমসুং একজিবিসন পাংথোকপা ঙসি লোইশিল্লে। ওক্সন অদুদা মীয়াম্না অঙকপা ফংনা শরুক য়াখি অমসুং মীওই লিশিং কয়াদগী বিদশিং ফংখি। ই-ওক্সনদগী ফংলকপা শেনফমশিং নমামী গঙ্গে মিসনদা থাদগনি।
কেন্দ্রগী কলচর মন্ত্রালয়না শীনবা সেপ্তেম্বর ১৪দগী হৌখিবা ই-ওক্সন অদুদা প্রধান মন্ত্রীদা পীরকপা মেমেন্তো ২৭৭২ য়োনখি। পোৎলমশিং অদু নই দিল্লীগী নেস্নেল গেল্লরী ওফ মোদর্ন আর্ত্তা য়েংনবা থমখি। মেমেন্তোশিং অদুদা অয়েকপা লাই, মীতমশিং, ইনফিশিং, ফুরিৎশিং অমসুং নাৎকী ঈশৈগী খোঙনবা পোৎলমশিং য়াওরি।
অহানবদা ই-ওক্সন অদু ওক্তোবর ৩ ফাওবা পাংথোক্কদবনি। অদুবু মীয়াম্না হায়জরকপা অমসুং মীওই কয়ানা শরুক য়ানবা হায়রকপদগী নিলাম লাওবগী থবক অদু চয়োল অহুম শাংদোকখিবনি। ঙসি ফাওবদা পোৎ খুদিংমক নিলাম লাওখ্রে। নিলাম লাওবা অদুদা বোল্লীৱুদকী স্তারশিং হায়বদি অনিল কাপুর, অর্জুন কাপুর অমসুং শৈশকপা কৈলাস খের য়াওনা শক্নাইরবা রাজনিতীৱালাশিং অমসুং মীওই কয়ানা শরুক য়াখি।
উৎখিবা মেমেন্তোশিং অদুগী মনুংদা লুপা ৫০০গী অপীকপা ভাগবান গনেসকী মীতম অমসুং থম্বাল মওংগী উপু য়াওরি। খ্বাইদগী মমল য়াম্বশিংগী মরক্ত মচু অহুমগী বেকগ্রাউন্দ অমদা প্রধান মন্ত্রীগা মহাত্মা গান্ধীগা য়াওবা লুপা লাখ ২.৫না অহৌবা মমল ওইবা এক্রাইলিক পেন্তিং অমা য়াওরি, মদু অরোইবা ওইনা লুপা লাখ ২৫দা য়োনখি।
অহানবগী মমলদা লুপা ১০০০ ওইখিবা প্রধান মন্ত্রীনা মহাক্কী মমাদগী বর ফংবগী ফ্রেম চল্লবা ফোতোগ্রাফ অমা লুপা লাখ ২০দা য়োনখি। অতৈ মমিং চৎখিবা পোৎলমশিংগী মনুংদা মনিপুরগী ফোক আর্তসকী একজিবিত অমা (অশেংবা মমল লুপা ৫০,০০০, লুপা লাখ ১০দা য়োনখি ), শনবীনা ষনাও শঙ্গোম পীথকপা ধাতুগী মীতম (অশেংবা মমল লুপা ৪,০০০, লুপা লাখ ১০দা য়োনখি ) অমসুং স্বামী বিবেকানন্দগী সেন্তিম৪তর ১৪গী ধাতুগী মীতম (অশেংবা মমল লুপা ৪,০০০, লুপা লাখ ৬তা য়োনখি) য়াওরি।
