ପ୍ରଧାନମନ୍ତ୍ରୀଙ୍କୁ ମିଳିଥିବା ସ୍ମାରକୀର ପ୍ରଦର୍ଶନୀ ତଥା ଇ-ନିଲାମୀ ଆଜି ଅର୍ଥାତ ଅକ୍ଟୋବର 24 ତାରିଖରେ ସମ୍ପନ୍ନ ହୋଇଛି । ଏହି ନିଲାମୀକୁ ଅଭୂତପୂର୍ଣ୍ଣ ଜନସମର୍ଥନ ମିଳିଥିଲା ଏବଂ ଦଶ ହଜାରରୁ ଊର୍ଦ୍ଦ୍ଵ ବିଡ ଦାଖଲ କରାଯାଇଥିଲା । ଏହି ଇ-ନିଲାମୀରୁ ମିଳିଥିବା ଅର୍ଥ ନମାମି ଗଙ୍ଗେ ଅଭିଯାନ ପାଇଁ ଖର୍ଚ୍ଚ କରାଯିବ ।
ପ୍ରଧାନମନ୍ତ୍ରୀଙ୍କୁ ଉପହାର ଦିଆଯାଇଥିବା 2772ଟି ସ୍ମାରକୀର ବିକ୍ରି ଲାଗି 14 ସେପ୍ଟେମ୍ବର ଠାରୁ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ପକ୍ଷରୁ ଇ-ନିଲାମୀ ଆୟୋଜନ କରାଯାଇଥିଲା । ନୂଆଦିଲ୍ଲୀସ୍ଥିତ ନ୍ୟାସନାଲ ମଡର୍ଣ୍ଣ ଆର୍ଟ ଗ୍ୟାଲେରୀ ଠାରେ ଏହି ସ୍ମାରକୀଗୁଡ଼ିକୁ ପ୍ରଦର୍ଶିତ କରାଯାଇଥିଲା । ଏହି ସ୍ମାରକୀଗୁଡ଼ିକ ମଧ୍ୟରେ ଚିତ୍ର, ମୂର୍ତ୍ତି, ଚଦର, ଜ୍ୟାକେଟ ଓ ପାରମ୍ପରିକ ବାଦ୍ୟଯନ୍ତ୍ର ଆଦି ବିଭିନ୍ନ ସାମଗ୍ରୀ ରହିଛି ।
ପୂର୍ବରୁ ଅକ୍ଟୋବର 3 ତାରିଖରେ ଇ-ନିଲାମୀ ପାଇଁ ନିଷ୍ପତ୍ତି ନିଆଯାଇଥିଲା । ତେବେ ଏଥିପ୍ରତି ଅଭୂତପୂର୍ବ ଜନସମର୍ଥନ ତଥା ଅଧିକରୁ ଅଧିକ ଅଂଶଗ୍ରହଣ ପାଇଁ ଅନୁରୋଧକୁ ଦେଖି ନିଲାମୀ ପ୍ରକ୍ରିୟାକୁ ଆହୁରି 3 ସପ୍ତାହ ପର୍ଯ୍ୟନ୍ତ ଘୁଂଚାଇ ଦିଆଯାଇଥିଲା । ଆଜିସୁଦ୍ଧା ନିଲାମୀ ପାଇଁ ଥିବା ସମସ୍ତ ସାମଗ୍ରୀ ବିକ୍ରି ହୋଇସାରିଛି । ବଲିଉଡ ତାରକା ଅନୀଲ କପୁର, ଅର୍ଜୁନ କପୁର ଏବଂ ଗାୟକ କୈଲାସ ଖେର ପ୍ରମୁଖଙ୍କ ସମେତ ବିଶିଷ୍ଟ ବ୍ୟକ୍ତି, ରାଜନେତା ଏବଂ ସାମାଜିକ କର୍ମୀ ନିଲାମୀ ପ୍ରତି ସେମାନଙ୍କ ଆଗ୍ରହ ବ୍ୟକ୍ତ କରିଥିଲେ ।
ପ୍ରଦର୍ଶିତ ହୋଇଥିବା ସ୍ମାରକୀଗୁଡ଼ିକ ମଧ୍ୟରେ ଭଗବାନ ଗଣେଶଙ୍କ ଏକ ଛୋଟ ମୂର୍ତ୍ତି ଏବଂ ପଦ୍ମ ଆକୃତିର ଏକ କାଠ ବାକ୍ସ ଭଳି ଛୋଟ ସାମଗ୍ରୀର ଆଧାର ମୂଲ୍ୟ 500 ଟଙ୍କା ରଖାଯାଇଥିଲା । ତେବେ ପୃଷ୍ଠଭୂମିରେ ତ୍ରିରଙ୍ଗା ରହିଥିବା ମହାତ୍ମା ଗାନ୍ଧୀ ଓ ପ୍ରଧାନମନ୍ତ୍ରୀଙ୍କ ଏକ ତୈଳଚିତ୍ରର ଆଧାର ମୂଲ୍ୟ 2.5 ଲକ୍ଷ ଟଙ୍କା ରଖାଯାଇଥିଲା, ଯାହା 25 ଲକ୍ଷ ଟଙ୍କାରେ ଚୂଡ଼ାନ୍ତ ନିଲାମ ହୋଇଥିଲା ।
ମା’ଙ୍କ ଠାରୁ ଆଶୀର୍ବାଦ ଗ୍ରହଣ କରୁଥିବା ସମୟରେ ପ୍ରଧାନମନ୍ତ୍ରୀଙ୍କ ଏକ ଫ୍ରେମ ହୋଇଥିବା ଫଟୋର ଆଧାର ମୂଲ୍ୟ 1ହଜାର ଟଙ୍କା ରଖାଯାଇଥିବା ବେଳେ ଏହାକୁ 20 ଲକ୍ଷ ଟଙ୍କାରେ କ୍ରୟ ପାଇଁ ବିଡ ଦାଖଲ କରାଯାଇଛି । ଅନ୍ୟ ଲୋକପ୍ରିୟ ନିଲାମ ସାମଗ୍ରୀ ମଧ୍ୟରେ ମଣିପୁରୀ ଲୋକକଳାର ଏକ କଳାକୃତି (ଆଧାର ମୂଲ୍ୟ 50 ହଜାର ଟଙ୍କା ରହିଥିବା ବେଳେ 10 ଲକ୍ଷ ଟଙ୍କାରେ ବିକ୍ରି ହୋଇଥିଲା), ବାଛୁରିକୁ ଖୁଆଉଥିବା ଏକ ଗାଈର ଧାତବ ମୂର୍ତ୍ତି (ଆଧାର ମୂଲ୍ୟ 4 ହଜାର ଥିବା ବେଳେ 10 ଲକ୍ଷ ଟଙ୍କାରେ ବିକ୍ରି ହୋଇଥିଲା) ଏବଂ 14 ସେମିର ସ୍ୱାମୀ ବିବେକାନନ୍ଦଙ୍କ ଏକ ଧାତବ ମୂର୍ତ୍ତି (4 ହଜାର ଟଙ୍କା ଆଧାର ମୂଲ୍ୟ ରହିଥିବା ବେଳେ 6 ଲକ୍ଷ ଟଙ୍କାରେ ବିକ୍ରି ପାଇଁ ବିଡ ଦାଖଲ ହୋଇଛି) ଆଦି ରହିଛି ।
